Saen Kamo Makanonompong nin Tunay na Pagpapahalaga sa Espirituwal na mga Bagay?

“KUN ootobon nindo an sarong relihion huli sana sa tradisyon kan pamilya, taano ta dai na sana pilion an relihion nin mga Celtico na inotob kan satong mga apoon 2,000 na taon na an nakaagi?” an may kadikit na pagtuyang ihinapot ni Rodolphe. Napahuyom sa ideyang iyan an hoben na nagdadangog sa saiya.

“An sakong relasyon sa Dios mahalagang marhay sa sako,” an sabi ni Rodolphe. “Ako biyong minakontra sa ideya na an relihiosong mga paniniwala maninigong ipirit sako kan tradisyon, huli sana ta an mga miembro kan sakong pamilya na nabuhay kaidtong manampulo o ginatos pa nganing taon an nakaagi nag-otob sa sarong relihion.” Maingat na tinurotimbang ni Rodolphe an mga bagay; dai nia trinatar an mahalagang bagay na ini bilang sarong bagay na minana nia sana.

Minsan ngani an pagpamana nin relihion hale sa sarong henerasyon pasiring sa masunod nagrururo na ngonyan na mga aldaw, an mayoriya nasa relihion pa man giraray kan saindang pamilya. Alagad pirme daw na tama na otobon nin saro an pamantayan kan saiyang mga magurang sa kun ano an mahalaga kun dapit sa relihiosong mga bagay? Ano daw an sinasabi kan Biblia?

Pakalihis nin 40 taon sa desierto, an mga Israelita pinapamili ni Josue, an kasalihid ni Moises: “Ngonyan kun maraot sa saindong pagheling na maglingkod ki Jehova, pumili kamo ngonyan kun siisay an saindong paglilingkodan, kun baga an mga dios na pinaglingkodan kan saindong mga apoon na nasa ibong kan Salog o an mga dios kan mga Amorreo na sa saindang daga kamo nag-eerok. Alagad kun para sa sako asin sa sakong kasararo sa harong, kami maglilingkod ki Jehova.”—Josue 24:15.

An saro sa mga apoon na sinambit ni Josue iyo si Tare, an ama ni Abraham, na nag-istar sa siudad nin Ur, na kan panahon na iyan yaon sa sirangan kan Salog nin Eufrates. Mayong gayong ihinahayag an Biblia manongod ki Tare, apuera sa bagay na sia nagsamba sa ibang mga dios. (Josue 24:2) An saiyang aking si Abraham, minsan ngani bakong lubos an pakaaram sa katuyohan nin Dios, andam na bayaan an saiyang iniistaran na siudad kan pinagbotan sia ni Jehova na gibohon iyan. Iyo, pinili ni Abraham an relihion na laen kan sa saiyang ama. Huli sa paggibo kaiyan, inako ni Abraham an mga bendisyon na ipinanuga sa saiya nin Dios, asin sia nagin an minimidbid nin dakol na relihion bilang an “ama kan gabos na nagtutubod sa Dios.”—Roma 4:​11, Today’s English Version.

Isinasaysay man kan Biblia sa positibong paagi an estorya ni Rut, an apoon ni Jesu-Cristo. Si Rut, sarong Moabitang babae na naagom nin sarong Israelita, nabalo asin napaatubang sa pagpili: magdanay sa sadiri niang daga o magbuelta sa Israel kaiba kan saiyang panugangan na babae. Rinerekonoser an nakalalabing halaga kan pagsamba ki Jehova kun ikokomparar sa idolatrosong pagsamba na inootob kan saiyang mga magurang, sinabi ni Rut sa saiyang panugangan: “An saimong banwaan magigin sakong banwaan, asin an saimong Dios sakong Dios.”—Rut 1:16, 17.

