Iginagalang daw Nindo an Saindong Lugar nin Pagsamba?
“Poon pa sa pagkapinoon kan ebanghelyo, an mga Kristiano permi nang may permanente asin determinadong lugar nin banal na pagsamba.”—“Primitive Christianity,” ni William Cave.
AN BANWAAN nin Dios perming naoogmang magtiripon para sa pagsamba. Ini totoo kaidtong enot na siglo arog ngonyan. An enot na mga autor asin teologo, arog ni Lucian, Clement, Justin Martyr, asin Tertullian, gabos oyon na an mga Kristiano may espisipikong mga lugar na dian sinda nagtitiripon tanganing iribang sumamba nin regular.
Pinatutunayan man iyan kan Biblia, na dakol an pagsambit sa regular na pagtiripon na ginibo nin mga grupo nin mga Kristiano. An mga grupong ini inapod na mga kongregasyon. Ini angay ta an terminong “kongregasyon” sa orihinal na mga lenguahe kan Biblia nangangahulogan nin sarong grupo nin mga tawo na tiripon para sa sarong partikular na katuyohan o aktibidad.
Enot na mga Lugar nin Kristianong Pagsamba
Ano an ginigibo kan mga Kristiano kan enot na siglo kun sinda nagtitiripon? Isinasaysay kan Biblia an nagkapira sa siring na pagtiripon asin ipinaheheling na an pagtotokdo sarong mahalagang kabtang. (Gibo 2:42; 11:26; 1 Corinto 14:19, 26) May iinaareglong edukasyonal na mga programa, na may mga diskurso, pagsaysay nin nakapakokosog na mga eksperyensia, asin maingat na pagkonsiderar sa mga surat na inako hale sa namamahalang grupo sa Jerusalem o hale sa sarong apostol.
Sa Gibo 15:22-35, mababasa niato na pakabasaha kan sarong surat na arog kaiyan sa sarong grupo nin mga Kristiano sa Antioquia, si Judas asin Silas “nagsadol sa mga tugang sa balakid na tataramon asin nagpakosog sa sainda.” An saro pang tala nagsasabi na kan si Pablo asin Bernabe umabot sa Antioquia “asin natipon na an kongregasyon, isinaysay ninda an dakol na bagay na ginibo nin Dios paagi sa sainda.” An pamimibi ki Jehova saro pang mahalagang kabtang nin Kristianong pagtiripon.—Gibo 14:27.
An mga lugar na pinagtiriponan nin mga kongregasyon kan enot na siglo para sa pagsamba bakong maluhong mga edipisyo arog nin dakol na simbahan nin Kakristianohan ngonyan. Sa kadaklan, an enot na mga Kristiano nagtiripon sa pribadong mga harong. (Roma 16:5; 1 Corinto 16:19; Colosas 4:15; Filemon 2) Parateng an ginagamit an kuwarto sa atop o kuwarto sa itaas nin sarong pribadong harong. Sa sarong kuwarto sa itaas sinelebrar an Pamanggihan kan Kagurangnan. Sa saro man na kuwarto sa itaas na an 120 disipulo linahidan nin banal na espiritu kan Pentecostes.—Lucas 22:11, 12, 19, 20; Gibo 1:13, 14; 2:1-4; 20:7, 9.
Ngonyan sinusunod kan mga Saksi ni Jehova an arogan na ibinugtak kan mga apostol. Ginagamit ninda an mga tiriponan na inaapod Kingdom Hall. Dian sinda tinotokdoan bilang mga parahulit kan maogmang bareta kan Kahadean nin Dios. (Mateo 24:14) Sa Kingdom Hall, sinda nag-aadal man sa Kasuratan, namimibi, asin nagpapakinosogan. Kaoyon ini sa hatol kan Biblia sa Hebreo 10:24, 25: “Magpasaradolsadol kita sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magpakinosogan kita, asin lalo na ta naheheling nindo na an aldaw harani na.”
Tamang Paggamit sa Satong Lugar nin Pagsamba
Nagigirumdoman daw nindo an mga tataramon ni apostol Pablo: “An Dios sarong Dios, bakong nin karibarawan, kundi nin katoninongan” asin, “Gibohon an gabos na bagay sa disente asin aregladong paagi”? Kun sisiyasaton nindo an nakapalibot na mga teksto sa mga tataramon na ini, madidiskobre nindo na an ipinaliliwanag ni Pablo an paagi na dapat gibohon sa Kristianong mga pagtiripon. Arog kaidtong panahon nin mga apostol, siniseguro nin mga Kristiano ngonyan na an saindang pagtiripon areglado asin organisadong marhay.—1 Corinto 14:26-40.
