Pagigin Sadiri ni Jehova—Sarong Dai Na Kutana Maninigong Kabootan
“Sadiri kita ni Jehova.”—ROMA 14:8.
1, 2. (a) Ano an pribilehio niato? (b) Anong mga hapot an pag-oolayan niato?
SARONG mahalagang marhay na pribilehio an itinao sa nasyon nin Israel kan si Jehova magsabi sa sainda: “Kamo sierto nanggad na magigin sakong espesyal na rogaring hale sa gabos na ibang banwaan.” (Ex. 19:5) Ngonyan, an mga miembro kan Kristianong kongregasyon igwa man kan onra nin pagigin sadiri ni Jehova. (1 Ped. 2:9; Kap. 7:9, 14, 15) Iyan sarong pribilehio na puedeng magtao sa sato nin pakinabang sagkod lamang.
2 Apuera sa pagigin sarong pribilehio, an pagigin sadiri ni Jehova saro man na paninimbagan. An nagkapira tibaad maghapot: ‘Kaya ko daw na gibohon an mga inaasahan sa sako ni Jehova? Kun ako magkasala, ako daw isisikwal nia? Mawawara daw an sakong katalingkasan huli sa sakong pagigin sadiri ni Jehova?’ An siring na mga kahaditan maninigong tawan nin atension. Pero, maninigo ngunang maingat na pag-isipan an saro pang hapot: Ano an mga pakinabang huli sa pagigin sadiri ni Jehova?
An Pagigin Sadiri ni Jehova Nagreresulta sa Kaogmahan
3. Paano nakinabang si Rahab sa saiyang desisyon na maglingkod ki Jehova?
3 An mga tawo daw na sadiri ni Jehova nakikinabang sa saindang situwasyon? Estudyare an kamugtakan ni Rahab, sarong patotot na nag-istar sa suanoy na Jerico. Daing duwa-duwa na pinadakula sia tanganing gumibo nin bikong pagsamba sa mga dios nin Canaan. Pero, kan mabaretaan nia an manongod sa mga kapangganahan na itinao ni Jehova sa Israel, narealisar nia na si Jehova an tunay na Dios. Kaya isinapeligro nia an saiyang buhay tanganing protehiran an piniling banwaan nin Dios asin sa siring ipinagkatiwala nia sa sainda an saiyang ngapit. An Biblia nagsasabi: “Bakong si Rahab man na patotot ipinahayag na matanos paagi sa mga gibo, pakatapos na istimaron nia an mga mensahero asin paagihon sinda sa ibang dalan?” (Sant. 2:25) Imahinara an mga pakinabang na nakamtan nia kan sia magin kabtang kan malinig na banwaan nin Dios, sarong banwaan na tinokdoan sa Ley nin Dios dapit sa mga dalan nin pagkamoot asin hustisya. Sierto nanggad na naogma sia na binayaan nia an saiyang dating pamumuhay! Sia nagin agom nin sarong Israelita asin pinadakula an saiyang aki, si Booz, na magin sarong marahayon na lingkod nin Dios.—Jos. 6:25; Rut 2:4-12; Mat. 1:5, 6.
4. Paano nakinabang si Rut sa desisyon nia na maglingkod ki Jehova?
4 Si Rut kan Moab nagdesisyon man na maglingkod ki Jehova. Kan sia aki pa, posibleng sinamba nia si Kemos asin an iba pang dios nin Moab, alagad namidbid nia an tunay na Dios, si Jehova, asin sia nagin agom nin sarong Israelita na nagpaili sa saindang nasyon. (Basahon an Rut 1:1-6.) Sa huri, kan si Rut asin an saiyang bilas, si Orpa, magpoon nang magbaklay pasiring sa Betlehem, kaiba kan saindang panugangan na si Noemi, sinadol ni Noemi an duwang hoben na babaeng iyan na pumuli na sa saindang harong. Dai magigin pasil para sa sainda na mag-istar sa Israel. Si Orpa talagang ‘nagbalik sa saiyang banwaan asin sa saiyang mga dios,’ alagad si Rut dai. Sia naghiro oyon sa saiyang pagtubod asin aram nia kun siisay an gusto nia na magin kagsadiri sa saiya. Sinabi nia ki Noemi: “Dai ka makimaherak sa sako na bayaan taka, na sumuway ako sa saimo; huli ta kun saen ka magduman ako maduman man, asin kun saen ka magtorog duman man ako matorog. An saimong banwaan magigin sakong banwaan, asin an saimong Dios sakong Dios.” (Rut 1:15, 16) Huli sa desisyon ni Rut na maglingkod ki Jehova, nakinabang sia sa Ley nin Dios, na nagtao nin espesyal na probisyon sa mga balo asin sa mga dukha saka mayong sadiring daga. Sa pangangataman ni Jehova, sia nagkaigwa nin kaogmahan, proteksion, asin katiwasayan.
