“An Anghel ni Jehova Nagkakampo sa Palibot”
Isinaysay ni Christabel Connell
Konsentrado kaming marhay sa pagsimbag sa mga hapot ni Christopher sa Biblia kaya mayo ni saro sa samo an nakariparo na banggihon na; ni narisa mi man na nagpaparatanaw si Christopher sa may bintana. Sa katapustapusi, sia nagsalingoy sa samo asin nagsabi, “Ligtas nang maghale ngonyan.” Sa puntong iyan, hinatod nia kami sa samong mga bisikleta asin nagpaaram na kami. Ano an naheling nia na peligrosong gayo?
CHRISTABEL Earl an ngaran ko kan mamundag ako sa Sheffield, Inglatera, kan 1927. Binomba an samong harong durante kan Guerra Mundial II, kaya pinaistar ako sa lola ko mantang tinatapos ko an sakong pag-eskuela. Nag-eskuela ako sa sarong kumbentong eskuelahan, asin duman pirme kong hinahapot an mga madre kun taano ta lakop na gayo an karatan saka kadahasan. Dai ninda ako natawan nin nakakakontentong simbag pati na kan iba pang relihiosong tawo na hinapot ko.
Pagkatapos kan Guerra Mundial II, nagsanay ako bilang nars. Nagbalyo ako sa Londres tanganing magtrabaho sa Paddington General Hospital, alagad sa siudad, mas dakol pang kadahasan an naheling ko. Pagkahale sana kan mas matua kong tugang na lalaki tanganing lumaban sa Guerra sa Korea, nakaheling ako nin madahas na pag-iiwal sa luwas mismo kan ospital. Mayo nin siisay man na nagtabang sa biktima, na nabuta huli mismo sa pagbugbog. Sa panahon na ini, iiniiba ako kan sakong ina sa mga pagtiripon nin mga espiritista, alagad dai ko pa man giraray nasabotan kun taano ta lakop na gayo an karatan.
Nadagka na Mag-adal sa Biblia
Sarong aldaw, nagbisita an panganay mi na si Manoy John na nagin saro sa Mga Saksi ni Jehova. “Aram mo daw kun taano ta nangyayari an gabos na maraot na bagay na ini?” an hapot nia. “Dai,” an simbag ko. Binukasan nia an saiyang Biblia asin binasa an Kapahayagan 12:7-12. Nasasabotan ko na ngonyan na si Satanas asin an mga demonyo an pangenot na responsable sa karatan sa kinaban. Kaya, sa pagsunod sa sadol ni Manoy, dai nahaloy pagkatapos kaiyan nag-ako ako nin pag-adal sa Biblia. Minsan siring, kan panahon na iyan, huli sa takot sa tawo dai ako nagpabautismo.—Tal. 29:25.
Nagin Saksi man an tugang ko na si Manay Dorothy. Kan mag-abot sia hale sa internasyonal na kombension sa Nueva York (1953) kaiba kan saiyang katratong pakasalan na si Bill Roberts, sinabi ko sa sainda na nakipag-adal ako sa Biblia. Hinapot ako ni Bill: “Hineling mo an gabos na teksto? Kinuritan mo an mga simbag sa libro?” Kan sabihon ko na dai, nagsimbag sia: “Kun siring, dai ka man talaga nag-adal! Kaolayon mo an tugang na idto, asin magpoon ka giraray!” Kan panahon na iyan pinonan na akong ribokon kan mga demonyo. Nagigirumdoman ko na nakiolay ako ki Jehova na logod protehiran ako asin iligtas ako sa impluwensia ninda.
Pagpapayunir sa Scotland Asin Irlandia
Nabautismohan ako kan Enero 16, 1954, natapos an kontrata ko bilang nars kan Mayo, asin nagpoon akong magpayunir kan Hunyo. Pakalihis nin walong bulan, idinestino ako bilang espesyal payunir sa Grangemouth, Scotland. Duman namatean ko na an mga anghel ni Jehova “nagkakampo sa palibot” mantang naglilingkod ako sa puerang teritoryong iyan.—Sal. 34:7.
