Umoswag sa Tamang Kaaraman na May “Pagkagalaga sa Isip”
AN GABOS na lingkod ni Jehova naghihingoang kamtan an saiyang pag-oyon. Huling minamawot niatong kamtan iyan, galaga kita na mapaoswag an kualidad kan satong pagtubod asin maigot na gumibo nin sagradong paglilingkod. Minsan siring, dinadara ni apostol Pablo an satong atension sa sarong posibleng peligro, peligro na nakaapektar sa nagkapirang Judio kan saiyang panahon: “Igwa sinda nin kaigotan para sa Dios; alagad bakong oyon sa tamang kaaraman.” (Roma 10:2) Malinaw nanggad, an satong pagtubod asin an satong pagsamba ki Jehova maninigo na bakong basado sa emosyon sana. Kaipuhan niato an tamang kaaraman dapit sa satong Kaglalang asin sa saiyang kabotan.
Sa ibang mga isinurat ni Pablo, an paggawe na inooyonan nin Dios ikinonektar nia sa satong galagang pagkua nin kaaraman. Namibi sia na an mga parasunod ni Cristo logod na “mapano kan tamang kaaraman” dapit sa kabotan nin Dios “tanganing maglakaw na angay ki Jehova sa katuyohan na lubos na makapaogma sa saiya” mantang sinda “padagos na namumunga sa lambang marahay na gibo asin nag-ooswag sa tamang kaaraman dapit sa Dios.” (Col. 1:9, 10) Taano ta kaipuhan niatong marhay an “tamang kaaraman”? Asin taano ta maninigo kitang umoswag sa siring na kaaraman?
An Liabe sa Pagtubod
An tamang kaaraman dapit sa Dios asin sa saiyang kabotan na ihinayag sa Biblia iyo an basehan kan satong pagtubod. Kun mayo kan siring na masasarigan na kaaraman, an satong pagtubod ki Jehova magigin garo harong-harong na gibo sa mga baraha na matutumba tolos sa kadikit na doros. Dinadagka kita ni Pablo na gumibo nin sagradong paglilingkod sa Dios na ginagamit an satong “kakayahan na mangatanosan” asin na ‘bagohon an satong pag-isip.’ (Roma 12:1, 2) Makakatabang sa sato sa bagay na iyan an regular na pag-adal sa Biblia.
Si Ewa, sarong regular payunir sa Poland, nag-admitir: “Kun dai ako regular na nag-adal kan Tataramon nin Dios, mapopondo ako sa pagtalubo sa tamang kaaraman dapit ki Jehova. Tolos na mararaot an sakong Kristianong midbidan, asin magluluya an sakong pagtubod sa Dios—ini maresulta sa pagkawara kan sakong espirituwalidad.” Nungka logod na mangyari iyan sa sato! Estudyaran niato an halimbawa nin sarong lalaki na uminoswag sa tamang kaaraman dapit ki Jehova asin huli kaiyan nagkamit kan Saiyang pag-oyon.
“Kanigoan an Sakong Pagkamoot sa Saimong Ley!”
An saboot kan salmista manongod sa mga ley, pagirumdom, pagboot, togon, asin hudisyal na mga desisyon ni Jehova ipinahayag sa poetikong awit na yaon sa satong Biblia bilang Salmo 119. Isinurat kan salmista: “Magpapaheling ako nin pagkagusto sa saimong mga reglamento. . . . An saimong mga pagirumdom iyo an gusto ko.” Isinurat nia man: “Kanigoan an sakong pagkamoot sa saimong ley! Sa bilog na aldaw iyan an sakong inaatoman.”—Sal. 119:16, 24, 47, 48, 77, 97.
