Pagpogol sa Kaanggotan—Nindo Asin kan Iba

KITA nabubuhay sa aranggoton na sosyedad. An surusuan na trapiko, magkakakontra asin nagliliwat na pamantayan, dai pagkasarabotan, mga inhustisya, o iba pang pagkadisganar sa pan-aroaldaw na buhay ginigikanan nin dakol na tension. An tension natitipon, asin haros gabos may panahon na nag-iinit. Kun siring, kita maninigong makanood na kalmahon an boot. Puwede niatong ponan an kada aldaw na may positibong kaisipan—na nagpapaheling nin pagpapasensia, pakatios, asin marahay na disposisyon. An kadaklan sa sato may pamilya na namomoot sa sato. An mga Kristiano man igwa nin maimbod na mga kapwa Kristiano sa kongregasyon, asin orog sa gabos, igwa sinda kan mamomoton na Pastor, si Jehova Dios. Kaya, dai kaipuhan na matakot sa sarong usong dahelan nin kaanggotan: an pagmate na an saro nagsosolo, inabandono.—Salmo 23:1-6; Hebreo 13:5, 6.

Minsan siring, kun kita nakamamate nin kaanggotan o kaipuhan na atubangon an kaanggotan nin ibang tawo, kaipuhan na pogolan niato iyan nin tama tanganing mapagdanay an satong kaogmahan asin karahayan. Paano? Sinasabi sato kan Biblia: “Orog karahay an haloy na maanggot ki kan tawong makosog, asin an nakapopogol sa saiyang espiritu ki kan minasakop sa sarong banwaan.” (Talinhaga 16:32) Imbes na naghihidaleng magdesisyon na magpahayag nin kaanggotan, maninigong horophoropon niato an posibleng ibunga kan satong gigibohon. An pagbilang sagkod sa sampulo tibaad makaolang sato na gumibo nin pagbabasolan niato sa huri.—Talinhaga 14:17.

Kun halimbawa kita naaanggot asin dai niato aram an dahelan, kita maninigong mapakumbaba asin sadiosan na humagad nin tabang. An pag-admitir sa iba, nangorogna sa mga namomoot sato, kan satong mga kinatatakotan o pagkaipo nin tabang bakong kaluyahan; iyan dalan nin kadonongan asin kapusoan. Sa siring maaaraman niato an pinakagamot kan problema. An Biblia nagsasabi: “Nasusudya an mga plano kun mayo nin pribadong orolay, alagad sa kadakolan nin mga parahatol may nahahaman.”—Talinhaga 15:22.

An paghihingoa na masabotan an mga dahelan kun taano ta siring an iginagawe nin iba makatatabang sato na mapogolan an satong emosyonal na reaksion. Saro pa, kun kita masimbag sa sarong anggot, “Nasasabotan ko kun taano ta naaanggot ka,” tibaad lumipot tolos an saiyang boot. An Biblia naghahatol: “An pagmansay nin tawo nakapopogol nanggad sa saiyang kaanggotan, asin kagayonan nia an pagtahob sa kasalan.”—Talinhaga 19:11.

Kun makolgan niato an boot nin iba na dai man tinutuyo, kaipuhan na humagad kita nin dispensasyon. Halimbawa, kun may makatongtong sa saindong bitis, tibaad may tendensia kamong maanggot. Pero kun sia minahagad nin dispensasyon, nawawara an saindong kaanggotan. Tibaad makolog pa an saindong bitis, pero iginalang an saindong dignidad. Siring man, an satong marahay na ugale, kaiba an ordinaryong kortesiya asin marahay na disposisyon, puwedeng makatunaw sa pagsentir asin makapagpadanay sa paggalang sa sato sa relasyon niato sa satong agom, mga aki, mga katood, asin sa mga miembro kan Kristianong kongregasyon.—Talinhaga 16:24; Colosas 4:6; 1 Pedro 3:8.