Kan 1956, inimbitaran ako na maglingkod sa Irlandia. Kaiba nin duwa pa, idinestino ako sa siudad nin Galway. Sa kaenot-enoteng aldaw, nakaduman ako sa sarong padi. Pakalihis nin pirang minuto, sarong pulis an nag-abot asin dinara nia kami sa presinto. Kan makua nia an samong ngaran asin adres, sia tolos na nag-apod sa telepono. Nadangog mi na nagsabi siang, “Iyo po Father, aram ko na kun saen talaga sinda nag-iistar.” Sinugo sia kan padi! An may sadiri kan harong na inaarkila mi ginipit tanganing pahaleon kami, kaya irinekomendar kan sangang opisina na maghale kami sa lugar na iyan. Nahuri kami nin dies minutos sa istasyon nin tren. Alagad yaon pa duman an tren, asin sarong lalaki an naghahalat tanganing seguradohon na nakasakay kami duman. Iyan pakalihis pa sana nin tolong semana sa Galway!
Idinestino kami sa Limerick, saro pang siudad na dakulaon an impluwensia kan Iglesia Katolika. Pirme kaming kinukurahawan nin sururog. Dakol na tawo an natatakot na buksan kami nin pinto. Sarong taon bago kaiyan, sarong tugang na lalaki an binugbog sa kaharaning sadit na banwaan nin Cloonlara. Kaya naogma kaming mamidbid si Christopher, na nasambitan sa kapinonan, na nagsabing balikan mi sia tanganing simbagon an mga hapot nia sa Biblia. Durante kan samong pagbisita, sarong padi an naglaog asin sinabihan si Christopher na pahaleon kami. Inatubang nia an padi asin nagsabi: “An mga babaeng ini inimbitaran ko sa sakong harong asin nagtuktok sinda bago maglaog. Dai taka inimbitaran, dai ka pa nagtuktok.” Anggot na naghale an padi.
Dai kami nag-aaram, nagtipon an padi nin sarong dakulang grupo nin mga lalaki, na naghahalat sa samo sa luwas kan harong ni Christopher. Huling aram nia na anggot sinda sa samo, ginibo ni Christopher an ilinadawan sa kapinonan. Dai nia kami pinahale sagkod na yaraon pa sinda. Kan huri, naaraman mi na dai nahaloy sia saka an pamilya nia napiritan na humale sa lugar na iyan, asin nag-imigrar sinda sa Inglatera.
Inimbitaran sa Gilead
Kan maresibi ko an imbitasyon sa ika-33 na klase kan Gilead, may plano na ako kaidto na mag-atender sa Kabotan nin Dios na Internasyonal na Asamblea sa Nueva York kan 1958. Imbes na magpuli pagkatapos kan asamblea, naglingkod ako sa Collingwood, Ontario, Canada, sagkod na magpoon an Paadalan sa Gilead kan 1959. Alagad durante kan asamblea, nakamidbid ko si Eric Connell. Nanodan nia an katotoohan kan 1957 asin nagpoon siang magpayunir kan 1958. Pagkatapos kan asamblea, sinusuratan nia ako aroaldaw mantang yaon ako sa Canada asin durante kan pag-adal ko sa Gilead. Inisip ko kun ano an mangyayari sa samo pagkagradwar ko.
An pag-eskuela ko sa Gilead sarong mahalagang marhay na pangyayari sa sakong buhay. Kaklase ko si Manay Dorothy asin an agom nia. Sinda madedestino bilang misyonero sa Portugal. Sa pagkabigla ko, idinestino ako sa Irlandia. Desganado akong gayo huling dai ako makakaiba sa sakong tugang! Hinapot ko an saro sa mga instruktor kun may nagibo akong sala. “Mayo,” an simbag nia. “Ika asin an saimong kapartner na si Eileen Mahoney nag-oyon na magduman saen man sa kinaban,” asin kaiba nanggad dian an Irlandia.
Balik sa Irlandia
Nakabalik ako sa Irlandia kan Agosto 1959 asin idinestino ako sa Kongregasyon nin Dun Laoghaire. Mientras tanto, si Eric nagbalik na sa Inglatera asin naogmang marhay huling haranihon na ako. Gusto nia man na magin misyonero. Sinabi nia na huling kan panahon na iyan sarong langtad sa pagmimisyonero an Irlandia, mapayunir sia digdi. Buminalyo sia sa Dun Laoghaire, asin ikinasal kami kan 1961.
Pakalihis nin anom na bulan, naaksidente si Eric sa motorsiklo na dikit pa niang ikagadan. Nagkaigwa nin baak sa saiyang bungo, asin an mga doktor dai segurado kun ikakaligtas ninda an saiyang buhay. Pagkatapos niang maospital nin tolong semana, inataman ko sia sa harong sa laog nin limang bulan sagkod na sia narahay. Nagpadagos ako sa ministeryo sagkod sa pinakamakakaya ko.
