Bebendisyunan Ka ni Jehova Kun Gigibuhon Mo an Ipinapagibo Niya

NAMUNDAG ako kan 1923 sa Hemsworth, sarong banwaan sa Yorkshire, England. May saro akong tugang na lalaki na matua sako, si Bob. Kan mga nuwebe anyos ako, an sakuyang ama, na nauuyam sa pagsagin-sagin nin mga relihiyon, nakakua nin pirang libro na nagbubuyagyag sa palsong relihiyon. Hanga siyang marhay sa mga nabasa niya. Pakalihis nin pirang taon, nagduman sa harong mi si Bob Atkinson asin nag-play sa ponograpo kan rekord kan sarong pahayag ni Brother Rutherford. Narealisar ming an rekord na ini hali man sa grupong nagpublikar kan mga librong idto! Inimbitaran kan sakong mga magurang si Brother Atkinson na samo na magkakan burubanggi asin simbagon an dakul ming hapot sa Bibliya. Inimbitaran kaming mag-atender sa mga pagtiripon na ginigibo sa harong nin sarong brother na mga pirang milya an rayo. Regular na kaming nag-atender, asin nagkaigwa na nin sarong sadit na kongregasyon sa Hemsworth. Dai nahaloy, nagpapadagos na kami sa harong mi nin mga zone servant (inaapod ngunyan na paraataman nin sirkito) asin iniimbitaran mi an mga payunir sa kaharaning mga kongregasyon para magkakan samuya. An pakikiiba-iba sa sainda talagang nagkaigwa nin marahay na epekto sa buhay ko.

Kan panahon man na iyan, nagpundar kami nin negosyo. Pero sinabi ni Tatay sa tugang ko, “Kun gusto mong magpayunir, ipupundo ta ini.” Nag-uyon si Bob, asin sa edad na 21, naghali siya sa harong para magpayunir. Pakalihis nin duwang taon, kan 16 anyos na ako, nagpayunir man ako. Sa bilog na semana, apuwera pag Sabado saka Domingo, sa parati solo akong naghuhulit gamit an testimony card asin ponograpo. Pero binendisyunan ako ni Jehova nin sarong tinutukduan sa Bibliya na nag-uswag na marhay sa espirituwal. Pag-abot nin panahon, dakul sa kapamilya kan study kong idto an nag-ako kan katotoohan. Kan sunod na taon, ninombrahan ako bilang espesyal payunir, kaiba si Mary Henshall. Iinasignar kami sa sarong teritoryo na mayo pang nakadestinong maghulit kan Kahadian sa distrito nin Cheshire.

Kan Giyera Mundiyal II, ipinagbuot sa mga babayi na gumibo nin mga trabahong nagsusuportar sa giyera. Bilang mga espesyal payunir asin bilog na panahon na mga ministro, huna mi tatawan man kami nin eksemsiyon arog kan mga ministro kan ibang relihiyon. Pero dai nagtugot an mga korte, kaya nasentensiyahan akong mapreso nin 31 aldaw. Kan sunod na taon, kan mag-19 anyos ako, duwang beses akong dinara sa korte dahil nagsayuma akong magsuportar sa giyera huli sa sakong konsiyensiya. Pero pirmi man akong naaabsuwelto sa kaso ko. Sa gabos na iyan, aram kong tinatabangan ako kan banal na espiritu ni Jehova asin na kinakaputan niya an sakuyang kamot tanganing pakusugon ako.—Isa. 41:10, 13.

BAGONG KAPARTNER

Nagkamidbidan kami ni Arthur Matthews kan 1946. Napreso siya nin tulong bulan dahil nagsayuma siyang makikabtang sa giyera huli sa konsiyensiya. Pero pagkaluwas niya, nagduman tulos siya sa tugang niyang si Dennis, na sarong espesyal payunir sa Hemsworth. Puon kan aki pa sinda, itinukdo na sa sainda kan saindang ama an katotoohan asin nagpabawtismo kan sinda mga tin-edyer. Dai nahaloy, iinasignar si Dennis sa Ireland, kaya mayo nang kapartner si Arthur. Naghanga an mga magurang ko sa paggawi kan mahigos na payunir na ini, kaya inimbitaran ninda si Arthur na sa harong mi magdagos. Pag nagpupuli ako, kami ni Arthur an naghuhugas kan mga kinakanan. Kan huri, nagsusuratan na kaming duwa. Kan 1948, nasentensiyahan giraray si Arthur nin tulong bulan na pagkapreso. Ikinasal kami kan 1949, asin pasuhan ming magdanay sa bilog na panahon na paglilingkod sagkod na posible. Maingat kaming marhay sa pagbadyet, asin ginagamit mi an panahon nin bakasyon para mangguno nin mga prutas tanganing makaganar nin dikit. Sa tabang ni Jehova, nakapagpadagos kami sa samuyang pagpapayunir.

