Iginagalang daw Nindo an Saindong Kingdom Hall?
1 Mantang an Kingdom Hall iyo an sentro kan tunay na pagsamba sa satong lugar, maninigo niatong tawan ini nin halangkaw na paggalang. Ini an lugar kun saen kita nakikitipon sa satong mga tugang tanganing pakosogon sinda. (Heb. 10:24, 25) Totoo daw na iginagalang niato ini? Kita gabos maninigong makikabtang sa pagpapadanay na malinig ini asin nasa marahay na kamugtakan. Kun an satong grupo sa pag-adal sa libro an inasignaran na maglinig kan tiriponan, mawot niatong makikabtang sa gibohon na ini, sa siring nagpapaheling kan satong pagpapahalaga para sa malinig asin nakaaakit na lugar nin pagtiripon.
2 Kita gabos puwedeng magpaheling nin interes sa Kingdom Hall, kita man asignadong maglinig o dai. Paano? Paagi sa pagpahid kan satong mga bitis kun minalaog sa tiriponan tanganing dai magdara nin ati. Kun minagamit kita kan kasilyas, puwede niatong pahidan an palibot kan lababo pakatapos na gamiton ini tanganing bayaan ining malinig para sa masunod na magamit. An mga naglilingkod sa kuanan nin literatura asin magasin maninigong haleon tolos-tolos an daing laog na mga karton asin patos. An gabos na ati maninigong iapon sa mga lalagan na ibinugtak para sa katuyohan na iyan. Kun makaheling kita nin ati sa salog, maninigong puruton niato ini imbes na bayaan para iba pa an pumurot. An An Satong Ministeryo sa Kahadean para sa Pebrero, 1989 nagtao nin mga suhestion sa pagpapadanay na malinig an information board. An iba maninigong makipagtabangan sa nangengenot na paraataman tanganing siertohon na sinusunod an sadol na ini.—km 2/89, p. 4.
3 An kaparehong mga prinsipyo minaaplikar kun nag-aatender kita sa mga asamblea. An lugar nin asamblea sarong sentro nin pagsamba, asin maninigo ining trataron na may paggalang. Maninigo niatong perming siertohon na dai kita nagwalat nin ano man na ati kun saen kita nagtutukaw. Maninigong dai niato pag-isipon na idtong asignadong maglinig an mapurot paghale niato.
KUN MAY KAHIRAS SA TIRIPONAN
4 Kadakol na Kingdom Hall an ginagamit nin labi sa sarong kongregasyon. An lambang kongregasyon maninigong magkaigwa nin interes sa Kingdom Hall, na minimidbid na ini ki Jehova asin ginagamit sa saiyang pagsamba. Kairiba sa paggalang para sa tiriponan an pagpapaheling nin pagkamoot sa satong mga tugang sa ibang kongregasyon na minagamit kan tiriponan.
5 Sa pankagabsan, an paglilinig kan Kingdom Hall ginigibo nin makasaro sa sarong semana. Kun labi sa sarong kongregasyon an naggagamit kan tiriponan, marahay na magkaigwa nin paglilinig pakatapos kan pagtiripon sagkod sa itinotogot kan panahon tanganing an masunod na kongregasyon na madatong maheling na presentable an tiriponan. Minaaplikar man ini kun mga Domingo na an sarong kongregasyon minadatong pakatapos tolos kan saro; ta kun dai an tiriponan magigin maati sa katapusan kan aldaw.
6 Kun paanong kita “dayupot na magkasararo sa saro sanang pag-isip” sa espirituwal na mga bagay, logod na kita man magkasararo sa pagpapaheling nin paggalang para sa satong mga Kingdom Hall.—1 Cor. 1:10.