Papagdanayon Niato na Nasa Marahay na Kamugtakan an Satong Lugar nin Pagsamba
1. Ano an katuyohan kan Kingdom Hall?
1 Sa bilog na kinaban igwa nin labing 94,000 na kongregasyon kan Mga Saksi ni Jehova. An kadaklan na kongregasyon nagtitiripon para sa pag-adal sa Biblia asin Kristianong asosasyon sa Kingdom Hall, na nagseserbing lokal na sentro nin dalisay na pagsamba.
2. Taano ta mahalaga na papagdanayon na malinig asin presentable an Kingdom Hall?
2 Regular na Iskedyul sa Paglinig: An gibohon na pagmantener kan Kingdom Hall sarong mahalagang marhay na kabtang nin satong sagradong paglilingkod. An librong Our Ministry nagsasabi sa pahina 61-2: “Maninigo na ibilang kan mga tugang na pribilehio bako sana an pagsuportar sa Kingdom Hall sa pinansial kundi pagboluntaryo man kan saindang paglilingkod sa pagpapadanay kaiyan na malinig, presentable asin nasa marahay na kamugtakan. Sa laog sagkod sa luwas, maninigo na an Kingdom Hall angay na representasyon kan organisasyon ni Jehova.” Huling ginagamit an Kingdom Hall nin nagkapirang beses kada semana, kaipuhan an regular na paglinig asin mantension. Sa parate an mga boluntaryo hale sa (mga) kongregasyon na nagtitiripon sa Kingdom Hall an nag-aasikaso sa mga bagay na ini. Siring kan mga panahon kan Biblia, an Mga Saksi ni Jehova ngonyan maninigo man na magin mahigos sa “pagpakarhay asin paghirahay” kan satong lugar nin pagsamba.—2 Cron. 34:10.
3. Paano inoorganisar an paglinig kan Kingdom Hall, asin sairisay an puedeng makikabtang sa pribilehiong ini?
3 An iskedyul para sa semanal na paglinig kan Kingdom Hall maninigong ipaskil sa information board. Maninigo na magsarosalida an gabos na grupo sa pag-adal sa libro sa paglinig kan tiriponan kada semana, na sinusunod an listahan nin mga dapat gibohon. An gabos na may kakayahan kaipuhan na makikabtang sa semanal na pribilehio na pagpapadanay na malinig asin presentable an Kingdom Hall. Sa paggiya nin mga magurang, puedeng iiba an mga aki, na paagi kaiyan tinotokdoan sinda na magpaheling nin pagpahalaga sa pribilehiong ini. Nangorogna kun labi sa sarong kongregasyon an naggagamit nin sarong Kingdom Hall, kaipuhan an marahay na kooperasyon tanganing an pag-asikaso sa mahalagang aspektong ini nin satong pagsamba bakong para sa nagkapira sana.
4. Ano an maninigong gibohon tanganing maaraman kan kongregasyon an gigibohon kun naglilinig kan Kingdom Hall?
4 An listahan nin mga bagay na dapat gibohon puedeng ipaskil, posibleng sa sarayan nin mga suplay. An listahan na ini maninigong magpaliwanag kan mga obligasyon na gigibohon nin semanal, kaiba an paglinig kan mga bintana, pagpunas kan mga counter, pag-apon kan mga basura, pagbagunas kan salog, asin paglinig kan mga salming. An nagkapirang gibohon tibaad dai man kaipuhan na gibohon nin regular, arog kan pagpakintab kan ano man na muebles na gibo sa kahoy asin lubos na paglinig kan mga tukawan, paglaba kan mga kurtina, asin paglinig kan mga ilaw. An gabos na kemikal na ginagamit sa paglinig maninigong isaray tanganing dai makua nin mga aki asin maninigo na ngaranan nin malinaw. Maninigo na itao an halipot na eksplikasyon kun paano gagamiton an kada kemikal.
5. Gurano kahalaga kan pagigin ligtas sa peligro, asin anong mga bagay an kaipuhan na siyasaton sa panapanahon? (Helingon an kahon sa pahina 4.)
5 Mahalagang marhay an pagigin ligtas niato sa peligro kun nasa Kingdom Hall. (Deut. 22:8) Mapadapit digdi, nakalista sa kahon na nasa pahina 4 an nagkapirang bagay na kaipuhan na siyasaton sa panapanahon tanganing malikayan an mga aksidente.
