Paadalan sa Ministeryal na Pagsasanay—Sarong Dakulang Pinto na Pasiring sa Gibohon
1 Paagi ki propeta Jeremias, si Jehova naghula: “Bubugtakan ko [an sakong banwaan] nin mga pastor na magpapastor nanggad sa sainda; asin dai na sinda magkakatarakot, saka dai na sinda magkakatirikbahan, asin mayo ni saro na mawawara.” (Jer. 23:4) An siring na pagpastor ginigibo ngonyan sa mga tawo kan gabos na nasyon. Ini ginigibo nin manampulong ribong magurang sa kongregasyon. Dugang pa, sarong grupo nin hoben na mga lalaki na siring kadakol sa mga tagdo nin ambon an gikan sa boot na nagpresentar na maglingkod ki Jehova. (Sal. 110:3) Tunay nanggad na bendisyon an mapakumbabang mga tugang na lalaking ini para sa mga kongregasyon kan banwaan nin Dios! Mantang nagpapadagos an espirituwal na pagtipon, igwa pa nin pangangaipo para sa kualipikadong mga lalaki na magpresentar na maglingkod sa saindang mga tugang.
2 An Paadalan sa Ministeryal na Pagsasanay sarong marahayon na probisyon sa pagsanay sa daing agom na mga magurang sa kongregasyon asin ministeryal na mga lingkod para sa dugang pang paninimbagan. Labi nang 22,000 na estudyante hale sa mga 140 nasyon an nag-ako kan pagsasanay na ini sa 999 klase na ginibo poon kan ponan an paadalan kan 1987. Poon kan 1994, nagkaigwa na nin 40 klase sa Pilipinas, asin 1,037 estudyante an naggradwar na. Minsan ngani napondo nin temporaryo an mga klase tangani na matawan nin lugar an Paadalan Para sa mga Nagbibiaheng Paraataman, ginigibo na an mga plano na ipagpadagos an mga klase sa Pilipinas sa Enero 2006. Para sa mga naggradwar, an paadalan tunay nanggad na “sarong dakulang pinto na pasiring sa gibohon.”—1 Cor. 16:9.
3 Katuyohan kan Paadalan: An katuyohan kan Paadalan sa Ministeryal na Pagsasanay iyo na sanayon asin andamon an kualipikadong mga lalaki para sa mga paninimbagan saen man tibaad may pangangaipo sa organisasyon. Dinadagdagan kan paadalan an mga abilidad ninda sa pangengenot sa gibohon na pag-ebanghelyo, pakikikabtang sa pagpastor sa aripompon, asin pagtotokdo sa kongregasyon. Pagkagradwar, an nagkapirang estudyante sinanay bilang nagbibiaheng paraataman sa Pilipinas, mantang an iba iinasignar sa ibang nasyon bilang mga misyonero. An iba nag-ako nin asignasyon na maglingkod sa sadiri nindang kongregasyon o sa mga lugar sa laog kan teritoryo kan sangang opisina na mas dakula an pangangaipo.
4 Durante kan walong semanang kurso, an mga estudyante sigidong nag-aadal sa Biblia. Maingat nindang ineestudyaran an kadakol na katokdoan sa Biblia siring man an mga paninimbagan sa pagpastor asin mga giya sa pag-asikaso kan mga problema sa Kristianong pamumuhay. Pinag-aadalan man ninda an itinotokdo kan Kasuratan manongod sa mga bagay-bagay na administratibo, hudisyal, asin organisasyonal. Nag-aako sinda nin espesyalisadong pagsasanay sa pagpahayag sa publiko asin tinatawan nin personal na tabang tangani na maparikas an saindang pagtalubo sa espirituwal.
5 Mga Kahagadan: Siempre, halangkaw an mga kahagadan sa pag-atender sa paadalan. An mga aplikante dapat na nakapaglingkod na bilang magurang sa kongregasyon o ministeryal na lingkod sa laog nin kisuerra duwang magkasunod na taon. An gabos dapat na daing agom asin 23 sagkod 50 an edad. Sa Pilipinas, an mga aplikante dapat na tataong magbasa, magsurat, asin magtaram nin Ingles, asin dapat na marahay an salud ninda, na dai nagkakaipo nin espesyal na pag-ataman o sistema nin pagkakan. Mas marahay kun naglilingkod bilang regular payunir.
6 An mga nagboboluntaryo dapat na andam asin kayang maglingkod saen man sinda kaipuhan. Ini nagkakaipo nin espiritu na siring kan ki propeta Isaias, na galagang nagpresentar na gibohon an sarong espesyal na trabaho, na nagsasabi: “Uya ako! Sugoa ako.” (Isa. 6:8) Nagpaheling man sia nin kapakumbabaan sa bilog niang buhay. An mga nagpepresentar para sa Paadalan sa Ministeryal na Pagsasanay maninigong motibado nin pagkamoot sa saindang mga tugang asin nin pagmawot na maglingkod sa sainda imbes na nin pagmawot na magin prominente o magkaigwa nin espesyal na posisyon. Pagkatapos na mag-ako nin siring na marahayon na pagsasanay, linalaoman an mga naggradwar na iaplikar an saindang nanodan para sa kapakinabangan nin iba.—Luc. 12:48.
7 Mga Pakinabang: Durante kan walong semana nin sigidong pagsasanay, an mga naggradwar ‘pinapakakan sa mga tataramon kan pagtubod asin kan marahay na katokdoan.’ (1 Tim. 4:6) Ginigibo sinda kaini na kualipikadong tumabang asin parigonon an boot nin iba sa saindang asignadong mga kongregasyon asin sirkito. Sa dakol na lugar na inasignaran sa mga naggradwar sa Paadalan sa Ministeryal na Pagsasanay, nadagdagan an gibohon sa langtad; naenganyar an pagpapayunir, nangorogna sa mga mas hoben; asin natawan nin orog na personal na atension an dakol na bagohan na nakikiasosyar sa banwaan nin Dios.
8 Ika daw daing agom na magurang sa kongregasyon o ministeryal na lingkod na an edad 23 sagkod 50? Taano ta dai pag-isipan an pag-aplay para sa Paadalan sa Ministeryal na Pagsasanay sa saindong masunod na pansirkitong asamblea? Ika daw sarong hoben na tugang na lalaki na nagpaplano nin panhaloyan na mga pasohan sa paglilingkod ki Jehova? Taano ta dai papagdanayon na simple an saimong buhay asin mayo nin mga disturbo tangani na makalaog ka sa “dakulang pinto [na ini] na pasiring sa gibohon”? Iyan puedeng magtao sa saimo nin dakulang kagayagayahan asin pagkakontento. Tunay nanggad, an Paadalan sa Ministeryal na Pagsasanay sarong bendisyon bako sanang sa mga naggradwar sa paadalan kundi sa mga kongregasyon kan banwaan nin Dios sa bilog na kinaban.
[Kahon sa pahina 3]
Kun Paano Sinda Nakinabang sa Pagsasanay
“An pagsasanay talagang pinaoswag an sakong ministeryo asin an sakong abilidad sa pagpastor na may kadonongan, na ginagamit an Kasuratan.”
“An paadalan nagtao sa sako nin orog pang kompiansa sa pag-asikaso kan sakong manlaenlaen na paninimbagan sa kongregasyon.”
“Binago kaiyan an haros gabos na aspekto kan sakong buhay, kaiba an saboot ko manongod sa teokrasya asin organisasyon nin Dios.”
“An pagsasanay na inako ko nakatabang sa sako na marealisar an pangangaipo na ako magpresentar na maglingkod kun saen may pangangaipo.”