Gamiton an Index Tanganing Magtalubo sa Espirituwal
1 Poon kan 1930 sagkod 1985 an Sosyedad naggibo nin dakol na pantabang sa pag-adal sa Biblia. An espirituwal na kakanon na ini itinao bilang “kakanon sa igong panahon” tanganing tabangan an mga sinserong tawo na “magtalubo sa . . . kaaraman kan satong Kagurangnan asin Paraligtas, si Jesu-Cristo.” (Mat. 24:45; 2 Ped. 3:18) Ngonyan igwa kita kan Watch Tower Publications Index 1930-1985 na nakatatabang sato na hanapon an espisipikong mga punto nin impormasyon. Iyan makatatabang na gayo sa sato sa satong mga paghihingoa na orog pang umoswag sa espirituwal.—Tal. 4:18; 9:9.
2 An pakatatao sa paggamit kan Index gigibohon na pasil an paghanap nin impormasyon na kaipuhan sa pag-andam nin mga pahayag, pag-aatubang sa paglilingkod sa langtad, asin report, o sa pagsimbag sa mga hapot na may koneksion sa satong Kristianong pagtubod. Iyan puwedeng magin mahalagang gayo sa satong personal asin pampamilyang pag-adal, sa pag-andam para sa mga pagtiripon, asin para sa paghuhulit asin pagtotokdo. (Col. 4:6) Kaipuhan na maaraman niato an laen-laen na kabtang kaiyan.
MGA KABTANG
3 An nakatatabang na kabtang sa Index na ini iyo na an regular na mga artikulo sa The Watchtower asin Awake! ilinista sa irarom kan saindang mga tema, arog baga kan “Questions From Readers,” “Young People Ask . . . ,” asin “The Bible’s Viewpoint.” Siring man, an mga hapot sa An Satong Ministeryo sa Kahadean ilinista nin separado sa irarom kan “Question Box.” Sa siring an espisipikong impormasyon madaling makua nin mga magurang, paraataman, asin parahayag.
4 An saro pang marahay na kabtang kan Index na ini iyo an parte sa irarom kan “Dates,” na may subtemang “B.C.E.,” “C.E.,” asin “Clarification of Beliefs.” Siring man, an scripture index renebisar tanganing ilista sana an mga reperensia na nagtatao nin makahulogan na mga paliwanag manongod sa mga bersikulong sinitar.
5 An Index nakatatabang sato na masabotan an progresibong pagtalubo kan satong pakasabot sa dakol na tema sa Biblia. (Helingon an pahina 5, parapo 6 kan Index.) Ini ipinag-iilustrar na gayo kan pagkaindese kan impormasyon manongod sa terminong “porneia.” Sa irarom kan “meaning of word,” an bagong mga reperensia an enot na minalataw. An dugang pang impormasyon makukua sa irarom nin ibang subtema.—Helingon an Index, pahina 669.
MAHALAGANG INSTRUMENTO
6 An Talinhaga 2:4, 5 nagsasadol sato na hanapon an kaaraman manongod sa Dios na garo natatagong kayamanan. An paghanap na ini nagkakaipo nin paghihingoa asin kaigotan. Iyan nagkakaipo nin dakulang pagkotkot. Kanigoan kapakipakinabang na instrumento an itinao sa sato kan “maimbod asin madonong na oripon” tanganing magamit niato sa paggibo kaiyan! Gamiton niato an Index para sa ikararahay.