5. Ano an naobserbaran nindo sa mga maimbod na naglilingkod ki Jehova?
5 Tibaad may midbid kamong nagkapirang indibiduwal na, pagkatapos na idusay an saindang sadiri ki Jehova, dakol nang dekada na maimbod na naglilingkod sa saiya. Hapoton sinda kun paano sinda nakinabang sa paglilingkod sa saiya. Minsan ngani mayo nin siisay man na dai nin mga problema, sinusuportaran nanggad kan ebidensia an mga tataramon kan salmista: “Maogma an banwaan na an Dios iyo si Jehova!”—Sal. 144:15.
Rasonableng mga Inaasahan ni Jehova
6. Taano ta dai kita maninigong matakot na tibaad dai niato makayang gibohon an inaasahan sa sato ni Jehova?
6 Tibaad iniisip-isip nindo kun baga kaya nindong gibohon an mga inaasahan sa saindo ni Jehova. Madali sanang madaog nin takot na tibaad dai nindo makayang maglingkod sa Dios, mamuhay kaoyon kan saiyang ley, asin magtaram sa ngaran nia. Halimbawa, namatean ni Moises na kulang an saiyang kakayahan kan sugoon sia na makipag-olay sa mga Israelita asin sa hade kan Egipto. Alagad rasonable an Dios sa mga inasahan nia ki Moises. ‘Itinokdo ni Jehova sa saiya an gigibohon nia.’ (Basahon an Exodo 3:11; 4:1, 10, 13-15.) Huling inako ni Moises an itinaong tabang, naeksperyensiahan nia an kagayagayahan sa paggibo kan kabotan nin Dios. Si Jehova rasonable man sa mga inaasahan nia sa sato. Nasasabotan nia an pagkabakong sangkap niato, asin gusto niang tabangan kita. (Sal. 103:14) An paglilingkod sa Dios bilang parasunod ni Jesus nakakapaginhawa imbes na nakakapagabat, huling an siring na pamumuhay nagtatao nin pakinabang sa iba asin nagpapaogma sa puso ni Jehova. Si Jesus nagsabi: “Madia kamo sa sako, . . . asin papaginhawahon ko kamo. Pasana nindo an sakong sakal asin makanood kamo sa sako, huli ta ako mahoyo asin may kababaan an puso.”—Mat. 11:28, 29.
7. Taano ta makakasarig kamo na tatabangan kamo ni Jehova na gibohon an inaasahan nia sa saindo?
7 Pirmeng itatao ni Jehova an pagparigon sa boot na kaipuhan niato, basta nagsasarig kita sa saiya para sa kosog. Halimbawa, minalataw na si Jeremias bakong pusoan magtaram. Sa siring, kan iasignar sia ni Jehova na magin propeta Nia, si Jeremias nagsabi: “Ah, O Soberanong Kagurangnan na Jehova! Uya dai talaga ako tataong magtaram, huli ta ako aki pa.” Kan huri, sinabi pa ngani nia: “Dai na ako noarin man magtataram pa sa ngaran nia.” (Jer. 1:6; 20:9) Pero, paagi sa pagparigon ni Jehova, ikinahulit ni Jeremias sa laog nin 40 taon an ikinakauyam na mensahe. Paorootro siang pinakosog ni Jehova paagi sa mga tataramon na: “Ako kaiba mo, tanganing iligtas ka asin kaldahon ka.”—Jer. 1:8, 19; 15:20.
