Kun Taano ta Dai Kita Puedeng Mabuhay nin Solo

“Mas marahay an duwa sa saro . . . Kun an saro sa sainda mapukan, mapatitindog kan saro an saiyang kaibanan.”​—Hadeng Salomon

SINABI ni Hadeng Salomon kan suanoy na Israel: “Mas marahay an duwa sa saro, ta igwa sinda nin marahay na balos sa saindang kahigosan. Huli ta kun an saro sa sainda mapukan, mapatitindog kan saro an saiyang kaibanan. Alagad ano an mangyayari sa sasaro na napukan kun mayo nin iba na mapatindog sa saiya?” (Eclesiastes 4:​9, 10) Sa siring, idinodoon kan madonong na paramasid na ini sa gawe-gawe nin tawo na kita nangangaipo nin makakaibaiba asin na importanteng dai niato isuway an satong sadiri. Minsan siring, bako ining opinyon sana nin tawo. An sinabi ni Salomon hale sa kadonongan asin pasabong nin Dios.

Bakong madonong na isuway niato an satong sadiri. Kaipuhan nin mga tawo an lambang saro. Gabos kita nangangaipo kan kosog asin tabang na makukua niato sa ibang tawo. “An isinusuway an sadiri mahanap kan maimot niang kamawotan,” an sabi kan sarong talinhaga sa Biblia. “Sasarongaton nia an gabos na praktikal na kadonongan.” (Talinhaga 18:1) Kaya bakong makangangalas na ineenkaminar kan mga eksperto sa siensia sosyal an mga indibiduwal na makiayon sa sarong grupo asin magin interesado sa iba.

Kabilang sa mga irinekomendar na paagi tanganing makabalik an pamumuhay bilang sarong komunidad, sinambit ni Propesor Robert Putnam an “pagpakosog sa impluwensia kan relihiosong pagtubod.” An Mga Saksi ni Jehova pambihira sa bagay na ini huli ta nakakamtan ninda an proteksion sa garo pamilyang mga kongregasyon sa bilog na daga. Kaoyon kan mga tataramon ni apostol Pedro, sinda ‘namomoot sa bilog na kasararoan nin mga tugang,’ na igwa nin reberensial na ‘pagkatakot sa Dios.’ (1 Pedro 2:17) Nalilikayan man kan mga Saksi an pagsosolosolo asin an nakadadanyar na mga epekto kaiyan huli ta an dakol na positibong aktibidad na konektado sa tunay na pagsamba nagpapadanay sa sainda na imbuelto sa pagtabang sa mga kapwa ninda na manodan an katotoohan na yaon sa Tataramon nin Dios, an Biblia.​—2 Timoteo 2:15.

An Pagkamoot Asin an Pakiibaiba Nakapabago sa Buhay Ninda

An Mga Saksi ni Jehova sarong nagkakasararong komunidad na dian an lambang miembro may importanteng kabtang. Halimbawa, estudyare an kaso ni Miguel, Froylan, asin Alma Ruth, tolong miembro kan sarong pamilyang Latino Amerikano. Namundag sinda na may diperensia sa tolang na nagbubunga nin sarong klase nin pagkapurog. Sindang tolo nasa silyang de rueda. Paano nakaapektar sa buhay ninda an pakikiasosyar sa mga Saksi?

Si Miguel nagkokomento: “Nakaeksperyensia ako nin kritikal na mga panahon, alagad kan magpoon akong makiasosyar sa banwaan ni Jehova, nabago an buhay ko. Peligrosong marhay an isuway an sadiri. An pakikiasosyar sa mga kapagtubod sa Kristianong mga pagtiripon, na kaibaiba ninda kada semana, nakatabang na marhay sa sako na makanompong nin pagkakontento asin satispaksion.”

Idinugang pa ni Alma Ruth: “Dati may mga panahon na nakakaeksperyensia ako nin grabeng depresyon; nakakamate ako nin grabeng kamondoan. Alagad kan mamidbid ko si Jehova, namatean ko na puede akong magkaigwa nin dayupot na relasyon sa saiya. Iyan an nagin pinakamahalagang bagay sa buhay ko. Sinuportaran kaming marhay kan sakong pamilya, asin orog kaming pinagsararo kaiyan.”