Pakalihis nin labi pa sanang sarong taon, iinasignar kami sa Northern Ireland, inot sa Armagh dangan sa Newry. Mga Katoliko an kadaklan na nakaistar sa mga banwaan na iyan. Grabe an pagkontra duman, kaya kaipuhan ming magin maingat na marhay asin mapagrisa pag nakikipag-ulay sa mga tawo. Ginigibo an mga pagtiripon sa harong nin sarong mag-agom na Saksi na mga 16 kilometros an rayo sa iniistaran mi. Mga walo an nag-aatender. Kun minsan duman na kami pinapaturog, asin sa salog kami naghihigda. Pagkaaga, masisiram na kakanon an ipinapapamahaw sa samo. Nakakaugma nanggad ta ngunyan, kadakul nang mga Saksi sa lugar na iyan.

“GIGIBUHON MI ’YAN!”

Dati nang mga espesyal payunir sa Northern Ireland an tugang kong si Bob asin an agom niyang si Lottie. Kan 1952, nag-atender kaming apat sa sarong pandistritong kumbensiyon sa Belfast. Sarong mabuot na brother an nagpadagos samo sa harong niya, asin kaiba mi man duman si Pryce Hughes, an branch servant kaidto sa Britania. Sarong banggi, napag-ulayan mi an dapit sa pag-release kan buklet na God’s Way Is Love, na espesyal na ipinublikar para sa mga taga Ireland. Inistorya ni Brother Hughes kun gurano kadipisil paabutan kan katotoohan an mga Katoliko sa Irish Republic. Pinapahali an mga tugang sa saindang mga dinadagusan saka may mga grupong sinusutsutan kan mga padi tanganing atakihon an mga tugang. “Kaipuhan mi nin mga mag-agom na may kotse,” an sabi ni Pryce, “tanganing isagibo an sarong espesyal na kampanya para idistribwir an buklet sa bilog na nasyon.”a Arog kan sinambit sa kapinunan, nagsimbag tulos kami, “Gigibuhon mi ’yan!”

An saro sa mga pirming dinadagusan kan mga payunir sa Dublin iyo an harong ni Ma Rutland, sarong maimbod na sister na haloy na sa katotoohan. Pakatapos na magdagos diyan nin dikit na panahon asin pakapabakal kan pirang gamit mi, nagsakay kaming apat sa traysikel ni Bob tanganing maghanap nin kotse. Nakahanap kami nin segunda-manong kotse na ayos pa an kondisyon asin pinakiulayan mi an nagpapabakal na ihatod iyan samo, huling mayo samong tataong magmaneho. Kan bilog na bangging idto, nakatukaw lang si Arthur sa kama na nagpupurupraktis kun paano magkambiyo. Pagkaaga, mantang pigpupurbaran niyang imaneho an kotse paluwas sa garahe, naghapit an misyonaryong si Mildred Willet (kan huri naagom ni John Barr). Tatao siyang magmaneho! Tinukduan niya kaming magmaneho asin pagkatapos nin dikit na praktis, andam na kaming lumarga!

An sunod na kaipuhan mi iyo an madadagusan. Pinatanidan kami kan mga brother na dai mag-istar sa harong na de-ruweda o trailer ta tibaad suluon iyan kan mga nagkokontra. Kaya naghanap kami nin harong, pero mayo man kaming nakua. Kan bangging idto, nagturog kaming apat sa kotse. Kinaagahan, an solamenteng nahanap mi sarong sadit na pasadyang trailer na may duwang sadit na double-deck na kama. Iyan an nagin harong mi. An makangangalas ta ayos lang sa mga mabuot na parauma na iparada mi an trailer sa lote ninda. Nakubrehan mi an mga teritoryo na 16 sagkod 24 kilometros an rayo. Dangan pag nasa sunod na teritoryo na kami, binabalikan mi an mga tawo kun sain mi ipinarada an trailer.

Mayong gayong pagkontra na nangyari kaya nadumanan mi an gabos na harong sa timog-sirangan kan Republika. Nakapagdistribwir kami nin labing 20,000 na buklet dangan ipinapadara mi sa sangang opisina kan Britania an pangaran kan mga interesado. Dakulang bendisyon nanggad huling ngunyan igwa na nin ginatos na mga Saksi sa lugar na iyan sa Ireland!

BALIK SA ENGLAND, DANGAN SA SCOTLAND NA

Pag-abot nin panahon, iinasignar kami sa timog na parte kan London. Pakalihis nin pirang semana, inapudan si Arthur kan sangang opisina kan Britania para ipaaram na sa sunod na aldaw mapuon na siya sa pansirkitong gibuhon! Pagkatapos nin sarong semanang pagsasanay, nagduman na kami sa iinasignar samong sirkito sa Scotland, kaya mayo nang panahon si Arthur para magpreparar kan saiyang mga pahayag. Pero napakusog talaga ako kan pagigin andam niyang atubangon an mga kadipisilan sa paglilingkod ki Jehova. Talagang ikinaugma mi an samuyang asignasyon sa pansirkitong gibuhon. Nagpirang taon kami sa teritoryong mayo pang parahayag kan Kahadian, kaya bendisyon nanggad ngunyan na makaibanan an dakulon na tugang.

