Kun Paano Nindo Mapaninigoan an Saindong Espirituwal na mga Pangangaipo
“KAN nakaaging dekada, labing 300 na libro manongod sa kabtang kan espirituwalidad sa trabaho—poon sa Jesus CEO sagkod sa The Tao of Leadership—an nakapano sa mga tindahan nin libro,” an sabi kan U.S.News & World Report. An pangyayaring ini nagpapabanaag sana kan katunayan na sa dakol na nasyon na asensado sa materyal, nagdadakol an naghihimuyawot nin espirituwal na giya sa buhay. Nagkokomento sa bagay na ini, an magasin sa komersio na Training & Development nagsasabi: “Sa panahon na naiimpluwensiahan na kan teknolohiya an lambang iba pang aspekto kan satong buhay, kita naghahanap nin mas hararom na kahulogan, nin katuyohan, asin nin mas dakulang personal na satispaksion.”
Pero, saen nindo puedeng makua an nakakokontentong espirituwal na giya? Kan nakaagi, an mga tawo naglalaom sa establisadong relihion tanganing tabangan sindang makua an “mas hararom na kahulogan” asin “katuyohan” nin buhay. Ngonyan, tinalikdan na nin dakol an establisadong relihion. Nanompongan sa sarong surbey na ginibo sa 90 halangkaw an posisyon na manedyer asin ehekutibo na “ipinaliliwanag kan mga tawo an malinaw na kalaenan kan relihion asin espirituwalidad,” an sabi kan Training & Development. Minamansay kan mga hinapot sa surbey na an relihion “dai nagtatao nin katanosan asin nakababanga,” mantang an espirituwalidad minamansay bilang “unibersal asin mahiwas an sakop.”
An dakol na hoben sa bakong relihiosong mga sosyedad, arog kan Australia, Nueva Zelandia, United Kingdom, asin Europa, may naheheling man na kalaenan kan relihion asin espirituwalidad. Si Propesor Ruth Webber, na nagsusurat sa Youth Studies Australia, positibong nagsabi: “An sarong mayoriya nin mga hoben nagtutubod sa Dios, o sa sarong klase nin lihis sa natural na puersa alagad dai kinokonsiderar an iglesia na importante o nakatatabang sa pagpahayag kan saindang espirituwalidad.”
An Tunay na Relihion Nagpapaoswag sa Espirituwalidad
An mapagdudang pagmansay na ini dapit sa relihion natural sana. Dakol na relihiosong organisasyon an imbueltong marhay sa politikal na intriga asin pagsaginsagin sa moral saka may kasalan sa inosenteng dugo na pinabolos sa dai mabilang na relihiosong guerra. Minsan siring, minsan ngani hinahaboan an relihiosong mga organisasyon na nadigtaan nin pagsaginsagin asin panloloko, may mga napasala sa paghabo man sa Biblia, na hinohona nindang nagkokonsinte sa mga gibong arog kaiyan.
An totoo, kinokondenar kan Biblia an pagsaginsagin asin katampalasanan. Sinabi ni Jesus sa mga namomoon sa relihion kan saiyang kaaldawan: “Herak man sa saindo, mga eskriba asin Fariseo, mga parasaginsagin! huli ta kamo kabaing nin mga lolobngan na pinaputi, na sa luwas magayonon na paghelingon alagad sa laog pano kan mga tolang nin mga gadan asin nin gabos na klaseng karigsokan. Siring man kamo, sa luwas garo matanos sa mga tawo, alagad sa laog kamo parano nin pagsaginsagin asin katampalasanan.”—Mateo 23:27, 28.
Dugang pa, ineenkaminar kan Biblia an mga Kristiano na magin neutral sa gabos na bagay-bagay sa politika. Imbes na sadolon an mga nagturubod na maggaradanan, iyan nagsasabi sa sainda na maninigong andam sindang magadan para sa lambang saro. (Juan 15:12, 13; 18:36; 1 Juan 3:10-12) Imbes na “dai nagtatao nin katanosan asin nakababanga,” an tunay na relihion, na basado sa Biblia, “mahiwas an sakop.” Sinabi ni apostol Pedro: “An Dios daing ipinaoorog, kundi sa lambang nasyon an tawo na natatakot sa saiya asin naggigibo nin katanosan saiyang inaako.”—Gibo 10:34, 35.
