Konstruksion nin Kingdom Hall sa Pilipinas

¹ Kun mamasdan niato an bilog na kinaban na langtad, nakaoogmang maheling an dakulang aumento na naeeksperyensiahan kan daganon na organisasyon ni Jehova! Kan nakaaging taon may total na 3,288 kongregasyon an nakadagdag sa bilog na kinaban. Huli sa gabos na pagtalubong ini, bakong makangangalas na igwang pangangaipo para sa dakol pang Kingdom Hall asin pagpakarhay sa mga nakatogdok na.

² Dakol na tugang na lalaki asin babae an nagpapaheling nin nangongorog na kaigotan asin suporta para sa organisasyon ni Jehova paagi sa pagboluntaryo kan saindang panahon asin kayamanan sa konstruksion nin Kingdom Hall. Taon-taon, mga 50 bagong Kingdom Hall an itinotogdok digdi sa Pilipinas asin dakol na iba pa an hinihirahay. An mga Komite sa Pagtogdok kan Kongregasyon pinagtiwalaan kan pangangataman sa mga proyektong ini, asin pinahahalagahan an saindang mga pagpapagal. An enterong areglo para sa konstruksion nin Kingdom Hall ginigibo paagi sa Kristianong espiritu nin pagtatao asin pagsakripisyo sa sadiri​—an kabaliktaran kan espiritu na lakop na marhay na ipinaheheling sa kinaban.​—2 Tim. 3:​2, 4.

³ Papagdanayon na Simple an Disenyo kan Kingdom Hall: Maninigong perming konsideraron an pagtogdok nin tama sana na may simple asin praktikal na disenyo. Huling dakol an nagboboluntaryo kan saindang kosog sa mga proyektong Kingdom Hall, tibaad mamatean kan mga nagtatrabaho na pinipirit sinda kun hinahagad sa sainda na magtogdok o mag-instalar nin masakit na marhay na mga dekorasyon. An Kingdom Hall Loans Department sa sangang opisina makatatao nin mahalagang impormasyon sa pagtabang na makagibo nin timbang na mga desisyon mapadapit sa disenyo kan Kingdom Hall.

⁴ Mantang an nagkapirang kongregasyon nakatogdok paagi sa pondong prinodusir sa lokal, mga 1,000 iba pang kongregasyon kan nakaaging sampulong taon an nanompongan na kaipuhan na dumolok sa Sosyedad tanganing mangutang sa Kingdom Hall Fund. Kun iniisip kan saindong kongregasyon na pakarhayon an saindong Kingdom Hall asin kakaipuhanon an pinansial na tabang, puede nindong kontakon an Sosyedad. Bago mangutang sa Sosyedad, maninigong magsurbey an kamagurangan sa lokal tanganing aramon (1) kun gurano an ikokontribwir sa pagpopoon tanganing makatabang sa pagbakal nin solar asin mga gastos sa konstruksion, (2) kun gurano an puedeng ipautang sa lokal kan mga nakaasosyar sa kalabot na kongregasyon (mga kongregasyon), asin (3) kun gurano an ikokontribwir bulan-bulan tanganing mabayadan an mga gastos sa pagpunsionar kan kongregasyon asin mabayadan an ano man na inutang sa Sosyedad. Dai maninigong ngaranan an mga papeletang itinatao kun ginigibo an surbey na ini. Importante na an gabos magtao nin tamang halaga, na realistikong hinohorophorop an sainda mismong kontribusyon asin linalaoman na utang, huling gagamiton kan kamagurangan an mga halagang ini sa paggibo nin magagabat na desisyon para sa kongregasyon. Naeksperyensiahan niamo na marahay na baloon kun ano an magigibo sa lokal paagi sa pagkaigwa nin Kingdom Hall Building Fund sa laog nin nagkapirang bulan bago mangutang sa Sosyedad.​—Luc. 4:​28-30.

