An Ministeryal na mga Lingkod Nagtatao nin Mahalagang Paglilingkod
1 “Pinatunayan ninda na sinda talagang dusay na mga lalaki na an pagtubod nahayag sa maigot na paglilingkod sa Kahadean asin sa pagtabang sa iba na magin marigon sa pagtubod.” Iyan an sabi kan Organized to Accomplish Our Ministry, sa pahina 57, manongod sa ministeryal na mga lingkod. Tunay nanggad na maninigong arogon an espirituwal na halimbawa na itinatao kan satong ministeryal na mga lingkod. An pakikipagtabangan sa sainda asin sa kamagurangan “nagbubunga kan pagtalubo kan hawak para sa pagkosog mismo kaiyan sa pagkamoot.”—Efe. 4:16.
2 An ministeryal na mga lingkod naggigibo nin mahalagang katongdan sa kongregasyon. Isip-isipa an gabos nindang mahalagang paglilingkod! Sinda nag-aasikaso kan kuenta, literatura, mga magasin, suskripsion, asin teritoryo; sinda nagseserbing mga attendant, nag-aasikaso kan kasangkapan sa sound, asin nagtatabang sa pamantener kan Kingdom Hall. Sinda nakikikabtang sa Teokratikong Paadalan sa Pagmiministro asin Pagtiripon sa Paglilingkod. An nagkapira sa sainda tibaad nagtatao pa ngani nin mga pahayag-publiko o nagkokondukta kan nagkapira sa mga pagtiripon kan kongregasyon. Siring sa mga miembro nin pisikal na hawak, an ministeryal na mga lingkod naggigibo nin mga paglilingkod na kaipuhan niato.—1 Cor. 12:12-26.
3 An pakaheling sa ministeryal na mga lingkod na may pagkaoroyon na nakikikooperar sa kamagurangan bilang kabtang nin sarong grupo nin mga lingkod na may paggalang asin pagsabot sa lambang saro nakaeenkaminar sa iba na gibohon man iyan. (Col. 2:19) Paagi sa fiel na pag-otob kan saindang mga paninimbagan serosemana asin paagi sa pagpaheling nin personal na interes sa iba, sinda nakakokontribwir sa sarong kongregasyon na maoswag sa espirituwal.
4 Ano an magigibo niato tangani na ipaheling an satong pag-apresyar sa mahigos na ministeryal na mga lingkod? Kaipuhan kitang magin pamilyar sa mga obligasyon na iinasignar sa sainda asin magpaheling nin pagigin andam na makikooperar kun kaipuhan an satong tabang. Paagi sa tataramon o gibo, ikapaaaram niato sa sainda na inaapresyar an saindang gibohon. (Tal. 15:23) Idtong mga mahigos na nagtatrabaho para sa sato angay sa sinserong pagrekonoser.—1 Tes. 5:12, 13.
5 An Tataramon nin Dios an nag-eestablisar kan katongdan asin mga kualipikasyon kan ministeryal na mga lingkod. (1 Tim. 3:8-10, 12, 13) An saindang mahalagang sagradong paglilingkod kaipuhan nanggad sa pagpunsionar kan kongregasyon. An siring na mga lalaki angay na mag-ako kan satong padagos na pagparigon sa boot, ta sinda gabos “dakol an gigibohon sa gibohon kan Kagurangnan.”—1 Cor. 15:58.