Pagpapadanay nin Pagkaoroyon sa Pag-oltanan kan mga Magurang Asin Ministeryal na Lingkod

DAI nahaloy pakatapos kan Pentecostes 33 C.E., sarong emerhensia an luminataw sa bago pa sanang mabilog na Kristianong kongregasyon. Inestablisar an areglo sa pag-asikaso sa nangangaipong mga balo. Pero taud-taod “an mga Judiong nagtataram nin Griego naggurumodgumod tumang sa mga Judiong nagtataram nin Hebreo, huli ta an saindang mga balong babae napapabayaan sa aroaldaw na pagwaras.”​—Gibo 6:1.

An mga reklamong ini nakaabot sa pandangog kan mga apostol: “Kaya tiniripon kan dose an kadaklan nin mga disipulo asin nagsabi: ‘Dai nakakaogma sa samo na pabayaan an tataramon nin Dios tanganing magwaras nin kakanon sa mga lamesa. Kaya, mga tugang, maghanap kamo nin pitong lalaki na marahay an dangog dian sa tahaw nindo, na pano nin espiritu asin kadonongan, tanganing manombrahan niamo sinda para sa mahalagang gibong ini.’”​—Gibo 6:​2, 3.

Ini nag-iilustrar kan mahalagang prinsipyo nin pag-organisar sa laog kan Kristianong kongregasyon. An nagkapirang responsableng lalaki ginagamit sa pag-asikaso sa rutinang mga bagay, mientras na an iba nag-aasikaso sa mas magagabat na pangangaipo sa espirituwal. Ini bakong mayong arogan. Sa suanoy na Israel, si Aaron asin an saiyang mga gikan ninombrahan na maglingkod bilang mga saserdote sa paggibo nin mga atang sa Dios. Alagad, nagboot si Jehova na an mga Levita tumabang sainda paagi sa ‘pag-asikaso kan gabos na kasangkapan kan tolda nin katiriponan.’ (Bilang 3:​5-10) Kaagid kaiyan, an mga paraataman ngonyan tinatabangan kan ministeryal na mga lingkod.

An Kabtang kan mga Magurang Asin Ministeryal na Lingkod

Sinasabi kan Kasuratan an halangkaw na mga kuwalipikasyon kapwa para sa mga magurang asin ministeryal na lingkod. (1 Timoteo 3:​1-10, 12, 13; Tito 1:​6-9) Bako sindang mga parapakikompetensia kundi naggigibo para sa parehong pasohan​—an pagparigon sa kongregasyon. (Ikomparar an Efeso 4:​11-13.) Minsan siring, igwa nin nagkapirang pagkakalaen sa trabahong ginigibo ninda sa kongregasyon. Sa 1 Pedro 5:​2, sinasabihan an mga paraataman: “Pastoran an aripompon nin Dios na nasa saindong pangataman, bakong sa kapiritan, kundi gikan sa boot; bakong huli sa pagkamoot sa madayang pakinabang, kundi may kaigotan.” Sinda may paninimbagan sa Dios kun paano ninda inootob an banal na obligasyon na ini.​—Hebreo 13:17.

Kumusta man an ministeryal na mga lingkod? Dai hinahagad kan Kasuratan na sinda magin siring kakuwalipikado sa saindang abilidad sa pagtokdo. An saindang mga obligasyon medyo laen kan sa mga magurang. Kan enot na siglo C.E., daing duwa-duwa na igwa nin kadakol na bagay manongod sa materyal, rutina, o mekanikal na naghahagad nin atension, tibaad kabale na an pagbakal nin materyal para sa pagkopya kan Kasuratan o an mismong pagkopya pa ngani kaiyan.

Ngonyan, padagos na inootob kan ministeryal na mga lingkod an laen-laen na importanteng gibohon sa laog kan kongregasyon, siring baga kan pag-asikaso sa kuwenta asin mga teritoryo kan kongregasyon, pagwaras nin mga magasin asin libro, asin pagmantenir kan Kingdom Hall. An ibang ministeryal na lingkod na igwang abilidad puwede pa nganing gamiton sa pagtokdo, kun beses sa pangengenot sa mga Pag-adal sa Libro kan Kongregasyon, pagkapot nin mga kabtang sa Pagtiripon sa Paglilingkod, asin mga pagpahayag sa publiko.

