An Padagos na Pag-oswag Pinaoorog an Pangangaipo Para sa mga Kingdom Hall
1 Ihinula kaidto pa kan propeta ni Jehova na “an kawiliwiling mga bagay kan gabos na nasyon dapat na lumaog.” (Hag. 2:7) Sierto nanggad na satong naheheling an kaotoban kaini ngonyan. Nakapupukaw nanggad sa boot na 7,559 an nabautismohan durante kan 1993 na taon nin paglilingkod digdi sana sa Pilipinas! Tanganing padagos na matabangan an gabos na bagohan na ini, kaipuhan niatong ‘isapuso an satong mga dalan’ tanganing masierto na lubos tang nasusuportaran an gibohon nin Dios. (Ikomparar an Haggeo 1:5.) Iyo, an sarong mahalagang kabtang kan satong pagsuportar sa gibohon nin Dios iyo an pagtabang niato na ikatao an angay na mga harong nin pagsamba para sa kaburunyogan nin bagong mga paraomaw ki Jehova.
2 An Pondo sa Kingdom Hall kan Sosyedad nagkapirang taon nang nagpupunsionar sa Pilipinas asin nagpangyari sa 1,013 kongregasyon na magkaigwa nin bagong mga Kingdom Hall. Durante sana kan 1993 na taon nin paglilingkod, 101 kongregasyon sa 34 probinsia an nakaresibi nin pautang para sa saindang mga proyekto sa Kingdom Hall. Nakapakokosog nanggad na maheling an simbag kan mga parahayag sa pagsuportar sa pinaiitok na pondong ini. An mga kuwartang ipinautang sa mga kongregasyon ibinubuwelta sa pondo tangani na an gabos na pondong idinonar padagos na magamit sa pagtogdok nin bagong mga Kingdom Hall.
3 An Maingat na Pagpaplano Asin Pagkonsulta Sinisierto an Kapangganahan: Sa Lucas 14:28, 29, iinatubang ni Jesus an sarong prinsipyo na maninigong manodan kan gabos na minapoon nin mga proyekto sa Kingdom Hall. Enot kaipuhan na ‘tumukaw asin kuwentahon an gastos, tanganing helingon kun igwa sinda nin igo tanganing matapos’ an proyekto. Iyo, kaipuhan an maingat na pagpaplano. Bakong igo an entusiasmo, kundi an bilog na kongregasyon kaipuhan na suportaran sa pinansial an proyekto paagi sa mga kontribusyon. Kun an mga tugang hinahapot kun gurano an kaya nindang ikakontribuwir kada bulan, maninigo sindang magin realistiko, na dai nanunuga nin sobra sa kaya nindang itao tangani sanang makautang. Marahay man kun puwedeng hagadon sa mga tugang na pumoon na tolos na magkontribuwir dawa bago pa mag-aplay na umutang. Sa paaging ini madadamot an mga pondo asin puwedeng maheling kan mga magurang kun kayang suportaran kan kongregasyon an proyekto.
4 An saro pang angay na Makakasuratan na prinsipyo yaon sa Talinhaga 15:22, na an sabi: “Nasusudya an mga plano kun mayo nin pribadong orolay, alagad sa kadakolan nin mga parahatol may nahahaman.” Boot sabihon kaini na kaipuhan na konsultahon kan mga magurang an lambang saro asin maingat na pag-orolayan an bagay bago iyan iatubang sa kongregasyon. Mayo nin siisay man na magurang na maninigong magdesisyon na sia sana. Kun saen ini an ginibo nin mga magurang, dakol na karibarawan asin dai pagkasinabotan an ibinunga. Dugang pa, arog kan isinuherir sa suplemento kan An Satong Ministeryo sa Kahadean na Disyembre, 1991, an paraataman sa sirkito maninigong konsultahon para sa saiyang suhestion. Paano sia makatatabang?
5 An pagpili nin lugar para sa hall kalabot an dakol pang bagay apuwera sa presyo kan lote. Sentro daw iyan para sa mga tugang? Harani daw iyan sa tinampo, o iyan palaog pa? Igwa daw nin malinaw na titulo sa daga? Igwa daw nin mga tawong nag-iistar sa daga na tibaad habong maghale pakatapos kan pagbakal? An paraataman sa sirkito puwedeng tumao kan saiyang suhestion dapit sa mga bagay na ini bago bakalon an lote. Makakapagrekomendar man sia nin sarong tugang na puwedeng magsierto na mayong legal na mga diperensia an titulo. Dugang pa, sa huri puwedeng siyasaton kan paraataman sa sirkito an mga plano na ipinagibo kan mga magurang, asin tumao nin mga suhestion dapit sa sokol kan Kingdom Hall asin sa itsura kaiyan. Puwede man niang siyasaton an aplikasyon ninda sa pag-utang tanganing masierto na nasunod an gabos na kahagadan.
