Makakanompong daw Kamo nin Katoninongan sa Maribok na Kinaban na Ini?

NABUBUHAY daw kamo na may katoninongan? Para sa dakol, dai an malinaw na simbag. Nabubuhay sinda sa mga lugar na may mga guerra, kariribokan sa politika, etnikong kadahasan, o terorismo. Minsan ngani dai nindo naeeksperyensiahan an siring na mga kalamidad, tibaad mayo kamo nin katoninongan huli sa krimen, pangriribok, asin iriwal kan magkakasosyo sa negosyo o magkataraed. An mga pamilya man sa parate garo pirmeng may guerra imbes na may katoninongan.

An dakol na tawo nagmamawot na magkaigwa nin panglaog na katoninongan. Iyan tibaad hanapon ninda sa relihion, mga seminar dapit sa meditasyon, o mga grupo na nagsasagibo nin yoga. An iba naglalaom na makanompong nin katoninongan sa natural na kapalibotan​—⁠mga pagbakasyon sa ibang lugar, pagbaklay sa kabukidan asin mga kadlagan, o pamamasyar sa mga hot spring o cold spring. Dawa ngani an mga naggigibo kaiyan garo baga nakakanompong man nin panglaog na katoninongan, tibaad dai mahaloy marerealisar ninda na an siring na katoninongan hababaw sana asin dai nagdadanay.

Kaya, saen kamo makakanompong nin tunay na katoninongan? An gikanan nin katoninongan iyo an satong Kaglalang, si Jehova Dios. Taano? Sia an “Dios na nagtatao nin katoninongan.” (Roma 15:33) Sa pamamahala kan saiyang Kahadean na madali nang dumatong, magkakaigwa nin “abundang katoninongan.” (Salmo 72:7; Mateo 6:​9, 10) Ini orog pa nanggad kisa sa basta katoninongan na ibinunga kan pinagkaoroyonan nin mga tawo. Sa parate, an siring na pinagkaoroyonan nakakapaontok sa mga ralaban sa halipot sanang panahon. Alagad hahaleon kan katoninongan nin Dios an gabos na dahelan nin guerra asin iriwal. Sa katunayan, mayo na nin siisay man na mag-aadal nin pakikiguerra. (Salmo 46:​8, 9) Sa katapustapusi, tunay na katoninongan para sa gabos!

Dawa ngani magayon an paglaom na ini, tibaad minamawot pa man giraray nindo na magkaigwa nin katoninongan ngonyan. Igwa daw nin paagi na manompongan an panglaog na katoninongan na makakatabang sa saindo sa maribok na panahon niato? Marahay sana ta ipinapaheling sa sato kan Biblia kun paano niato manonompongan iyan. Estudyare an nagkapirang giya sa ika-4 na kapitulo kan surat ni apostol Pablo sa mga taga Filipos. Puede nindong basahon sa sadiri nindong Biblia an bersikulo 4 sagkod 13.

“An Katoninongan nin Dios”

Sa bersikulo 7 mababasa niato: “An katoninongan nin Dios na minalampas sa gabos na kaisipan mag-iingat sa saindong puso asin sa saindong pag-isip paagi ki Cristo Jesus.” An katoninongan na ini dai makakamtan paagi sa meditasyon o pagpaoswag nin personalidad sana. Imbes, iyan hale sa Dios. An katoninongan na ini mapuersang marhay kaya iyan “minalampas sa gabos na kaisipan.” Siertong nakakalabi nanggad iyan sa gabos niatong kahaditan, kaaraman, asin pangangatanosan. Tibaad sa pagheling niato dai ta na makakaya an satong mga problema, alagad an katoninongan nin Dios makakatao sa sato nin basado sa Bibliang paglaom na maabot an panahon mawawara na an gabos niatong problema.

Imposible daw iyan? Sa tawo iyo; alagad “an gabos na bagay posible sa Dios.” (Marcos 10:27) An pagtubod asin pagtitiwala sa Dios nakakatabang sa sato na makontrol an satong mga kahaditan. Isip-isipa an sarong sadit na aki na nawara sa sarong shopping mall. Siertong aram nia na an dapat nia sanang gibohon iyo na hanapon si Mama nia asin mayo nang problema. Siring kan aking iyan kun sia nahanap na ni Mama nia, makakapagtiwala kita na kukugoson man kita nin Dios, sabi ngani. Tatabangan nia kita asin sa katapustapusi hahaleon nia an gabos na kahaditan niato.