⁵ Pagkalkulo kan Gastos Asin mga Prosedimiento sa Kuenta: Bago ponan an konstruksion nin Kingdom Hall, maninigong maingat na kalkulohon an mga gastos sa konstruksion bago isumitir an pinal na kahagadan sa pag-utang. Ineebitaran kaini na magabatan an mga parahayag sa mas masakit na iskedyul sa pagbayad kisa sa kinakaipuhan. Siring man, may nawawalat na kuarta sa Society Kingdom Hall Fund na magagamit kan iba pang mga kongregasyon na nangangaipong marhay na mapakarhay an Kingdom Hall. (Fil. 4:5) Mantang an dai linalaoman na mga gastos puedeng magcausa na sumobra an mga gastos sa badyet, an rasonableng tamang mga kalkulasyon puedeng gibohon paagi sa marahay na pagplano asin pag-analisar.

⁶ Kalabot sa proyektong konstruksion nin Kingdom Hall an paggasto kan kongregasyon nin dakulang kantidad nin kuarta. Dapat na siertohon kan kamagurangan na inaasikaso an pondo sa responsableng paagi. Kaipuhan na manteneron an tamang mga rekord nin kuenta, asin maninigong itao an malinaw na mga report sa kalabot na kongregasyon (mga kongregasyon) bulan-bulan. Maninigong siertohon kan nangengenot na paraataman na an pondo sa pagtogdok asin gabos na konektadong kuenta sinisiyasat kada tolong bulan kaiba kan regular na kuenta kan kongregasyon. Minsan siring, sa panahon kan konstruksion na dakol an resibong binabayadan, kaipuhan na siyasaton an kuenta bulan-bulan. Dapat na aprobaran kan kongregasyon sa pankagabsan an proyekto pakatapos na biyong paisihon kan mga detalye asin kalkuladong mga gastos. Pakatapos kaiyan, maninigong itao sa angay na paagi an pag-aprobar sa gabos na babayadan bago itao an ano man na pondo. Sa pagtatapos kan proyekto, maninigong magkaigwa nin malinaw na pagkuenta kan gabos na pondong ginasto.

⁷ An mga Boluntaryo Nagsusuportar sa Marahay na Gibo: Nagpapasalamat an Sosyedad sa dakol na boluntaryong nagtatabang sa konstruksion nin Kingdom Hall. Tunay na nakakokontentong maheling an manampulong ribong boluntaryo na ipinepresentar an saindang sadiri sa gabos na aspekto kan konstruksion nin Kingdom Hall. Posible an kapangganahan kan programang ini huli sa siring na gikan sa boot, buka an palad, asin nakikipagtabangan na espiritu kan boluntaryong mga trabahador, na nagsasakripisyo nin panahon na puede kutanang magamit na marhay sa saindang mga kongregasyon asin pamilya. (Sal. 110:​3; Col. 3:23) An mamomoton na paghimateng ini pinangyayari sindang magin angay sa satong komendasyon, pagpapahalaga, asin lubos na pagsuportar.​—Roma 12:​10; Heb. 13:1.

⁸ Kun may itinotogdok na Kingdom Hall, puedeng imbitaran an mga parahayag sa karaning mga kongregasyon na makikabtang sa proyekto. Puede ining gibohon kan Komite sa Pagtogdok kan Kongregasyon paagi sa pagsurat sa nangengenot na mga paraataman kan karaning mga kongregasyon asin pagpaisi sainda na kaipuhan ninda an tabang. An gabos na nasa kamugtakan na makaboluntaryo naggigibo nin sarong mahalagang paglilingkod.

⁹ Pagpapadanay nin Pinakahababang Gastos sa Konstruksion: An mga Komite sa Pagtogdok kan Kongregasyon maninigong humanap nin paborableng mga presyo paagi sa paghapothapot nin mga presyo asin may pakikompetensiang pagpatasar. Paagi kaini, madedeterminaran kun arin na mga nagsusuplay an maninigong usaron asin arin na materyales an maninigong bakalon. Tanganing seguradohon na gagamiton an pondo sagkod sa pinakaekonomiyang mapupuede, dapat na aprobaran kan Komite sa Pagtogdok kan Kongregasyon an gabos na gastos hale sa pondo kan pagtogdok.