Kan 1965 idinestino kami sa sarong kongregasyon na may walong parahayag sa Sligo, sarong duongan sa amihanan-solnopan na baybayon. Pakalihis nin tolong taon, nagduman kami sa saro pang sadit na kongregasyon sa Londonderry, sa enotan pa paamihanan. Sarong aldaw, pagpuli mi hale sa paglilingkod naheling mi na binarikadahan nin alambreng may tunok an tinampo sa lugar na iniistaran mi. Nagpoon na an inaapod na Kariribokan sa Amihanan na Irlandia. An mga gang nin mga hoben nagsusulo nin mga auto. An siudad nabanga na sa lugar nin mga Protestante asin Katoliko. Peligroso an magpabarobalyo nin lugar sa laog kan siudad.
Pamumuhay Asin Pagpapatotoo sa Panahon kan Kariribokan
Minsan siring, huli sa samong ministeryo, nakaduman kami minsan saen. Sa giraray, an pagmate mi garo baga an mga anghel nagkakampo sa palibot mi. Kun nakakaduman kami sa mga lugar na pinonan nin kariribokan, minahale tolos kami asin minabalik kun trangkilo na an situwasyon. Sarong beses kan may nangyaring pagkariribok harani sa apartment mi, may mga pidaso nin naglalaad na materyales hale sa kaharaning tindahan nin pinta na tuminugpa sa pasamano kan samong bintana. Nagdanay kaming mata en kaso masulo an samong apartment. Pagkalipat sa Belfast kan 1970, naaraman mi na sarong bombang de gasolina an talagang nakasulo sa tindahan nin pinta asin sa dati ming apartment kan panahon na iyan.
Saro pang beses, kan ako asin an sarong tugang na babae naghuhulit, may narisa kaming laen na marhay na túbo sa pasamano nin bintana. Padagos kaming naglakaw. Pakalihis nin pirang minuto, suminabog iyan. An paghona kan mga taga duman na nagruluwas, kami an naglaag kan bombang túbo! Kan oras man sanang iyan sarong tugang na babae na nag-iistar duman an nagpadagos sa samo sa saiyang harong. Inako ini kan saiyang mga kataed bilang prueba na inosente kami.
Kan 1971, nagbalik kami sa Londonderry tanganing magdalaw sa sarong tugang na babae. Kan ilinadawan mi an ruta asin barikada na inagihan mi, sia naghapot, “Mayong tawo sa barikada?” Kan sabihon mi na, “Igwa, alagad dai man ninda kami inintindi,” napangalas sia. Taano? Huli ta kan nakaaging mga aldaw sarong doktor saka pulis an inagawan nin auto asin sinulo iyan.
Kan 1972 buminalyo kami sa Cork. Paghaloyhaloy, naglingkod kami sa Naas, dangan sa Arklow. Sa katapustapusi, kan 1987, idinestino kami sa Castlebar, na iyo an lugar mi ngonyan. Digdi, ibinilang mi na sarong dakulaon na pribilehio na makatabang sa pagtogdok nin Kingdom Hall. Nagkahelang nin grabe si Eric kan 1999. Pero, sa tabang ni Jehova asin sa mamomoton na suporta kan kongregasyon, sa giraray nakaya ko iyan asin naataman ko sia sagkod na sia narahay.
Duwang beses na kaming nagklase ni Eric sa Paadalan sa Paglilingkod Bilang Payunir. Naglilingkod pa sia bilang magurang sa kongregasyon. Igwa ako nin grabeng artritis asin kinaipuhan na operaran an sakong mag-ibong na piad asin tuhod. Minsan ngani kinaipuhan kong atubangon an grabeng relihiosong pagtumang asin nabuhay ako sa mga panahon na grabe an kariribokan sa politika asin sa sosyedad, an saro sa pinakadakula kong mga kadepisilan iyo na kaipuhan kong magpondo sa pagmaneho. Iyan sarong pagbalo huli ta dai na ako basta-basta makaduman sa gusto kong dumanan. Dakula an tabang na itinao kan kongregasyon, sinda nagin mapagsuportar na marhay. Nakakalakawlakaw na ako ngonyan sa tabang nin sarong sogkod, asin naggagamit ako nin de bateriang motorsiklo na tolo an rueda kun mas halawig an distansia.
Kun susumahon, may total na labing 100 na taon na kaming naglilingkod ni Eric bilang espesyal payunir—an 98 kaiyan digdi sa Irlandia. Mayo sa isip mi na magpondo. Dai kami nagsasarig sa mga milagro, alagad naniniwala kami na an makapangyarihan na mga anghel ni Jehova “nagkakampo sa palibot” kan mga natatakot asin maimbod na naglilingkod sa saiya.