Kun oroyon na nagtitinabangan an mga magurang asin ministeryal na lingkod, an mga pangangaipo kan kongregasyon​—kapwa sa espirituwal asin organisasyon—​naaasikaso sa timbang na paagi. Kun siring magayagaya, makosog, asin mabunga sa espirituwal an mga miembro kan kongregasyon. Girumdomon an isinurat ni Pablo sa mga linahidan sa Efeso: “Paagi sa pagkasorogpon na may pagkaoroyon asin pagtarabangan paagi sa lambang kabtang na nagtatao kan kinakaipuhan, sono sa igong paggibo kan lambang miembro, nagbubunga kan pagtalubo kan hawak para sa pagkosog mismo kaiyan sa pagkamoot.”​—Efeso 4:16.

An mga magurang asin ministeryal na lingkod kaipuhan na magmaigot na pataluboon an kaparehong pagkaoroyon, an boot sabihon, pagkasurundo, pagkaburonyog, pagkooperar, asin pagkasararo. Alagad an siring na pagkaoroyon dai basta nangyayari. Iyan kaipuhan na kultibaron asin maingat na protehiran.

Kun Ano an Puwedeng Gibohon kan mga Magurang

An sarong importanteng paagi iyo na midbidon na an relasyon nin magurang sa ministeryal na lingkod bakong siring kan sa relasyon nin kagurangnan sa oripon o kan among sa empleyado. Kun saen igwa nin tunay na pagkaoroyon, minamansay kan mga magurang an mga ministeryal na lingkod bilang mga kapwa ministro nin Dios. (Ikomparar an 1 Corinto 3:​6-9.) “Sa pagpaheling nin onra sa lambang saro mangenot kamo,” an sabi kan Roma 12:10. Kaya linilikayan kan mga magurang an pagtratar sa ministeryal na mga lingkod sa mga paagi na tibaad lumataw na pagpababa o pagmenus. Sinda nagpapakosog, imbes na nagraraot, nin kapakipakinabang na sadiring kabotan. An pagtratar na may paggalang sa ministeryal na mga lingkod may tendensiang paoswagon an pinakamarahay sa sainda asin tinatabangan sinda na maogma sa saindang gibohon sa kongregasyon.

Kaipuhan man na isaisip kan mga magurang na an sugo sainda na pastoran an aripompon nin Dios na nasa pangataman ninda kabale an mga tugang na naglilingkod bilang ministeryal na mga lingkod. Totoo, an siring karesponsableng mga lalaki linalaoman na maygurang na mga Kristiano. Minsan siring, arog kan iba sa aripompon, kaipuhan ninda nin personal na atension paminsanminsan. Maninigo na an mga magurang magin alistong interesado sa saindang espirituwal na pagtalubo.

Halimbawa, kan mamidbid ni Pablo an solterong si Timoteo, namansayan nia tolos an potensial ni Timoteo asin “nagpahayag kan kamawotan na an lalaking ini umiba sa saiya.” (Gibo 16:3) Naglingkod si Timoteo bilang kaiba ni Pablo sa pagbiyahe, na nag-aako nin pinakamahalagang pagsasanay bilang resulta. Tara, kan huring mga taon si Pablo nagsurat sa mga Kristiano sa Corinto: “Isinugo ko sa saindo si Timoteo, huli ta sia an sakong namomotan asin maimbod na aki dian sa Kagurangnan; asin ipagigirumdom nia sa saindo an sakong mga paagi mapadapit ki Cristo Jesus”!​—1 Corinto 4:17.

Mga magurang, pinonan na daw nindong gamiton an bilog na potensial kan ministeryal na mga lingkod sa saindong kongregasyon? Tinatabangan daw nindo sindang umoswag paagi sa pagtao sainda nin personal na pagsasanay sa pagtaram sa publiko asin pagsiyasat sa Biblia? Inimbitaran na daw nindo an mga kuwalipikado na ibanan kamo sa mga pagpapastor? Kamo daw nakikiiba sainda sa ministeryo sa langtad? Sa parabola ni Jesus manongod sa mga talento, an kagurangnan nagsabi sa saiyang maimbod na mga lingkod: “Marahay na gibo, marahay asin maimbod na oripon!” (Mateo 25:23) Kamo daw matinao man nin pag-omaw asin komendasyon sa ministeryal na mga lingkod na pormal na inootob an saindang mga asignasyon sa marahay na paagi? (Ikomparar an Talinhaga 3:27.) Kun dai, mamamatean daw ninda na dai inaapresyar an saindang ginigibo?