Dakol na parasamba ki Jehova an nakaeksperyensia kan katoninongan nin Dios durante kan pinakagrabeng mga pagbalo. Horophoropon niato an halimbawa ni Nadine, na nagadanan nin omboy na nasa matris pa. Sia nagsabi: “Nasasakitan akong gayo na ipakipag-olay an nasa boot ko, asin pirme kong hinihingoa na dai iparisang apektado ako. Alagad sa boot ko, miserable an pagmate ko. Haros aroaldaw, biyo kong ipinapahayag ki Jehova paagi sa pamibi an nasa boot ko asin nakikimaherak ako na logod tabangan nia ako. Namatean ko an puersa nin pamibi, huling kun mamondoon ako asin naiisip ko na, ‘Dai ko na talaga kaya,’ namamatean ko an panglaog na katrangkilohan asin katoninongan. An pagmate ko protektado asin tiwasay na ako.”

Proteksion sa Saindong Puso Asin Isip

Balikan niato an Filipos 4:⁠7. Sinasabi kaiyan na an katoninongan nin Dios mag-iingat sa satong puso asin pag-isip. Kun paanong nagdadanay an sarong guardia sa saiyang puesto, iniingatan man kan katoninongan nin Dios an satong puso, tanganing dai dian makalaog an materyalistikong kaisipan, dai kinakaipuhan na kahaditan, asin bakong diosnon na paggawe. Horophoropon an sarong halimbawa.

Dakol na tawo sa maribok na kinaban na ini an naniniwala na tanganing magin maogma asin tiwasay, kaipuhan ninda nin dakolon na kuarta asin rogaring. Huli sa sadol nin mga eksperto, tibaad an saindang natipon na kuarta ikapital ninda sa negosyo. Dangan, talaga daw na matoninong na sinda? Dai man. Aroaldaw, puedeng may kahaditan nindang inaaram an kamugtakan kan saindang negosyo, na iniisip-isip kun baga nalulugi o naggaganansia iyan. Kun malugi an negosyo, puedeng mataranta sinda. Tunay nanggad na dai kinokondenar kan Biblia an pangangapital, alagad nagtatao iyan nin marahay na obserbasyon: “An mamomoton sa plata dai makokontento sa plata, ni an siisay man na mamomoton sa kayamanan makokontento sa ginaganar. Ini man daing kamanungdanan. Masiram an torog kan sarong naglilingkod, minsan pa kadikit o dakol an saiyang kinakakan; alagad an abundansia kan mayaman dai sia pinapatorog.”​—⁠Eclesiastes 5:​10, 12.

Sinasabi kan Filipos 4:7 bilang kongklusyon na an katoninongan nin Dios nag-iingat sa satong puso asin pag-isip “paagi ki Cristo Jesus.” Ano an koneksion ni Cristo Jesus sa katoninongan nin Dios? Importanteng marhay an nagin papel ni Jesus sa kaotoban kan katuyohan nin Dios. Itinao ni Jesus an saiyang buhay tanganing makalda kita sa kasalan asin kagadanan. (Juan 3:16) Sia man an nakatukaw na Hade sa Kahadean nin Dios. An pakaaram sa papel ni Jesus nakakakontribwir na marhay sa satong katoninongan nin isip asin puso. Paano nangyari iyan?

Kun kita sinserong nagsosolsol sa satong mga kasalan asin naghahagad nin kapatawadan basado sa atang ni Jesus, an Dios papatawadon kita, na nakakakontribwir sa satong katoninongan nin isip asin puso. (Gibo 3:19) Kun aram niato na dai magigin lubos na maogma an buhay bago an pagdatong kan Kahadean ni Cristo, dai kita magpaparahadit na garo baga iyo na sana ini an buhay. (1 Timoteo 6:19) Siempre, dai kita ligtas sa gabos na problema, alagad mararanga kita sa seguradong paglaom na an pinakamarahay na buhay madali nang mag-abot.

Kun Paano Nindo Manonompongan an Katoninongan nin Dios

Kaya, paano nindo manonompongan an katoninongan nin Dios? May makukua kitang nagkapirang suhestion sa Filipos 4:​4, 5, na dian mababasa niato: “Danay kamong maggayagaya sa Kagurangnan. Sa giraray sasabihon ko, Maggayagaya kamo! Ipaaram nindo sa gabos na tawo an saindong pagkarasonable. An Kagurangnan harani.” Kan isurat ni Pablo an mga tataramon na iyan, sia nakabilanggo sa Roma huli sa bakong makatanosan na dahelan. (Filipos 1:13) Imbes na magmondo sa bakong makatanosan na pagtratar sa saiya, dinagka nia an saiyang mga kapagtubod na danay na maggayagaya sa Kagurangnan. An saiyang kagayagayahan malinaw na nakadepende, bakong sa saiyang mga kamugtakan, kundi sa saiyang relasyon sa Dios. Kita man kaipuhan na makanood na ikaogma an paglilingkod sa Dios ano man an satong mga kamugtakan. Mientras na mas namimidbid niato si Jehova asin mas lubos na ginigibo an kabotan nia, mas maoogma kitang maglingkod sa saiya. Iyan man magtatao sa sato nin pagkakontento asin panglaog na katoninongan.

