Mga Ministeryal na Lingkod na Naggigibo nin Mahalagang Paglilingkod

SA KONGREGASYON sa Filipos, nagsurat si apostol Pablo: “Hali ki Pablo asin Timoteo, na mga uripon ni Cristo Jesus, para sa gabos na mga banal na kasaro ni Cristo Jesus na yaon sa Filipos, pati na sa mga paraataman asin mga ministeryal na lingkod.” (Fil. 1:1) Mangnuhon na nagpaabot siya nin pangungumusta sa mga ministeryal na lingkod. Malinaw na an mga lalaking ini igwa nin importanteng papel sa pagtabang sa kamagurangan sa kongregasyon kaidto. Totoo man iyan ngunyan. An paglilingkod ninda nakakatabang sa mga paraataman asin sa pagigin areglado kan kongregasyon.

² Bisto mo an mga ministeryal na lingkod sa kongregasyon nindo? Aram mo daw an mga ginigibo ninda na nakakatabang saimo asin sa bilog na kongregasyon? An paghihinguwa ninda pinapahalagahan nanggad ni Jehova. Nagsurat si Pablo: “An mga naglilingkod sa mahusay na paagi nagkakaigwa nin marahay na reputasyon asin nakakapagtaram na daing pag-alangan mapadapit sa pagtubod ninda ki Cristo Jesus.”—1 Tim. 3:13.

MGA KAHAGADAN SA KASURATAN PARA SA MGA MINISTERYAL NA LINGKOD

³ An mga ministeryal na lingkod inaasahan na may marahay na Kristiyanong pamumuhay, responsable, asin inaasikaso nin mahusay an mga paninimbagan ninda. Malinaw ta ining mahihiling sa sinabi ni Pablo sa surat niya ki Timoteo manungod sa mga kuwalipikasyon ninda: “An mga ministeryal na lingkod dapat na seryoso, bakong magkaiba an mga pigsasabi, dai nagpapangana sa arak, bakong mahanab sa materyal na pakinabang, asin nangangapot sa sagradong hilom kan pagtubod na may malinig na konsiyensiya. Siring man, purbaran nguna an mga ini kun baga angay sinda sa pribilehiyo; dangan puwede na sindang magin mga ministeryal na lingkod, huling mayo nin mairereklamo laban sa sainda. An ministeryal na lingkod dapat na agom nin sarong babayi, na pinapanginutan an saiyang mga aki asin an saiyang pamilya sa mahusay na paagi.” (1 Tim. 3:8-10, 12) Huli sa pagsunod sa halangkaw na pamantayan para sa mga ministeryal na lingkod, napoprotektaran an kongregasyon sa mga akusasyon may koneksiyon sa klase nin mga lalaki na pinagkakatiwalaan nin mga paninimbagan.

⁴ Hoben man o may edad na, an mga ministeryal na lingkod aktibo sa ministeryo kada bulan. Maigot sinda sa ministeryo arog ni Jesus. Paagi kaiyan, nahihiling sa sainda an kagustuhan ni Jehova na iligtas an mga tawo.—Isa. 9:7.

⁵ An mga ministeryal na lingkod arugan man sa saindang pagbado, pag-ayos kan sadiri, pagtaram, ugali, asin paggawi. Tultol an isip ninda, kaya iginagalang sinda kan iba. Dugang pa, pinapahalagahan nindang marhay an saindang relasyon ki Jehova asin sineseryoso ninda an saindang mga pribilehiyo sa kongregasyon.—Tito 2:2, 6-8.

⁶ An mga lalaking ini ‘napurbaran na kun baga angay sa pribilehiyo.’ Bago pa man sinda nombrahan, nahiling na an saindang kaimbudan. Ipinahiling ninda na iniinot ninda sa saindang buhay an intereses kan Kahadian asin naghihinguwa sindang maabot an ano man na pribilehiyo nin paglilingkod na bukas sa sainda. Talagang mga halimbawa sinda sa kongregasyon.—1 Tim. 3:10.

KUN PAANO SINDA NAGLILINGKOD

⁷ May iba-ibang paglilingkod na ginigibo an mga ministeryal na lingkod para sa mga tugang, kaya mas dakul an panahon kan mga paraataman na maasikaso an paninimbagan ninda na magtukdo asin magpastor. Pag nagtatao nin mga asignasyon an grupo nin kamagurangan, kinokonsiderar ninda an kakayahan kan mga ministeryal na lingkod asin an pangangaipo kan kongregasyon.

⁸ Isipon nindo an nagkapira sa mga paglilingkod na ginigibo ninda: May ministeryal na lingkod na naasignaran na mag-asikaso kan mga literatura tanganing makakua kita nin personal na kopya asin nin magagamit sa ministeryo. An iba naasignaran na mag-asikaso kan accounts kan kongregasyon o kan rekord kan teritoryo. May mga naasignaran na mag-abot nin mikropono, mag-operate kan sound system, magin attendant, asin tumabang sa mga elder sa iba pang gibuhon. Kadakul nin gibuhon sa pagmentenar kan Kingdom Hall asin pagmantenir kan kalinigan kaiyan, kaya an mga ministeryal na lingkod parating pinapatabang sa pag-asikaso kan mga paninimbagan na ini.