An komunikasyon mahalaga man sa sarong nagkakaoroyon na relasyon sa pagtrabaho. (Ikomparar an Talinhaga 15:22.) An mga obligasyon maninigong dai iasignar o kuanon sa sadiri sanang kagustohan o patibasang na paagi. An mga magurang maninigong mapagngayongayong mag-orolay kun paano puwedeng pinakamarahay na magamit an mga abilidad nin sarong tugang na lalaki sa kongregasyon. (Ikomparar an Mateo 25:15.) Kun itinatao an asignasyon, an tugang maninigong maingat na tawan nin instruksion sa kun ano talaga an hinahagad sa saiya. “Kun mayo nin eksaktong paggiya,” nagpapatanid an Talinhaga 11:​14, “mapupukan an banwaan.”

Bako pinakamarahay na sabihan na sana an sarong tugang na lalaki na kapotan an departamento nin kuwenta, magasin, o literatura hale sa saro pang naglilingkod. Kun beses an bago pa sanang iasignar na lingkod nagmamana nin kadakol na bakong tama o bakong kompletong mga rekord. Kanigoan kanakapanluluya nin boot! “Gibohon an gabos na bagay sa disente asin aregladong paagi,” an tokdo kan 1 Corinto 14:40. An mga magurang maninigong magboluntaryo na sanayon an mga tugang na lalaki, na iniimpormaran sinda kan mga prosedimiento sa kongregasyon asin na nagtatao mismo nin halimbawa sa pagsunod sa siring na mga prosedimiento. Halimbawa, kaipuhan na iareglo kan mga magurang na siyasaton kada tolong bulan an kuwenta kan kongregasyon. An pagpabaya sa siring kaimportanteng areglo puwedeng gumiya sa mga problema asin makapaluya sa paggalang kan ministeryal na mga lingkod sa organisasyonal na mga instruksion.

Pero ipamugtak na an sarong tugang garo baga pabaya sa pag-asikaso sa sarong partikular na asignasyon? Imbes na tolos-tolos siang haleon sa saiyang asignasyon, maninigong ipakipag-olay kan mga magurang sa saiya an mga bagay. Tibaad an problema kakulangan nin pagsasanay. Kun an tugang padagos na nagkakaigwa nin mga kadepisilan sa pag-asikaso sa saiyang asignasyon, tibaad mas marahay sia sa ibang asignasyon.

An mga magurang makakapaoswag man nin pagkaoroyon paagi sa pagpaheling nin kapakumbabaan. Dinadagka kan Filipos 2:3 an mga Kristiano na ‘dai gumibo nin ano man huli sa iriwal o huli sa kapalangkawan, kundi sa kapakumbabaan nin pag-isip na ibinibilang an iba na mas halangkaw kisa saindo.’ Kun siring an magurang maninigong maghingoa na makikooperar kun ginigiyahan sia kan attendant na tumukaw sa sarong tukawan sa hall, na dai nangangatanosan na huling sia magurang, dai nia kaipuhan na kumuyog. Tibaad sinusunod sana kan attendant an suhestion na tumukaw sa laen-laen na kabtang kan hall, minsan ngani maninigo niang girumdomon na mayo nin susundon na gabos kaipuhan na gumibo kaiyan.a Lilikayan kan magurang an dai kinakaipuhan na pagpagilid sa mga desisyon manongod sa mga bagay na iinasignar sa ministeryal na lingkod.

Ministeryal na mga Lingkod na Nagtatrabaho Para sa Pagkaoroyon

“An ministeryal na mga lingkod maninigo man na magin pormal,” an sabi ni apostol Pablo. (1 Timoteo 3:8) An saindang pormal na pagmansay sa mga asignasyon​—bilang kabtang kan saindang banal na paglilingkod—​dakol an nagigibo tanganing malikayan na lumataw an mga tension. Kun kamo ministeryal na lingkod, ginigibo daw nindo an saindong mga obligasyon na may entusiasmo? (Roma 12:​7, 8) Nagmamaigot daw kamo na magin eksperto sa pag-asikaso kan saindong mga obligasyon? Kamo daw matitiwalaan asin masasarigan? Kamo daw nagpapaheling nin andam na espiritu kun manongod sa mga asignasyon? An sarong ministeryal na lingkod sa sarong nasyon sa Aprika nagkakapot nin tolong laen-laen na asignasyon sa kongregasyon. An saiyang kaisipan? “Bueno, nangangahulogan sana iyan nin orog pang kahigosan,” an sabi nia, “asin an kahigosan dai makagagadan saindo.” Tunay nanggad, an mga nagboboluntaryo nagkakamit kan pinakadakol na kaogmahan.​—Gibo 20:35.

