Sarong Paadalan na an mga Naggradwar Nagtatao nin Pakinabang sa mga Tawo sa Bilog na Kinaban

SA LABING 98,000 na kongregasyon kan Mga Saksi ni Jehova sa labing 200 na nasyon, tinotokdoan nin Dios an mga tawo gikan sa gabos na klase nin pamumuhay. An prinsipal na librong pinag-aadalan iyo an Biblia, asin an obheto kan edukasyon na ini iyo na tabangan an mga indibiduwal na umoswag sa espirituwal paagi sa pakanood kun ano an kabotan nin Dios asin kun paano mamuhay kaoyon kaiyan. Nakikinabang nin dakula an mga nag-aako kan edukasyon na ini. Ipinapaabot man ninda sa iba kun ano an saindang nanonodan, kaoyon kan instruksion ni Jesu-Cristo na gumibo nin mga disipulo.—Mateo 28:19, 20.

Apuera sa nagpapadagos na programa nin pagtotokdo sa saindang mga kongregasyon, an Mga Saksi ni Jehova nakapag-establisar nin dakol na espesyalisadong paadalan. An saro sa mga ini iyo an Paadalan sa Ministeryal na Pagsasanay. Iyan nagpoon kan Oktubre 1987 sa Pittsburgh, Pennsylvania, E.U.A. An enot na klase kompuesto nin 24 estudyante na nagtataram nin Ingles. Poon kaidto isinagibo an mga pag-adal sa 21 lenguahe sa 43 na nasyon. Sagkod sa presente, gikan sa labing 90 nasyon na kamagurangan asin ministeryal na mga lingkod na daing agom an nakapag-adal na. Pakatapos kan walong semana na pag-adal, an mga naggradwar iinasignar na maglingkod kun saen may pangangaipo, magsalang sa saindang sadiring nasyon o sa ibang nasyon. Sa katapusan nin 2005, labing 22,000 na Kristianong ministro an nakatapos na sa pag-adal. Nagsosopay na binendisyonan an saindang mapakumbabang paghihingoa na palakopon an intereses kan Kahadean asin pakinabangon an iba.—Talinhaga 10:22; 1 Pedro 5:5.

Pag-areglo na Makaatender

Tanganing makaatender sa Paadalan sa Ministeryal na Pagsasanay, an kadaklan na estudyante kinaipuhan na maghagad nin bakasyon sa saindang por ora sana o bilog na panahon na sekular na trabaho. Kun beses nangangahulogan ini nin kadepisilan. Sa Hawaii, an duwang Kristianong lalaki na inimbitaran na mag-atender sa paadalan kinaipuhan na maghagad nin bakasyon sa saindang trabaho bilang mga paratokdo sa eskuelahan. Huli sa pagtubod, isinumitir ninda an saindang mga kahagadan, na ipinapaliwanag kun taano ta gusto nindang mag-atender asin kun paano sinda makikinabang. Parehong tinawan nin bakasyon an duwa.

Sa dakol na pangyayari, an mga Saksi na naghagad nin bakasyon sa trabaho sinabihan na mayo na sindang babalikan na trabaho. Pinili ninda na akoon an pagsasanay gikan sa organisasyon ni Jehova, dawa ngani nangahulogan iyan nin pagkawara kan saindang mga trabaho. An nagkapira sa mga indibiduwal na ini sa huri nakaresibi nin mga imbitasyon gikan sa saindang mga among na magbalik sa trabaho pakatapos kan pag-adal ninda. An siring na determinasyon na mag-atender sa paadalan puedeng sumaryohon sa paaging ini: Isumitir an saindong hinahagad na bakasyon, mamibi ki Jehova para sa tabang, asin pabayaan na sia an maggibo kan iba pa.—Salmo 37:5.

“Tinokdoan ni Jehova”

Kaiba sa walong semanang pag-adal sa paadalan an lubos na pag-adal sa Biblia. Nanonodan kan mga estudyante kun paano inoorganisar an banwaan ni Jehova tanganing gibohon an kabotan nin Dios asin kun paano ninda personal na magagamit nin orog na epektibo an Biblia sa saindang ministeryo sa langtad, sa mga pagtiripon kan kongregasyon, asin sa mga asamblea.