6 Kun maaprobaran na kan Sosyedad an mga plano, mayo nang darakulang pagliliwat an maninigong gibohon sa disenyo o sokol kan Kingdom Hall o sa lugar kaiyan na mayong patienot na pagkonsulta sa Sosyedad. May mga kongregasyon na liniwat an lugar kan daga o an disenyo kan hall na dai pinaisi an Sosyedad. Nagcausa ini nin dai kinakaipuhan na mga problema.
7 Isinusuherir na, kun posible, pagmaigotan kan kongregasyon na mabakal an daga asin matitulohan iyan sa ngaran kan korporasyon nin sirkito bago ipadara sa Sosyedad an saindang aplikasyon sa pag-utang. Paririkason kaini an pagproseso kan pautang huling an daga sadiri na kan mga tugang.
8 An eksakto asin detalyadong mga rekord sa pinansial dapat na sarayon magpoon mismo sa pagpoon kan pagtogdok. Marahay na pagtarabangan nin duwa o tolong tugang an kuwenta tanganing malikayan an ano man na pagsuspetsa o mga dai pagkasinabotan. Pakatapos kan proyekto, an kongregasyon maninigong magkaigwa nin kompletong rekord kan kuwenta para sa proyekto.
9 An mga Boluntaryo Nakaparirikas sa Trabaho Asin Nakaiina sa Gastos: Orog karahay nanggad na gamiton an mga abilidad na makukua sa laog kan mga kongregasyon na magtitiripon sa bagong mga Kingdom Hall. Mayong duwa-duwa na, arog kan ipinaheling ni Jesus sa Juan 10:12-15, an boluntad na nagtatrabaho huli sa pagkamoot magigin mas mahigos kisa “parapatangdan,” na interesado sana sa tangdan asin “daing pagmakolog sa mga karnero.” Dawa kun saro sana an tugang na eksperto sa sarong trabaho, puwedeng hagadon saiya na sanayon an iba mantang ginigibo nia an trabaho. Sa paaging ini dakol pa an magigin kuwalipikado sa pagtabang sa iba pang maabot na mga proyekto. An boluntaryong mga trabahador nakatatabang na mainaan an gastos, sa siring madonong na nagagamit an mahalagang marhay na mga pondo na itinagama kan mga tugang. Sa paaging ini, an bilog na kongregasyon magigin kalabot asin, arog kan kaaldawan ni Nehemias, an mga tugang magpapadagos na ‘magkaigwa nin puso sa paggibo.’ (Neh. 4:6b) Pakatapos kan saindang proyekto, an mga tugang maninigong mamotibar nin pagkamoot na tumabang sa pagtogdok nin mga Kingdom Hall para sa ibang kongregasyon.—Neh. 5:19; Fil. 2:3, 4.
10 Marahay na an mga paraataman sa sirkito magsaray nin listahan nin mga tugang sa saindang sirkito na eksperto sa laen-laen na trabaho asin andam na magboluntaryo sa mga proyekto sa Kingdom Hall sa ibang kongregasyon. Mantang dakol an nasasanay, madakol an listahan. Dangan, kun magkaigwa man nin proyekto sa laog kan sirkito, an grupo nin ekspertong mga trabahador makatatabang sa lokal na mga tugang paagi sa pagboluntaryo kan saindang trabaho, sa siring nakahahale nin grabeng kahaditan sa lokal na kongregasyon. An pagtabang sa paaging ini ebidensia nin satong pagkamoot sa pinakaharaning kataed niato—an satong Kristianong mga tugang.—Mat. 7:12; 22:39; Juan 13:35.
11 Pagpaheling nin Pagkamoot Asin Apresasyon sa Areglo: Girumdomon na an ano man na pautang sa satong kongregasyon hale sa boluntad na mga kontribusyon nin mga tugang sa bilog na kinaban. Sierto nanggad na habo niatong dai makapagpasalamat sa mamomoton na kabootan na ini kan mga tugang, arog kan siyam na daoton kan kaaldawan ni Jesus, bako daw? (Luc. 11:12-18) Nagpapaheling daw kita nin pagpasalamat kun dai niato binayadan an satong utang nin oyon sa ipinanuga? Pagpaheling daw iyan nin pagkamoot sa satong mga tugang sa ibang kongregasyon? Kun nag-aako sana kita nin tabang sa pagtogdok kan satong Kingdom Hall dangan daing pagmakolog sa mga tagaibang kongregasyon na nangangaipo nin tabang, pagpaheling daw ini kan espiritu kan Filipos 2:4?
12 Huli sa pagkaigwa nin pagmakolog, bako sana sa sadiri nindang kongregasyon, kundi sa ‘bilog na kasararoan nin mga tugang sa kinaban,’ (1 Ped. 5:9) an dakol na kongregasyon boluntad na nag-aprobar nin mga resolusyon na magpadara nin mga kontribusyon sa Sosyedad para sa Pondo sa Kingdom Hall kada bulan. Minsan an iba na igwang binabayadan na utang sa Kingdom Hall nagpapadara nin mga kontribusyon sa pondong ini. Marahayon nanggad na espiritu an ipinaheheling kaini! Girumdomon, “igwang orog na kaogmahan sa pagtao kisa pag-ako,” kaya kita logod gabos maghingoa na magin mga paratao asin bako sanang mga paraako paagi sa pagtabang sa ibang kongregasyon sagkod na makakaya niato.—Gibo 20:35.