An mga terminong “pagkagusto” asin “inaatoman” nagsusuherir nin paghorophorop sa Tataramon nin Dios, na sa katunayan, naoogmang marhay sa siring na paghorophorop. Idinodoon kan mga tataramon na iyan an risang-risang pagkamoot kan salmista sa pag-adal sa ley nin Dios. An pagkamoot na iyan dai naggikan sa basta sana pagsulwak nin emosyon sa puso kan salmista. Imbes, odok an saiyang pagmawot na ‘atoman’ an ley, na marorop an mga tataramon ni Jehova. Maririsa niato sa saiyang saboot na gusto niang makaaram dapit sa Dios asin sa Saiyang kabotan sa pinakatamang paagi na mapupuede.
Maliwanag na an pagkamoot kan salmista sa Tataramon nin Dios gikan sa kairairaromi kan saiyang puso. Puede niatong hapoton an satong sadiri: ‘Totoo man daw iyan sa sako? Ikinakaogma ko daw na marhay an pagbasa asin an pagsiyasat sa sarong kabtang kan Biblia kada aldaw? Mapagngayongayo asin may kaigotan ko daw na binabasa an Tataramon nin Dios?’ Kun makakasimbag kita nin iyo sa mga hapot na iyan, posibleng marhay na kita “nag-ooswag sa tamang kaaraman dapit sa Dios.”
Si Ewa nagkomento: “Padagos kong pinagmamaigotan na paoswagon an kualidad kan sakong personal na pag-adal. Poon kan maresibi ko an brosyur na ‘See the Good Land,’ ginagamit ko iyan sa haros gabos na pag-adal ko. Lalo ko pang pinagmamaigotan na magheling sa Insight on the Scriptures asin sa iba pang mga reperensia kun kinakaipuhan.”
Estudyaran man niato an halimbawa kan mag-agom na si Wojciech asin Małgorzata, na may darudakulang obligasyon sa pamilya. Paano ninda ikinakaiba sa saindang iskedyul an personal na pag-adal sa Biblia? “Nag-iiskedyul kami nin panahon na kanya-kanyang pag-adalan an Tataramon nin Dios sagkod na kaya niamo. Dangan, sa samuyang pampamilyang pag-adal asin aroaldaw na pag-orolay, pinag-oorolayan niamo an interesante o nakakamotibar na mga punto.” An hararom na personal na pag-adal nagtatao sa sainda nin dakulang kagayagayahan asin nagtatabang sa sainda na ‘umoswag sa tamang kaaraman.’
Pag-adal na May Bukas na Isip
Bilang mga Kristiano, nagtutubod kita na kabotan nin Dios “na an gabos na klase nin tawo makaligtas asin makaabot sa tamang kaaraman dapit sa katotoohan.” (1 Tim. 2:3, 4) Idinodoon kan katotoohan na ini an kahalagahan kan pagbasa kan Biblia asin kan pagmamaigot na ‘saboton iyan.’ (Mat. 15:10) An sarong tabang tanganing magibo iyan iyo an pag-adal na may bukas na isip. Ini an kaisipan na ipinaheling nin mga taga Berea kan suanoy kan ipaabot ni Pablo sa sainda an maogmang bareta: “Inako ninda an tataramon na igwa nin dakulang pagkagalaga sa isip, na maingat na sinisiyasat an Kasuratan aroaldaw kun baga an mga bagay na ini iyo man nanggad.”—Gibo 17:11.
Inaarog daw nindo an halimbawa kan mga taga Berea na pagkaigwa nin galagang isip asin pinapagdadanay daw nindo an saindong isip na mayo nin dai kinakaipuhan na mga disturbo mientras na nag-aadal kamo sa Biblia? Mapagmamaigotan nin sarong Kristiano na arogon an mga taga Berea, dawa kun kaidto, bakong kawiliwili para sa saiya an pag-adal. Apuera kaini, an nagkapirang tawo may tendensia na magbasa asin mag-adal nin mas kadikit mientras na nagkakaedad, alagad dai iyan dapat na mangyari sa sarong Kristiano. Ano man an edad, mapagmamaigotan na malikayan an mga disturbo. Asin mantang nagbabasa kamo, puede kamong galagang maghanap nin mga impormasyon na ikakaestorya nindo sa iba. Halimbawa, puede daw nindong hingoahon na sambiton sa saindong agom o sa sarong Kristianong katood an manongod sa nabasa o nanodan nindo sa saindong pag-adal? Sa paggibo kaiyan, epektibong ikakalaog nindo sa saindong isip asin puso an mga napag-adalan mantang nagkakaigwa man kamo nin positibong epekto sa iba.
