Dai Kamo Magpasingkog sa Kaanggotan

“PAHIWASHIWAS ka nguna!” “Dai ka magpabiglabigla!” “Pogoli an dila mo!” Pamilyar daw sa saindo an mga tataramon na iyan? Tibaad sinasabi nindo iyan sa saindong sadiri tanganing pakalmahon an saindong nagpupurokpusok na pagmate. An nagkapirang tawo naglalakawlakaw tanganing sumpoon an pagputok nin kaanggotan. Ini an simpleng mga paagi tanganing kontrolon an kaanggotan asin ingatan an relasyon sa iba.

Minsan siring, sa nakaagi pa sanang mga taon, dakol an naribong sa magkakontrang sadol hale sa mga propesyonal mapadapit sa kun baga an kaanggotan maninigong kontrolon o pogolan. Halimbawa, may nagkapirang sikologo na iinintrodusir an teoriya na “kun iyan mas nakararahay sa pagmate nindo,” iluwas an saindong kaanggotan. An iba nagpapatanid na an regular na pagputok nin kaanggotan “orog na nagigin causa nin mayo pa sa panahon na kagadanan kisa ibang peligrosong causa na arog kan paninigarilyo, alta-presyon, asin sobrang kolesterol.” An Tataramon nin Dios sayod na nagsasabi: “Pabayaan an kaanggotan asin rumayo sa kabangisan; dai ka magpaheling nin kaanggotan tangani sanang makagibo nin maraot.” (Salmo 37:8) Taano an Biblia ta nagtatao kan espesipikong hatol na iyan?

An dai kontroladong mga emosyon minagiya sa dai kontroladong mga gibo. Nagin risang-risa ini amay na marhay sa kasaysayan nin tawo. Mababasa niato: “Si Cain naanggot na marhay, asin an saiyang lalauogon nagpoon na magmurusdot.” Saen sia giniyahan kaini? An saiyang kaanggotan nangibabaw sa saiya asin iyo an nasunod, kaya ngani pinatagas kaiyan an saiyang puso sa konseho ni Jehova na maggibo nin marahay. An mayong kontrol na kaanggotan ni Cain naggiya sa saiya sa magabat na kasalan—an tinutuyong paggadan sa saiyang tugang na lalaki.—Genesis 4:3-8.

Si Saul, an enot na hade kan Israel, kaagid kaiyan naimpluwensiahan na marhay kan madangog nia na mas dakula an pag-omaw na inako ni David. “An mga babaeng nagseselebrar nagsisirimbag asin nagsasarabi: ‘Nagadan ni Saul an saiyang mga rinibo, asin ni David an saiyang manampulong ribo.’ Asin nagpoon na maanggot nin makuri si Saul, asin an mga tataramon na ini bakong marahay sa saiyang punto de vista.” An kaanggotan nagdominar na marhay sa kaisipan ni Saul kaya minotibar sia kaiyan na probaran na asesinaron si David nin nagkapirang beses. Minsan ngani si David nagsadiring boot na makipagkatood, habo ni Saul na makipagkatoninongan asin makiulian. Sa katapustapusi, biyong nawara sa saiya an pabor ni Jehova.—1 Samuel 18:6-11; 19:9, 10; 24:1-21; Talinhaga 6:34, 35.

Dai malilikayan, kun an saro magpadaog sa dai nakokontrol na kaanggotan, sia mataram asin magibo nin mga bagay na makakokolog sa gabos na kalabot. (Talinhaga 29:22) Si Cain asin si Saul naanggot huli ta an kada saro sa sainda, sa sadiri niang kagustohan, nag-imon asin naara. Minsan siring, an kaanggotan puedeng lumataw huli sa manlaenlaen na dahelan. An mayo nin marahay na basehan na pagtatsar, pag-insulto, dai pagkasinabotan, o bakong makatanosan na pagtratar puedeng makapukaw nin pagputok.

An halimbawa ni Cain asin ni Saul nagsusuherir nin seryosong kakulangan ninda pareho. An dolot ni Cain minalataw na dai namotibar nin pagtubod. (Hebreo11:4) An dai pagkuyog ni Saul sa direktang mga pagboot ni Jehova asin an saiyang suminunod na mga paghingoang ipangatanosan an saiyang sadiri nagbunga kan pagkawara kan pabor asin espiritu nin Dios. Malinaw nanggad, rinaot kan duwang lalaking idto an saindang relasyon ki Jehova.