Sarong mapag-apresyar na naggradwar an nagsurat kaini sa sarong estudyante na dai pa nag-adal: “Magtubod ka sako, maeeksperyensiahan mo an pinakamarahay na eksperyensia sa pag-adal kasuarin man. An teksto na nagsasabing ‘tinotokdoan ni Jehova’ talagang nagkakaigwa nin orog na kahulogan. An bilog na eksperyensia nagmomolde asin nagdadalisay kan puso saka personalidad tanganing mas makasunod nanggad sa halimbawa ni Cristo Jesus. Mananamitan mo an nakakalabi sa gabos na eksperyensia sa buhay mo.”—Isaias 54:13.

Mga Ebanghelisador, Pastor, Asin Paratokdo

An mga naggradwar sa Paadalan sa Ministeryal na Pagsasanay naglilingkod sa presente sa 117 nasyon. Kaiba sa mga ini an mga isla sa mga lugar nin Atlantiko, Caribe, asin Pasipiko saka sa kadaklan na nasyon na igwa nin mga sangang opisina nin Mga Saksi ni Jehova. Ibinabareta kan mga sangang opisina na an marahayon na pagsasanay na inako kan mga estudyante nababanaag sa saindang mga pag-ebanghelyo, pagpastor, asin pagtotokdo. Sinasangkapan sinda kan pagsasanay sa sainda na gamiton nin mas epektibo an Biblia sa ministeryo sa langtad. (2 Timoteo 2:15) Kun sinisimbag an mga hapot kan mga kagharong, parate man nindang ginagamit na reperensia an librong Reasoning From the Scripturesa asin sinasanay an ibang mga parahayag kan Kahadean na gibohon man iyan. Nakakaolakit an kaigotan kan mga naggradwar, asin nakakapakosog sa mga kongregasyon an saindang mga aktibidad.

An kamagurangan sa kongregasyon may pribilehio na ‘pastoran an aripompon,’ na nagtatabang na pangatamanan an espirituwal na mga pangangaipo kan iba. (1 Pedro 5:2, 3) An sarong magurang sa kongregasyon nagsabi mapadapit sa areglo: “Inaapresyar niamo an pagpadara kan sangang opisina nin sinanay na marhay na mga tugang na lalaki tanganing tabangan kami na pasanon an pagpastor sa aripompon nin Dios.” An sarong sangang opisina sa Harayong Sirangan nagsabi man: “Mapagmalasakit na marhay an mga naggradwar. Sinda mahigos asin nakukua ninda an paggalang kan kongregasyon. Aram na marhay asin pinapahalagahan na gayo an saindang kapakumbabaan, init, asin pagkagalaga. Gikan sa boot sindang nagsasakripisyo asin may kaogmahan na nagbabalyo sa mga kongregasyon na nangangaipo nin mga pastor.” (Filipos 2:4) Pinapakosog kan siring na mga lalaki an saindang mga kapagtubod asin sinda maninigo sa komendasyon.—1 Corinto 16:18.

Kabilang sa iba pang bagay, tinatabangan kan mga instruktor sa Paadalan sa Ministeryal na Pagsasanay an mga estudyante na paoswagon an saindang mga abilidad bilang mga nagpapahayag sa publiko. Paagi sa pag-aplikar kan mga suhestion asin sadol na saindang inaako, dakol sa mga naggradwar an tolos na nagagamit sa mga programa sa pansirkitong asamblea asin pandistritong kombension. Naobserbaran nin sarong paraataman sa sirkito na an mga naggradwar nagtatao nin “ekselenteng mga pahayag asin iinaaplikar an materyales paagi sa paggamit nin marahay na pangangatanosan.”—1 Timoteo 4:13.

Dakula an pag-oswag kan kualidad nin pagtotokdo sa mga pagtiripon kan kongregasyon sa sarong nasyon sa Aprika pakatapos na magkaigwa duman nin Paadalan sa Ministeryal na Pagsasanay asin iinasignar sa langtad an mga naggradwar. An kamagurangan na ipinapadara gikan sa paadalan nagtatao nin tabang sa pag-ebanghelyo, pagpastor, asin pagtotokdo, na paagi kaiyan pinapakosog sa espirituwal an mga kongregasyon.—Efeso 4:8, 11, 12.