Kun mapadapit sa saindong pag-adal, arogon an halimbawa ni Esdras, an lingkod nin Dios kan suanoy na ‘inandam an saiyang puso na konsultahon an ley ni Jehova.’ (Esd. 7:10) Paano nindo magigibo iyan? Puede kamong humanap nin kamugtakan na makakatabang sa saindong pag-adal. Dangan, tumukaw asin mamibi ki Jehova na logod giyahan kamo asin tawan nin kadonongan. (Sant. 1:5) Hapoton an saindong sadiri, ‘Ano daw an linalaoman kong manodan sa pag-adal na ini?’ Mantang nagbabasa, magin listo sa mayor na mga ideya. Tibaad booton nindo na magsurat nin nota dapit kaiyan o markahan an mga kabtang na nangorognang gusto nindong magirumdoman. Isip-isipon kun paano nindo magagamit an mga pinag-adalan nindo kun kamo naghuhulit, kun nagdedesisyon, o kun nagpaparigon nin boot sa mga kapagtubod. Sa pagtatapos kan saindong pag-adal, repasohon nindo nin halipot an saindong pinag-adalan. Matatabangan kamo kaiyan na mapagdanay sa saindong isip an mga nanodan nindo.
Ilinadawan ni Ewa an saiyang pamamaagi: “Mantang binabasa ko an Biblia, ginagamit ko an mga cross-reference, an Watch Tower Publications Index, asin an Watchtower Library sa CD-ROM. Nagsusurat ako nin mga nota tanganing magamit ko iyan sa sakong ministeryo.”
Haloy nang ikinakaogma nin nagkapira an hararom na pag-adal, na nagtatao nin lubos na atension sa espirituwal na mga bagay. (Tal. 2:1-5) Pero, dakol sindang responsabilidad asin nadedepisilan na magtagama nin panahon para sa personal na pag-adal. Kun totoo iyan sa saindo, anong mga pagliliwat sa saindong iskedyul an puede nindong gibohon?
Paano Ako Magkakapanahon?
Maoyon gayod kamo na mas madaling magtagama nin panahon sa paggibo kan mga bagay na ikinakaogma nindo. Narealisar nin dakol na an sarong tabang tanganing magin lubos an atension sa personal na pag-adal iyo an pagkaigwa nin realistikong pasohan, siring kan pagbasa kan bilog na Biblia. Totoo, tibaad garo baga masakiton na basahon an halawig na mga kasaysayan nin linahe, detalyadong paglaladawan sa suanoy na templo, o komplikadong mga hula na garo mayong koneksion sa pangaroaldaw na buhay. Pagmaigotan na maggibo nin praktikal na mga lakdang na aboton an saindong mga pasohan. Halimbawa, bago siyasaton an sarong kabtang kan Biblia na garo baga depisil, puede nindong basahon an manongod sa kasaysayan o praktikal na aplikasyon kaiyan. An siring na mga impormasyon makukua sa librong “All Scripture Is Inspired of God and Beneficial,” na makukua sa haros 50 lenguahe.
Nakakapukaw sa isip kun gagamiton nindo an saindong imahinasyon mantang binabasa nindo an Biblia. Makakatabang ini sa saindo na ikaladawan sa saindong isip an mga karakter asin pangyayari na kalabot dian. Kun iaaplikar an pira sanang sadol na ini, posibleng marhay na magigin mas nakakaogma asin kapakipakinabang an saindong pag-adal. Huli kaiyan, magigin mas galaga kamo na magtagama nin panahon para dian. Magigin mas madaling ugaleon an pagbasa kan Biblia aroaldaw.
