Mga Anghel—Kun Siisay Sinda

DAI makatubod an monarka nin sarong poderosong imperyo sa saiyang naheheling. Tolong lalaki na nasentensiahan na soloon an ilinigtas sa makatatakot na kagadanan! Siisay an nagligtas sa sainda? An hade mismo nagsabi sa tolong ilinigtas: “Pag-omawon an [saindong Dios], na nagsugo kan saiyang anghel asin ilinigtas an saiyang mga lingkod na nagtiwala sa saiya.” (Daniel 3:28) Naheling mismo kan Babilonyong namamahala na ini kaidtong labing duwang milenyo na an nakaagi an pagliligtas nin sarong anghel. Minilyon na tawo kan nakaagi an naniniwala sa mga anghel. Dakol ngonyan an bako sanang naniniwala na may mga anghel kundi nagsasaboot man na an buhay ninda mismo naaapektaran nin mga anghel sa nagkapirang paagi. Siisay an mga anghel, asin ano an ginikanan ninda?

Oyon sa Biblia, an mga anghel mga espiritu, kun paanong an Dios mismo sarong Espiritu. (Salmo 104:4; Juan 4:24) Dakula an pamilya nin mga anghel, na minilyon an kabilangan. (Kapahayagan 5:11) Asin gabos sinda “makakamhan sa kapangyarihan.” (Salmo 103:20) Minsan ngani an mga anghel garo mga tawo ta sinda may personalidad asin tinawan nin libreng kabotan, dai nagpoon an saindang buhay bilang mga tawo. Sa katunayan, linalang nin Dios an mga anghel haloy pa bago nagkaigwa nin mga tawo​—bago pa ngani lalangon an planetang Daga. Kan “lalangon [nin Dios] an daga,” an sabi kan Biblia, “an mga bitoon nin kaagahan [mga anghel] iribang nagkururahaw na may kagayagayahan, asin an gabos na aki nin Dios nagkururahaw sa pag-omaw.” (Job 38:​4, 7) Mantang an mga anghel linalang nin Dios, inaapod sindang mga aki nin Dios.

Sa anong katuyohan na linalang nin Dios an mga anghel? Ano an papel, kun igwa man, kan mga anghel sa kasaysayan nin tawo? Nakakaapekto daw sinda sa satong buhay ngonyan? Mantang sinda mga libre ahente moral, igwa daw nin mga anghel na suminunod sa ginibo ni Satanas na Diablo asin ginibo an sadiri ninda na mga kaiwal nin Dios? An Biblia nagtatao nin totoong mga simbag sa mga hapot na ini.