An ama ni Miguel mamomoton na tinokdoan si Miguel na magbasa asin magsurat. Dangan tinabangan ni Miguel si Froylan asin Alma Ruth na makanood man na magbasa asin magsurat. Ini mahalagang marhay sa espirituwalidad ninda. “Nakinabang kaming marhay sa pakanood na magbasa huli ta puede na kaming magkakan sa espirituwal paagi sa pagbasa kan Biblia asin mga publikasyon na basado sa Biblia,” sabi ni Alma Ruth.

Sa presente, si Miguel naglilingkod bilang sarong Kristianong magurang sa kongregasyon. Nabasa na ni Froylan nin siyam na beses an bilog na Biblia. Pinahiwas ni Alma Ruth an saiyang paglilingkod ki Jehova paagi sa pagigin sarong ministrong payunir, o bilog na panahon na parabalangibog kan Kahadean, poon kan 1996. Sia nagkokomento: “Sa bendisyon ni Jehova naabot ko an pasohan na ini, huling sinusuportaran ako kan sakong mahal na mga tugang na babae na nagtatabang sa sako bako sanang sa paghuhulit kundi patin sa pagtotokdo paagi sa pamamayo sa 11 pag-adal sa Biblia na naponan ko.”

Saro pang marahay na halimbawa an ipinaheling ni Emelia, na naaksidente kaya kinaipuhan niang gumamit nin silyang de rueda huli ta nadanyaran an saiyang mga tabay asin gulod. An mga Saksi ni Jehova sa Siudad ni Mejico nakipag-adal sa saiya sa Biblia, asin sia nabautismohan kan 1996. Sabi ni Emelia: “Bago ko naaraman an katotoohan, gusto kong maghugot; habo ko na nanggad na mabuhay. An pagmate ko dai nang halaga an buhay, na aldaw asin banggi akong naghihibi. Alagad kan makiasosyar ako sa banwaan ni Jehova, namatean ko an pagkamoot kan mga tugang. An ipinaheheling nindang personal na interes sa sako nagparigon sa sakong boot. An saro sa mga magurang sa kongregasyon nagin garo tugang o ama ko. Sia asin an nagkapirang ministeryal na lingkod dinadara ako sa mga pagtiripon asin sa paghuhulit sa sakong silyang de rueda.”

Si Jose, na nabautismohan bilang saro sa Mga Saksi ni Jehova kan 1992, nagsosolo sa harong. Sia 70 anyos, na nagretiro kan 1990. Kaidto si Jose nakaeeksperyensia nin depresyon, alagad pagkatapos na hulitan sia kan sarong Saksi, tolos-tolos siang nagpoon na umatender sa Kristianong mga pagtiripon. Nagustohan nia an nadangog asin naheling nia duman. Halimbawa, naheling nia an pakiibaiba kan mga tugang asin namatean an saindang pagmalasakit sa saiya bilang persona. An kamagurangan asin ministeryal na mga lingkod sa saiyang kongregasyon an nag-aataman sa saiya ngonyan. (Filipos 1:1; 1 Pedro 5:2) An arog kaiyan na mga kapagtubod “tabang na nagpapakosog” sa saiya. (Colosas 4:11) Iniibanan ninda sia sa doktor, binibisita sia sa harong, asin sinuportaran sia durante kan saiyang apat na operasyon. Sabi nia: “Ipinaheheling ninda an pagmalasakit sa sako. Sinda an talagang pamilya ko. Ikinaoogma ko an saindang pakiibaiba.”

Igwang Tunay na Kaogmahan sa Pagtatao

Kan sabihon ni Hadeng Salomon na “mas marahay an duwa sa saro,” isinabi pa sana nia an manongod sa kadaihan nin pakinabang kan pag-ubos kan gabos na kosog nin saro sa pagkua nin materyal na mga kayamanan. (Eclesiastes 4:7-9) Iyan mismo an galagang pinag-aaabot kan dakol ngonyan, dawa ngani nangangahulogan ini nin pagsasakripisyo kan relasyon sa tawo sa laog sagkod sa luwas kan pamilya.

