Ginigibo si Jehova na Saindong Dios

KAIDTONG mga panahon kan Biblia, may nagkapirang indibiduwal na nagkaigwa nin dayupot na marhay na relasyon ki Jehova kaya inaapod sia na saindang Dios. Halimbawa, sa Kasuratan, ilinaladawan si Jehova bilang an “Dios ni Abraham,” “Dios ni David,” asin “Dios ni Elias.”​—Genesis 31:42; 2 Hade 2:14; 20:5.

Paanong an kada saro kan mga tawong ini nagkaigwa nin dayupot na relasyon sa Dios? Ano an manonodan niato sainda tanganing makapatalubo asin makapagpadanay man kita nin makosog na personal na relasyon sa Kaglalang?

Si Abraham “Tuminubod ki Jehova”

Si Abraham an pinakaenot na tawo na sinasabi kan Biblia na tuminubod ki Jehova. An pagtubod an pangenot na kualidad ni Abraham na nagpangyaring makamit nia an pag-oyon nin Dios. Sa katunayan, nakamtan ni Abraham an siring na pabor ki Jehova kaya sa huri ipinamidbid kan Kaglalang an saiyang sadiri ki Moises bilang an “Dios ni Abraham” asin kan saiyang aki patin makoapo, si Isaac asin Jacob.​—Genesis 15:6; Exodo 3:6.

Paanong si Abraham nagkaigwa nin arog kaining klase nin pagtubod sa Dios? Enot sa gabos, pinasikad ni Abraham an saiyang pagtubod sa masarig na pundasyon. Tibaad tinokdoan sia sa mga dalan ni Jehova kan aki ni Noe na si Sem, na nakaheling mismo kan pagliligtas nin Dios. Si Sem sarong buhay na patotoo na “ilinigtas [ni Jehova] si Noe, sarong parahulit nin katanosan, kaibanan nin pito pa kan papangyarihon nia an delubyo sa sarong kinaban nin maraot na mga tawo.” (2 Pedro 2:5) Tibaad naaraman ni Abraham ki Sem na sa oras na manuga si Jehova nin sarong bagay, sierto an kaotoban kaiyan. Sa paano man, kan inako mismo ni Abraham an panuga hale sa Dios, naggayagaya sia asin namuhay basado sa seguradong kaaraman na an panuga maootob.

Huling igwa nin masarig na pundasyon, an pagtubod ni Abraham napakosog kaidto kan saiyang mga gibo. Si apostol Pablo nagsurat: “Huli sa pagtubod si Abraham, kan sia apodon, nagkuyog sa pagluwas pasiring sa sarong lugar na nakatalagang akoon nia bilang mana; asin sia luminuwas, minsan ngani dai aram kun saen sia maduman.” (Hebreo 11:8) An aktong iyan nin pagkuyog nakadagdag sa pagtubod ni Abraham, na mapadapit dian an disipulong si Santiago nagsurat: “Saimong naheling na an saiyang pagtubod naggibo na katabang kan saiyang mga gibo asin paagi sa saiyang mga gibo an saiyang pagtubod nasangkap.”​—Santiago 2:22.

Apuera kaini, tinogotan ni Jehova na mabalo an pagtubod ni Abraham, na orog pang nagpapusog kaiyan. Si Pablo nagsabi pa: “Huli sa pagtubod si Abraham, kan sia baloon, garo man sana idinolot si Isaac.” Dinadalisay asin pinapakosog kan pagbalo an pagtubod, na ginigibo iyan “na may orog nanggad na halaga kisa bulawan.”​—Hebreo 11:17; 1 Pedro 1:7.

Maski ngani dai nabuhay si Abraham tanganing maheling an kaotoban kan gabos na panuga nin Dios, naggayagaya siang maheling na an iba nagsunod sa saiyang halimbawa. An saiyang agom na si Sara asin tolo pang miembro kan saiyang pamilya​—si Isaac, Jacob, asin Jose​—inomaw man sa Biblia huli sa pambihira nindang pagtubod.​—Hebreo 11:​11, 20-22.

Pagtubod Ngonyan na Arog kan ki Abraham

An pagtubod mahalagang marhay para sa siisay man na nagmamawot na gibohon si Jehova na saiyang Dios. “Kun dai nin pagtubod imposible na mapanigoan [an Dios] nin lubos,” an isinurat ni Pablo. (Hebreo 11:6) Paano mapapatalubo nin sarong lingkod nin Dios ngonyan an makosog na pagtubod na arog kan ki Abraham?