Mas Marahay na Pangangataman sa Kongregasyon

Sa dakol na lugar, igwa nin pangangaipo para sa dugang pang kamagurangan asin ministeryal na mga lingkod. An nagkapirang kongregasyon mayo kutana nanggad nin kamagurangan kun dai ipinadara sa sainda an sarong naggradwar sa Paadalan sa Ministeryal na Pagsasanay. Kun siring, dakol na naggradwar an iinasignar na maglingkod kun saen igwa nin siring na mga pangangaipo.

Ibinabareta kan dakol na sangang opisina na an mga lalaking ini “aram na marhay an organisasyonal na mga areglo,” “seryosong isinasaabaga an saindang mga paninimbagan,” “tinatabangan an iba na apresyaron asin igalang an organisasyon ni Jehova,” asin “nagkokontribwir sa init asin espirituwalidad kan saindang mga kongregasyon.” Ini huli ta sinusunod kan mga naggradwar sa paadalan kun ano an nakasurat sa Tataramon nin Dios asin dai nagsasarig sa saindang sadiring pakasabot o nagpapakadonong sa saindang sadiring mga mata. (Talinhaga 3:5-7) An siring na mga lalaki nagigin espirituwal na mga bendisyon sa mga kongregasyon na naasignaran sa sainda.

Paglilingkod sa Napapasuway na mga Teritoryo

An nagkapirang naggradwar na ninombrahan bilang mga espesyal payunir nagtatabang sa napapasuway na mga grupo na magin mga kongregasyon. Ipinapahayag an pag-apresyar para sa saindang tabang, an sarong magurang sa kongregasyon sa sarong harayong lugar nin Guatemala nagsabi: “Sa laog nin 20 taon nahadit ako kun paano pangangatamanan an dakulaon na teritoryong ini. Parate kong ipinapamibi iyan. An mga tugang na lalaki na gikan sa Paadalan sa Ministeryal na Pagsasanay sinanay na marhay sa pagtaram saka sa organisasyonal na mga bagay, asin nagpapasalamat ako na maheling na an lugar nag-aako ngonyan nin mamomoton na atension.”

Nanodan kan mga naggradwar na magin epektibo sa mga teritoryo kun saen kaipuhan nindang magbiahe nin haralawig na distansia sa mabukid na lugar tanganing maabot an suruwaysuway asin saradit na baryo. Tolos sindang nag-eestablisar asin nag-oorganisar duman nin napapasuway na mga grupo, dawa kun an ibang parahayag dai nakakayang gibohon an siring. Halimbawa, hinagad nin sarong magurang sa kongregasyon sa Niger an tabang kan mga naggradwar huling naniniwala sia na marahayon an magigibo ninda sa lugar na iniistaran nia. Nangorogna sa hararayong lugar, tibaad mas pasil para sa daing agom na mga lalaki na makapaglingkod bilang mga espesyal payunir asin paraataman sa sirkito. Arog ni apostol Pablo, kaipuhan nindang atubangon an ‘mga pag-alaman sa mga salog asin tulisan, mga pag-alaman sa kapatagan,’ asin personal na mga kadepisilan saka paghadit sa mga kongregasyon na saindang pinaglilingkodan.—2 Corinto 11:26-28.

Pakinabang sa mga Hoben

Sinasadol kan Kasuratan an mga hoben na girumdomon an saindang Kaglalang. (Eclesiastes 12:1) An maigot na mga naggradwar sa Paadalan sa Ministeryal na Pagsasanay marahayon na mga halimbawa para sa Kristianong mga hoben. Pakatapos na an duwang naggradwar mag-abot sa sarong kongregasyon sa Estados Unidos, nadoble an total na kabilangan nin oras na ginamit kan mga tugang sa ministeryo. Dugang pa, luminangkaw an kabilangan nin mga regular payunir, o bilog na panahon na mga parabalangibog kan Kahadean, na dati 2 nagin 11. Nangyayari man ini sa dakol na kongregasyon.

Ineenkaminar man kan mga naggradwar an mas hoben na mga lalaki na pensaron an manongod sa pag-atender sa Paadalan sa Ministeryal na Pagsasanay. Nakamotibar ini sa mga dai pa naglilingkod bilang ministeryal na mga lingkod na hingoahon na aboton an pribilehiong iyan. An sangang opisina sa Netherlands inaapod an mga naggradwar sa Paadalan sa Ministeryal na Pagsasanay na “buhay na mga halimbawa para sa mas hoben na mga lalaki na naghohorophorop kun ano an gigibohon ninda sa saindang buhay.”

