Mga Hapot Hale sa mga Parabasa

Maninigo daw na magtao an sarong Kristiano nin tip o regalo sa empleyado kan gobyerno para sa serbisyo nia, o iyan daw masasabing panunuhol?

Saen man sinda nakaistar, an mga Kristiano naghihingoang gumamit nin praktikal na kadonongan kun ano an gigibohon sa lokal na mga kamugtakan, na ginigirumdom na an akseptable asin legal sa sarong nasyon puedeng biyong bakong akseptable asin ilegal sa ibang nasyon. (Talinhaga 2:6-9) Siempre, maninigo na pirmeng girumdomon nin sarong Kristiano na an siisay man na gustong magin ‘bisita sa tolda ni Jehova’ kaipuhan na lumikay sa panunuhol.​—Salmo 15:​1, 5; Talinhaga 17:23.

Ano an panunuhol? Segun sa The World Book Encyclopedia, “an panunuhol nangangahulogan nin pagtao o pag-alok nin sarong bagay na may halaga sa sarong . . . tawo na yaon sa katongdan na ipinagkatiwala kan publiko, na bilang balos linalapas kaini an saiyang katongdan o an ley tanganing pakinabangon an nagtao.” Sa siring, saen man nag-iistar an saro, panunuhol an pagtao nin kuarta o regalo sa sarong huwes o pulis tanganing biribidon an hustisya o sa sarong inspektor tanganing baliwalaon an sarong depekto o pagbalga. Panunuhol man an paggamit nin regalo tanganing mag-ako nin pagpaorog, siring kan paglaag kan ngaran sa enotan kan listahan nin mga naghahalat o lampasan an iba na naenot sa linya. An siring na gawe nagpapaheling man nin kawaran nin pagkamoot.​—Mateo 7:12; 22:39.

Alagad panunuhol daw an pagtao nin regalo o tip, halimbawa, sa sarong lingkod sa publiko tanganing makua an sarong lehitimong serbisyo o tanganing likayan an bakong makatanosan na tratamiento? Halimbawa, sa nagkapirang nasyon tibaad magabat an boot kan mga opisyal na ilista an mga aki sa eskuelahan, akoon an sarong tawo sa ospital, o gumibo nin dokumento sa imigrasyon kun mayo sinda nin tip. O tibaad mag-atraso sinda sa pagproseso nin mga aplikasyon sa pagkua giraray nin mga lisensia asin pases.

An kaugalean nin pagtao nin tip asin an pankagabsan na aktitud dapit dian nagkakalaenlaen sa manlaenlaen na lugar. Kun an siring na bayad pinagkatodan na o linalaoman na, tibaad magsaboot an nagkapirang Kristiano na sagkod na dai sinda naglalapas sa ley, dai man sinda naglalapas sa mga prinsipyo kan Biblia kun nagtatao sinda nin tip sa sarong opisyal tanganing gibohon an saiyang trabaho. Sa nagkapirang nasyon tibaad mansayon pa ngani kan mga tawo an siring na bayad bilang regalo tanganing dagdagan an hababang ginaganar kan empleyado sa publiko. Girumdomon na may kalaenan an pagtao nin regalo para sa lehitimong serbisyo asin pag-alok nin suhol para sa ilegal na pabor.

Sa ibong na lado, kun naggigibo nin lehitimong mga kahagadan, may mga Saksi ni Jehova na nagsasayumang magtao nin tip sa mga inspektor, opisyal sa adwana, o iba pa dawa sa lugar na an siring na pagtao nin regalo pinagkatodan na. Huli ta an mga Saksi midbid sa lokal bilang mga tawong igwa kan paninindogan na ini na sono sa konsensia sagkod onesto, kun beses nag-aako sinda nin tratamiento na nakukua sana kan kadaklan na tawong nagtatao nin bayad.​—Talinhaga 10:9; Mateo 5:16.

Bilang sumaryo, an lambang lingkod ni Jehova kaipuhan na magdesisyon para sa sadiri nia kun baga matao sia nin tip tanganing mag-ako nin sarong lehitimong serbisyo o makalikay sa bakong makatanosan na tratamiento. Orog sa gabos, maninigo niang pagmaigotan na gumawe sa paagi na matao saiya nin marahay na konsensia, na dai nagtatao nin katuyawan sa ngaran ni Jehova, asin dai nakakapasingkog sa iba.​—Mateo 6:9; 1 Corinto 10:31-33; 2 Corinto 6:3; 1 Timoteo 1:5.