8. Paano niato ipinapaheling na kita nagtitiwala ki Jehova?
8 Kun paanong tinabangan ni Jehova si Moises asin Jeremias, puede man nia kitang tabangan na gibohon an mga inaasahan nia sa mga Kristiano ngonyan. An pangenot na makakatabang iyo na magsarig sa Dios. An Biblia nagsasabi: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.” (Tal. 3:5, 6) Ipinapaheling niato na kita nagtitiwala ki Jehova kun inaaprobetsaran niato an tabang na itinatao nia paagi sa saiyang Tataramon asin kongregasyon. Kun tinotogotan niato si Jehova na giyahan an satong mga lakad sa buhay, mayo nin makakaolang sa sato sa pagigin maimbod sa saiya.
Si Jehova Nagmamakolog sa Saiyang mga Lingkod Bilang mga Indibiduwal
9, 10. Anong klaseng proteksion an ipinapanuga kan ika-91 Salmo?
9 Mantang hinohorophorop nin nagkapira an desisyon na idusay an saindang sadiri ki Jehova, puedeng iniisip-isip ninda na tibaad sinda magkasala, magin bakong maninigo, asin isikwal ni Jehova. Marahay sana ta itinatao sa sato ni Jehova an gabos na proteksion na kaipuhan niato tanganing maingatan an satong mahalagang marhay na relasyon sa saiya. Helingon niato kun paano iyan ipinapahayag sa ika-91 Salmo.
10 An salmong iyan nagpopoon: “An siisay man na nag-eerok sa hilom na lugar kan Kaharohalangkawe makakakua nin ontokan sa mismong limpoy kan Makakamhan sa Gabos. Magsasabi ako ki Jehova: ‘Ika an sakuyang pailihan asin an sakuyang kuta, an sakuyang Dios, na sakuyang pagtitiwalaan.’ Huli ta sia mismo magliligtas sa saimo sa silo kan paradakop nin gamgam.” (Sal. 91:1-3) Mangnohon na an Dios nanunuga na poprotehiran an mga namomoot asin nagtitiwala sa saiya. (Basahon an Salmo 91:9, 14.) Anong klaseng proteksion an boot niang sabihon? Bueno, an nagkapira sa mga lingkod ni Jehova kan suanoy prinotehiran nia sa pisikal na paagi—na sa nagkapirang kamugtakan tanganing maingatan an linahe na dian magikan an ipinanugang Mesiyas. Minsan siring, dakol na iba pang maimbod na tawo an ibinilanggo, pinasakitan nin grabe, asin ginadan sa makadiablong paagi tanganing patalikodon sinda sa pagigin maimbod sa Dios. (Heb. 11:34-39) Nagkaigwa sinda kan kinakaipuhan na kosog nin boot na magtagal huling prinotehiran sinda ni Jehova sa espirituwal na paagi tanganing dai maraot an saindang integridad. Kun siring, an ika-91 Salmo puedeng saboton na sarong panuga dapit sa espirituwal na proteksion.
11. Ano an “hilom na lugar kan Kaharohalangkawe,” asin sairisay an yaon dian na pinoprotehiran nin Dios?
11 Sa siring, an “hilom na lugar kan Kaharohalangkawe,” na sinambit kan salmista, sarong piguratibong lugar nin espirituwal na proteksion. Dian, an mga nag-oontok kaiba nin Dios bilang saiyang mga bisita ligtas sa ano man asin sa siisay man na makakaraot kan saindang pagtubod asin pagkamoot sa Dios. (Sal. 15:1, 2; 121:5) Iyan sarong hilom na lugar huli ta dai iyan naaaraman kan mga daing pagtubod. Digdi, pinoprotehiran ni Jehova an saiyang mga lingkod na garo baga nagsasabi: ‘Ika an sakuyang Dios na sakuyang pagtitiwalaan.’ Kun kita nagdadanay sa lugar na ini nin pailihan, dai niato kaipuhan na maghadit nin labi-labi manongod sa pagkawara kan pag-oyon nin Dios paagi sa pagkahulog sa silo ni Satanas, an “paradakop nin gamgam.”
