Tawan nin Onra si Jesu-Cristo—An Pasisikadan kan Satong Pagtubod
1 Napakahalaga kan pakasabot sa katongdan ni Jesu-Cristo sa pagkaotob kan mga katuyohan ni Jehova. (Mat. 20:28) Kun mayo kan mga probisyon ni Jehova paagi ki Jesu-Cristo, mayo kutana kita nin paglaom sa ngapit.
2 Nangorogna sa panahon kan Memorial, hinohorophorop niato an buhay ni Jesus, an saiyang mga katokdoan, asin an saiyang atang. (Luc. 22:19) Sa pakasabot na “ipinamimidbid nin Dios an saiyang pagkamoot sa sato sa paagi na, mantang kita mga parakasala pa, si Cristo nagadan para sa sato,” kita napahihirong tawan nin onra an Dios asin si Cristo. Paano niato magigibo ini?—Roma 5:8, 10.
PAGPAHELING NIN PAGPASALAMAT
3 Minimidbid niato na an naheheling na organisasyon ni Jehova nagtatrabaho sa irarom kan pagkapayo ni Jesus. An grupong maimbod na oripon nagtatao sato kan espirituwal na pagkakan na kaipuhan niato. Poon sa saiyang pagkaniaki, si Jesus nagpaheling nin hararom na pag-apresyar sa Tataramon nin Dios, asin boot niatong arogon an saiyang halimbawa paagi sa pag-adal sa itinataong espirituwal na kakanon sa katuyohan na matokdoan nin epektibo an iba. (Mat. 24:45, 46; Luc. 2:46-50) An pagpasalamat niato para sa organisasyon ipinaheheling paagi sa satong pagkuyog sa paggiya kaiyan asin pakikikooperar sa kamagurangan.
4 Ikapaheheling man niato an onra ki Cristo paagi sa pag-aplikar kan satong nanonodan sa Tataramon nin Dios. Si Jesus “siblag sa mga parakasala.” (Heb. 7:26) Dai sia nagsasabi nin sarong bagay asin iba man an ginigibo. Bilang mga kapwa oripon, kaipuhan na kita makaotob man sa halangkaw na pamantayan na iyan. Kaya kun kita nagpapahayag manongod sa matanos na bagong palakaw, boot niato na mamuhay na ngonyan sa paagi na magpapamidbid sato bilang kabilang kan bagong kinaban.—Mat. 7:21; 1 Cor. 1:18; 1 Juan 2:17.
PAGHUHULIT SAKOP KAN PAGKAPAYO NI CRISTO
5 Ngonyan na Marso iaalok niato an librong Revelation, na nagpapaheling kan mensahe ni Jesu-Cristo para sa satong aldaw. (Kap. 1:1) Magmaigot kita sa pagpaliwanag kun paano an katuyohan nin Dios madali nang makaabot sa kulminasyon kaiyan paagi sa hade, si Jesu-Cristo.
6 An sarong dakulang grupo nin mga tawo magpapaheling nin paggalang ki Jesus paagi sa pag-atender sa Memorial ngonyan na bulan. An mga ini daw matatabangan na umoswag paagi sa personal na pag-adal sa Biblia? Seguradohon niato na may tumabang sa sainda tanganing sa masunod na Memorial, sinda nakikikabtang na sa ministeryo.
7 Kanigoan an satong pagpasalamat sa mamomoton na atang kan satong Parabalukat, si Jesus! Tawan niato sia nin onra paagi sa pag-arog sa saiyang marahay na halimbawa.