An espiritung iyan nin kahanaban asin kaimotan nagmotibar sa dakol na isuway an saindang sadiri. Ini dai nagtao sainda nin kaogmahan ni pagkakontento sa buhay, huli ta pagkadesganar asin kadaihan nin paglaom an lakop sa mga nagpapadara sa siring na aktitud. Sa kabaliktaran, ipinaheheling kan mga isinaysay pa sana an marahay na mga epekto kan pakikiasosyar sa mga naglilingkod ki Jehova asin minomotibar nin pagkamoot para sa saiya asin sa saindang kapwa. An regular na pag-atender sa Kristianong mga pagtiripon, an pagsuportar asin pagmalasakit kan kapwa mga Kristiano, asin an maigot na gibohon sa ministeryo nakakontribwir na marhay sa pagtabang sa mga indibiduwal na ini na mapangganahan an negatibong mga saboot na konektado sa pagsosolosolo.​—Talinhaga 17:17; Hebreo 10:​24, 25.

Mantang minadepende kita sa lambang saro, natural sana na an paggibo nin mga bagay para sa iba nagbubunga nin satispaksion. Si Albert Einstein, na an mga ginibo pinakinabangan nin iba, nagsabi: “An halaga nin sarong tawo . . . maninigong maheling sa kun ano an saiyang itinatao asin bakong sa kun ano an saiyang inaako.” Kaoyon ini kan mga tataramon na ini kan satong Kagurangnan na si Jesu-Cristo: “Igwang orog na kaogmahan sa pagtao kisa pag-ako.” (Gibo 20:35) Kun siring, minsan ngani marahay an umako nin pagkamoot, marahayon man sa salud an magpaheling nin pagkamoot sa iba.

An sarong nagbibiaheng paraataman na sa laog nin dakol na taon nagbisita sa mga kongregasyon tanganing magtao nin espirituwal na tabang asin nakatabang sa pagtogdok nin mga lugar na tiriponan para sa mga Kristianong dukha ipinahahayag an saiyang saboot nin arog kaini: “An kagayagayahan sa paglilingkod sa sakong mga tugang asin pakaheling sa saindang mga lalauogon na pano nin apresasyon nagpapahiro sa sako na padagos na humanap nin mga oportunidad na makatabang. An nagin eksperyensia ko iyo na an pagpaheling nin personal na interes sa iba an liabe sa kaogmahan. Asin aram ko na bilang mga magurang sa kongregasyon, maninigo kitang magin ‘siring sa pailihan sa doros . . . , siring sa mga sapa nin tubig sa sarong desierto, siring sa limpoy nin tugdok na kantil sa tagiltil na daga.’”​—Isaias 32:2.

Kanigoan Kaogma na Mag-ontok na Sararo!

Daing duwa-duwa na igwa nin dakulang pakinabang asin tunay na kaogmahan sa pagtabang sa iba asin sa paghingoang makiibaiba sa mga naglilingkod ki Jehova. “Uya!” an kagsing kan salmista. “Kanigoan karahay asin kanigoan kaogma na an magturugang mag-ontok na sararo!” (Salmo 133:1) An pagkasararo sa pamilya nagkokontribwir na marhay sa pagsinuportaran, arog kan ipinaheling sa kaso ni Miguel, Froylan, asin Alma Ruth. Asin kanigoan na bendisyon na magkasararo sa tunay na pagsamba! Pakatao nin konseho sa Kristianong mga agom na lalaki asin babae, si apostol Pedro nagsurat: “Sa katapustapusi, kamo gabos magin parareho an isip, nagpapaheling nin pakikipagkapwa, may kapadangatan na sa magturugang, madinamayon sa mapagpadangat na paagi, mapakumbaba sa isip.”​—1 Pedro 3:8.

An tunay na pakikikatood nagtatao nin dakulang pakinabang, sa emosyon sagkod sa espirituwal. Kinakaolay an mga kaibaiba sa pagtubod, si apostol Pablo nagsadol: “Magtaram na may pagranga sa mga kalag na nagmomondo nin makuri, suportaran an maluya, magin matinios sa gabos. . . . Danay na hanapon an karahayan kan lambang saro asin kan gabos na iba pa.”​—1 Tesalonica 5:​14, 15.