An Abril 1, 1970 luwas kan An Torrengbantayan (Oktubre 15, 1969 sa Ingles) nagsabi: “An espirituwal na kamugtakan sa Kingdom Hall tunay, hale sa totoong interes sa tunay na pagsamba asin katokdoan kan Biblia. Asin an maliwanag, natural na palibot kaiyan nagpapahiro sa mga yaon dian na magin maogma asin makikatood, dai napopogolan nin misteryosong ipinirit na pormalidad.” Siyempre, ginigibo man an pag-iingat tangani na an paggamit sa Kingdom Hall perming nagpaparisa nin paggalang asin dignidad.
An Kakristianohan nagpaheling nin grabeng kakulangan nin paggalang sa bagay na ini. An ibang relihiyosong organisasyon ginagamit an saindang mga lugar nin pagsamba bilang pankomunidad na sentro para sa pag-aling-aling. Igwa sinda nin aktuwal na mga konsierto nin relihiyosong musikang rock, mga kuwarto para sa pagbarbel, bilyaran, narseri, asin sinehan. An sarong simbahan may gumolan bilang kabtang kan saindang programa. Ini masakit na makaoyon sa arogan na itinao kan mga apostol.
Kun may kongregasyon kan enot na siglo na sala an gibo, angay an pagtatanos. Halimbawa, an iba sa Kristianong kongregasyon sa Corinto ginagamit an selebrasyon kan Pamanggihan kan Kagurangnan na okasyon para sa karakanan asin irinoman. Binabalon ninda an saindang pamanggihan tanganing kakanon bago o sa panahon kan pagtiripon, na an iba nagpapalabilabi pa ngani sa pagkakan asin pag-inom. Ini tunay na bakong maninigo. Si apostol Pablo nagsurat sa sainda: “Tunay na igwa kamo nin mga harong para sa pagkakan asin pag-inom, bako daw?”—1 Corinto 11:20-29.
Kaoyon sa hatol ni Pablo, hinihingoa nin mga Saksi ni Jehova na asikasohon an personal na mga bagay sa harong o sa ibang lugar imbes na sa Kingdom Hall. Totoo, an satong regular na pagtiripon nagtatao nin kombenyenteng oportunidad na maheling nin durungan an nagkapirang katood. Pero an Kingdom Hall dusay ki Jehova, kaya iyan maninigong gamiton sana para sa pagsamba sa saiya. Dai niato inaaprobetsaran an pag-atender niato dian na makapagnegosyo o maasikaso an personal na mga transaksion sa kuwarta.
Dugang pa, an mga Kingdom Hall dai ginagamit kan kongregasyon para sa mga programa nin pag-aling-aling, mga aktibidad sa pagtipon nin pondo, o sosyal na mga serbisyo, arog baga kan pag-aling nin mga aki. May ibang lugar na dian maaasikaso an siring na personal asin komersial na mga bagay.
Narisa kan kamagurangan sa sarong Kingdom Hall na an mga miembro kan kongregasyon inuugale an pagsubli o pag-uli nin mga sinubli sa pagtiripon. Saro pa, ugale na nindang magsinublian nin mga pelikula sa videocassette sa Kingdom Hall. Minsan ngani bakong komersial an aktibidad na ini, tinabangan sinda kan kamagurangan na masabotan an kadonongan nin pag-asikaso kan mga bagay na ini sa harong sagkod sa mapupuwede.
Tanganing malikayan an mga situwasyon na puwedeng makatao nin salang impresyon asin maseguro na an Kingdom Hall ginagamit nin tama, an kada saro maninigong ihapot sa sadiri: ‘Igwa daw nin personal na mga bagay na inaasikaso ko sa Kingdom Hall na maaasikaso sa harong?’ Halimbawa, kun nag-oorganisar nin mga piknik o iba pang sosyal na pagtiripon, bako daw na mas marahay na sa harong pag-orolayan an siring na mga areglo? Puwede daw na gamiton niato an telepono o songkoon an harong kan mga boot niatong makaolay? Sa pagsubli sa mga tataramon ni Pablo, puwede niatong sabihon: ‘Tunay na kita may mga harong para sa pag-asikaso sa siring na mga bagay, bako daw?’
An Itinalaan na Panahon Asin Lugar sa Pagsamba ki Jehova
Sinasabi kan Biblia sa Eclesiastes 3:1: “Sa gabos na bagay igwa nin itinalaan na panahon, panahon para sa lambang gibo sa irarom kan kalangitan.” Kun nag-aatender sa mga pagtiripon sa Kingdom Hall, lubos niatong ikadudusay an satong sadiri sa mga aktibidad na konektado sa Kristianong ministeryo. Iyan itinalaan na panahon na sambahon si Jehova.
