1921—Sanggatos na Taon Na an Nakaagi

“KUN siring, anong partikular na gibuhon an nahihiling niyatong kaipuhan tang marhay na isagibo sa taon na ini?” Iyan an ihinapot kan Watch Tower na Enero 1, 1921, sa entusiyastikong mga Estudyante sa Bibliya. Dangan kinotar kaiyan an Isaias 61:1, 2, na nagpagirumdom sainda kan sugo sainda na maghulit. “Linahidan ako ni Jehova na magpahayag nin maugmang bareta sa mga mahuyo . . . , tanganing ibalangibog an taon nin marahay na buot ni Jehova asin an aldaw nin pamamalos kan satuyang Diyos.”

DAING TAKOT NA MGA PARAHULIT

Tanganing magibo an sugo sainda, kaipuhan kan mga Estudyante sa Bibliya na magin daing takot. Kaipuhan nindang ibalangibog an “maugmang bareta” sa mga mahuyo pati man “an aldaw nin pamamalos” sa mga maraot.

Si Brother J. H. Hoskin, na nakaistar sa Canada, daing takot na naghulit sa ibong nin pagkontra. Kan tigsuli kan 1921, may nabisto siyang ministrong Metodista. Pinunan ni Brother Hoskin an pakikipag-ulay saiya sa pagsabing: “Dapat na magkaigwa kita nin marahay na pag-uulay manungod sa Kasuratan, asin dawa kun magkalain kita sa nagkapirang bagay, puwede kitang mag-uyon na dai magkauyon asin magsuwayan na mag-amigo.” Pero bako iyan an nangyari. Nagigirumduman ni Brother Hoskin: “Pirang minuto pa lang kaming nag-uulay kan hampakon nin makusugon [kan ministro] an pinto kaya paghuna ko magkakaparasa an dakulang salming kaiyan.”

“Ano ta dai ka na lang magduman sa mga bakong Kristiyano asin makipag-ulay sainda?” an kurahaw kan ministro. Dai nagsimbag si Brother Hoskin, pero kan pahali siya, naisip niya, ‘Garo siya na baga idtong pigsasabi niya!’

Kan sunod na aldaw mantang nagsesermon an ministro, nagpadagos an pag-atake niya. “Pinatanidan niya an mga miyembro niya, na ako daa an pinakamaraot na paradaya na nag-abot sa banwang idto asin na dapat akong badilon,” an nagirumduman ni Brother Hoskin. Dai lamang siya nagpaapektar, imbes padagos siyang naghulit asin nagin mapanggana diyan. Sinabi niya: “Naugma talaga akong marhay sa paghulit duman. May mga tawo pa nganing nagsasabi nin makusog, ‘Aram kong lingkod ka nin Diyos!’ asin hinahapot ninda ako kun may maitatabang sinda sako para dai ako magkulang nin ano man.”

PERSONAL ASIN PAMPAMILYANG PAG-ADAL

Para matabangan na umuswag an mga interesado, nagpublikar an mga Estudyante sa Bibliya nin mga programa sa pag-adal sa The Golden Age.a An programang Juvenile Bible Study kompuwesto nin mga hapot na puwedeng ipakipag-ulay kan mga magurang sa saindang mga aki. “Ipapakipag-ulay [kan mga magurang] an mga hapot na ini sa saindang mga aki asin tatabangan an mga ini na hanapon sa Bibliya an simbag.” May mga hapot, arog kan “Pira an libro na yaon sa Bibliya?,” na nagtutukdo nin simpleng mga bagay manungod sa Bibliya. An iba, arog kan “Dapat daw na asahan kan lambang tunay na Kristiyano na mapapaatubang sinda sa persekusyon?,” nag-aandam sa mga aki na magin daing takot na parahulit.