Sa pag-atubang sa situwasyon na nagpapaanggot sa sato, nakatatabang na maaraman kun paano ipakikipag-olay an satong kaanggotan na dai inaatake an ibang tawo. May kalaenan an berbal na pagsalakay (“Tonto ka!” o, “Susuntokon ta ka!”) asin an pagsabi kan kaanggotan nin saro (“Naaanggot ako” o, “Nakolgan an boot ko”). An berbal na pagsalakay parateng nasusudya ta pinoprobokar kaiyan an iba na bumalos, mantang an pagsabi kan saindong pagmate bakong gayong pag-atake, asin an iba tibaad mapahiro na remedyohan an mga bagay. Arog kan sabi kan Biblia: “An simbag, kun mahoyo, nakapararayo nin kaanggotan, tara an tataramon na makolog nakapaaanggot. An tawong anggot nagpopoon nin iriwal, alagad an haloy na maanggot nagpapaontok sa iriwal.”—Talinhaga 15:1, 18.

Matanos na Kaanggotan

Para sa kadaklan sa sato natural sana an maanggot paminsanminsan. Sinasabi kan Biblia na minsan si Jehova nakamamate nin kaanggotan. (Sofonias 2:2, 3; 3:8) Kaya bakong makangangalas na an tawo, na ginibo sa Saiyang ladawan, magkaigwa nin kaparehong pagmate. (Genesis 1:26) Kaya, an pakamate nin kaanggotan mismo bako man na kasalan.

Minsan siring, kun anggot si Jehova, iyan perming huli sa tamang dahelan: Linapas an matanos na mga prinsipyo. Asin an saiyang reaksion perming tama nanggad asin sangkap an kontrol. Laen man sa bakong sangkap na mga tawo. Parate kitang naaanggot huli ta an satong amor propio nakolgan o huli sa ibang kaluyahan nin tawo. Kaya kaipuhan an pag-iingat sa ginigibo niato sa satong kaanggotan. Arog kan ipinatanid ni apostol Pablo: “Maanggot kamo, alagad dai kamo magkasala; dai nindo pagpasolnopon an aldaw na kamo may kaanggotan, ni tawan man nin lugar an Diablo.” (Efeso 4:26, 27) Iyo, puwedeng aprobetsaran ni Satanas an satong daing pagpopogol na kaanggotan. Sa katunayan, an “aranggotan” nalilista kaiba kan “mga gibo kan laman” na minaolang sa saro sa pakamana kan Kahadean nin Dios.—Galacia 5:19-21.

Iyan an dahelan na an disipulong si Santiago nagsadol: “Aramon nindo ini, namomotan kong mga tugang. An gabos na tawo kaipuhan na magin . . . maluway kun dapit sa kaanggotan; huli ta an kaanggotan nin tawo dai nagbubunga kan katanosan nin Dios.” (Santiago 1:19, 20) Dawa kun an satong kaanggotan may makatanosan na dahelan, an pagkabakong sangkap puwedeng magdara sato na gumawe sa daing pagpopogol, salang paagi. Kaya, maninigong permi kitang giyahan kan prinsipyo na: “Dai kamo magbalos, mga namomotan, kundi magtao nin lugar sa karatan; huli ta nasusurat: ‘Sako an pagbalos; ako an mabalos, sabi ni Jehova.’” (Roma 12:19) Girumdomon man na bilang mga tawong bakong sangkap, tibaad masala kita. Kaya peligroso an marikas na paghusgar sa iba sa ngaran nin matanos na indignasyon.—Santiago 2:13; 4:11, 12; 5:9.

Sono sa Kasuratan, kita nabubuhay sa panahon kan katapusan. Sa huring mga aldaw na ini, “an mga nasyon nagkaaranggot” tumang sa Kahadean nin Dios, asin an Diablo “may dakulang kaanggotan, sa pakaaram na halipot na sana an saiyang panahon.” (Kapahayagan 11:17, 18; 12:10-12) Kun siring, an pamumuhay niato sono sa Tataramon nin Dios iyo an solamenteng proteksion sa sato. (Salmo 119:105) Sa dai na mahahaloy an Dios maghohokom sa mga nasyon, asin an daga malilinigan kan gabos na karatan. (Isaias 35:10; 65:23; Miqueas 4:3, 4) Mientras tanto, kaipuhan na seguradohon niato na dai arogon an mga gibo kan anggot na kinaban na ini. An tamang pagpogol sa satong kaanggotan makatatabang na mapagdanay an pagkaminootan nin mag-agom, Kristianong pagkasararo, asin personal na katoninongan asin kaogmahan. Asin pinakamahalaga, iyan matabang sato na padagos na magkamit kan pag-oyon asin bendisyon ni Jehova Dios.—Salmo 119:165.