Kun siring, maghanap nin praktikal na mga paagi na makagibo nin marahay sa iba. ‘Gumibo kan marahay sa gabos, alagad orog na sa mga may relasyon sa saindo sa pagtubod,’ huli ta ini an matao nin tunay na kahulogan sa saindong buhay asin makontribwir sa saindong pagkakontento asin satispaksion. (Galacia 6:​9, 10) An disipulo ni Jesus na si Santiago nagsurat: “Kun an sarong tugang na lalaki o babae huba asin kulang nin pagkakan sa aroaldaw, alagad an saro sa saindo nagsasabi sa sainda: ‘Lakaw kamo sa katoninongan, magpakahimbong kamo asin magpakabasog kamo,’ alagad dai man nindo sinda tinatawan kan mga pangangaipo para sa saindang hawak, ano an pakinabang kaiyan?” (Santiago 2:​15, 16) Risang-risa an simbag sa hapot na iyan. Kaipuhan na kita ‘nagririsa, bakong kan personal na interes sa sadiri sana niatong mga bagay-bagay, kundi siring man sa personal na interes sa mga bagay-bagay kan iba.’​—Filipos 2:4.

Apuera sa pagtabang sa iba sa materyal na paagi kun may espesyal na pangangaipo o kun may kalamidad na nangyayari, an Mga Saksi ni Jehova sibot na marhay sa pagtabang sa saindang kapwa tawo sa mahalagang marhay na paagi​—sa paghuhulit kan maogmang bareta kan Kahadean nin Dios. (Mateo 24:14) An pakikikabtang kan labing 6,000,000 na Saksi sa pagbalangibog kan mensaheng ini nin paglaom asin karangahan ebidensia kan saindang tunay, mamomoton na interes sa iba. Alagad an pagtao nin tabang hale sa Banal na Kasuratan nakatatabang man na mapanigoan an saro pang pangangaipo nin tawo. Ano iyan?

Pagpanigo sa Mahalagang Marhay na Pangangaipo

Tanganing makamtan an tunay na kaogmahan, kaipuhan na igwa kita nin tamang relasyon sa Dios. May nagsabi: “An katunayan na an tawo, saen man na lugar sa gabos na panahon, poon sa kapinonan sagkod sa presenteng aldaw, nakamamate nin natural na tendensia na umarang sa sarong bagay na tinutubod niang mas halangkaw asin mas makapangyarihan kisa sa sadiri nia, nagpapaheling na an relihion katambay na asin maninigong rekonoseron kan siensia. . . . Maninigo kitang magkaigwa nin may pagkangirhat na paggalang, pagngalas asin reberensia sa pakaheling kan pagigin lakop kan paghanap asin paniniwala nin tawo sa sarong supremong persona.”​—Man Does Not Stand Alone, by A. Cressy Morrison.

Ipinahayag ni Jesu-Cristo: “Maogma idtong mga nakamamate kan saindang espirituwal na pangangaipo.” (Mateo 5:3) An mga tawo dai napaparahay kun isusuway nin halawig sa ibang tawo. Minsan siring, mas seryosong marhay na isuway an satong sadiri sa satong Kaglalang. (Kapahayagan 4:11) An pagkua asin pag-aplikar kan “mismong kaaraman nin Dios” maninigong magin mahalagang elemento sa satong buhay. (Talinhaga 2:1-5) Tunay nanggad, maninigo kitang magin determinado na panigoan an satong espirituwal na pangangaipo, huli ta dai kita puedeng mabuhay nin solo asin suway sa Dios. An sarong maogma asin totoong nakakokontentong buhay nakadepende sa marahay na relasyon ki Jehova, “an Kaharohalangkawe sa bilog na daga.”​—Salmo 83:18.

[Ritrato sa pahina 5]

Miguel: “Nakaeksperyensia ako nin kritikal na mga panahon, alagad kan magpoon akong makiasosyar sa banwaan ni Jehova, nabago an buhay ko”

[Ritrato sa pahina 5]

Alma Ruth: “Kan mamidbid ko si Jehova, namatean ko na puede akong magkaigwa nin dayupot na relasyon sa saiya”

[Ritrato sa pahina 6]

Emelia: “Bago ko naaraman an katotoohan, . . . an pagmate ko dai nang halaga an buhay”

[Ritrato sa pahina 7]

An pakikiasosyar sa tunay na mga parasamba nakatatabang na mapanigoan an satong espirituwal na pangangaipo