Pagtogdok nin mga Kingdom Hall—Sarong Importanteng Aspekto nin Sagradong Paglilingkod
1. Ano na an nagibo sa pagtogdok nin mga Kingdom Hall, alagad ano pa man giraray an kinakaipuhan?
1 Durante kan nakaaging tolo may kabangang taon, 150 Kingdom Hall an ikinatogdok na sa teritoryo kan sangang opisina digdi sa Pilipinas. Sinsero niamong pinapasalamatan an mahigos na pagtrabaho kan mga Grupong Nagtotogdok nin mga Kingdom Hall asin kan gabos na nagtatabang sa sainda. Minsan ngani dakula nang marhay an nagibo, dakol pa man giraray an gibohon sa pagtogdok nin mga Kingdom Hall. Paano kita gabos makakasuportar sa importanteng aspektong ini kan satong sagradong paglilingkod ki Jehova?—Kap. 7:15.
2. Paano kita direktamenteng makakasuportar sa gibohon na pagtogdok nin mga Kingdom Hall?
2 Magin Andam: Kun kamo bautisadong parahayag, iniimbitaran niamo kamo na boluntaryong magtrabaho kaiba nin sarong Grupong Nagtotogdok nin mga Kingdom Hall paagi sa pagllenar nin Application for Kingdom Hall Construction Volunteer Program (A-25). Makukua an pormang ini sa saindong kongregasyon o puedeng humagad sa sangang opisina an kamagurangan. Kun aprobado, iimbitaran kamo na magtrabaho sa sarong proyektong Kingdom Hall sa laog nin tolo sagkod anom na bulan. An saro pang paagi na kamo makakapagboluntaryo dawa dai magllenar nin porma nin aplikasyon iyo an pagboluntaryo sa laog nin saro o duwang aldaw o sarong semana pa ngani sa arin man na ginigibong proyektong Kingdom Hall sa saindong sirkito o sa kaharaning sirkito. An gabos na nagboboluntaryo dapat na mga trabahador na andam asin may espiritu nin kooperasyon. (Sal. 110:3; 133:1) Dawa kun kamo mayo nin abilidad sa pagtogdok, dakol pa man giraray kamong ikakakontribwir para sa kapangganahan nin proyektong pagtogdok. Puede man kamong matawan nin pagsasanay na mapangyari sa saindo na orog pang magamit sa ngapit.
3. Sa ano pang ibang mga paagi ikakapaheling niato an satong suporta sa areglong ini?
3 Kun kamo dai makakapagboluntaryo, puede nindong ipaheling an saindong suporta paagi sa pagparigon sa boot kan iba na nakakapakikabtang sa areglong iyan. Puede kamong tumabang na kamo an gumibo kan mga asignasyon sa kongregasyon kan mga nagtatrabaho sa proyekto. Paagi sa patienot na pagplano, masesegurado kan kamagurangan na naaasikasong marhay an kongregasyon kun an nagkapira nagtatrabaho sa sarong proyektong Kingdom Hall. Daing duda na naoogma si Jehova kun kita sararong nagtitinabangan para sa pagpaoswag kan intereses kan Kahadean.—Heb. 13:16.
4. Paano niato mapaparigon an boot kan mga nakikikabtang sa mga proyektong pagtogdok nin mga Kingdom Hall?
4 Magin Nakakaparigon sa Boot: Kalabot sa pagtogdok nin mga lugar nin pagsamba an dakol na panahon asin mahigos na pagtrabaho. Kun siring, natural sana na an mga inimbitaran na tumabang sa mga proyektong pagtogdok kun beses mayo sa sainda mismong kongregasyon. Logod na magin listo kita sa pagtao nin komendasyon asin pagparigon sa boot sa mga boluntaryo sa pagtogdok, na naggigibo nin mga sakripisyo tangani na maasikaso an “mahalagang gibong” ini.—Gibo 6:3; Roma 14:19.
5. Paano ikakapaheling kan mga boluntaryo sa pagtogdok an pagkatimbang?
5 Magin Timbang: An paghuhulit manongod sa Kahadean nin Dios iyo an satong pangenot na teokratikong aktibidad. (Mar. 13:10) Nasa isip ini, hinihingoa kan Kingdom Hall Construction Desk asin mga Regional Kingdom Hall Office na iiskedyul an mga proyekto sa paagi na an mga boluntaryo makakapakikabtang nin regular sa ministeryo sa langtad. Siring man, pinagmamaigotan kan mga boluntaryo sa pagtogdok na magin timbang sa pag-asikaso sa saindang espirituwal na mga paninimbagan.
6. Ano an nagigibo kun an gabos na nasa kongregasyon iribang nagkokooperar sa pagpaoswag kan tunay na pagsamba?
6 Ilinadawan ni apostol Pablo na an mga miembro kan kongregasyon sararong nagtitinarabangan sa “pagtalubo kan hawak para sa pagkosog mismo kaiyan sa pagkamoot.” (Efe. 4:16) An pagkamoot niato ki Jehova asin sa tunay na pagsamba nagpapahiro sa sato na iribang magkooperar tangani na ikahulit an maogmang bareta asin masuportaran an pagtogdok nin mga Kingdom Hall.