Bagay na Mas Marahay Kisa Pagkaigwa Gikan sa Mayo

HAROS gabos na hugador nagigin mas pobre kisa kan bago sinda pumoon na maghuwego. Parate na pati an nagkapira na talagang nanggagana nin darakulang halaga nakadidiskobre na an saindang mga ginana bakong pasaporte pasiring sa kaogmahan.

An sarong 36 anyos na soltero sa Hapon nanggana nin $45,000 sa loteriya. An intension nia ibakal nin harong an saiyang gaganahon, alagad ta nag-agi sia sa makuring pagkauri asin pagbalobagi kaya sia nagdesisyon na idto daing pakinabang. Sa pagngalas kan mga katrabaho nia, sinolo nia an saiyang ganang tiket sa atubangan mismo kan saindang mga mata.

Inarestar nin mga pulis sa Florida an sarong babae na, sa ibong kan panggana nin $5 milyones sa loteriya, nagpakana na gadanon an saiyang manugang na babae. Sinabi kan aki niang lalaki na sia natataranta huli sa pierdeng mga pangangapital asin sobrang paggasto na nakaubos sa kayamanan nia.

Nadaog na Nagin Ganador

Si Domingo bangkag na hugador asin ama nin lima. Sia nagpapaliwanag: “Kun manggana ako, mas grabe an nangyayari. An paghona ko madonongon na ako, asin dai ako makahalat na bumalik sa sugalan tanganing patunayan na idto bako sanang saroan na aksidente.

“Kan magapos na ako kan pagkabangkag na ini, garo ako nakadroga. Andam akong bayaan an sakong agom asin mga aki tangani sanang makapagpadagos sa paghuwego. Minsan ngani paorootro akong nanunumpa sa sakong agom na dai na ako noarin man mahuwego, aram ko sa sakong puso na daing halaga an mga panugang ini. Nagigirumdoman ko na sarong beses sinisierto ko sa sakong agom na talagang binayaan ko na an paghuwego, mantang kan oras mismong idto, nagpaplano ako kun paano makakukua nin kuwartang itataya.

“Nawara an gabos kong kuwarta, an kuwarta kan agom ko, asin an negosyo ko, asin nagkautang ako nin dakulaon. Dai nin aldaw na minaagi na dai ako nin tinatayaan, sagkod na may nangyari na nakapirit sako na siyasaton an sakong sadiri. Nagpoon akong makipag-adal kan Biblia sa mga Saksi ni Jehova. Hinangaan ko an sakong nanonodan, pero dai man tolos ako nagpondo sa paghuwego. Nagpapasalamat ako na pasensiosong marhay an Saksi na nakipag-adal sa sako.

“Pero dai nahaloy an mensahe kan Biblia nagpoon na makaapektar sa sako. Tinabangan ako kaiyan na bayaan an kinaban na pinangangarap ko asin helingon an sadiri ko arog kan pagheling sako nin Dios. Nakubhanan ako. Nasopog ako nin makuri, kapareho kan mga sinuratan ni apostol Pablo kan enot na siglo: ‘Ano, kun siring, an bunga na igwa kamo kan panahon na idto? Mga bagay na ikinasosopog na nindo ngonyan. Huli ta an sagkodan kan mga bagay na idto kagadanan.’​—Roma 6:21.

“An pakamidbid sa Dios, sa saiyang ngaran, sa saiyang personalidad, asin nangorogna sa saiyang pagkaherak nagpahiro sako na magmawot na magbakle, na isipon an iba imbes na an sadiri ko. Sa katapustapusi biyo na akong nakabutas sa bisyong paghuwego, asin nabautismohan kami mag-agom.

“Sinabi ni Jesus na bubutasan kita kan katotoohan. (Juan 8:32) Tunay na totoo iyan sa sako. An katotoohan kan Tataramon nin Dios iyo an nagtao sako nin kapakipakinabang na bagay na katuyohan sa buhay, ibinalik sako an paggalang ko sa sadiri, asin nagtao sako nin dakulang satispaksion. Natabangan ko pa ngani an saro sa mga dati kong amigong hugador na bakleon an buhay nia arog kan ginibo ko. Kan mabautismohan sinda mag-agom, iyan nagtao sako nin kaogmahan na labi kisa ikinatao sako nin ano man na panggana sa huwego.

“Sa nakaaging 20 taon, dai ako nin tinayaan, minsan kadikit. Dai ko masasabing iyan pasil, pero dai man iyan nagin depisilon. Asin an itinao sako nin Dios sobra-sobra nang nagpanigo sa mga pangangaipo na hiningoa kong panigoan paagi sa paghuwego.”a

An punto-de-vista kan Kasuratan may pangenot na halaga para sa mga boot na gibohon an kabotan nin Dios. Asin an mga nagkukuyog sa hatol nin Dios bako sanang nakalilikay sa kamondoan na dara nin paghuwego kundi nakadidiskobre na sia may iinoopresir sa sainda na nakalalabi nanggad sa ano man na ginana sa paghuwego.

Sarong Kayamanan na Mas Mahalaga

Si Pablo, sa pagsurat ki Timoteo kan enot na siglo, nagsabi: “Pagbotan mo [sinda] na dai ibugtak an saindang mga paglaom sa daing kasegurohan na bagay na arog kan pirak, kundi sa Dios, na mayaman na nagtatao sa sato kan gabos na bagay na ikaoogma. Sabihi sinda na gumibo nin marahay . . . , na magin andam na manao asin magwaras, asin kun siring magkaigwa nin kayamanan na magigin marahay na pasisikadan para sa ngapit. Sa siring sinda makapangangapot sa buhay na talagang buhay.”​—1 Timoteo 6:​17-19, The New English Bible.

An sarong kayamanan na mapangangaptan iyo an marahay na ngaran sa Dios. Ini nagdadara sa “buhay na talagang buhay”​—buhay na daing katapusan, an pinakadakulang premyong iinalok. Si Jesus nagsabi sa pamibi sa Dios: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.”​—Juan 17:3.

Bakong arog nin daing kasegurohan na mga premyong kuwarta, an premyong iinoopresir nin Dios puwedeng ganahon nin siisay man asin nin gabos na naggigibo kan kabotan nin Dios. Dugang pa, an paggibo sa kabotan nin Dios nagtatao kan gabos na kaogmahan na puwedeng mawoton nin siisay man, asin iyan nagtatao sa tawo nin paggalang sa sadiri asin makahulogan na buhay. Mientras tanto, huli sa mapait na balos nin paghuwego, girumdoma an hatol nin sarong suanoy na talinhagang Ingles: “An pinakamarahay na tira kan dados tirang paapon.”

[Nota sa Ibaba]

[Ritrato sa pahina 20]

An buhay na daing katapusan sa sarong paraisong daga mas dakula nanggad na premyo kisa ano man na makakamtan paagi sa paghuwego