Pag-otob kan Satong Ministeryo sa Kahadean sa Kongregasyon
1 Si Jehova, paagi ki Jesu-Cristo, nagtao nin paninimbagan sa “maimbod na mayordomo,” o namamahala sa harong. (Luc. 12:42, 43) An areglong ini nagpangyari sato na mag-ako nin napublikar na paggiya kun paano ‘niato maaraman kun paano kita magawe sa harong nin Dios.’ (1 Tim. 3:15) Paano an Watch Tower Publications Index makatatabang saindo na manompongan an napublikar na?
2 Kamo daw sarong magurang? May duwang tema manongod sa saindong mga paninimbagan: an “Elders” asin “Overseers.” An seksion na “Elders” may mga reperensia manongod sa pagtabang sa mga kabilang sa kongregasyon, kun paano magsadol, an relasyon sa laog kan grupo nin kamagurangan, mga paninimbagan kan mga magurang, abp. An mga reperensia sa mga kuwalipikasyon manonompongan sa temang “Overseers,” mantang ini an terminong ginagamit sa Biblia kun kinokonsiderar ini. Siring man sa irarom kan “Overseers” an opisyal na mga asignasyon, siring sa “presiding overseer,” “service overseer,” asin “secretary.”
3 Kamong mga ministeryal na lingkod makakukua nin impormasyon sa saindong mga kuwalipikasyon asin mga paninimbagan sa temang “Ministerial Servants.” Makakakua man kamo nin mga reperensia sa materyal manongod sa mga pribilehiyo sa paglilingkod na bukas saindo asin kun paano magmamaigot para sa dugang pang paninimbagan.
4 An temang “Meetings” nagtatao man nin mga reperensia sa kada kabtang kan tema, kabilang an nakapupukaw sa boot na mga halimbawa sa irarom kan “efforts to attend.” Siyempre, may pangenot na mga tema man para sa kada pagtiripon.
5 An Salmo 68:11 nagsasabi: “An mga babae na nagsasabi kan maogmang bareta dakulang hukbo.” Siring sa mga lalaking miembro kan kongregasyon, an mga tugang na babae man dapat sumunod sa tamang paggawe para sainda sa harong nin Dios. Kun minsan may nalataw na mga hapot manongod sa paglambong o kun ano an gigibohon kun daing presenteng kuwalipikadong tugang na lalaki tanganing mangenot sa pagtiripon o magrepresentar kan kongregasyon sa pamibi. An temang “Women” magtotokdo saindo kan impormasyon sa mga temang ini. Makatatabang man an mga temang “Sisters,” “Head Covering,” asin “Prayer.”
6 Gumawe kita nin angay sa harong nin Dios, na inootob an satong ministeryo sa Kahadean sa laog kan kongregasyon.