Arog ki Abraham, an satong pagtubod dapat na napapasikad sa masarig na pundasyon. An pinakamarahay na paagi na magigibo iyan iyo an regular na pag-adal kan Biblia asin mga publikasyon na basado sa Biblia. An pagbasa kan Biblia asin paghorophorop sa binabasa puedeng mag-asegurar sa sato na an mga panuga nin Dios magkakatotoo. Dangan mapapahiro kita na moldehon an satong pamumuhay basado sa siertong paghalat na iyan. An satong pagtubod orog pang nadadagdagan paagi sa mga akto nin pagkuyog, na kaiba an pagpartisipar sa pampublikong ministeryo asin pag-atender sa Kristianong mga pagtiripon.​—Mateo 24:14; 28:​19, 20; Hebreo 10:​24, 25.

An satong pagtubod tunay nanggad na mababalo, tibaad paagi sa pagtumang, grabeng helang, pagkagadan nin sarong namomotan, o sa iba pang bagay. An pagdadanay na maimbod ki Jehova sa irarom nin pagbalo nagpapakosog kan satong pagtubod, na ginigibo iyan na mas mahalaga kisa bulawan. Baga man mabubuhay kita tanganing maheling an kaotoban kan gabos na panuga nin Dios o dai, an satong pagtubod orog na mapadayupot sa sato ki Jehova. Dugang pa, an satong halimbawa maenkaminar sa iba na arogon an satong pagtubod. (Hebreo 13:7) Ini an nangyari ki Ralph, na minasdan asin inarog an pagtubod kan saiyang mga magurang. Sia nagpapaliwanag:

“Kan nakaistar ako sa harong, ineenkaminar kan sakong mga magurang an bilog na pamilya na magmata nin amay sa aga tanganing iriba ming mabasa an Biblia. Nabasa mi an bilog na Biblia sa paaging iyan.” Binabasa pa man giraray ni Ralph an Biblia kada aga, asin nagtatao ini sa saiya nin marahay na pagpopoon sa aldaw na iyan. Si Ralph pirmeng nag-iiba sa saiyang ama sa pampublikong ministeryo serosemana. “Dian ako nakanood na gumibo nin mga pagdalaw liwat asin pag-adal sa Biblia.” Si Ralph naglilingkod ngonyan bilang boluntaryo sa saro kan mga sangang opisina kan Mga Saksi ni Jehova sa Europa. Kanigoan karahay na balos huli sa pagtubod kan saiyang mga magurang!

Sarong Lalaki na Nasusunoan kan Puso ni Jehova

Si David, na namundag mga 900 na taon pakalihis ni Abraham, sarong marahayon na personahe na kabilang sa mga lingkod ni Jehova na nasambitan sa Kasuratan. May labot sa pagpili ni Jehova ki David bilang hade sa ngapit, si propeta Samuel nagsabi: “Si Jehova tunay na mahanap nin sarong lalaki na nasusunoan kan saiyang puso.” Dayupot na marhay an relasyon ni Jehova asin ni David kaya kan huri naunabihan ni propeta Isaias ki Hadeng Ezequias si “Jehova na Dios ni David na saimong apoon.”​—1 Samuel 13:14; 2 Hade 20:5; Isaias 38:5.

Dawa si David nasusunoan kan puso ni Jehova, may mga pangyayari na nagpadaog sia sa mga pagmawot nia. Tolong beses siang nakaginibo nin magabat na sala: Tinogotan nia na darahon sa bakong tamang paagi an kaban kan tipan pasiring sa Jerusalem; nakakomiter sia nin pagsambay ki Bat-seba asin nagpakana kan paggadan sa agom kaini, si Urias; asin naggibo sia nin sensus sa banwaan nin Israel asin Juda na dai ipinagboot ni Jehova. Sa lambang pangyayari, linapas ni David an Ley nin Dios.​—2 Samuel 6:2-10; 11:2-27; 24:1-9.

Minsan siring, kan inatubang ki David an saiyang mga kasalan, inako nia an paninimbagan sa mga iyan asin dai nia iyan ibinasol sa iba. Inadmitir nia na an pagdara kan Kaban dai inareglo nin tama, na nagsabi pa na ‘dai niamo hinanap si Jehova segun sa kaugalean.’ Kan ibuyagyag ni Natan na propeta an pagsambay ni David, si David nagsimbag na nagsasabi: “Nagkasala ako tumang ki Jehova.” Asin kan marealisar ni David an kamangmangan kan pagbilang sa mga tawo, inadmitir nia: “Nagkasala ako nin grabe sa ginibo ko.” Si David nagsolsol sa saiyang mga kasalan asin nagdanay na dayupot ki Jehova.​—1 Cronica 15:13; 2 Samuel 12:13; 24:10.

