Mga Areglo Para sa mga Lugar nin Pagsamba

AN TUNAY na mga nagsasamba ki Jehova pinagbubutan na magtiripon para matukduan asin mapakusog an kada saro. (Heb. 10:23-25) An “tabernakulo, an tolda nin pakipagtagbuan,” iyo an inot na lugar para sa pagsamba kan piniling banwaan nin Diyos, an mga Israelita. (Ex. 39:32, 40) Pag-abot nin panahon, an aki ni David na si Solomon nagtugdok nin sarong harong, o templo, para sa kamurawayan nin Diyos. (1 Ha. 9:3) Pagkatapos gabaon an templong iyan kan 607 B.C.E., iinareglo kan mga Judio na magtiripon sa mga edipisyo na inaapod na sinagoga para sumamba sa Diyos. Pag-abot nin panahon, itinugdok liwat an templo asin nagin sentro giraray nin tunay na pagsamba. Nagtukdo si Jesus sa mga sinagoga asin sa templo. (Luc. 4:16; Juan 18:20) May isinagibo pa ngani siyang pagtiripon sa sarong bukid.—Mat. 5:1–7:29.

² Pagkagadan ni Jesus, nagtiripon an mga Kristiyano sa pampublikong mga lugar asin sa mga harong para magtukdo kan Kasuratan saka makiasosyar sa mga kapagtubod. (Gibo 19:8, 9; Roma 16:3, 5; Col. 4:15; Filem. 2) May pagkakataon man na kinaipuhan na magtiripon an inot na mga Kristiyano sa mga puwerang lugar para dai marisa kan mga nagpepersegir. Gustong-gusto nanggad kan maimbod na mga lingkod nin Diyos kaidto na magtiripon sa mga lugar nin pagsamba para ‘matukduan ni Jehova.’—Isa. 54:13.

³ Sa ngunyan, ginagamit man an pampublikong mga lugar asin mga harong para sa Kristiyanong mga pagtiripon. Sa parati, sa mga harong ginigibo an mga pagtiripon bago maglingkod sa langtad. Ibinibilang kan mga tugang na pribilehiyo an pagpagamit kan saindang harong sa arog kaiyan na mga pagtiripon. Dakul an nagsasabi na nakinabang sinda sa espirituwal huli kaiyan.

KINGDOM HALL

⁴ An Kingdom Hall iyo an panginot na lugar na pinagtitiripunan kan Mga Saksi ni Jehova. Sa parati, nagbabakal nin propyedad dangan nagtutugdok diyan nin bagong Kingdom Hall o pigre-renovate an dati nang nakatugdok na edipisyo. Tanganing makatipid sa gastos saka magamit na marhay an satong mga pasilidad, puwedeng saro sanang Kingdom Hall an gamiton nin nagkapirang kongregasyon kun iyan praktikal. Sa nagkapirang lugar, kaipuhan mag-arkila nin hall. Para sa bagong tugdok na mga Kingdom Hall asin sa mga nagkaigwa nin dakulang renovation, angay na magkaigwa nin programa sa pagdedikar. Pero kun dikit na renovation sana an ginibo sa dati nang Kingdom Hall, dai na iyan kaipuhan.

⁵ An Kingdom Hall dapat na bakong magarbong edipisyo para pahangaon an iba. Puwedeng magkakalain an disenyo sa iba-ibang lugar, pero gabos iyan praktikal. (Gibo 17:24) Depende sa lugar, dapat na komportable iyan asin kumbenyenteng gamiton para sa Kristiyanong mga pagtiripon.

⁶ An gabos na kongregasyon kan Mga Saksi ni Jehova nagtatao nin donasyon para sa mga gastos sa paggamit asin pagmentenar kan saindang Kingdom Hall. Mayo nin pangungulekta saka dai man nagso-solicit nin pondo. May kahon para sa donasyon na diyan puwedeng ihulog kan mga nag-aatender an saindang donasyon para sa mga gastos na konektado sa paggamit kan hall. Ginigibo ninda iyan nin gikan sa buot asin gikan sa puso.—2 Cor. 9:7.

⁷ Ibinibilang kan gabos sa kongregasyon na sarong pribilehiyo an pagtao nin pinansiyal na suporta sa Kingdom Hall asin pagboluntaryo para mapagdanay iyan na malinig saka mentenado. Sa parati, sarong elder o ministeryal na lingkod an inaasignaran na mag-iskedyul kan gibuhon na ini. Sa pangkagabsan, an paglinig ginigibo nin mga grupo sa paglilingkod sa langtad, sa panginginot kan paraataman nin grupo o kan assistant niya. An laog asin luwas kan Kingdom Hall dapat na angay na magrepresentar ki Jehova saka sa saiyang organisasyon.