6. Paano kinokoordinar an gibohon na pagmantener kan Kingdom Hall?
6 Pagmantener kan Kingdom Hall: An grupo nin kamagurangan an may paninimbagan na direhiran an mantension kan Kingdom Hall. Sa pankagabsan, nonombrahan an sarong magurang sa kongregasyon o ministeryal na lingkod na makoordinar kan gibohon. Sia an maorganisar kan aroaldaw na pagpunsionar kan Kingdom Hall, na sinesegurado na iyan napagdadanay na malinig asin nasa marahay na kamugtakan saka igwa nin supisyenteng mga suplay na magagamit. Mahalaga na mayo nin peligrosong mga kamugtakan sa tiriponan o sa palibot. Kun duwa o tolong kongregasyon an naggagamit nin sasarong tiriponan, manombra an mga grupo nin kamagurangan nin komite sa pagpunsionar na maorganisar kan mga areglo para sa pag-asikaso kan edipisyo asin propiedad. An komiteng ini nagpupunsionar sa pagdirehir kan mga grupo nin kamagurangan.
7. (a) Ano an ginigibo kada taon tangani na seguradohon na napagdadanay na nasa marahay na kamugtakan an Kingdom Hall? (b) Anong mga bagay an nagkakaipo nin panapanahon na atension? (Helingon an kahon sa pahina 5.)
7 Ginigibo nin taonan an detalyadong pag-inspeksion kan Kingdom Hall. Paninimbagan nin kamagurangan na gumibo nin mga areglo sa pag-asikaso nin lubos sa ano man na bagay na nagkakaipo nin atension. Puedeng imbitaran an mga parahayag na tumabang sa kinakaipuhan na mga paghirahay asin mantension. An gabos maninigong magin listo na asikasohon an saradit na bagay asin maninigong magin marikas sa pag-asikaso sa mga bagay na nagkakaipo nin atension.
8. Noarin puedeng kontakon kan kamagurangan an Opisina sa Pagtogdok nin Kingdom Hall manongod sa mga bagay na may koneksion sa mantension?
8 Kun sa pagmate kan kamagurangan kaipuhan ninda an suhestion o tabang sa pag-asikaso kan mantension kan Kingdom Hall, puede nindang kontakon an Opisina sa Pagtogdok nin Kingdom Hall sa sangang opisina. Puedeng kaiba digdi an mga bagay na arog kan paghirahay sa estruktura asin an pagremedyo sa mga nagtotoro sa edipisyo.
9. Anong prosedimiento an maninigong sunodon kun kaipuhan na magbayad nin sarong kontratista?
9 Paggamit nin Madonong kan Pondo kan Kongregasyon: An kadaklan na trabaho sa Kingdom Hall asin sa palibot ginigibo nin mga boluntaryo. An mapagsakripisyo nindang mga paghihingoa sarong marahay na kapahayagan nin pagkamoot asin nakatatabang nin dakula sa pag-ina kan gastos. Kun kaipuhan na magbayad nin kontratista na maasikaso kan nagkapirang trabaho, arog kan pagkontrol sa peste o dakulang paghirahay, mahanap an kamagurangan nin pinakabaratong mga alok (bid) para sa siring na gibohon. Ginigibo ninda ini paagi sa, enot pagpreparar nin detalyadong nasusurat na deskripsion kan gigibohon asin ano man na materyales na isusuplay. Tatawan nin tigsararong kopya kan listahan na ini an laen-laen na nagsusuplay tanganing an gabos mag-alok na may kaparehong pakasabot sa mga kahagadan. Pakaresibi nin nasusurat na mga alok hale sa nagkapirang puedeng magsuplay, mapili na an kamagurangan kan pinakamarahay na alok. An prosedimientong ini maninigong sunodon dawa kun sarong tugang an nag-alok na magtrabaho o magsuplay kan kinakaipuhan na materyales sa espesipikong presyo.
10. Ano an ginigibo tangani na masegurado na ginagamit nin tama an pondo kan kongregasyon?
10 Kun labi sa sarong kongregasyon an naggagamit kan Kingdom Hall, an komite sa pagpunsionar magkakaigwa nin suhay na deposito sa bangko asin matao nin nasusurat na bulanan na report sa pinansial sa kada grupo nin kamagurangan, sa siring pinagdadanay na aram kan kamagurangan kun paano ginagasto an pondo. An kamagurangan an may paninimbagan sa tamang paggasto kan pondo kan kongregasyon.