Sarong dakulang desisyon an kaipuhan ming gibuhon kan makaresibi si Arthur nin imbitasyon na mag-atender sa sampulong bulan na pag-adal sa Gilead School kan 1962. Dawa mangangahulugan iyan na mawawalat ako, nagdesisyon kami na tama sanang akuon ni Arthur an pribilehiyong iyan. Huling mayo akong kapartner, iinasignar giraray ako sa Hemsworth bilang espesyal payunir. Kan magbalik na si Arthur pagkalihis nin sarong taon, iinasignar kami sa pandistritong gibuhon. Kaiba sa teritoryo mi an Scotland, norteng parte kan England, asin Northern Ireland.

SARONG BAGONG ASIGNASYON SA IRELAND

Kan 1964, tinawan si Arthur nin sarong bagong asignasyon bilang branch servant sa Irish Republic. Maugma kaming marhay sa gibuhon na pagdalaw, kaya kan primero haditon talaga ako sa pagbabagong iyan. Ngunyan pag ginigirumdom ko iyan, ipinagpapasalamat ko na natawan ako kan pribilehiyo na maglingkod sa Bethel. Naniniwala ako na kun aakuon mo an sarong asignasyon dawa dai mo man talaga gusto iyan, siguradong bebendisyunan ka ni Jehova. Sa Bethel, nagtrabaho ako sa opisina, nag-iimpake nin mga literatura, nagluluto, asin naglilinig. Sa pana-panahon, nasa pandistritong gibuhon kami asin may mga nakakamidbid kaming mga tugang sa bilog na nasyon. Paagi kaini, saka pag nahihiling ming nag-uuswag an mga tinutukduan mi sa Bibliya, napadayupot kaming marhay sa samuyang espirituwal na pamilya sa Ireland. Bendisyon nanggad iyan!

SARONG MAKASAYSAYAN NA PANGYAYARI PARA SA MGA SAKSI NI JEHOVA SA IRELAND

An inot na internasyonal na kumbensiyon sa Ireland ginibo sa Dublin kan 1965.b Sa ibong nin grabeng pagkontra, nagin mapangganang marhay an kumbensiyon. An nag-atender may bilang na 3,948, asin 65 an nabawtismuhan. An gabos na dinagusan kan 3,500 na delegado na hali sa manlain-lain na nasyon tinawan nin surat nin pasasalamat. Asin inumaw man kan mga dinagusan an marahay na paggawi kan mga delegado. Tunay nanggad na sarong makasaysayan na pangyayari idto sa Ireland!

Kan 1966, pinagsaro an amihanan asin an timog na Ireland sa pangangataman kan sangang opisina sa Dublin—ibang-iba nanggad iyan sa sitwasyon sa isla kun sain nagkakabaranga an mga tawo huli sa pulitika asin relihiyon. Maugma kaming marhay na mahiling an dakul na Katoliko na nag-ako kan katotoohan asin naglilingkod na ngunyan kaiba kan mga tugang na dating Protestante.

BIGLANG PAGBABAGO NIN ASIGNASYON

Kan 2011, biglang nagbago an samuyang buhay kan pagsaruon an sangang opisina kan Britania asin kan Ireland tapos iinasignar kami sa Bethel sa London. Nag-abot an baretang iyan kan panahon na nahahadit na ako ki Arthur huling na-diagnose siya na may Parkinson’s disease. Kan Mayo 20, 2015, nagadan an kaiba-iba ko sa laog nin 66 na taon.

Sa nakaaging pirang taon, nakamati ako nin grabeng kulog, kamunduan, asin depresyon. Kaidto, pirming yaon si Arthur para sako. Pungawon na talaga ako saiya! Pero, pag nag-aagi ka sa arog kaining mga sitwasyon, mas napaparani ka ki Jehova. Nakakaugma man na maaraman na kadakul kan nagpapadangat ki Arthur. Nakaresibi ako nin mga surat hali sa mga amigo mi sa Ireland, Britania, asin dawa sa Estados Unidos. Kulang an mga tataramon para maipahayag an pasasalamat ko sa naitabang sakuya kan mga surat na ini, pati kan mga pampakusog kan tugang ni Arthur na si Dennis, kan agom kaining si Mavis, asin kan mga pamangkin kong si Ruth saka Judy.

An sarong teksto na talagang nakapakusog sako iyo an Isaias 30:18, na an sabi: “Si Jehova mapasensiyang naghahalat na pahilingan kamo nin pabor, asin siya matindog tanganing pahilingan kamo nin pagkahirak. Huli ta si Jehova sarong Diyos nin hustisya. Maugma an gabos na padagos na naghahalat sa saiya.” (NW) Nakakaranga talagang maaraman na mapasensiyang naghahalat si Jehova tanganing resolberan na niya an mga bagay-bagay asin tanganing tawan kita nin nakakaugmang mga asignasyon sa saiyang bagong kinaban.

Pag iniisip-isip ko an mga nagin eksperyensiya mi, nahihiling ko kun paano giniyahan asin binendisyunan ni Jehova an gibuhon sa Ireland! Dakulang pribilehiyo para sakuya na magkaigwa nin dikit na kabtang sa pag-uswag kan gibuhon diyan. Tunay nanggad na kun gigibuhon ta an ipinapagibo ni Jehova, pirmi niya kitang bebendisyunan.