Nag-aabante an Programa sa Pagtogdok nin mga Kingdom Hall
1 Kan 1983 sa “Pagkasararo sa Kahadean” na Pandistritong mga Kombension sa Estados Unidos, iinanunsiar na magkakaigwa nin sarong espesyal na pondo na masustento sa pagtogdok asin pagremodel nin mga Kingdom Hall sa bilog na Estados Unidos asin Canada. Dai ta lamang naisip kaidto kun anong mga bendisyon an magigin resulta kan siring kasadit na mga pagpoon. Naeksperyensiahan niato nin mas lubos an tamang-tamang sinasabi kan Salmo 92:4: “Huli ta pinagayagaya mo ako, O Jehova, huli sa saimong mga aktibidad; huli sa mga gibo kan saimong mga kamot ako nagkukurahaw na may kagayagayahan.”
2 Ipinaggagayagaya niatong marhay ngonyan an nagigibo. Ginigibo na ngonyan an pinarikas na programa nin pagtogdok nin mga Kingdom Hall sa bilog na globo. Minsan paano, kita gabos may pribilehio na makikabtang sa aktibidad na ini. Ginigibo niato iyan paagi sa pagdonar nin dakula man o sadit na kantidad na makakatabang na gastosan an pagtogdok nin dagdag pang lugar nin pagsamba sa bilog na kinaban. Dakol man na tugang an nagboboluntaryong ipagamit an saindang kasangkapan saka gamiton an saindang panahon asin abilidad may koneksion sa siring na mga proyekto. An kapangganahan kan bilog na areglo huli sa paggiya, suporta, asin mayaman na bendisyon ni Jehova sa satong nagkakasararong paghihingoa.—Sal. 127:1.
3 Dakol na sangang opisina an nagsunod sa arogan na orihinalmenteng pinonan para sa mga kongregasyon sa Estados Unidos. Sa mga Kingdom Hall sa dakol na nasyon, igwa nin kahon kun saen ihinoholog kan mga parahayag an saindang donasyon para sa Pondo sa Kingdom Hall. Sa Marso 1997 edisyon kan An Satong Ministeryo sa Kahadean para sa Estados Unidos iinanunsiar an pagliwat sa programang ini. An sabi kaiyan: “Poon pa kan establisaron an Pondo sa Kingdom Hall kan Sosyedad kaidtong 1983, an mga tugang buka an palad na nagdodonar, sa siring pinangyayari an pagpautang para sa pagtogdok nin Kingdom Hall. Mga 2,700 na kongregasyon na sa nasyon na ini an nakinabang sa areglong ini. Dakol na kongregasyon an dai kutana kayang magtogdok nin bagong mga Kingdom Hall o maghirahay kan mga nangangaipong hirahayon. May apretadong pangangaipo ngonyan na gamiton an kabtang kan idinonar na pondong ini sa pagpautang sa mga kongregasyon sa mga nasyon na masakit an pagbuhay. Inaapresyar na marhay kan Sosyedad asin kan mga kongregasyon na nakikinabang sa saindong mga donasyon an padagos na suporta nindo sa areglong ini.”
4 An paising iyan nagserbing imbitasyon na makikabtang sa pinarikas na programa nin pagtogdok nin mga Kingdom Hall. Padadakulaon an Pondo sa Kingdom Hall tangani na ikaiba an mga pangangaipo kan satong mga tugang sa ibang nasyon. An suminunod na artikulo sa Agosto 1997 isyu kan edisyon kan An Satong Ministeryo sa Kahadean para sa Estados Unidos nagsabi: “Igwa nin padagos na pangangaipo para sa pagtogdok nin mga Kingdom Hall sa bilog na kinaban. Durante kan nakaagi sanang taon nin paglilingkod, 3,288 bagong kongregasyon an naorganisar. Dakol sa mga kongregasyon na ini an nasa Amerika Sentral asin del Sur, Aprika, Asia, asin Europa Oriental.”
5 Ano an nagin mga resulta poon kan panahon na idto? An 2001 Yearbook nagbareta: “Huli sa areglong ini, sa 30 nasyon, 453 nang Kingdom Hall an natapos, asin 727 edipisyo pa an itinotogdok. An konsentrasyon nasa paggibo nin establisado na an disenyong mga plano nin Kingdom Hall para sa kada nasyon na naggagamit nin lokal na materyales asin paagi sa pagtogdok. Sa Kenya, naggagamit nin sinapsap na gapo; sa Togo uso an paggamit nin adobe; sa Camerun popular an hollow blocks na sa huri pinapalitada. Paagi kaini, an lokal na mga tugang tolos na nagkakaigwa kan mga abilidad na kaipuhan tangani na makapagkapot nin mayor na mga katongdan sa laog nin sarong nasyonal na programa.”
6 An patunay na binebendisyonan ni Jehova an programang ini manonompongan sa dakulang kontinente nin Aprika. Mantang hineheling nindo an mga retrato nin nagkapira sa mga Kingdom Hall na itinogdok na, imahinaron an nagin epekto kan siring na pagtogdok sa gibohon kan Mga Saksi ni Jehova! Totoo ini sa tolong laen-laen na bagay—an pagkasararo kan satong pambilog na kinaban na kasararoan nin magturugang, an epekto sa lokal na komunidad, asin an pagdakol kan mga nag-aatender sa mga pagtiripon kan kongregasyon. Mantang itinatampok kan suplementong ini an mga Kingdom Hall na itinogdok sa Aprika, makonsentrar an masurunod na edisyon kan An Satong Ministeryo sa Kahadean sa kun paano nag-aabante an programa sa pagtogdok nin mga Kingdom Hall sa ibang mga rehion kan kinaban.
[Mga Ritrato sa pahina 3]
REPUBLIKA NIN APRIKA SENTRAL
Bimbo, Bangui
Begoua, Bangui
[Mga Ritrato sa pahina 4]
Ukonga, Tanzania
[Ritrato sa pahina 4]
Accra, Ghana
[Ritrato sa pahina 4]
Salala, Liberia
[Ritrato sa pahina 4]
Karoi, Zimbabwe
[Mga Ritrato sa pahina 4, 5]
Allada, Benin—dating Kingdom Hall
Allada, Benin—bagong Kingdom Hall
[Ritrato sa pahina 5]
Kpeme, Togo
[Ritrato sa pahina 5]
Sokodé, Togo
[Mga Ritrato sa pahina 4, 5]
Fidjrosse, Benin
[Ritrato sa pahina 6]
Lyenga, Zambia—dating Kingdom Hall
[Ritrato sa pahina 6]
Lyenga, Zambia—bagong Kingdom Hall
[Ritrato sa pahina 6]
Kinshasa, Congo
[Ritrato sa pahina 6]
Musambira, Rwanda