Ikomparar an kalaenan kan siring na mga ugale sa ugale ni David, na may dahelan na maanggot huli sa tratamiento na naeksperyensiahan nia ki Saul. Pinogolan ni David an saiyang espiritu. Taano? Sinabi nia: “Dai ko lamang pepensaron, sa punto de vista ni Jehova, na gibohon ko an bagay na ini sa sakong kagurangnan, an linahidan ni Jehova.” Malinaw sa isip ni David an saiyang relasyon ki Jehova, asin iyan nakaapektar sa saiyang tratamiento ki Saul. Mapakumbaba niang ipinabaya an mga bagay-bagay sa kamot ni Jehova.—1 Samuel 24:6, 15.

Tunay nanggad, magabat an kalabot bilang resulta kan dai nakokontrol na kaanggotan. Si apostol Pablo nagpatanid: “Maanggot kamo, pero dai kamo magkasala.” (Efeso 4:26) Minsan ngani kun beses an paggurobgutob nasa lugar, may dai nahahale na peligro na an kaanggotan puedeng magin satong singkogan. Kun siring, bakong makangangalas na napapaatubang sa sato an angat na kontrolon an satong kaanggotan. Paano niato iyan magigibo?

An sarong pangenot na paagi iyo an pagpatalubo nin makosog na relasyon ki Jehova. Ineenkaminar nia kamo na buksan an saindong puso asin isip sa saiya. Sabihon nindo sa saiya an saindong mga kahaditan asin kapurisawan, asin humagad na magkaigwa kamo nin kalmadong puso tanganing daogon an kaanggotan. (Talinhaga 14:30) Makasisierto kamo na “an mga mata ni Jehova nasa mga matanos, asin an saiyang mga talinga nasa saindang pagngayongayo.”—1 Pedro 3:12.

An pamibi puede kamong moldehon asin giyahan. Sa anong paagi? Iyan puedeng magkaigwa nin hararom na epekto sa saindong tratamiento sa iba. Girumdomon kun paano an pagtrato sa saindo ni Jehova. Arog kan sabi kan Kasuratan, “dai [ni Jehova] ginibo sa sato an sono sa satong mga kasalan.” (Salmo 103:10) Mahalaga an mapagpatawad na espiritu tangani na kamo ‘dai masaroan ni Satanas.’ (2 Corinto 2:10, 11) Dugang pa, an pamibi nagseserbing pambukas sa saindong puso sa paggiya kan banal na espiritu, na kayang itumba an marigonon an pundasyon na mga ugale sa buhay. Si Jehova maogmang nagtatao nin ‘katoninongan na minalampas sa gabos na kaisipan,’ na makabubutas sa saindo sa namomogol na puersa nin kaanggotan.—Filipos 4:7.

Minsan siring, an pamibi dapat na ibanan nin regular na pagsiyasat sa Kasuratan tanganing magibo niato na “padagos na saboton kun ano an kabotan ni Jehova.” (Efeso 5:17; Santiago 3:17) Kun kamo personal na nasasakitan na kontrolon an saindong kaanggotan, magmaigot na magkaigwa kan kaisipan ni Jehova sa bagay na iyan. Repasohon an mga teksto na espesipikong konektado sa pagkontrol nin kaanggotan.

Si apostol Pablo nagtatao kan importanteng pagirumdom na ini: “Gumibo kita kan marahay sa gabos, alagad orog na sa mga may relasyon sa sato sa pagtubod.” (Galacia 6:10) Ikonsentrar nindo an saindong kaisipan asin mga aksion sa paggibo nin marahay sa iba. An siring na kapakipakinabang, positibong aktibidad maenkaminar nin pakikidamay asin pagtitiwala patin iinaan an mga dai pagkasinabotan na madaling magresulta sa kaanggotan.

Sinabi kan salmista: “Pamugtaka nin marigon an sakuyang mga lakad sa saimong kasabihan, asin mayo man logod nin nakadadanyar na bagay an mangibabaw sa sakuya. An nagsosopay na katoninongan nasa mga namomoot sa saimong ley, asin sa sainda mayo nin masisingkogan.” (Salmo 119:133, 165) Iyan puedeng magin totoo man sa saindo.

[Kahon/Retrato sa pahina 9]

MGA PAAGI NA KONTROLON AN KAANGGOTAN

□ Mamibi ki Jehova.—Salmo 145:18.

□ Siyasaton an Kasuratan aroaldaw. —Salmo 119:133, 165.

□ Magmasibot sa kapakipakinabang na mga aktibidad.—Galacia 6:9, 10.