Paglilingkod sa mga Kongregasyon na Iba an Lenguahe

Sa dakol na nasyon, nag-oorog an mga paghihingoa na ihulit an maogmang bareta sa mga tawo sa sadiring tataramon ninda. An mga naggradwar sa Paadalan sa Ministeryal na Pagsasanay sa parate nag-aadal nin ibang mga lenguahe asin naglilingkod sa mga teritoryo kun saen igwa nin dakulang populasyon nin mga imigrante. Halimbawa, sa Belhika, igwa nin pangangaipo para sa dakol na parahulit kan Kahadean sa mga nagtataram nin Albaniano, Persiano, asin Ruso.

An mga kongregasyon asin grupo na iba an lenguahe sa Alemania, Britania, Estados Unidos, Italia, Mejico, asin iba pang nasyon nakikinabang na nin dakula sa mga nagbibiaheng paraataman, kamagurangan, asin ministeryal na mga lingkod na naggradwar sa Paadalan sa Ministeryal na Pagsasanay. Ibinabareta kan sangang opisina sa Korea na “labing 200 na naggradwar an may pangenot na kabtang sa pagtabang sa mga kongregasyon asin grupo na iba an lenguahe.”

Paglilingkod nin May Kapakumbabaan sa Iba Pang Katongdan

Apuera sa paglilingkod sa mga grupo asin kongregasyon na iba an lenguahe, an mga naggradwar sa Paadalan sa Ministeryal na Pagsasanay naglilingkod bilang kamagurangan, ministeryal na mga lingkod, asin nagbibiaheng mga paraataman. An nagkapira inako an mga asignasyon sa ibang nasyon, na tibaad tanganing gibohon an apretadong mga pangangaipo sa Departamento nin Paglilingkod sa sarong sangang opisina. An mga igwa nin abilidad sa pagtogdok tibaad nakikikabtang sa programa nin pagtogdok nin Kingdom Hall.

An pambilog na kinaban na pagdakol kan mga kongregasyon asin sirkito nangangahulogan na pirmeng kaipuhan an dakol na nagbibiaheng paraataman. Tanganing panigoan an pangangaipong ini, an piling mga naggradwar sa Paadalan sa Ministeryal na Pagsasanay nag-aako nin sampulong semana na pagsasanay sa gibohon na nagbibiahe dangan naglilingkod bilang kasangli o regular na paraataman sa sirkito. Mga 1,300 na naggradwar an naglilingkod sa presente bilang nagbibiaheng mga paraataman sa 97 nasyon. Sa sarong nasyon sa Aprika, 55 porsiento kan nagbibiaheng mga paraataman an gradwado sa Paadalan sa Ministeryal na Pagsasanay. Sa saro pang nasyon sa Aprika, 70 porsiento an kabilangan.

Sa Australia, Canada, Estados Unidos, Europa, asin Harayong Sirangan, ginatos na naggradwar sa paadalan an ipinadara sa ibang nasyon tanganing panigoan an espesipikong mga pangangaipo. Sa paaging ini, an mga pakinabang gikan sa paadalan nakalakop sa bilog na kinaban.

Paagi sa saiyang Aki, si Jesu-Cristo, si Jehova nag-asignar nin mga ebanghelisador, pastor, paratokdo, asin iba pa na nagpapalakop kan intereses kan Kahadean sa huring mga aldaw na ini. Igwa daw nin mga posibilidad para sa dugang pang pagdakol sa banwaan nin Dios? Igwa nanggad! Kaya pirmeng nadadagdagan an pangangaipo para sa nagdusay na mga lalaki na maghingoang aboton an mas dakulang paninimbagan. (Isaias 60:22; 1 Timoteo 3:1, 13) An Paadalan sa Ministeryal na Pagsasanay nagtatao nin oportunidad sa kamagurangan asin ministeryal na mga lingkod na masangkapan tanganing humiwas sa saindang ministeryo, na may dakulang pakinabang sa sainda asin sa iba sa bilog na kinaban na langtad.

[Nota sa Ibaba]

[Mga Ritrato sa pahina 10]

Ipinapalakop kan Paadalan sa Ministeryal na Pagsasanay an intereses kan Kahadean sa bilog na kinaban

[Mga Ritrato sa pahina 13]

Naglalaom daw kamo na makapag-adal sa Paadalan sa Ministeryal na Pagsasanay asin pakinabangon an iba?