11. Ano an maninigong gibohon kun kaipuhan an dakulang mantension o paghirahay?
11 Kadakol na Mantension Asin Paghirahay: Kun sa pagmate kan komite sa pagpunsionar dakula an pangangaipo may koneksion sa pagpunsionar o mantension kan Kingdom Hall, sasabihon kan komite an bagay na iyan sa mga grupo nin kamagurangan para sa paggiya. Kun madeterminaran na kakaipuhanon an kadakol na mantension o paghirahay o na kaipuhan an tabang hale sa luwas kan (mga) kongregasyon na nagtitiripon sa Kingdom Hall na iyan, kokontakon kan kamagurangan an Opisina sa Pagtogdok nin Kingdom Hall. An departamentong ini matao nin nakakatabang na mga suhestion sa kun paano gigibohon an trabaho. Kun dakulang gastos an kalabot, kaipuhan na kumua nin tamang kalkulasyon sa gastos asin mag-andam nin sarong resolusyon para aprobaran kan kongregasyon.—Helingon an “Hapot” sa Pebrero 1994 An Satong Ministeryo sa Kahadean.
12. Paano niato ikapaheheling an satong pag-apresyar sa pribilehio na umatender sa mga pagtiripon sa Kingdom Hall?
12 Kanigoan an pag-apresyar niato sa satong pribilehio na iribang magtiripon sa Kingdom Hall! Nungka niatong gugustohon na mapabayaan an satong mga pagtiripon o ipasipara na sana iyan. An gabos makakokontribwir sa kapangganahan kan probisyon na ini para sa pagparigon sa boot niato paagi sa lubos na pakikikabtang sa pag-asikaso kan satong Kingdom Hall. Ibinabantog kaini an dalisay na pagsamba asin nagtatao ini nin onra sa ngaran ni Jehova. Magin determinado kita na papagdanayon na nasa marahay na kamugtakan an satong lugar nin pagsamba.
[Kahon sa pahina 4]
Listahan Para sa Pagigin Ligtas sa Peligro
◻ An mga fire extinguisher maninigong madaling makua asin inspeksionon nin taonan.
◻ An mga luwasan asin hagyan maninigong markado nin malinaw, supisyente an ilaw, asin madaling makua, saka maninigong ligtas sa peligro an mga barandilya.
◻ An mga kuartong sarayan asin kasilyas maninigong malinig, areglado, asin mayo nin materyales na madaling masolo, personal na mga bagay, patin basura.
◻ An atop asin mga sagurong maninigong inspeksionon asin linigan nin regular.
◻ An mga gilid nin dalan asin paradahan dapat na may ilaw asin pagdanayon na mayo nin ano man na puedeng magin dahelan nin pagkadarinas o pagbagsak.
◻ An mga sistema nin elektrisidad asin bentilasyon maninigong siyasaton asin manteneron nin tama.
◻ An ano man na nagtotoro maninigong hirahayon tolos-tolos tangani na malikayan an grabeng mga problema.
◻ An edipisyo maninigong baratan kun mayo nin tawo dian.
[Kahon sa pahina 5]
Pag-asikaso sa Edipisyo Asin Propiedad
◻ Sa luwas: Nasa marahay daw na kamugtakan an atop, lanob sa luwas, pintura, mga bintana, asin karatula kan Kingdom Hall?
◻ Palibot: Marahay daw an pagmantener kan palibot? Nasa marahay daw na kamugtakan an mga gilid nin dalan, mga kudal, asin paradahan?
◻ Sa laog: Presentable daw an salog, mga kurtina, tukawan, ilaw asin tubo nin tubig, pintura kan lanob saka mga kabinet kan literatura?
◻ Kasangkapan: Nagpupunsionar daw nin tama an ilaw, sound system, bentilasyon, asin air-condition?
◻ Mga kasilyas: Malinig daw asin tama an pagpunsionar kaini?
◻ Mga dokumento kan kongregasyon: Sunod daw sa panahon asin tama an mga dokumento kan korporasyon o mga titulo kan daga? Nakapag-aplay na daw nin iksemsion sa buhis para sa propiedad?