An Biblia—Sarong Masasarigan na Giya sa Espirituwal na Salud
Sinasabi sa sato kan Biblia na an mga tawo linalang sa ladawan nin Dios. (Genesis 1:26, 27) Minsan ngani dai man ini nangangahulogan na an mga tawo kapareho nin Dios sa pisikal na paagi, nangangahulogan nanggad iyan na an mga tawo may abilidad na ipabanaag an personalidad nin Dios, kaiba an kapasidad para sa espirituwal na mga bagay, o espirituwalidad.
Kun siring kaiyan, makatanosan na maniwala na matao man sa sato an Dios nin paagi tanganing mapanigoan an satong espirituwal na mga pangangaipo, siring man nin tamang paggiya tanganing mamidbid niato an kalaenan kun ano an kapakipakinabang asin kun ano an nakadadanyar sa sato sa espirituwal. Kun paanong linalang nin Dios an satong hawak na may pambihira an pagkadisenyong sistema sa inmunidad, na naglalaban sa helang asin nagtatabang na papagdanayon kitang may marahay na salud, sinangkapan man nia kita nin konsensia, o tingog sa laog, na makatatabang sa sato na gumibo nin tamang mga desisyon asin lumikay sa mga gibo na nakadadanyar sa pisikal asin sa espirituwal. (Roma 2:14, 15) Siring kan aram niato, tanganing magpunsionar an satong sistema sa inmunidad, kaipuhan na tawan iyan nin tamang sustansia. Kaagid kaiyan, tanganing magpunsionar an satong konsensia, kaipuhan niatong pakakanon iyan nin masustansiang espirituwal na kakanon.
Sinasabi kun anong klase nin kakanon an magpapadanay sa sato na may marahay na salud sa espirituwal, si Jesus nagsabi: “An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.” (Mateo 4:4) An mga tataramon ni Jehova isinurat sa saiyang Tataramon, an Biblia, asin iyan “kapakipakinabang para sa pagtokdo, sa pagsagwe, sa paghusay kan mga bagay.” (2 Timoteo 3:16) Kun siring, yaon na sa sato an paninimbagan na maghingoang kumakan nin espirituwal na kakanon. Kun sagkod saen an kaaraman niato sa Biblia asin an paghihingoa niato na iaplikar an mga prinsipyo kaiyan sa satong buhay, sagkod man dian kita makikinabang sa espirituwal asin pisikal.—Isaias 48:17, 18.
Bawi daw an Paghihingoa?
Totoo, kaipuhan an panahon tanganing mapaoswag an satong espirituwal na salud paagi sa pag-adal sa Biblia; asin garo baga kulang na marhay an panahon. Alagad bawi an paghihingoa huli sa mga balos! Mangnoha an nagkapirang sibot na propesyonal na nagpapaliwanag kun taano ta importante sa sainda an pagtao nin panahon tanganing asikasohon an saindang espirituwal na salud.
Si Marina, sarong doktor, nagsasabi: “Dai ko talaga noarin man pinag-isipan an manongod sa sakong espirituwalidad sagkod na nagpoon akong magtrabaho sa sarong ospital asin nagpoon na matudok an boot ko huli sa mga pagdusa nin iba. Kaidto ko narealisar na kaipuhan kong rekonoseron asin panigoan an sakong espirituwal na pangangaipo tanganing magkaigwa ako nin pagkakontento asin katrangkilohan, huli ta an dalagan nin buhay asin an pangangaipo na asikasohon an mga problema nin mga tawo puedeng magin nakalulunos sa saro na an propesyon arog sa sako.
“Nag-aadal na ako ngonyan sa Biblia kaiba kan mga Saksi ni Jehova. An pag-adal na ini nakatatabang sa sako na siyasaton an sakong mga gawe-gawe asin motibo sa nakatatabang na paagi asin sinasanay an sakong pag-iisip na magin mas positibo, tanganing mapagdanay ko na balanse an sakong buhay. Nakakamate ako nin dakulang satispaksion sa sakong sekular na karera. Alagad an sakong pag-adal sa Biblia an nagparahay kan kamugtakan kan sakong emosyon, na nakatabang sa sako na makontrol an negatibong mga saboot, mainaan an tension, asin magin mas mapasensia asin maheherakon sa mga tawo. An pag-aplikar kan mga prinsipyo sa Biblia nagin man kapakipakinabang sa sakong relasyon sa sakong agom. An pinakamahalaga, namidbid ko si Jehova asin naeksperyensiahan, sa sadit na paagi, an daing olang na pagbolos kan saiyang espiritu, na nagtao nin orog na kahulogan sa sakong buhay.”
