Pag-otob sa Satong Ministeryo sa Kahadean Bilang mga Saksi ni Jehova
1 Bilang mga Saksi ni Jehova nasa sato an pinakadakulang pribilehiyo sa ibabaw nin daga. Irenerepresentar niato si Jehova sa sarong unibersal na kaso sa husgado na nagbibista sa gabos na sinasamba bilang dios. (Isa. 41:1, 23; 43:12) Tanganing matabangan kita na ikadepensa an satong paglaom, si Jehova nagtagama nin kompletong librariya nin mga publikasyon. (1 Ped. 3:15) An Watch Tower Publications Index makatatabang sato na makua an impormasyon na kaipuhan niato.
2 Sa irarom kan mayor na temang “Jehovah” sa 1986-1989 Index, makakakua daw kamo nin mga reperensia na nagpapaliwanag sa temporaryong pagtogot ni Jehova sa karatan? Siring man, sa irarom kan nakasentrong tema na “Name” kapwa sa 1930-1985 asin sa presenteng Index, manonompongan nindo an mga reperensia sa gabos na ipinublikar manongod sa ngaran na Jehova.
3 An saro pang mayor na tema iyo an “Jehovah’s Witnesses.” Kabale dian an mga reperensia manongod sa sato bilang organisasyon. Aram daw nindo kun ano an satong opisyal na pagmansay sa halangkaw na inadalan, autopsiya, o pakagadan huli sa pagdepensa sa sadiri? Makukua nindo an siring na mga reperensia sa irarom kan subtemang “attitude toward—.” Kasunod pa an lista kan modernong mga kasaysayan kan mga Saksi ni Jehova sa laen-laen na nasyon, asin an halabang lista nin mga komento manongod sa sato manonompongan sa irarom kan “Statements by Others.”
4 Sa irarom kan temang “Dates,” igwa nin nakasentrong tema na “Clarification of Beliefs.” An mga reperensia para sa pangenot na mga pagklaripikar sa satong pakasabot sa mga doktrina asin hula nalilista nin sunod-sunod sono sa taon. Kasunod an “Dates of Prophetic Significance,” na ilinilista an mga taon na naotob an mga hula.
5 An mga kasaysayan kan nagin buhay nin maimbod na mga lingkod ni Jehova makatatabang sato na makabugtak nin marigon na pundasyon sa satong mga aki asin mga inaadalan sa Biblia. Manonompongan nindo na ini nakalista sa ngaran asin titulo kan artikulo sa irarom kan “Life Stories of Jehovah’s Witnesses.”
6 Napapalaen manongod sa banwaan ni Jehova an Makakasuratan na katokdoan nin duwang destino para sa mga inoyonan ni Jehova—sarong langitnon asin sarong daganon. An mga reperensia sa “heavenly calling” manonompongan sa irarom kan “Congregation of God.” (Heb. 3:1; Gibo 20:28; 1 Tim. 3:15) An iba pang tema iyo an “Remnant” asin “144,000.” An duwang tema, “Great Crowd” asin “Other Sheep,” manongod sa daganon na paglaom.—Kap. 7:9; Juan 10:16.
7 Baga man kita hoben o gurang, an pribilehiyo na magin saro sa mga Saksi ni Jehova may labot sa gabos na kabtang nin buhay. An maabot pang mga artikulo sa An Satong Ministeryo sa Kahadean magpapaliwanag kun paano an Index makatatabang sato sa satong ministeryo, sa laog kan pamilya, asin sa kongregasyon.