⁸ Kun labi sa sarong kongregasyon an naggagamit kan hall, an mga elder kan mga kongregasyon na iyan mabilog nin Kingdom Hall Operating Committee na iyo an maasikaso kan mga bagay-bagay may koneksiyon sa edipisyo asin propyedad. An mga grupo nin kamagurangan nagpipili nin sarong brother na maglilingkod bilang koordineytor kan operating committee. Sa superbisyon kan mga grupo nin kamagurangan, minomonitor kan operating committee an paglinig sa Kingdom Hall asin sinisiguradong namementenar iyan na marhay saka may supisyenteng mga suplay. Kaipuhan digdi an lubos na kooperasyon kan mga kongregasyon na naggagamit kan Kingdom Hall.

⁹ Puwedeng mag-rotation nin iskedyul nin pagtiripon pag dakul na kongregasyon an naggagamit nin sarong Kingdom Hall. Pag-uurulayan iyan kan mga elder sa paaging nagpapahiling nin pagmakulog asin pagkamuot sa mga tugang. (Fil. 2:2-4; 1 Ped. 3:8) Dai dapat magdesisyon an sarong kongregasyon para sa ibang kongregasyon. Pag dalaw kan paraataman nin sirkito sa saro sa mga kongregasyon na naggagamit kan Kingdom Hall, liliwaton kan ibang kongregasyon an iskedyul kan pagtiripon ninda sa semanang iyan kun kinakaipuhan.

¹⁰ Puwedeng gamiton an Kingdom Hall para sa mga diskurso sa kasal asin diskurso sa gadan basta may permiso kan Komite sa Paglilingkod kan Kongregasyon. Pinag-iisipan na marhay kan komite an paghagad nin permiso asin ibinabasar an desisyon ninda sa instruksiyon na itinatao kan sangang opisina.

¹¹ An mga tinutugutan na gumamit kan Kingdom Hall sa siring na mga okasyon inaasahan na magawi sa paaging angay sa tunay na mga Kristiyano. Dai dapat gumibo nin ano man sa Kingdom Hall na ikakasingkog kan mga tugang sa kongregasyon o makakatao nin katuyawan ki Jehova asin sa marahay na reputasyon kan kongregasyon. (Fil. 2:14, 15) Sa instruksiyon kan sangang opisina, puwedeng gamiton an Kingdom Hall para sa iba pang espirituwal na mga aktibidad arog kan Pang-Kahadian na Paadalan sa Pagmiministro asin Paadalan sa Paglilingkod Bilang Payunir.

¹² Pirming igagalang kan kongregasyon an saindang lugar na pinagtiripunan. An saindang pagbado, pag-ayos sa sadiri, asin paggawi dapat na may dignidad saka angay sa pagsamba ki Jehova. (Ecl. 5:1; 1 Tim. 2:9, 10) Kun susunudon niyato an mga konseho mapadapit digdi, ipinapahiling ta na pinapahalagahan ta an satong Kristiyanong mga pagtiripon.

¹³ Mahalagang magsunod pirmi sa mga areglo sa panahon kan mga pagtiripon. Marahay kun an mga aki magtukaw kataid kan mga magurang ninda. Puwedeng pakiulayan an mga magurang na may saradit na aki na magtukaw sa lugar na daing gayo sinda makakadisturbo kun kaipuhan iluwas an saindang mga aki para sawayon o para asikasuhon an iba pang kaipuhan.

¹⁴ May kuwalipikadong mga brother na inaasignaran bilang mga attendant sa mga pagtiripon sa Kingdom Hall. Dapat alisto sinda, mainamigo asin may marahay na paghusgar. Kaiba sa mga paninimbagan ninda an pag-welcome sa mga bagong nag-atender, pagtabang sa mga nahuhuri na makakua nin matutukawan, pagrekord kan bilang kan mga nag-atender, saka an pagsigurado na marahay an bentilasyon o temperatura kan hall. Kun kaipuhan, papagirumdumon kan mga attendant an mga magurang na bantayan an mga aki ninda tanganing dai magkawat sa stage o magparadurudalagan bago asin pagkatapos kan mga pagtiripon. Sa mabuot asin mataktikang paagi, puwedeng pakiulayan kan attendant an magurang nin sarong nagpapasaway na aki na iluwas ini tanganing daing gayo makadisturbo sa mga nagdadangog. Dakula an naitatabang kan mga attendant para makinabang an gabos sa mga pagtiripon. Mas marahay kun mga elder asin ministeryal na lingkod an gamiton bilang mga attendant.