Kun Masala Kita

Sa paghihingoa niato na gibohon si Jehova na satong Dios, nakakaparigon sa boot na halimbawa si David. Kun an sarong tawo na nasusunoan na marhay kan puso ni Jehova nakagibo nin siring kagabat na mga kasalan, dai kita dapat madesganar kun, sa ibong kan gabos niatong paghihingoa, may beses na kita nasasala o nakakagibo pa ngani nin darakulang sala. (Eclesiastes 7:20) Puedeng maparigon an satong boot sa bagay na kan magsolsol si David, an saiyang mga kasalan pinatawad. Iyan an nangyari ki Uwea kaidtong nagkapirang taon na an nakaagi.

Si Uwe naglilingkod bilang magurang sa kongregasyon kan Mga Saksi ni Jehova. Sa sarong pangyayari, sia nagpadaog sa salang mga pagmawot asin nakakomiter nin inmoralidad. Kan enot si Uwe, arog ni Hadeng David, nagprobar na itago an bagay na iyan, na naglalaom na dai iintindihon ni Jehova an saiyang paglapas. Sa kahurihurihi, rinibok nang marhay si Uwe kan saiyang konsensia kaya nagtuga sia sa sarong kapwa magurang sa kongregasyon asin ginibo an aksion tanganing tabangan si Uwe na marahayan sa saiyang pagkapahamak sa espirituwal.

Nagsolsol si Uwe sa saiyang mga kasalan asin nagdanay na harani ki Jehova asin sa kongregasyon. Nagpasalamat siang marhay sa tabang na naako nia kaya pakalihis nin pirang semana nagsurat sia sa kamagurangan na ipinapahayag an saiyang sinsero asin odok na pagpasalamat sa tabang na inako nia. “Tinabangan nindo ako na mahale an katuyawan sa ngaran ni Jehova,” an isinurat nia. Napagdanay ni Uwe an saiyang relasyon ki Jehova asin pag-abot nin panahon ninombrahan giraray sia bilang lingkod sa iyo man sanang kongregasyon.

“Sarong Tawo na May mga Saboot na Arog kan sa Sato”

Si Elias, na nabuhay sanggatos na taon pakalihis ni David, saro sa pangenot na propeta sa Israel. Si Elias sarong parasurog kan tunay na pagsamba sa panahon na lakop an karatan asin inmoralidad, asin nungka siang nag-urong-sulong sa saiyang debosyon ki Jehova. Bakong makangangalas na an saiyang kasalihid, si Eliseo, sarong beses inapod si Jehova “na Dios ni Elias”!​—2 Hade 2:14.

Minsan siring, si Elias dai nakakalabi sa tawo. Isinurat ni Santiago: “Si Elias sarong tawo na may mga saboot na arog kan sa sato.” (Santiago 5:17) Halimbawa, pagkatapos niang gibohon an grabeng pandadaog sa mga parasamba ki Baal sa Israel, hinuma siang gadanon ni Reyna Jezabel. Ano an nagin reaksion nia? Sia natakot asin duminulag pasiring sa kaawagan. Duman, mantang nakatukaw sa sirong kan poon nin retama, si Elias nanangis: “Igo na! Ngonyan, O Jehova, kuana an sakong kalag, huli ta mayo akong kalabihan sa sakong mga apoon.” Habo na ni Elias na magin propeta kundi mas gusto pa niang magadan.​—1 Hade 19:4.

Minsan siring, nagpaheling si Jehova nin pagsabot sa namamatean ni Elias. Pinakosog sia nin Dios, na inaasegurar giraray si Elias na dai sia nagsosolo, huli ta igwa pang iba na maimbod sa tunay na pagsamba. Dugang pa, nagtitiwala pa man giraray si Jehova ki Elias asin igwa siang ipapagibo sa saiya.​—1 Hade 19:5-18.

An emosyonal na pagkapurisaw ni Elias bakong tanda na mayo na saiya an pabor nin Dios. Mga 1,000 taon pakalihis kaiyan, kan magliwat an itsura ni Cristo Jesus sa atubangan ni Pedro, Santiago, asin Juan, siisay an pinili ni Jehova na maheling sa bisyon kaiba ni Jesus? Si Moises asin Elias. (Mateo 17:1-9) Malinaw nanggad, minidbid ni Jehova si Elias bilang arogan na propeta. Maski ngani si Elias ‘saro sanang tawo na may mga saboot na arog kan sa sato,’ pinahalagahan nin Dios an saiyang pagmamaigot na ibalik sa dati an dalisay na pagsamba asin santipikaron an Saiyang ngaran.

