Sarong Leksion Manongod sa Pagigin Orgolyoso Asin Kapakumbabaan
ITINATAMPOK nin sarong pangyayari sa buhay ni Hadeng David an pagkakalaen kan tunay na kapakumbabaan asin kan maraot na pagigin orgolyoso. Nangyari iyan pagkatapos na sakopon ni David an Jerusalem asin gibohon iyan na saiyang kabiserang siudad. Para ki David si Jehova an tunay na Hade kan Israel, kaya iinareglo nia na darahon sa laog kan siudad an Kaban, na nagsisimbolisar sa presensia nin Dios. An pangyayaring ini mahalagang marhay ki David kaya hayagan na ipinaheling nia an saiyang kagayagayahan mantang nakasunod sia sa mga saserdote na nagdadara kan Kaban. Naheling kan mga nag-eerok sa Jerusalem an saindang hade na “nagluluksolukso” asin “nagbabarobayle . . . sa bilog niang kosog.”—1 Cronica 15:15, 16, 29; 2 Samuel 6:11-16.
Minsan siring, an agom ni David na si Mical dai nakiayon sa magayagayang prosisyon na iyan. Sia nagdalan sa may bintana, asin imbes na hangaan an paagi nin pagtao ni David nin pag-omaw ki Jehova, ‘pinonan niang duhagion ini sa saiyang puso.’ (2 Samuel 6:16) Taano ta arog kaini an saboot ni Mical? Malinaw na halangkawon an pagheling nia sa saiyang posisyon bilang aking babae kan enot na hade kan Israel na si Saul, asin ngonyan bilang agom kan ikaduwang hade kan Israel. Tibaad nagsaboot sia na an saiyang agom, an hade, maninigo na dai kutana ipinantay an sadiri kaini sa ordinaryong mga tawo asin dai nakiiba sa saindang paagi nin pagselebrar. An siring na maabhaw na saboot nahayag sa paagi kan saiyang pagsabat ki David kan ini magpuli. Sa mapagtuyang paagi sia nagsabi: “Abaa kapinamuraway kan hade sa Israel an saiyang sadiri ngonyan kan maghuba sia ngonyan sa pagheling kan mga oripon na babae kan saiyang mga lingkod, kun paanong an saro sa mga tawong daing isip naghuhuba nin biyo!”—2 Samuel 6:20.
Ano an nagin reaksion ni David sa pagkritikar na ini? Sinaway ni David si Mical paagi sa pagsabi na isinikwal ni Jehova an saiyang ama, si Saul, apabor ki David. Sinabi pa ni David: “Magpapakadaing halaga ako nin orog pa kisa digdi, asin magpapakanghababa ako sa sakong mga mata; asin sa mga oripon na babae na nasambitan mo, sa sainda desidido ako na pamurawayon an sakong sadiri.”—2 Samuel 6:21, 22.
Iyo, desidido si David na padagos na maglingkod ki Jehova na may kapakumbabaan. Makakatabang an aktitud na ini sa sato na masabotan kun taano ta inapod ni Jehova si David na “lalaking naooyonan kan sakong puso.” (Gibo 13:22; 1 Samuel 13:14) Sa katunayan, inaarog ni David an pinakamarahay na halimbawa nin kapakumbabaan—si Jehova Dios mismo. Interesante nanggad, an ekspresyon na ginamit ni David kan sia magsabi ki Mical na “magpapakanghababa ako” hale sa pinakagamot na berbo sa Hebreo na ginagamit man sa paglaladawan kan pagmansay mismo nin Dios sa katawohan. Minsan ngani si Jehova an kadarudakulaing Persona sa uniberso, ilinaladawan sia kan Salmo 113:6, 7 na “nagpapakanghababa [pagbaba sa ranggo o dignidad nin saro kun tinatratar an saro na mas hababa] na helingon an langit asin daga, na binabangon an hamak sa mismong kabokabo; ilinalangkaw nia an dukha hale mismo sa aponan nin abo.”
Huling si Jehova mapakumbaba, bakong makangangalas na ikinakaongis nia an “mapaabaw-abaw na mga mata” kan mga tawong orgolyoso. (Talinhaga 6:16, 17) Huli sa pagpaheling kan maraot na ugaleng ini asin dai paggalang sa saro na pinili nin Dios bilang hade, si Mical dai tinawan nin pribilehio na magkaigwa nin aki ki David. Sia nagadan na mayo nin aki. Mahalaga nanggad na leksion ini para sa sato! An gabos na gustong magkamit kan pag-oyon nin Dios kaipuhan na sumunod sa mga tataramon na ini: “Maghagkos nin kababaan nin pag-isip sa lambang saro, huli ta tinutumang nin Dios an mga maabhaw, alagad ta tinatawan nia nin dai na kutana maninigong kabootan an mga mapakumbaba.”—1 Pedro 5:5.