Nagkokomento sa kahalagahan kan rekord na ini sa canon kan Biblia, an Dictionnaire de la Bible nagpapaliwanag na an pagkasaysay na ini nagpapaheling “kun paanong an sarong babae na namundag sa ibang nasyon, namundag sa tahaw nin mga pagano na antipatiko sa asin ikinaoongis kan Israel, . . . huli sa pagkamoot nia sa nasyon ni asin pagsamba ki Jehova, pinalad na magin apoon kan banal na si Hadeng David.” Si Rut dai nagduwaduwang pilion an sarong relihion na laen kan sa mga magurang nia, asin bilang resulta kan desisyon na iyan, inako nia an bendisyon nin Dios.

An pagkasaysay manongod sa kapinonan kan Kristianismo mas malinaw kun manongod sa mga dahelan kun taano ta binayaan kan mga disipulo ni Jesus an relihion kan saindang mga apoon. Sa nakabebensir na marhay na pahayag, inagda ni apostol Pedro an mga nagdadangog sa saiya na ‘paligtas hale sa bikong kapag-arakian na ini’ paagi sa pagsolsol sa saindang mga kasalan asin pagpabautismo sa ngaran ni Jesu-Cristo. (Gibo 2:37-41) An saro sa pinakapambihirang mga halimbawa iyo an ki Saulo, sarong Judiong paralamag sa mga Kristiano. Mantang yaon sa dalan pasiring sa Damasco, naheling nia si Cristo sa sarong bisyon, na pagkatapos kaiyan si Saulo nagin Kristiano asin namidbid bilang si apostol Pablo.—Gibo 9:1-9.

An mayoriya kan enot na mga Kristiano dai nagkaigwa nin pambihirang eksperyensia na arog kaiyan. Pero, kinaipuhan na bayaan kan gabos magsalang an Judaismo o an pagsamba sa manlaenlaen na paganong dios. An mga uminako sa Kristianismo ginibo iyan na lubos an kaaraman sa mga katunayan, sa parate pagkatapos nin halawig na mga pakipag-olay manongod sa kabtang ni Jesus bilang an Mesiyas. (Gibo 8:26-40; 13:16-43; 17:22-34) Malinaw na may kabatidan an enot na mga Kristiano sa pangangaipong gumibo nin mga pagbabago sa saindang buhay. An pangagda ipinaabot sa gabos, sa mga Judio sagkod sa mga bakong Judio, alagad an mensahe iyo pa man giraray. Tanganing mapaogma an Dios, kaipuhan na sunodon an bagong paagi nin pagsamba, kan sa Kristianismo.

Pagpili na May Halaga sa Sato

Tunay nanggad na kinaipuhan an kosog nin boot kan enot na siglo tanganing bayaan an relihiosong mga tradisyon kan pamilya​—an Judaismo, pagsamba sa emperador, pagsamba sa paganong mga dios​—asin umayon sa sarong relihion na tinutuyatuya kan mga Judio sagkod kan mga Romano. Dai nahaloy an pagpiling ini nagbunga nin maringis na paglamag. Ngonyan, nangangaipo nin kaparehong kosog nin boot na magsayumang “pabayaan an sadiri na maimbuelto asin mabangkag sa naglalakop na basta pag-arog na sana,” segun sa pagkasabi kaiyan ni Hippolyte Simon, Katolikong obispo nin Clermont-Ferrand, sa saiyang librong Vers une France païenne? (An Pagigin Pagano kan Pransia?) Nangangaipo nin kosog nin boot na magin asosyado sa sarong minoriyang relihiosong mobimiento na kun beses tinatatsaran, an Mga Saksi ni Jehova.