An programang Advanced Studies in the Divine Plan of the Ages nagtao sa maygurang na mga Estudyante sa Bibliya nin nakakapaisip na mga hapot na basado sa inot na volume kan Studies in the Scriptures. Ribo-ribong parabasa an nakinabang sa mga programang ini, pero ipinaisi kan The Golden Age na Disyembre 21, 1921, na ipupundo na an duwang programang ini. Taano ta biglang ipinundo iyan?

SARONG BAGONG LIBRO!

An librong *The Harp of God*

Bookmark na may asignasyon na babasahon

Mga self-quiz na kard

Narealisar kan mga nanginginot na kaipuhan kan bagong mga tinutukduan sa Bibliya na makanuod nin panginot na mga katotoohan sa sistematikong paagi. Para magibo iyan, pig-release kan Nobyembre 1921 an librong The Harp of God. An mga interesado na nag-ako kan libro ipinaenrol man sa The Harp Bible Study Course. An self-study course na ini nakatabang sa mga parabasa na masabutan an “plano nin Diyos na bendisyunan an katawuhan nin daing katapusan na buhay.” Paano isinagibo an self-study course na iyan?

Pag an sarong tawo mag-ako kan libro, tatawan siya nin asignasyon na babasahon na nakaimprenta sa sadit na kard. Sa sunod na semana, tatawan siya nin kard na may nagkapirang hapot na basado sa asignasyon na iyan. Sa bandang hurihan kan kard nakasurat an asignasyon na babasahon para sa sunod na semana.

Kada semana sa laog nin 12 semana, tatawan an tinutukduan nin bagong kard na ipinapadara kan haraning klase, o kongregasyon. Sa parati an nagpapadara kan mga kard iyo an mga tugang sa kongregasyon na may edad na o limitado na an nagigibo dahil sa kamugtakan. Halimbawa, nagirumduman ni Anna K. Gardner na taga Millvale, Pennsylvania, U.S.A.: “Kan i-release an The Harp of God, natawan kaiyan an ate kong si Thayle, na dai na gayong makalakaw, nin mas dakul na trabahong kaya niyang gibuhon. Nagpapadara siya surusemana nin mga kard na may mga hapot.” Pag tapos na an kurso, personal na bibisitahon an tinutukduan para tabangan ining lalo pang makanuod manungod sa Bibliya.

AN GIBUHON NA NASA INUTAN

Sa pagtatapos kan taon, nagpadara si Brother J. F. Rutherford nin surat sa gabos na klase. Sinabi niya na “an ginibong pagpatotoo para sa Kahadian sa taon na ini mas mahiwas saka mas epektibo kisa sa ginibong pagpatotoo sa arin man na taon kan panahon nin pag-ani.” Dangan sinabi niya: “Dakul pa an kaipuhan na gibuhon. Dagkahon an iba na umiba sa marahayon na paglilingkod na ini.” Malinaw na ginibo kan mga Estudyante sa Bibliya an sadol na ini. Durante kan taon 1922, daing takot nindang ipinaisi an Kahadian sa pambihirang paagi.

Daing Takot na mga Amigo

An mga Estudyante sa Bibliya nagpahiling nin pagkamuot na sa-magturugang paagi sa pagtinarabangan. Daing takot sindang mga amigo na “namumundag sa mga panahon nin kasakitan,” arog kan mahihiling sa minasunod na istorya.—Tal. 17:17.

Kan Martes, Mayo 31, 1921, nagpuon an inaapod na Tulsa Race Massacre sa Tulsa, Oklahoma, U.S.A., pagkatapos na ipreso an sarong itom na lalaki asin akusaran nin pag-atake sa sarong puting babayi. Kan atakihon nin sarong sururog na grupo na kompuwesto nin labing 1,000 puting lalaki an sarong mas sadit na grupo nin itom na mga lalaki, marikas na naglakop an iriwal sa Greenwood na mga itom an nakaistar, asin labing 1,400 na harong saka mga establisimiyento diyan an hinabunan saka sinurulo. An opisyal na bilang kan nagadan 36, pero an aktuwal na bilang posibleng ginatos.

