Paniniwala sa Sarong Dios na Tibaad Dai Niato Midbid
DUWA sa tolong tawo sa Alemania an naniniwala sa Dios. Pero, kan an labing sangribo hagadan nin deskripsion kan Dios na pinaniniwalaan ninda, haros gabos laen-laen an simbag. “An mga Aleman may kanya-kanyang ideya manongod sa Dios na an pagkalaenlaen arog kan mga Aleman mismo,” an report kan magasin manongod sa mga bareta na FOCUS. Minsan ngani kaomaw-omaw an paniniwala sa Dios, bako daw na makamomondong maniwala sa saiya na dai naaaraman kun anong klaseng Dios sia?
Bako sanang sa Alemania manonompongan an pagduwaduwang ini manongod sa naturalesa o persona nin Dios; manonompongan iyan sa iba pang lugar sa Europa. Ihinayag kan sarong surbey na ginibo sa Austria, Britania, asin Netherlands an lakop na pagkaoroyon na an Dios “sarong mas halangkaw na kapangyarihan o dai ikaladawan na hilom.” Partikularmente sa mga hoben, dawa sa tahaw nin mga naniniwala sa saiya, na sia sarong misteryo.
Midbid daw Nindo an Dios nin Personal?
Dakulang marhay an kalaenan kan pakamidbid sa saro asin pakamidbid sa saiya nin personal. An pakamidbid sa saro—sarong masakit maranihan na monarka, sarong sikat na atleta, sarong sikat sa pelikula—pagrekonoser sana na sia nag-eeksister. Minsan siring, an pakamidbid sa saro nin personal nangangahulogan nin labi pa dian. Kalabot dian an pagigin pamilyar sa ugale, gawe-gawe, mga saboot, mga gusto asin dai gusto, saka mga plano sa ngapit kan tawong iyan. An personal na pakamidbid sa saro nagpapangyari na magkaigwa nin dayupot na relasyon sa saiya.
Ginatos na ribong indibiduwal an nagkonklusyon na an pagkaigwa sana nin malibog na ideya manongod sa Dios—o pakamidbid sana saiya—bakong igo. Dinagdagan pa ninda iyan paagi sa lubos na pagmidbid sa Dios. Nagin kapakipakinabang daw iyan para sa sainda? An sarong tawo na an ngaran Paul, na nag-iistar sa amihanan na Alemania asin dati naniniwala sana sa Dios, nagdesisyon na mas mamidbid Sia nin personal. Si Paul nagpapaliwanag: “Nangangaipo nin panahon asin paghihingoa na mamidbid na marhay an Dios, alagad an pakinabang kaiyan dakula. An pagkaigwa nin dayupot na relasyon sa Kaglalang ginigibong mas marahay an buhay sa aroaldaw.”
Bawi daw an panahon asin paghihingoa na kaipuhan tanganing lubos na mamidbid an Dios? Basahon tabi an masunod na artikulo.
[Blurb sa pahina 3]
Dakulang marhay an kalaenan kan pakamidbid sa saro asin pakamidbid sa saiya nin personal