“Rumani Kamo sa Dios, Asin Sia Marani sa Saindo”

Bago Asin Pakatapos—Nanompongan Nia an Puersa na Magbago

SINASABI ni Sandra, sarong babae sa Mejico, na sia an pasaway sa saiyang pamilya. Rinaot kan pakamate na sia hinahaboan asin dai pinapadangat an mga taon kan saiyang pagkatinedyer. Sabi nia: “Inagihan ko an pagkabarobata na may dai nahahaleng pagmate na dai nang halaga an buhay ko asin dakol na pagduda manongod sa kun taano ta buhay pa ako asin manongod sa buhay.”

Kan nasa haiskul, pinonan ni Sandra na inomon an arak kan saiyang ama sa harong. Pag-abot nin panahon, nagpoon na siang bumakal kan sadiri niang arak asin nagin alkoholiko. “Mayo na akong dahelan para mabuhay,” an inadmitir nia. Huling desesperado na, si Sandra nagpoon na magdroga. “An solamenteng nakatabang sa sako na malingawan an sakong mga problema,” an sabi nia, “iyo an dara-dara ko sa sakong bag: sarong bote nin arak, mga pildora, o kadikit na marihuana.”

Pagkagradwar ni Sandra sa eskuelahan nin medisina, mas ruminuro an saiyang pagigin alkoholiko. Prinobaran niang taposon an saiyang buhay. Alagad sia nakaligtas.

Si Sandra nagdolok sa dakol na manlaenlaen na relihion para sa espirituwal na tabang asin emosyonal na suporta pero mayong nangyari. Huling nawaran na nin paglaom asin nagpadaog na sa pagkadesesperar, paorootro siang nag-agrangay sa Dios: “Haen ka? Taano ta dai mo ako tinatabangan?” Biyo na siang nawaran nin pagpahalaga sa sadiri kan an saro sa Mga Saksi ni Jehova makipag-olay sa saiya. Nagbunga ini nin personal na pag-adal sa Biblia. Napahirong marhay an boot ni Sandra kan naaraman nia na “si Jehova harani sa mga laglag an puso.”​—Salmo 34:18.

Tinabangan si Sandra kan nagtotokdo sa saiya sa Biblia na masabotan na aram ni Jehova Dios na kita madaling mabiktima huli sa kasalan asin pagkabakong sangkap na minana niato ki Adan. Naaraman ni Sandra na nasasabotan nin Dios na dai niato kayang maabot sa sangkap na paagi an matanos na mga pamantayan. (Salmo 51:5; Roma 3:23; 5:​12, 18) Naogma siang maaraman na si Jehova dai nagtuturuhok sa satong mga kaluyahan, asin dai nia hinahagad sa sato an labi sa kaya niatong gibohon. Naghapot an salmista: “Kun mga sala an saimong binabantayan, O Jah, O Jehova, siisay an makatitindog?”​—Salmo 130:3.

An importanteng katotoohan sa Biblia na nagpaogma sa puso ni Sandra iyo an atang na pantubos ni Jesu-Cristo. Paagi kaiyan, maheherakon na itinatao ni Jehova sa makinuyog na mga tawo an matanos na kamugtakan sa ibong kan saindang pagkabakong sangkap. (1 Juan 2:2; 4:​9, 10) Iyo, puede niatong akoon an “kapatawadan sa satong mga kalapasan” asin sa siring matabangan kita na mapangganahan an ano man na pakamate nin kadaihan nin halaga.​—Efeso 1:7.

Nakanood si Sandra nin mahalagang mga leksion sa halimbawa ni apostol Pablo. Pinasalamatan niang marhay an kabootan nin Dios sa maugayon na pagpatawad sa saiyang mga sala kan nakaagi asin sa pagsuportar sa saiyang maigot na pakikipaglaban na mapangganahan an pabalikbalik na mga kaluyahan. (Roma 7:15-25; 1 Corinto 15:​9, 10) Ikinorehir ni Pablo an saiyang pamumuhay, ‘linanog an saiyang hawak asin inoripon iyan’ tanganing makapagdanay sa dalan na inooyonan nin Dios. (1 Corinto 9:27) Dai nia tinogotan na oriponon sia kan saiyang makasalan na mga inklinasyon.

Pinasakitan si Sandra kan saiyang mga kaluyahan, alagad padagos niang linabanan iyan. Odok siang nag-arang kan tabang ni Jehova tanganing mapangganahan iyan asin hinagad an saiyang pagkaherak. (Salmo 55:22; Santiago 4:8) Huling namamatean an personal na interes nin Dios sa saiya, nakaya ni Sandra na bakleon an saiyang buhay. “Naggagayagaya ako sa bilog na panahon na pagtotokdo sa iba kan Biblia,” an sabi nia. Nagkaigwa si Sandra nin pribilehio na matabangan an saiyang mas matuang tugang na babae asin an saiyang nguhod na tugang na babae na mamidbid si Jehova. Mantang ‘naggigibo sia kan marahay,’ nagboboluntaryo man sia kan saiyang abilidad sa pagbolong sa mga kombension kan Mga Saksi ni Jehova.​—Galacia 6:10.

Kumusta an adiksion ni Sandra? Kompiado siang nagsabi: “Malinaw an sakong isip. Dai na ako nag-iinom, nagsisigarilyo, o nagdodroga. Dai ko na kaipuhan an mga iyan. Nanompongan ko na an hinahanap ko.”

[Blurb sa pahina 9]

“Nanompongan ko na an hinahanap ko.”

[Kahon sa pahina 9]

Mga Prinsipyo sa Biblia na Epektibo

An minasunod nagkapirang prinsipyo sa Biblia na nakatabang sa dakol na makabutas sa nakapararamog na mga adiksion:

“Magpakalinig kita sa lambang ramog nin laman asin espiritu, na sinasangkap an kabanalan sa pagkatakot sa Dios.” (2 Corinto 7:1) An binebendisyonan nin Dios idtong mga nagpakalinig sa karamogan, na linilikayan an maating mga gibo.

“An pagkatakot ki Jehova nangangahulogan nin pagkaongis sa maraot.” (Talinhaga 8:13) An reberensial na pagkatakot sa Dios nakatatabang sa sarong tawo na makabutas sa maraot na mga bisyo, kaiba an pagdodroga. Apuera sa pagpaogma ki Jehova, an nagbakle napoprotehiran tumang sa makatatakot na mga helang.

“Magpasakop asin magkuyog sa mga gobyerno asin autoridad bilang mga namamahala.” (Tito 3:1) Sa dakol na lugar, an pagkaigwa o paggamit nin nagkapirang droga pagbalga sa ley. An tunay na mga Kristiano mayo o dai naggagamit nin ilegal na mga droga.