Si Brother Richard J. Hill, na sarong itom na Estudyante sa Bibliya asin residente kan Greenwood, nag-istorya kan nangyari: “Kan banggi kan rayot, nagba-Bible study class kami arog kan dati ming ginigibo. Pagkatapos kaiyan, nakadangog kami nin nagbabaradilan sa sentro. Nagpadagos iyan dawa kan nakahigda na kami kan banggi.” Kinaagahan nin Miyerkules, Hunyo 1, naglala pa an sitwasyon. “May mga nagduman samo tapos nagsabi na kun gusto mi nin proteksiyon, mas maray kun magduman na kami sa Convention Hall ora mismo.” Kaya si Brother Hill kaiba an saiyang agom saka mga aki nagdulag pasiring sa Convention Hall kan Tulsa. Diyan, pigkakarkulong 3,000 na itom na lalaki saka babayi an pigpoprotektaran kan National Guard, na isinugo para ibalik an katuninungan.

Kan mga oras man na iyan, si Brother Arthur Claus, na sarong puti, kusog-buot na naggibo nin desisyon. “Kan mabaretaan kong lakop na sa Greenwood an nagrarayot na mga grupo na nanghahabon tapos nangsusulo nin mga harong, nagdesisyon akong dumanan an namumutan kong amigong si Brother Hill.”

Gamit an The Harp of God, tinukduan ni Arthur Claus an sarong klase na may 14 aki

Pag-abot niya sa harong ni Brother Hill, may nahiling siyang sarong puting taga duman na may kapot na riple. An lalaking ini amigo man ni Brother Hill, tapos inisip kaini na saro man si Arthur sa mga nagrarayot. “Ta’no ta yaon ka sa harong niya?” an kurahaw kan lalaki.

“Kun dai niya nagustuhan su simbag ko, binadil niya na gayod ako,” an sabi ni Arthur. “Pigsiyerto ko sa lalaki na amigo ako ni Brother Hill asin na dakul na beses na akong nagbisita sa harong niya.” Naprotektaran ni Arthur saka kan lalaki an pagsadiri ni Brother Hill sa mga parahabon.

Dai nahaloy naaraman ni Arthur na nasa Convention Hall si Brother Hill saka an pamilya kaini. May nagsabi ki Arthur na dai makakahali diyan an mga itom sagkod na mayong pagbuot na pirmado ni Heneral Barrett, an opisyal na namamahala. Inistorya ni Arthur: “Dipisilon magkaigwa nin tsansa na makaulay an heneral. Kan sabihon ko saiya an plano ko, naghapot siya: ‘Poprotektaran mo daw an pamilyang ini saka itatao an mga pangangaipo ninda?’ Siyempre, maugma akong nag-iyo.”

Dahil igwa na siya kan pagbuot, naghidali si Arthur pasiring sa Convention Hall. Pigpahiling niya iyan sa sarong opisyal na makusog na nagsabi: “Pirmado talaga ini ni heneral ah! Aram mo daw na ika an pinakainot na makakapagluwas nin siisay man sa lugar na ini?” Nahanap tulos ninda si Brother Hill saka an pamilya kaini. Nagsurusuan sinda gabos sa lunadan ni Arthur dangan nagpuli na sa harong.

Sinigurado ni Brother Claus na ligtas si Brother Hill saka an pamilya kaini. An halimbawa niya nin kusog nin buot saka pagkamuot na sa-magturugang nagkaigwa nin marahay na epekto sa iba. Inistorya ni Arthur: “An lalaki na nagtabang para protektaran an pagsadiri kan pamilyang Hill mas naparani sa katotoohan. Saka nagkapirang tawo an nagkainteres sa Kahadian dahil nahiling ninda na mayo kitang pagpalain-lain huli sa rasa asin kita gabos na mga lingkod nin Diyos pantay-pantay.”

a An The Golden Age ginibo nang Consolation kan 1937 asin Awake! kan 1946.