⁹ Sa nagkapirang kongregasyon, tibaad puwedeng mag-asignar nin iba-ibang ministeryal na lingkod sa kada gibuhon na iyan. Sa ibang kongregasyon man, tibaad may nagkapirang paninimbagan an sarong ministeryal na lingkod. May pagkakataon man na labi sa sarong ministeryal na lingkod an nag-aasikaso sa sarong gibuhon. Kun kulang an ministeryal na lingkod na maasikaso sa nagkapira sa mga gibuhon na ini, puwedeng iasignar kan grupo nin kamagurangan sa ibang arugan na bawtisadong mga brother an mahalagang gibuhon na ini. Paagi kaiyan, magkakaigwa sinda nin eksperyensiya na magagamit ninda pag kuwalipikado na sindang nombrahan bilang ministeryal na lingkod. Kun mayong brother na puwedeng asignaran, an sarong arugan na sister puwedeng patabangon sa nagkapirang gibuhon dawa ngani, siyempre, dai man siya nonombrahan bilang ministeryal na lingkod. Maibibilang na arugan an saro kun an paggawi asin pagsamba niya masasabing angay na arugon. Marahay siyang ehemplo sa iba pag-abot sa pag-atender sa pagtiripon, pakikikabtang sa ministeryo, buhay pampamilya, pinipiling libangan, pagbado saka pagpakarhay sa sadiri, asin iba pa.

¹⁰ Sa mga kongregasyon na pira sana an elder, an may kakayahan na mga ministeryal na lingkod puwedeng asignaran na iyo an magrepaso sa mga kandidato sa bawtismo kan mga hapot may koneksiyon sa mga doktrina. Yaon iyan sa Apendise “Kabtang 1: Kristiyanong mga Paniniwala.” An “Kabtang 2: Kristiyanong Pamumuhay” igwa nin sensitibo asin personal na mga hapot, kaya dapat na elder an magrepaso kan kabtang na ini.

¹¹ Tibaad mahiling kan grupo nin kamagurangan na makakatabang kun sa pana-panahon pagribayon an ibang mga asignasyon na kinakaputan kan mga ministeryal na lingkod. Pero dakula an bentaha kun dai babaguhon sa huruhalawig na panahon an mga asignasyon kan mga brother na iyan tanganing masanay asin magin mahusay sinda diyan.

¹² Depende sa kamugtakan kan kongregasyon, tibaad may iba pang paninimbagan na puwedeng iasignar sa mga ministeryal na lingkod na an pag-uswag ‘malinaw na nahihiling kan gabos na tawo.’ (1 Tim. 4:15) Kun kulang an mga elder, an sarong ministeryal na lingkod puwedeng asignaran bilang assistant nin paraataman nin grupo o, sa nagkapirang kamugtakan, bilang group servant, na nasa irarom kan superbisyon kan mga elder. Puwede man na iasignar sa mga ministeryal na lingkod an pirang kabtang sa Pagtiripon na Pamumuhay Asin Ministeryo, kaiba na an pagkondukta kan Pag-adal sa Bibliya kan Kongregasyon kun kaipuhan, asin pagtao nin pampublikong mga pahayag. May iba pang pribilehiyo na puwedeng itao sa mga ministeryal na lingkod kun may partikular na pangangaipo asin kun naaabot ninda an mga kahagadan para diyan. (1 Ped. 4:10) Pag an mga ministeryal na lingkod nagtatabang sa mga elder, dapat na gikan iyan sa buot.

¹³ Minsan ngani iba an gibuhon ninda sa mga elder, iyan parte man kan sagradong paglilingkod sa Diyos asin importante para magin areglado an pagpunsiyonar kan kongregasyon. Pag-abot nin panahon, kun mahusay na ginigibo kan mga ministeryal na lingkod an paninimbagan ninda asin magin kuwalipikado sinda na maglingkod bilang mga pastor asin paratukdo, puwede sindang irekomendar bilang mga elder.

¹⁴ Kun ika tin-edyer o bagong mabawtismuhan na brother, naghihinguwa ka daw na makuwalipikar na magin ministeryal na lingkod? (1 Tim. 3:1) Huling kadakul nin nababawtismuhan kada taon, kaipuhan nin kuwalipikadong espirituwal na mga lalaki na maasikaso kan mga paninimbagan sa kongregasyon. Maaabot mo an mga pribilehiyo kun papakusugon mo an pagmawot na tumabang sa iba. An sarong paagi para magibo iyan iyo an paghurop-hurop sa marahay na halimbawa ni Jesus. (Mat. 20:28; Juan 4:6, 7; 13:4, 5) Magkukusog an pagmawot mong tumabang sa iba mantang namamatian mo an kaugmahan sa pagtao. (Gibo 20:35) Kaya magboluntaryo ka sa pagtao nin praktikal na tabang sa iba, sa pagmentenar kan Kingdom Hall, o na magin karibay kun dai magigibo kan estudyante an asignasyon niya sa Pagtiripon na Pamumuhay Asin Ministeryo. Kaipuhan man na hinguwahon mong magkaigwa nin espirituwal na mga kuwalidad na resulta nin marahay na rutina nin personal na pag-adal. (Sal. 1:1, 2; Gal. 5:22, 23) Dugang pa, an brother na naghihinguwang umabot nin pribilehiyo maaasahan asin sadiyosan sa paggibo kan mga asignasyon niya sa kongregasyon.—1 Cor. 4:2.

¹⁵ An mga ministeryal na lingkod ninombrahan kan banal na espiritu para sa kapakanan kan kongregasyon. Maipapahiling kan gabos sa kongregasyon an pagpapahalaga sa kahigusan kan mga ministeryal na lingkod paagi sa pakikikooperar sa sainda mantang inaasikaso ninda an mga paninimbagan ninda. Sa paaging ini, ipinapahiling kan kongregasyon na pinapahalagahan ninda an probisyon ni Jehova para mapagdanay na areglado an kongregasyon.—Gal. 6:10.