Makakagibo man kamo nin dakol sa pagpaoswag nin pagkaoroyon paagi sa lubos na pakikikooperar sa mga magurang. “Magin kamong makinuyog duman sa mga nangengenot dian sa tahaw nindo asin magin mapagpasakop,” sabi kan Hebreo 13:​17, “huli ta sinda nagbabantay sa saindong kalag bilang an mga maninimbag; tanganing ini magibo nindang may kaogmahan asin bakong sa kamondoan, huli ta ini makararaot sa saindo.” Totoo, an mga magurang bakong sangkap na mga tawo, asin tibaad pasil na makaheling nin sala sainda. Alagad an mapagtatsar na kaisipan nagbubunga nin dai pagtiwala. Iyan makararaot sa saindong kagayagayahan asin maraot an epekto sa iba sa kongregasyon. Kaya itinao ni apostol Pedro an hatol na ini: “Kamong mga hoben, magpasakop kamo sa kamagurangan. Alagad gabos kamo maghagkos nin kababaan nin boot sa lambang saro . . . Kaya magpakumbaba kamo sa irarom kan mapangyaring kamot nin Dios, tanganing ilangkaw nia kamo sa igong panahon.”​—1 Pedro 5:​5, 6.

An siring na hatol partikularmenteng angay kun namamatean nindo na kamo nalilingawan para sa mga pribilehiyo nin paglilingkod. Tibaad kaidto pa kamo “naghihingoang maabot an katongdan nin paraataman,” pero mayo pang pagnombrar na ginibo. (1 Timoteo 3:1) An kababaan nin boot makakatabang saindo na pagdanayon an “mapaghalat na kaisipan.” (Lamentacion 3:24) Imbes na makamate nin paghinanakit sa mga magurang​—na siertong makakapaluya sa saindong relasyon sa pagtrabaho—​hapoton sinda kun may mga kabtang na puwede kamong makagibo nin pag-oswag. An saindong tunay na pagigin andam na umako asin iaplikar an sadol daing duwa-duwa na maheheling bilang ebidensia nin espirituwal na pagtalubo.

An diosnon na kapakumbabaan asin kababaan nin boot makakatabang sa ministeryal na lingkod na pagdanayon an saiyang pagkabalanse kun igwa sia nin pambihirang mga abilidad o edukasyonal asin sosyal na mga bentaha. Tibaad kanigoan kanakakatentar para sa saiya na labawan an mga magurang o darahon an atension sa saiya mismong mga abilidad! Nagpapagirumdom sa sato an Talinhaga 11:2 na “yaon sa mga may hababang boot an kadonongan.” An tugang na lalaking may hababang boot aram an saiyang mga limitasyon. Andam siang toninong na magtrabaho sa likod asin gamiton an saiyang mga abilidad sa pagsuportar sa mga magurang. An kababaan nin boot puwede man siang tabangan na marealisar na dawa dakol siang kaaraman sa kinabanon na paagi, tibaad kulang pa sia sa importanteng mga kabtang nin espirituwal na kadonongan asin pakamansay​—mga kuwalidad na puwedeng nangongorog an mga magurang.​—1 Corinto 1:26–2:13; Filipos 1:9.

Malinaw nanggad, igwa nin mahalagang mga kabtang an mga magurang asin ministeryal na lingkod. Sa pag-iriba makakagibo sinda nin dakol sa pagpakosog sa gabos sa kongregasyon. Alagad tanganing magibo iyan, kaipuhan sindang magtinabangan na may pagkaoroyon, “na igwa nin lubos na kababaan nin boot asin kahoyoan, na may pakatios, na nagpapatiriostiosan sa pagkamoot, na maigot na naghihingoa na otobon an pagkasararo kan espiritu sa nakapagpapasarong bogkos nin katoninongan.”​—Efeso 4:​2, 3.

[Nota sa Ibaba]

[Mga ritrato sa pahina 23]

Minamansay kan mga magurang an ministeryal na mga lingkod, bakong bilang mga sakop, kundi bilang mga kapwa ministro nin Dios