Dugang pa, nadadagka kita na magin makatanosan. Kun pinapatalubo niato an pagkamakatanosan, dai kita maasa nin sobra sa makakaya niato. Aram niato na kita bakong sangkap; kita dai puedeng magin pinakamatibay sa gabos na bagay. Kaya, taano ta ikakahadit niato kun paano magigin sangkap o, minsan paano, magin mas matibay kisa sa gabos na iba pa? Dugang pa, dai niato aasahan an iba na magin sangkap. Kun siring, makakapagdanay kitang kalmado kun makolgan ninda an satong boot. An saro pang pagkatradusir kan orihinal na Griegong tataramon para sa “pagkamakatanosan” iyo an “pagpahunod.” Kun kita nagpapahunod pag-abot sa mga bagay na depende na sa personal na kagustohan, nakakalikay kita sa mga iriwal; na sa parate mayong pakinabang asin sa laog nin sarong peryodo nin panahon makakahale kan matoninong na relasyon niato sa iba saka kan satong panglaog na katoninongan.

An sunod na mga tataramon sa Filipos 4:5 na “an Kagurangnan harani,” garo baga mayong koneksion. Dai na mahahaloy, an Dios madatong tanganing an daan na sistemang ini nin mga bagay salidahan nin bagong sistema na pamamahalaan kan saiyang Kahadean. Alagad dawa ngonyan, puede siang magin harani sa gabos na minarani sa saiya. (Gibo 17:27; Santiago 4:⁠8) An pakaaram na sia harani nakakatabang sa sato na maggayagaya, magin makatanosan, asin dai maghadit sa mga problema ngonyan o dapit sa ngapit, arog kan ipinapaheling kan bersikulo 6.

Kun sisiyasaton niato an bersikulo 6 asin 7, maaaraman niato na an katoninongan nin Dios direktang resulta nin pamibi. Minamansay nin nagkapira an pamibi na sarong klase sana nin meditasyon, na iniisip na an ano man na klase nin pamibi makakadagdag sa saindang panglaog na pagkakalmado. Minsan siring, an Biblia nagtataram dapit sa tunay na pakikikomunikar ki Jehova, sarong komunikasyon na siring kadayupot kun ipinapahayag nin sarong aki sa saiyang mamomoton na magurang an mga kagayagayahan asin kahaditan nia. Nakakapaginhawa nanggad na maaraman na puede niatong idolok sa Dios an “gabos na bagay.” Ano man an nasa isip niato o kalaoglaogi kan satong puso, ikakapahayag niato iyan sa satong langitnon na Ama.

Dinadagka kita kan bersikulo 8 na magkonsentrar sa positibong mga kaisipan. Minsan siring, bakong igo an basta pag-isip sana nin positibong mga bagay. Arog kan ipinapaliwanag kan bersikulo 9, dapat man niatong isagibo an marahay na sadol kan Biblia. An paggibo kaiyan magtatao sa sato nin malinig na konsensia. Totoo nanggad an talinhaga na: An malinig na konsensia sarong malumoy na ulunan!

Iyo, makakanompong kamo nin panglaog na katoninongan. Iyan hale ki Jehova Dios, na nagtatao kaiyan sa mga minarani sa saiya asin nagmamawot na sunodon an paggiya nia. Paagi sa pagsiyasat sa saiyang Tataramon, an Biblia, magigin pamilyar kamo sa saiyang mga kaisipan. An pag-aplikar kan saiyang mga instruksion bako pirmeng pasil. Alagad bawi man an gabos na paghihingoa huling “mapapasaindo an Dios nin katoninongan.”​—⁠Filipos 4:⁠9.

[Blurb sa pahina 10]

“An katoninongan nin Dios . . . mag-iingat sa saindong puso.”—FILIPOS 4:7

[Blurb sa pahina 12]

Nakakapaginhawa nanggad na maaraman na puede niatong idolok sa Dios an “gabos na bagay”