Pag-otob kan Satong Ministeryo sa Kahadean Paagi kan Tabang Hale sa Index
1 Tanganing tabangan kitang maotob an satong ministeryo, nagtao si Jehova nin mayaman na paggiya sa mahiwas an sakop na librarya nin mahalagang mga publikasyon. Magagamit daw niato nin mas marhay iyan? An pangenot na tabang sa paggibo nin siring iyo an Watch Tower Publications Index, na padagos na ipinupublikar magpoon kan 1961.
2 Paano an Index makatatabang saindo na otobon an saindong ministeryo? Paagi sa pagtokdo kan ekselenteng sadol asin paliwanag na itinao na. An Index itinao para sa bilog na pagkanitugang. Magpoon sa mga aki sagkod sa mga lolo asin lola, bagong mga estudyante nin Biblia sagkod sa kamagurangan, an gabos makanonompong nin mga reperensiang kaipuhan ninda para sa arin man na kapakipakinabang na katuyohan.
KUN PAANO MANONOMPONGAN AN KAIPUHAN NINDO
3 Kun interesado kamo sa kahulogan nin partikular na bersikulo, maheheling nindo na pinakamarahay na buksan nguna an scripture index sa likod. Sinitar daw nin iba an Juan 10:30 tanganing patunayan an Trinidad? An scripture index magiya saindo sa materyal na nagpapaliwanag kun taano ta sinabi ni Jesus an mga tataramon na idto. An scripture index magpapayaman kan satong personal na pagbasa nin Biblia mantang hinahanap niato an paliwanag sa mga bersikulo na garo masakit masimbag o bakong maliwanag.
4 An subject index nagtatao nin manlaenlaen na paagi sa iyo man sanang impormasyon. Halimbawa, tibaad kaipuhan nindong maaraman kun ano an gigibohon kun an dai nagtutubod na agom habong iiba nindo an saindong mga aki sa pagtiripon. Puwede nindong buksan an temang “Husbands,” “Wives,” “Children,” “Opposition,” o “Meetings.” Kun dai nindo mahanap an simbag sa enot na tema, probaran an iba. Kun sa paghona nindo garo tama an pangenot na tema, enot na siyasaton an cross-references na nasa ibaba sana kaiyan. Ini parateng nakamemenus sa panahon sa pagpili nin saro pang tema na mas direkta sa punto.
5 An abilidad sa paggamit nin Index makakokontribuwir nin dakol sa kapangganahan sa pag-otob kan satong banal na mga paninimbagan. An satong mga pamilya, mga estudyante sa Biblia, asin satong kongregasyon makikinabang mantang kita nagigin mas maabilidad sa paggamit kan kagamitan na ini. An maabot na mga isyu kan An Satong Ministeryo sa Kahadean magsisiyasat nin espisipikong mga paagi na dian an Watch Tower Publications Index magigin kapakipakinabang na tabang sa pag-otob kan satong ministeryo sa Kahadean.