Si Nicholas, sarong arkitektural na paradisenyo, nagsasabi: “Bago ako nag-adal sa Biblia kaiba an mga Saksi ni Jehova, mayo ako nin interes sa espirituwal na mga bagay. An solamenteng obheto ko sa buhay iyo an umasenso sa pinili kong propesyon. An sakong pag-adal sa Biblia nagtokdo sa sako na igwa nin orog pa sa buhay asin na an paggibo kan kabotan ni Jehova nagtatao nin tunay asin nagdadanay na kaogmahan.
“An sakong sekular na karera nagtatao sa sako nin satispaksion, alagad an Biblia an nagtokdo sa sako kan importansia nin pagpapadanay nin simpleng pamumuhay paagi sa pagpokus sa espirituwal na mga bagay. Sa paggibo kaiyan, nalikayan ming mag-agom an dakol na tension na bunga nin materyalistikong estilo nin pamumuhay. Nagkaigwa man kami nin dakol na tunay na katood paagi sa samong pakikiasosyar sa mga may kaparehong espirituwal na pananaw sa buhay.”
Si Vincent, sarong abogado, nagsasabi: “An sarong marahay na sekular na karera puedeng magtao nin sarong sokol nin satispaksion. Minsan siring, nanompongan ko na labi pa an kaipuhan tanganing magkaigwa nin kaogmahan asin pagkakontento. Bago ko naaraman an katokdoan sa Biblia manongod sa temang iyan, nagigirumdoman ko na bigla na sanang narealisar ko an biyong pagkadaing kahulogan kan buhay—mamumundag, madakula, maagom, matrabaho tanganing ikatao an materyal na pangangaipo sa pagpadakula sa mga aki nin saro, sasanayon sinda na sunodon an iyo man sana nanggad na siklo nin buhay, asin sa katapustapusi magurang asin magagadan.
“Pagkatapos sanang mag-adal kan Biblia kaiba an mga Saksi ni Jehova na nakua ko an nakakokontentong simbag sa sakong mga hapot manongod sa katuyohan nin buhay. An sakong pag-adal sa Biblia nagpangyari na mamidbid ko si Jehova bilang persona asin mapatalubo an hararom na pagkamoot sa saiya. Ini an nagtao nin basehan sa sako na papagdanayon an tamang espirituwal na pananaw mantang nagmamaigot akong mamuhay kaoyon kan aram kong katuyohan nia. Ngonyan, kaming mag-agom may pagkakontento sa pakaaram na ginagamit mi an samong buhay sa pinakamakahulogan na paaging posible.”
Puede man kamong makamate na may katuyohan asin kahulogan an buhay paagi sa pag-adal sa Biblia. An mga Saksi ni Jehova maoogmang tabangan kamo. Arog ni Marina, Nicholas, asin Vincent, puede nindong makamtan an satispaksion na bunga nin pag-adal manongod ki Jehova asin sa saiyang mga katuyohan para sa katawohan sa pankagabsan asin para sa saindo bilang indibiduwal. Bako sanang mapapasaindo an kagayagayahan na mapanigoan an saindong espirituwal na mga pangangaipo ngonyan kundi mapapasaindo man an oportunidad na kamtan an daing katapusan na buhay na may sangkap na pisikal na salud—oportunidad na bukas sana sa mga “nakamamate kan saindang espirituwal na pangangaipo.”—Mateo 5:3.
An sarong paagi na mapatatalubo an satong espirituwalidad iyo an pamibi. Nagtao nin panahon si Jesus tanganing tokdoan an saiyang mga disipulo kun paano mamibi, na itinotokdo sa sainda an sa parate inaapod na Pamibi kan Kagurangnan. Ano an kahulogan kan pamibing iyan para sa saindo ngonyan? Paano kamo makikinabang dian? Makukua nindo an mga simbag sa masunod na duwang artikulo.
[Mga Ritrato sa pahina 6]
Si Marina
[Mga Ritrato sa pahina 7]
Si Nicholas
[Mga Ritrato sa pahina 7]
Si Vincent