¹⁰ An Gabos Puedeng Tumabang: Kita gabos may oportunidad na magkontribwir sa pinansial sa Society Kingdom Hall Fund mantang itinotogot kan satong mga kamugtakan. Poon kan establisaron an Society Kingdom Hall Fund, rinibong kongregasyon an natabangan na magkaigwa nin mga Kingdom Hall. Dakol na kongregasyon an dai kutana nagkaigwa nin siring kagayon na mga lugar nin pagtiripon kun bakong huli sa pagkamoot kan kasararoan nin magturugang na ipinaheling paagi sa saindong matinaong pagsuportar sa Society Kingdom Hall Fund. An pondong ini ipinauutang tanganing makatabang sa konstruksion nin bagong mga Kingdom Hall. Mantang maigot na binabayadan an kuarta, an mga pondong ini ipinauutang sa ibang mga kongregasyon na nangangaipo.

¹¹ Mga Kapahayagan nin Apresasyon: Kan matapos an bago nindang Kingdom Hall, sarong kongregasyon an nagsabi kaini sa sarong surat sa Sosyedad: “Nagsusurat kami sa saindo tanganing pasalamatan kamo sa saindong mamomoton na pagtabang sa pagtogdok kan samong bagong Kingdom Hall. An samong edipisyo biyo nang tapos ngonyan asin idinedikar na ki Jehova, asin labi-labi an pasasalamat kan kongregasyon sa pagkaigwa nin siring kagayon na edipisyo para sa pagsamba ki Jehova. An samong kongregasyon perming maogmang nagsusuportar sa Society Kingdom Hall Fund asin lokal na mga proyektong pagtogdok patin padagos na gigibohon iyan, na narerealisar an dakulang pangangaipo kan iba pang mga kongregasyon na makinabang sa buka an palad asin importanteng probisyon na ini.”

¹² An saro pang kongregasyon nagpahayag nin apresasyon sa mamomoton na tabang na ginibo para sa sainda, na nagsasabi: “Mawot niamong ipahayag sa saindo an samong pinakaodok sa boot na mga pasasalamat sa tabang kan Society Kingdom Hall Fund. Kun mayo kaiyan an konstruksion kan [samong] tiriponan nagin mas depisil kutana asin naatraso nin haloy-haloy na panahon. An kadonongan ni Jehova siertong naheheling sa areglong ini.”

¹³ An Gibohon na Nasa Enotan: Kita gabos may dahelan na maggayagaya mantang napaninigoan niato an pangangaipo na magtao nin dakol pa asin mas marahay na mga Kingdom Hall. Maninigo kitang magkaigwa nin espiritu nin pakikipagtabangan​—na nagtitinabangan asin lubos na nagsusuportar sa mahalagang aktibidad na ini. (Sal. 133:1) Kanigoan an kaogmahan niato na magkaigwa nin mga lalaki na ninombrahan kan organisasyon ni Jehova na mangenot kapwa sa espirituwal na mga bagay asin sa konstruksion nin kinakaipuhan na mga pasilidad! Nakiolay si Pablo sa mga taga-Filipos, na nagsasabi: “Giboha nindong magin lubos an sakong kaogmahan na kamo nasa saro sanang pag-isip asin igwa kan iyo man sanang pagkamoot.” (Fil. 2:2) Sierto nanggad, igwa kita kan gabos na dahelan na maggayagaya, mantang ipinagkatiwala sa sato an maogmang bareta kan inestablisar na Kahadean na “ihuhulit sa bilog na ineerokan na daga para sa pagpatotoo sa gabos na nasyon” bago dumatong an katapusan. (Mat. 24:14) An satong pagkaigwa nin marigon na paninindogan sa lado kan kahadean na iyan asin maimbod na paggibo para sa intereses kaiyan pinagagayagaya an puso ni Jehova. “Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.” (Tal. 27:11) Abaa kapambihirang pribilehio niato na makipagtabangan asin magayagayang makikabtang ki Jesu-Cristo sa gibohon ni Jehova!