Armagedon—Sarong Kapahapahamak na Katapusan?
ARMAGEDON! An termino daw na ini nagpapaimahinar sa saindo nin lagdoan na paglaglag o pagkasolo sa uniberso? Pira sanang ekspresyon sa Biblia an nagin kabtang na kan ordinaryong pagtaram na arog kan “Armagedon.” Ginagamit nin dakol an terminong iyan tanganing iladawan an mamondong ngapit na napapaatubang sa mga tawo. Ilinalaog sa imahinasyon nin mga tawo kan industriya nin aling-alingan an makatatakot na mga eksena manongod sa sarong nagdadangadang na “Armagedon.” An terminong iyan natatahoban nin misteryo asin mga salang paghona. Minsan ngani dakol an ideya manongod sa kahulogan kaiyan, an kadaklan kaiyan bakong kaoyon kan itinotokdo kan Biblia—an pinaghalean kan ekspresyon—manongod sa Armagedon.
Mantang ikinokonektar kan Biblia an Armagedon sa “katapusan kan kinaban,” bako daw na maoyon kamo na mahalagang marhay na magkaigwa nin malinaw na pakasabot kun ano talaga an kahulogan kan terminong iyan? (Mateo 24:3, King James Version) Asin bako daw na rasonable sana na dumolok sa pinakagikanan nin katotoohan, an Tataramon nin Dios, tanganing makua an mga simbag manongod sa kahulogan kan Armagedon asin kun paano iyan makakaapektar sa saindo asin sa saindong pamilya?
Ipapaheling kan siring na pagsiyasat na imbes na magpangyari nin kapahapahamak na katapusan, an Armagedon an mapangyari nin maogmang kapinonan para sa mga tawo na nagmamawot na mag-istar asin mapakarhay an buhay sa sarong matanos na bagong kinaban. Babalosan kamo nin malinaw na pakasabot manongod sa mahalagang marhay na katotoohan sa Kasuratan mantang ineestudyaran nindo an pagtokar sa tunay na kahulogan kan Armagedon sa masunod na artikulo.
[Kahon/Ritrato sa pahina 3]
ANO DAW SA PAGHONA NINDO AN ARMAGEDON?
• Sarong nuklear na biyong pagkatunaw
• Sarong kalamidad sa palibot
• Pagbangga sa daga nin sarong bagay sa langit
• Paglaglag nin Dios sa mga maraot