An Satong Emosyonal na Pakikipaglaban

An mga lingkod ni Jehova ngonyan tibaad kun beses nanluluya an boot o nahahadit. Nakakaranga nanggad na maaraman na si Elias nakaeksperyensia nin kaparehong emosyon! Asin nakakapakosog liwat sa boot na maaraman na kun paanong nasabotan ni Jehova an namamatean ni Elias, nasasabotan man Nia an satong emosyonal na pakikipaglaban.​—Salmo 103:14.

Sa sarong lado, namomotan niato an Dios asin an satong kapwa tawo asin nagmamawot kitang otobon an gibohon ni Jehova na pagbalangibog kan maogmang bareta kan Kahadean. Sa ibong na lado, tibaad madesganar kita huli ta mayong naghihimate sa satong paghuhulit o mahadit pa ngani huli sa mga patakot kan mga kaiwal kan tunay na pagsamba. Minsan siring, kun paanong sinangkapan ni Jehova si Elias tanganing magpadagos, sinasangkapan man Nia an saiyang mga lingkod ngonyan. Kuanon niatong halimbawa an nangyari ki Herbert asin Gertrud.

Nabautismohan si Herbert asin Gertrud bilang Mga Saksi ni Jehova sa Leipzig, sa dating Aleman na Republika Demokratika, kan 1952. Depisil an buhay kan panahon na idto para sa mga lingkod nin Dios, mantang an saindang pampublikong ministeryo prohibido. Ano an nagin saboot ni Herbert dapit sa paghuhulit sa harong-harong?

“Kun beses nahahadit kaming marhay. Kun naghaharongharong kami, dai mi aram kun baga an mga autoridad biglang matunga asin aarestaron kami.” Ano an nakatabang ki Herbert asin sa iba pa na daogon an pagkatakot ninda? “Naggamit kami nin dakol na panahon sa personal na pag-adal sa Biblia. Asin tinawan kami ni Jehova nin kosog na magpadagos sa samong paghuhulit.” Sa saiyang pampublikong ministeryo, si Herbert nagkaigwa nin dakol na eksperyensia na nagpasarig​—nakapangisi pa ngani​—sa saiya.

Nanuparan ni Herbert an sarong medyo may edad nang babae na nagpaheling nin interes sa Biblia. Kan magdalaw liwat si Herbert sa saiya pakalihis nin pirang aldaw, yaon an sarong hoben na lalaki asin nagdangog sa pag-oolay. Pakalihis nin nagkapirang minuto may naheling si Herbert na nagpatakig sa saiya. Nasa tukawan sa may kanto kan kuarto an sarong kupya nin pulis. Kupya iyan kan hoben na lalaki, na malinaw nanggad na sarong pulis na desididong arestaron si Herbert.

“Saro ka sa Mga Saksi ni Jehova!” an kagsing kan lalaki. “Helingon ko daw an saimong ID.” Itinao ni Herbert an saiyang kard nin identipikasyon. Dangan may nangyaring dai linalaoman. Hineling kan babae an pulis asin pinatanidan ini: “Kun may maraot na mangyari sa lalaking ini nin Dios, dai ka na makakadagos sa harong na ini.”

Puminondo nguna nin kadikit an hoben na lalaki, ibinalik an ID ki Herbert, asin pinahale sia. Sa huri naaraman ni Herbert na nag-iilusyon an pulis sa aking babae kan babaeng ini. Siempre pa, inisip kan pulis na mas marahay na padagos siang mag-ilusyon sa hoben na babae kisa arestaron si Herbert.

Gibohon si Jehova na Satong Dios

Ano an manonodan niato sa mga pangyayaring ini? Arog ni Abraham, kaipuhan na magkaigwa kita nin pusog na pagtubod sa mga panuga ni Jehova. Arog ni David, maninigo na dumolok kita ki Jehova na tunay an pagsolsol kada masala kita. Asin arog ni Elias, kaipuhan na manarig kita ki Jehova para sa kosog sa mga panahon nin kahaditan. Paagi kaiyan, magigibo niato si Jehova na satong Dios ngonyan asin sa bilog na panahon na daing sagkod, huli ta sia “nabubuhay na Dios, na Paraligtas sa gabos na klase nin mga tawo, orog na sa mga maimbod.”​—1 Timoteo 4:10.

[Nota sa Ibaba]

[Mga Ritrato sa pahina 25]

An mga akto nin pagkuyog nakadagdag sa pagtubod ni Abraham

[Ritrato sa pahina 26]

Arog ni David, maninigong magsolsol kita kun magkasala kita

[Ritrato sa pahina 28]

Kun paanong nasabotan ni Jehova an pagmate ni Elias, nasasabotan man nia an satong pagmate