Pag-aatubang kan Maogmang Bareta—Paagi sa mga Tract Asin Handbill
1 “Inagihan ko an sarong babae na nagtao sako nin sarong tract manongod sa Biblia,” an isinurat kan lalaki sa Sosyedad. “An sabi kaiyan, ‘Life in a Peaceful New World.’ Mamondo ako bago ko basahon iyan, pero pakatapos napakosog na gayo ako asin nagkaigwang katoninongan.” Nagsurat an lalaki para sa dugang pang impormasyon asin nagpedido nin librong Mabuhay Sagkod Lamang.
2 An dakol na nag-oomaw ngonyan ki Jehova nagkaigwa kan saindang espirituwal na gana paagi sa mga tract asin mensahe sa likod kan handbill. Naggagamit daw kamo nin mga tract asin handbill sa saindong ministeryo? Dakol an naggigibo nin siring. Sa Brooklyn sana, labing 122 milyones na tract na Peaceful New World an inimprinta, siring man mga 250 milyones na kopya kan tolo pang ibang tract.
3 Dai niato maninigong menuson an puwersa kan Tataramon nin Dios siring kan ipinaliwanag sa haralipot na mensaheng ini. (Heb. 4:12; ikomparar an Zacarias 4:10; Santiago 3:4, 5.) Sarong Saksi sa Arizona an nagsurat: “An mga tawo ngonyan habong magbasa nin haloy, pero an mga tract tama sana an laba kan mahalagang mensahe pero bakong halabaon tanganing humarayo an mga tawo bago man lamang ninda helingon iyan.”
4 An mga tawo parateng nagduduwaduwang magkua sato nin literatura. Alagad dakol an maako nin tract sana. Sarong paraataman sa sirkito an may sadit na lalagan na plastic asin ipinaheheling an mga tract, na pinapipili an kagharong nin saro na gusto nia.
SA ENOT NA PAGDALAW
5 Nanompongan nin ibang parahayag na an pagtao nin tract o handbill marahay na paagi sa pagpoon nin pag-orolay. Sa pag-alok nin saro, an kagharong na nagduduwaduwang buksan an pintuan tibaad mapahirong gibohon an siring. An pagpaheling kan iskedyul nin pagtiripon sa handbill makakabukas kan paagi sa pag-orolay manongod sa satong gibohon asin katuyohan.
6 Kun maliwanag na sibot o mamondo an kagharong, an tract sana an tibaad kaipuhan. Sarong babae an narangang gayo kan tract manongod sa paglaom kan mga gadan kaya sia nagsurat sa Sosyedad para sa dugang na impormasyon.
SA MGA PAGDALAW LIWAT
7 Sa pagdalaw liwat sa ibang nagpaheling nin interes kan nakaagi, puwedeng sabihon nin saro: “Kan enot kitang maghelingan, naghanga ako sa saindong pagtao nin panahon na makipag-olay manongod sa Biblia. Igwa ako nin dugang na impormasyon na sa paghona ko tibaad makainteres saindo. Iyan nasa tract na ini, Life in a Peaceful New World. Kun magigirumdoman nindo, kan nakaagi napag-olayan niato an manongod sa panuga kan Biblia na tunay asin nagdadanay na katoninongan para sa katawohan. Alagad, mantang dakol an naghohona kan langit sana kun nababasa ninda an mga panugang ini, mangnoha na an Salmo 37:29 nagpapaheling na an mga bendisyon na ini mangyayari digdi sa daga. [Basahon an teksto, na ipinaheheling sa kagharong kun saen iyan sa tract.] Bako daw iyan nakakainteres? [Pag-olayan an pirang parapo.] May orog na nakakapakosog na mga teksto sa tract na ini asin maoogma kamo kaiyan. Sa masunod kong pagdigdi, tibaad puwede niatong magkaibang basahon an iba kaiyan siring kan ginibo niato ngonyan.”
8 Tunay nanggad, an satong mga tract asin handbill mga regalo hale ki Jehova. Logod gamiton niato iyan nin epektibo sa saiyang kaomawan asin sa satong daing katapusan na bendisyon.—Tal. 22:29.