13 Inaapresyar an Gikan sa Boot na Espiritu: An gikan sa boot na espiritu asin kaigotan kan mga tugang sa pagtogdok nin mga hall naririsa arog kan isinurat nin sarong grupo: “Kanigoan kadakulang kagayagayahan na maheling an mga kongregasyon na nagtataram nin Koreano, Kastila, asin Ingles na nagtatarabang nanggad gabos sa sararong pagsamba ki Jehova!” Totoo nanggad an mga tataramon sa Salmo 133:1, 3: “Uya! Kanigoan karahay asin kanigoan kaogma na an magturugang mag-ontok na sararo!”
14 Bilang apresasyon sa trabahong nahaman sa Kingdom Hall nin sarong kongregasyon, an nangengenot na paraataman nagsurat: “Huling dakolon an gurang sa kongregasyon na ini, an proyektong ini dai kutana nahaman sa samuya sanang paghihingoa. Kaya dakulang salamat sa saindo asin sa mga tugang na arog nindo na nakamamate kan pagkamoot ni Jehova asin gustong, bako sanang mamatean iyan, kundi ipaheling iyan. Boot niamong sabihon sa satong mga tugang: ‘Ipadagos nindo an marahay na gibo.’”
15 Naghanga an mga Nagmamasid: An risang paghiro kan banal na espiritu ni Jehova sa mga tugang na nagtatrabaho sa mga proyekto nin pagtogdok nin Kingdom Hall nagserbing patotoo sa iba. An mga materyales para sa sarong hall binakal sa sarong kompaniya nin tablon, asin sa huri nagsurat an manedyer: “Mayo akong nagigirumdoman na napahanga ako sa sarong grupo nin orog kisa mga Saksi ni Jehova durante kan proyekto. Pareho nakaoogma asin nakawiwili para sa sako na makaheling nin siring na pangyayari, asin naogma akong makapartisipar sa sadit na paagi. Kamo asin an saindong mga tawo dapat na tawan nin komendasyon, asin mawot ko an saindong dakulang kapangganahan sa maabot nindong mga proyekto.”
16 Sa saro pang pangyayari, an sarong representante nin pinagkukuanan nin mga suplay iinasignar na magbisita nin tolong aldaw sa proyekto nin Kingdom Hall. An sabi nia: “An sakong buhay napayaman paagi sa pakikiiba sa saindo ngonyan na katapusan nin semana. Nabago an impresyon ko sa mga Saksi ni Jehova! Labi pa sa pagtoktok sa pinto an nagigibo nindo. Sarong pribilehiyo nanggad na magkaigwa nin kabtang. Dai kamo magngalas na maheling ako sa saindong pampublikong pagtiripon.”
17 Pakatapos nin sarong proyekto, an alkalde nagsurat sa pagrepresentar sa siudad, na an sabi: “Sarong inspirasyon na maheling an ginatos na boluntaryo na nagtatarabang sa marikas na pagtogdok kan hall. Tunay na iyan sarong magayon na edipisyo. An mga residente pinag-oorolayan an dapit sa marikason na pagtogdok sa edipisyo. An bagong Kingdom Hall sarong tunay na kredito sa satong komunidad, asin ipinag-oorgolyo ming akoon iyan asin an saindong kongregasyon.”
18 An Pinansial na mga Kontribusyon Padagos na Nagtatabang: An bukas-palad na mga kontribusyon sa Pondo sa Kingdom Hall kan Sosyedad nakatabang sa mga kongregasyon kan nakaagi asin siertong padagos na gigibohon an siring sa ngapit. Bako daw na si Jehova Dios mismo an nangengenot sa daing kapasloan na pagtao? (Sant. 1:17) Minsan ngani totoo na magkalaen an satong mga kakayahan sa pagtao, puwedeng manompongan ta na paagi sa pagliliwat sa satong personal na paggasto, puwede kitang magkaigwa nin lubos na pakikikabtang sa pagsuportar sa gibong pagtotogdok. An siring na pagkamatinao siertong nagtatao nin kagayagayahan sa puso ni Jehova, patin man dakulang pampakosog sa satong mga tugang.
19 Padakol nang padakol, an “kawiliwiling mga bagay” nagraralaog sa espirituwal na templo ni Jehova, asin saiyang ‘pinapano nin kamurawayan an harong nia.’ (Hag. 2:7) Kapareho kan maimbod na mga Judio kan panahon ni Haggeo, ibugtak logod niato an satong puso sa gibohon nin Dios, na lubos na sinusuportaran an pangangaipo para sa dugang pang Kingdom Hall. An pag-oswag padagos an pagrikas. An padagos tang pagsuportar sa Pondo sa Kingdom Hall kan Sosyedad sarong ekselenteng paagi na makikabtang sa gibohon nin Dios.