“Rumani Kamo sa Dios, Asin Sia Marani sa Saindo”

Bago Asin Pakatapos—Madiklom na Nakaagi, Maliwanag na Ngapit

“AN TATARAMON nin Dios buhay asin mapuersa asin mas matarom kisa arin man na espada na may duwang tarom . . . asin nakamamansay kan mga kaisipan asin intension kan puso.” (Hebreo 4:12) Iyan an sabi ni apostol Pablo manongod sa nakatataros na kapangyarihan kan mensahe nin Dios. An kakayahan kaiyan na taroson an puso nangorognang risang-risa durante kan enot na siglo C.E. Sa ibong kan nakararaot na impluwensia kan panahon na iyan, isinolog kan mga nagin Kristiano an bagong personalidad.—Roma 1:28, 29; Colosas 3:8-10.

An nakakapabagong puersa kan tataramon nin Dios, na nakarekord sa Biblia, naheheling man ngonyan. Halimbawa, estudyare an kaso nin sarong halangkaw asin makosog na lalaki na an ngaran Richard. Huling aranggoton, si Richard nakikisuntokan dawa maprobokar sana nin kadikit. An saiyang buhay rinaot nin kadahasan. Si Richard uminayon ngani sa sarong klab sa boksing. Nagsanay siang marhay asin nagin kampeon sa boksing sa kategoryang pinakamagabat sa Westphalia, Alemania. Si Richard makosog man na uminom asin parateng naiimbuelto sa mga labolabo. Sa saro kan siring na pangyayari, may nagadan, asin si Richard dikit pang mabilanggo.

Kumusta an buhay may agom ni Richard? “Bago kami ni Heiki nag-adal sa Biblia,” an nagigirumdoman ni Richard “ginigibo kan lambang saro samo an sadiri ming gusto. Dakol na oras na kaibaiba ni Heike an saiyang mga kaamiga, mantang ako yaon sa sakong mga apisyon​—pangenot na an boksing, surfing, asin diving.”

Kan si Richard asin Heike nagpoon nang mag-adal kan Biblia kaiba kan mga Saksi ni Jehova, nadepisilan si Richard sa pag-isip kan pangangaipong gumibo nin garo baga imposibleng mga pagbabago tanganing ikaoyon an saiyang buhay sa halangkaw na mga pamantayan na yaon sa Tataramon nin Dios. Minsan siring, kan mas namidbid nia si Jehova Dios, si Richard nagkaigwa nin makosog na pagmawot na paogmahon sia. Naaraman ni Richard na dai inooyonan nin Dios an mga namomoot sa kadahasan o an mga minagamit kaiyan para sa pag-aling-aling. Nanodan ni Richard na ‘an siisay man na namomoot sa kadahasan ikinaoongis nanggad kan kalag ni Jehova.’—Salmo 11:5.

Apuera dian, an paglaom na mabuhay sagkod lamang sa sarong paraiso sa daga nakaakit ki Richard sagkod ki Heiki. Gusto ninda na magkaibanan na lumaog dian! (Isaias 65:21-23) Napahirong marhay si Richard kan pangagdang “rumani kamo sa Dios, asin sia marani sa saindo.” (Santiago 4:8) Naheling nia an halaga kan paghimate sa ipinasabong na konsehong ini: “Dai ka mauri sa tawo nin kadahasan, ni pilion an arin man sa saiyang mga dalan. Huli ta an biko makauuyam nin makuri ki Jehova, alagad ta Sia dayupot sa mga matanos.”—Talinhaga 3:31, 32.

Sa ibong kan makosog niang pagmawot na bagohon an saiyang dalan, narealisar ni Richard na dai nia kayang gibohon iyan sa sadiri niang kosog. Narealisar nia na kaipuhan na hagadon an tabang nin Dios sa pamibi. Sa siring, huminiro sia kaoyon kan mga tataramon ni Jesus sa Saiyang mga apostol: “Padagos na mamibi, tanganing dai kamo makalaog sa sugot. Siempre, an espiritu nagmamawot na gayo, alagad an laman maluya.”—Mateo 26:41.

Pagkatapos na manodan an pagmansay nin Dios sa kadahasan asin mga pagputok nin kaanggotan, segurado na si Richard na dai puede an isport na boksing. Sa tabang ni Jehova asin pagparigon sa boot kan mga namayo kan pag-adal sa Biblia sa saiya, napondo ni Richard na maimbuelto sa kadahasan. Pinondo na nia an pagboksing asin pakikilabolabo saka nagdesisyon na pakarhayon an saiyang buhay pampamilya. “An pakanood kan katotoohan sa Biblia an nakatabang sa sako na pumondo asin mag-isip bago ako humiro,” an sabi ni Richard, na sarong mahoyong paraataman na ngonyan sa saro sa mga kongregasyon kan Mga Saksi ni Jehova. Sinabi pa nia: “An prinsipyo nin pagkamoot asin paggalang an naggigiya sako ngonyan sa relasyon ko sa sakong agom asin mga aki. Bilang resulta, an samong pamilya nagin dayupot sa lambang saro.”

An mga tawong naimpormaran nin sala kun beses nagsasahot na rinaraot kan Mga Saksi ni Jehova an mga pamilya. Minsan siring, pinahihimutikan kan mga halimbawa nin mga indibiduwal arog ni Richard an saindang paghihingako. An totoo, an katotoohan sa Biblia puedeng magbunga nin masarig na pamilya asin maliwanag na ngapit para sa mga may madiklom na nakaagi.—Jeremias 29:11.

[Blurb sa pahina 9]

“An paglaom sa sarong paraisong daga an nagmotibar sa sako na magbago”

[Kahon sa pahina 9]

Mga Prinsipyo sa Biblia na Epektibo

An Biblia puedeng magkaigwa nin mapuersang impluwensia sa buhay nin mga tawo. Uya an nagkapirang mga prinsipyo sa Kasuratan na nakatabang sa madahas na mga tawo na magbago:

“Orog karahay an haloy na maanggot kisa kan tawong makosog, asin an nakapopogol sa saiyang espiritu kisa kan minasakop sa sarong banwaan.” (Talinhaga 16:32) An daing kontrol na kaanggotan sarong tanda nin kaluyahan, bako nin kosog.

“An pakarorop nin tawo nakapopogol nanggad sa saiyang kaanggotan.” (Talinhaga 19:11) Nakatatabang an pagkaigwa nin pakarorop asin pakasabot sa sarong situwasyon na maheling nin saro an totoong dahelan kan komprontasyon asin puedeng malikayan an pagputok nin kaanggotan.

‘Dai ka makiiba sa siisay man na madaling magputok an kabangisan tanganing dai ka makanood kan saiyang mga dana.’ (Talinhaga 22:24, 25) May kadonongan na linilikayan kan mga Kristiano an pakiibaiba sa mga madaling maanggot.