PAGTUGDOK NIN MGA KINGDOM HALL

¹⁵ Kan inot na siglo, an ibang mga Kristiyano mas may kaya sa buhay kisa sa iba, kaya nagsurat si apostol Pablo: “Paagi sa pagpantay-pantay, an sobra nindo sa presenteng panahon makahipno sa kaipuhan ninda, na sa siring an sobra man ninda makahipno sa ano man na kulang kamo, tanganing magkaigwa nin pagpantay-pantay.” (2 Cor. 8:14) Sa ngunyan, igwa man nin arog kaiyan na “pagpantay-pantay.” An kuwartang idinodonar kan mga kongregasyon sa bilog na kinaban tinitipon para makatao nin pinansiyal na tabang sa pagtugdok asin pag-renovate nin mga Kingdom Hall. An bukas-palad na pagsuportar kan mga tugang sa bilog na kinaban inaapresyar na marhay kan organisasyon asin kan mga kongregasyon na nakikinabang sa mga donasyon na iyan.

¹⁶ Kinokonsiderar kan sangang opisina an nagkapirang bagay asin mga kamugtakan pag nagdedesisyon kun sain na Kingdom Hall pinakamarahay na iasignar an lambang kongregasyon. Dinedeterminaran man kan sangang opisina kun nuarin asin kun sain matugdok nin bagong mga Kingdom Hall o ma-renovate nin nakatugdok nang mga edipisyo sa teritoryo kan sangay. Pag nagkaigwa nin mga kalamidad, naggigibo nin mga areglo para sa paghirahay kan naraot na mga Kingdom Hall asin, kun beses, kan mga harong kan mga tugang.

¹⁷ An sangang opisina an nag-aasignar nin mga boluntaryo para tumabang sa pagbakal nin propyedad, pagdisenyo nin Kingdom Hall, pagkua nin building permit, pagtugdok, asin pagmentenar kaiyan. Nangangaipong marhay nin mga Kingdom Hall sa dakul na nasyon kaya nangangaipo man nin dakul na boluntaryo. An gabos na bawtisadong parahayag na kuwalipikado asin gustong tumabang dinadagka na magsumitir nin aplikasyon sa saindang Komite sa Paglilingkod kan Kongregasyon. Dawa an dai pa bawtisadong mga parahayag puwedeng tumabang sa pagtugdok o pag-renovate kan saindang Kingdom Hall.

MGA ASSEMBLY HALL

¹⁸ Sa pangkagabsan, saradit sanang grupo pag nagtitiripon kaidto an inot na mga Kristiyano. Pero may beses na “dakul” na tawo an nagtiripon. (Gibo 11:26) An mga lingkod ni Jehova ngunyan nagkakaigwa man nin darakulang pagtiripon sa mga pansirkitong asembleya asin pangrehiyon na kumbensiyon. Sa parati, nag-aarkila nin mga pasilidad para digdi, pero kun mayo nin angay o puwedeng gamiton na pasilidad, puwedeng magbakal o magtugdok nin sadiring lugar nin pagsamba na inaapod na Assembly Hall.

¹⁹ Kun minsan, nagbabakal nin nakatugdok nang edipisyo dangan pigre-renovate iyan para gibuhon na Assembly Hall. Pero sa parati, lote an binabakal para tugdukan nin bagong hall. An mga Assembly Hall magkakalain an kadakulaan, depende sa pangangaipo sa sarong lugar. An sangang opisina an nagdedesisyon kun baga mabakal o matugdok nin Assembly Hall. Pero inaanalisar nguna nindang marhay kun gurano kadakula an gagastuson saka kun gurano iyan kaparating gagamiton.

²⁰ Nag-aasignar an sangang opisina nin mga brother na maasikaso sa pagpunsiyonar asin pagmentenar kan Assembly Hall. May iskedyul an mga sirkito para sa regular na paglinig sa Assembly Hall, paglinig nin duwang beses kada taon, asin sa pagmentenar kaiyan. Dakulang tabang kun magboboluntaryo an mga tugang sa mga gibuhon na ini. Kaya dinadagka an mga kongregasyon na suportaran nin bilog na puso an mga areglong ini.—Sal. 110:3; Mal. 1:10.

²¹ May mga pagkakataon na puwede man gamiton an mga Assembly Hall para sa iba pang teokratikong aktibidad, arog kan mga paadalan sa Bibliya asin espesyal na mga miting para sa mga paraataman nin sirkito. Arog kan Kingdom Hall, an Assembly Hall sarong idinedikar na lugar nin pagsamba. Kun kita nagtitiripon sa Assembly Hall, an satong paggawi, pagbado, asin pag-ayos sa sadiri dapat na may dignidad, arog kan kun kita nag-aatender sa Kingdom Hall.

²² Kadakul nin mga baguhan na gustong mapabilang sa organisasyon nin Diyos sa huring parte kan huring mga aldaw na ini. Patunay iyan kan bendisyon ni Jehova. (Isa. 60:8, 10, 11, 22) Kaya gusto tang suportaran an mga areglo sa pagtugdok asin pagmentenar nin malinig saka komportableng mga lugar nin pagsamba. Kun gigibuhon ta iyan, maipapahiling niyato an satong pagpapahalaga sa siring na mga pasilidad na nakakatabang para mapakusog ta an kada saro lalo na ta nahihiling niyato na harani na an aldaw ni Jehova.