An tugang ni Jesus sa ina na si Santiago nagtao nin hatol tumang sa pagpaheling nin paboritismo sa laog kan Kristianong kongregasyon. (Santiago 2:1-9) Paano niato ikaaaplikar an hatol na ini sa satong Kingdom Hall? Puwedeng itao an impresyon nin paboritismo kun ginigibo dian an hayag na pananao nin mga imbitasyon para sa sosyal na mga okasyon. Sa sarong kongregasyon an kaugalean ibugtak an siring na mga imbitasyon sa bag o Biblia kan mga presente. Totoo, ini mas kombenyente kisa pagpadara kan siring na mga imbitasyon sa koreo o paghatod kaiyan sa kada harong. Minsan siring, ano an magigin saboot kan mga dai nakaaako nin imbitasyon pakaheling na may ipinananaong imbitasyon sa iba? Ini daw puwedeng magtao kan impresyon nin paboritismo?
Siyempre, dai kaipuhan na magkaigwa nin estriktong reglamento na nagsasabing mayo nin makatatao nin personal na mensahe o patos kun yaon sa Kingdom Hall; ni sala man na pag-orolayan sa Kingdom Hall an pan-aroaldaw na mga aktibidad o pangyayari, imbitaran an saro sa saindong harong, o agdahon an saro na umiba sa saindo sa pag-aling-aling. Pero ini maninigong insidental sana asin gibohon sa maingat asin sekretong paagi. An personal na mga areglo maninigong nungka na irayo an atension sa tunay na katuyohan kan satong pagtiripon sa Kingdom Hall, an mapakosog sa espirituwal.—Mateo 6:33; Filipos 1:10.
Mga Lalaking Nagtatao nin Halimbawa
An kamagurangan asin ministeryal na mga lingkod maigot na nagtatao kan halimbawa sa paggalang sa Kingdom Hall. Sa kadaklan saro o duwang magurang asin ministeryal na lingkod an iinaasignar na mag-areglar sa mga bagay may koneksion sa pag-asikaso sa Kingdom Hall. Kun bako sanang sarong kongregasyon an naggagamit kan tiriponan, an mga bagay na ini inaataman nin sarong komite nin mga magurang.
Minsan ngani may espisipikong mga inasignaran na mag-asikaso sa siring na mga trabaho, an gabos na ministeryal na lingkod asin magurang maninigong magpaheling nin tunay na interes sa tiriponan. Minimidbid ninda na an Kingdom Hall idinusay ki Jehova asin ginagamit para sa pagsamba sa saiya.
An mga magurang dai maninigong magparadirodigson kun may kaipuhan na hirahayon. (2 Cronica 24:5, 13; 29:3; 34:8; Nehemias 10:39; 13:11) Sa ibang kongregasyon may regular na inspeksion sa Kingdom Hall tanganing maasikaso tolos an ano man na kaipuhan na hirahayon. May mga imbentaryo tanganing masierto na igwa asin yaon an kaipuhan na mga suplay. Kun may talagang lugar para sa pagsaray nin mga suplay, gamit, asin panlinig, an gabos na magurang asin ministeryal na lingkod maninigong magpaheling nin interes sa kamugtakan kaiyan, na siniseguro na iyan perming areglado. An mga nagtatrabaho sa literatura asin magasin makapaheheling kan saindang interes paagi sa alistong pag-asikaso na daing warak na basiyong karton sa tiriponan.
Paagi sa pagtao nin halimbawa, matatabangan kan mga magurang asin ministeryal na mga lingkod an iba sa kongregasyon na magpaheling nin kaigotan para sa Kingdom Hall. (Hebreo 13:7) An gabos makapaheheling nin tamang paggalang paagi sa pakikakabtang sa paglinig sa tiriponan asin paagi sa pagpapaheling nin tunay na interes sa itsura kaiyan sa kabilogan.
Si Jesus nagsabi sa Mateo 18:20: “Kun saen an duwa o tolo na nagkakatiripon sa ngaran ko, yaon ako sa tanga ninda.” Iyo, interesado si Jesus sa satong ginigibo kun kita nagtitiripon sa pagsamba ki Jehova. Kabale digdi an ano man na pagtiripon sa pribadong mga harong asin darakulang pagtiripon arog kan mga kombension o asamblea.
Para sa minilyon na Saksi ni Jehova, mayo nin lugar na mas harani sa saindang puso kisa saindang regular na lugar nin pagsamba, an Kingdom Hall. Nagpapaheling sinda nin tamang paggalang sa lugar na iyan. Nagpapaheling sinda nin kahigosan sa pag-asikaso kaiyan, asin naghihingoa sinda na perming gamiton iyan nin tama. Logod kamo man sumunod sa hatol na itinatao mismo ni Jehova: “Maanan mo an saimong bitis kun ika minaduman sa harong kan tunay na Dios.”—Eclesiastes 5:1.