Mga Hapot Hale sa mga Parabasa

Huli ta an mga Kristiano dai nagpupusta nin kuwarta, puwede daw sindang umako nin mga tiket o magpartisipar sa mga paripa na dian tibaad magkapremyo sinda?

Hapot ini na sa parate nagbangon, kaya sinimbag na ini sa satong mga publikasyon. Sa ibang tataramon, may ilinuwas na kaming mga indese kan satong literatura, arog kan Watch Tower Publications Index 1930-1985 (asin sarong kapareho kaiyan na 1986-1990). Kun an sarong Kristiano igwa nin siring na mga indese sa saiyang tataramon, mapakikinabangan ini sa madaling paghanap nin nakakokontentong mga simbag.

Halimbawa kaini an hapot na nasa itaas. Kun hehelingon an Index para sa 1930-1985 sa temang “Questions From Readers,” manonompongan an subtemang “‘drawings,’ may Christian accept ticket for?” An nagbabasa itinotokdo sa kabtang na “Questions From Readers” sa The Watchtower na Pebrero 15, 1973, pahina 127 (“Mga Hapot hale sa mga Parabasa,” An Torrengbantayan, Nobyembre 1, 1973, pahina 350).a Dakol na Saksi an igwa kan tomo (o pasarosarong isyu) kan The Watchtower para sa 1973, o puwedeng helingon iyan sa libreriya nin dakol na Kingdom Hall.

An paliwanag na ipinublikar kan 1973 idinoon na an mga Kristiano tamang lumikay sa ano man na swipstik o mga paripa na kalabot an pagbakal nin suwerte (arog nin mga tiket sa ripa) o pagpusta para sa posibilidad na manggana nin premyo. Sa simpleng pagtaram, linilikayan niato an paghuwego, na pagpapaheling nanggad nin kahanaban.​—1 Corinto 5:​11; 6:​10; Efeso 4:​19; 5:​3, 5.

Minsan siring, an sarong tindahan o negosyo tibaad gumamit nin mga paripa sa pag-anunsio. An gigibohon man sana nin saro iyo an pagsumitir kan saiyang ngaran o pagpadara nin sarong porma o sarong tiket, dawa mayong binakal. An paripa parte kan pag-anunsio; dinisenyo ini bilang paagi na mayong pinaoorog sa pagdesisyon kun siisay an matatawan nin premyo o mga premyo. Igwang mga Kristiano na tibaad maghona na puwede sindang umako nin premyo sa paripa na daing kalabot na paghuwego, kun paanong puwede sindang umako nin libreng mga sampol o iba pang regalo na tibaad gamiton nin sarong negosyo o tindahan sa pagpaanunsio kaini.

Alagad, an nagkapirang Kristiano minalikay sa ano man na klase kaini, na habong makapasingkog o makaparibong sa iba asin naghihingoa man na rumayo sa ano man na pan-akit na magsarig sa Kapaladan. Siring sa ipinaheheling kan Isaias 65:​11, dai ilinalabot kan mga lingkod ni Jehova an saindang sadiri sa “dios nin Kapaladan” o “dios nin Kaaabtan.” Puwedeng namamatean man ninda na habo nindang magin kabtang nin ano man na publisidad na tibaad hagadon sa mga manggagana na pakikabtangan. An mga nakamamate nin siring kaini maninigo nanggad na dai man magin mapagkritika sa sarong Kristiano o mga Kristiano na an konsensia tinotogotan sinda na makikabtang sa siring na mga paripa.​—Ikomparar an Roma 14:​1-4.

[Nota sa Ibaba]