Si Paul, sarong hoben na lalaki na taga Bastia, Corsica, na pinadakula bilang Katoliko, kun minsan nakikikabtang sa mga aktibidad sa simbahan, arog kan pagtinda nin mga keik tanganing magtipon nin kuarta para sa sarong Katolikong organisasyon sa pag-abuloy. Huling gustong magkaigwa nin mas marahay na pakasabot sa Biblia, uminoyon sia sa regular na pakipag-olay sa mga Saksi ni Jehova. Pag-abot nin panahon, naaraman nia na an nanonodan nia matao saiya nin nagdadanay na mga pakinabang. Huli kaiyan, biyong inako ni Paul an pamantayan kan Biblia sa kun ano an mahalaga asin sia nagin saro sa Mga Saksi ni Jehova. Iginalang kan saiyang mga magurang an pagpili nia, na dai man nakaapektar sa saindang dayupot na relasyon sa pamilya.

Si Amelie nag-iistar sa timog kan Pransia. An mga miembro kan saiyang pamilya mga Saksi ni Jehova sa laog na nin apat na henerasyon. Taano ta pinili niang akoon an pamantayan kan saiyang mga magurang sa kun ano an mahalaga kun dapit sa relihiosong mga bagay? “Dai ka nagigin saro sa Mga Saksi ni Jehova huli sana ta an saimong mga magurang o apoon mga Saksi ni Jehova,” an sabi nia. “Alagad pag-abot nin panahon, masabi ka sa saimong sadiri, ‘Ini an sakong relihion huli ta ini an sakong mga kombiksion.’” Arog kan dakol na iba pang hoben na Saksi ni Jehova, aram ni Amelie na an saiyang marigon na relihiosong mga kombiksion nagtatao saiya nin katuyohan sa buhay asin gikanan iyan nin nagdadanay na kaogmahan.

Kun Taano ta Dapat Akoon an Pamantayan nin Dios sa Kun Ano an Mahalaga

Ineenkaminar kan libro nin Talinhaga, kapitulo 6, bersikulo 20, an mga gustong paogmahon an Dios: “Kuyoga, O aki ko, an togon kan saimong ama, asin dai mo pagpabayaan an ley kan saimong ina.” Imbes na nagrerekomendar nin basta na sana pagkuyog, an hatol na iyan nagsasadol sa mga hoben na akoon an diosnon na mga pamantayan paagi sa pagpararom kan saindang pagtubod asin paninindogan para sa Dios. Inagda ni apostol Pablo an saiyang mga kaibaiba na “siertohon an gabos na bagay,” berepikaron kun baga an itinotokdo sa sainda kaoyon kan Tataramon nin Dios asin kan Saiyang kabotan, patin gumawe oyon dian.—1 Tesalonica 5:21.

Baga man pinadakula sa Kristianong pamilya o dai, an labi sa anom na milyon na Mga Saksi ni Jehova, hoben sagkod gurang, guminibo kan siring na desisyon. Paagi sa maingat na pag-adal sa Biblia, nanompongan ninda an mapagtitiwalaan na mga simbag sa mga hapot ninda manongod sa katuyohan nin buhay asin nag-ako sinda nin malinaw na pakasabot sa kabotan nin Dios para sa katawohan. Kan makua an kaaraman na ini, inako ninda an pamantayan nin Dios sa kun ano an mahalaga asin ginigibo an pinakamakakaya ninda tanganing gibohon an kabotan nin Dios.

Baga man kamo regular na parabasa kan magasin na ini o bako, taano ta dai nindo akoon an alok kan Mga Saksi ni Jehova na tabangan kamong siyasaton an Biblia tanganing maheling an pamantayan kaiyan sa kun ano an mahalaga kun dapit sa espirituwal na mga bagay. Sa paaging ini, ‘mananamitan nindo asin maheheling nindo na si Jehova marahay’ asin makukua an kaaraman na, kun isasagibo, magiya pasiring sa buhay na daing katapusan.​—Salmo 34:8; Juan 17:3.

[Ritrato sa pahina 5]

Apat na henerasyon nin sarong pamilya nin Mga Saksi ni Jehova sa Pransia

[Ritrato sa pahina 7]

Pinili ni Rut na maglingkod ki Jehova imbes na sa mga dios kan saiyang mga apoon