Minsan ngani an nasambitan na mga sadol makakatabang sa sato bilang mga indibiduwal, ano an puedeng gibohon nin sarong sibot na pamilya? Taano ta dai iribang magtukaw asin relaks na pag-orolayan an dapit sa posibleng mga pakinabang kan pampamilyang pag-adal? Puedeng lumataw sa pag-orolay na iyan an praktikal na mga ideya, arog baga nin pagmata na mas amay nin pirang minuto kada aldaw o sa nagkapirang aldaw tanganing pag-olayan an sarong kabtang kan Biblia. O tibaad mahayag sa saindong pag-orolay an pangangaipo na pakarhayon an iskedyul kan pamilya. Halimbawa, naheling nin nagkapirang pamilya na praktikal na pag-olayan an teksto kan aldaw o basahon an sarong kabtang kan Biblia pagkatapos magkakan kan pamilya. Bago ponan na linigan an lamesa o humale tanganing gibohon an ibang aktibidad, an pamilya naggagamit nin 10 o 15 minutos tanganing pag-olayan an Kasuratan o basahon an nakaiskedyul na babasahon sa Biblia. Tibaad sa primero garo baga medyo depisil ini, alagad dai mahaloy magigin normal na sana iyan sa pamilya asin magigin kawiliwiling marhay.
Ipinaliwanag ni Wojciech asin Małgorzata kun ano an nakatabang sa saindang pamilya: “Kaidto, nauubos an samong panahon sa bakong importante asin mayong gayong pakinabang na mga aktibidad. Nagdesisyon kami na bawasan an panahon na ginagamit niamo sa pagpadara nin mga e-mail. Ininaan mi man an pira sa samong aling-alingan asin nag-iskedyul kami nin espesipikong aldaw saka oras para sa hararom na pag-adal.” Siertong dai nagbabasol an pamilyang ini sa paggibo kan mga pagliliwat na iyan, asin magigin totoo man iyan sa saindong pamilya.
Kapakipakinabang an Pag-oswag sa Tamang Kaaraman!
An hararom na pag-adal sa Tataramon nin Dios puedeng ‘magbunga sa lambang marahay na gibo.’ (Col. 1:10) Mientras na nagigin totoo iyan sa saindong buhay, an saindong pag-oswag mahahayag sa gabos. Magigin espirituwal na tawo kamo na may mahiwas na pakasabot sa mga katotoohan sa Biblia. Magigin mas timbang an saindong mga desisyon asin magigin mas may kakayahan kamong tumabang sa iba, na dai man nasosobrahan, na sa parate tanda nin mga tawong daing kabatidan. Orog sa gabos, mas mapaparani kamo ki Jehova. Magkakaigwa kamo nin mas hararom na apresasyon sa saiyang mga kualidad, asin maririsa ini mantang sinasabi nindo sa iba an manongod sa saiya.—1 Tim. 4:15; Sant. 4:8.
Ano man an saindong edad o inagihan, gibohon an gabos nindong makakaya na padagos na makamate nin dakulang kaogmahan sa Tataramon nin Dios asin gumibo nin hararom na pag-adal na may bukas na isip. Makakasarig kamo na dai lilingawan ni Jehova an saindong mga paghihingoa. (Heb. 6:10) Itatao nia sa saindo an saiyang nagsosopay na mga bendisyon.
[Kahon sa pahina 13]
KUN KITA “NAG-OOSWAG SA TAMANG KAARAMAN”. . .
Napapakosog niato an satong pagtubod sa Dios asin naglalakaw kita na angay ki Jehova.—Col. 1:9, 10
Nagkakaigwa kita nin pakarorop, na nagagamit an pakabatid asin nakakagibo nin madonong na mga desisyon.—Sal. 119:99
Mas naoogma kitang marhay sa pagtabang sa iba na rumani ki Jehova.—Mat. 28:19, 20
[Mga Ritrato sa pahina 14]
Puedeng depisil na humanap nin lugar na nakakatabang sa pag-adal, alagad kawiliwili iyan
[Ritrato sa pahina 15]
An nagkapirang pamilya nagbabasa nin sarong kabtang kan Biblia pagkatapos magkakan