12. Ano an mga nagsasapeligro kan satong relasyon sa Dios?
12 Ano an mga nagsasapeligro kan satong relasyon sa Dios? Sinasambit kan salmista an nagkapirang peligro, na kaiba dian an ‘peste na naglalakaw sa kaduloman, asin an paglaglag na nananamsam sa kaudtohan.’ (Sal. 91:5, 6) Dakol an sinisilo kan “paradakop nin gamgam” paagi sa maimot na pagmawot para sa pagigin independiente. (2 Cor. 11:3) An iba garo man sana dinadakop nia paagi sa pagpalakop nin kahanaban, pagigin orgolyoso, asin materyalismo. An iba pa dinadaya nia paagi sa mga pilosopiya na arog nin patriotismo, ebolusyon, asin falsong relihion. (Col. 2:8) Asin dakol an naakit sa silo nin bawal na seksuwal na pakikidorog. An siring na garo mga damat na nakakaraot sa espirituwal nagin dahelan na mawara an pagkamoot nin minilyon sa Dios.—Basahon an Salmo 91:7-10; Mat. 24:12.
Pagprotehir sa Saindong Pagkamoot sa Dios
13. Paano kita pinoprotehiran ni Jehova sa mga nagsasapeligro kan satong espirituwal na kapakanan?
13 Paano pinoprotehiran ni Jehova an saiyang mga lingkod sa espirituwal na mga peligrong ini? An salmo nagsasabi: “Pagbobotan nia an saiyang sadiring mga anghel may koneksion sa saimo, na bantayan ka sa gabos mong dalan.” (Sal. 91:11) Ginigiyahan asin pinoprotehiran kita kan langitnon na mga anghel tanganing makapaghulit kita kan maogmang bareta. (Kap. 14:6) Apuera sa mga anghel, an Kristianong kamagurangan, paagi sa marigon na pangangapot sa Kasuratan sa saindang pagtotokdo, pinoprotehiran man kita na dai madaya nin falsong pangangatanosan. Puede sindang magtao nin indibiduwal na tabang sa siisay man na maigot na naghihingoang pangganahan an kinabanon na mga paggawe. (Tito 1:9; 1 Ped. 5:2) Siring man, “an maimbod asin mapagmansay na oripon” nagtatao nin espirituwal na kakanon tanganing protehiran kita sa katokdoan nin ebolusyon, pang-aakit nin imoral na mga pagmawot, pagmamaigot na magin mayaman asin prominente, saka dakol pang nakakaraot na pagmawot asin impluwensia. (Mat. 24:45) Ano an nakakatabang sa saindo na labanan an nagkapira sa mga peligrong iyan?
14. Paano niato inaaprobetsaran an proteksion na itinatao nin Dios?
14 Ano an dapat niatong gibohon tanganing magdanay sa “hilom na lugar” nin proteksion nin Dios? Kun paanong dapat na danay niatong protehiran an satong sadiri sa pisikal na mga peligro, arog baga sa mga aksidente, kriminal, o impeksion, dapat man na padagos kitang humiro tanganing protehiran an satong sadiri sa espirituwal na mga peligro. Huli kaini, maninigo niatong regular na aprobetsaran an paggiyang itinatao sa sato ni Jehova sa satong mga publikasyon asin pagtiripon kan kongregasyon saka asamblea. Naghahagad kita nin sadol sa kamagurangan. Asin bako daw na nakikinabang kita sa manglaenlaen na kualidad na ipinapaheling kan satong Kristianong mga tugang? Tunay nanggad na an satong pakikiasosyar sa kongregasyon nakakatabang sa sato na magin madonong.—Tal. 13:20; basahon an 1 Pedro 4:10.
15. Taano ta makakasarig kamo na kaya kamong protehiran ni Jehova sa ano man na puedeng magin dahelan na mawara nindo an saiyang pag-oyon?
15 Mayo kitang dahelan na magduda na kaya kitang protehiran ni Jehova sa ano man na puedeng magin dahelan na mawara niato an saiyang pag-oyon. (Roma 8:38, 39) Pinoprotehiran nia an kongregasyon sa mapuersang mga kaiwal sa relihion asin politika na an pirmeng intension, bako na gadanon kita, kundi isuway kita sa satong banal na Dios. An panuga ni Jehova nagigin totoo: “Ano man na armas na gigibohon tumang sa saimo dai magkakaepekto.”—Isa. 54:17.
Siisay an Nagtatao sa Sato nin Katalingkasan?
16. Taano an kinaban ta dai makakatao sa sato nin katalingkasan?
16 Mawawara daw an satong katalingkasan huli sa satong pagigin sadiri ni Jehova? Sa kabaliktaran, mawawara an satong katalingkasan huli sa satong pagigin sadiri kan kinaban. An kinaban siblag ki Jehova asin pinamamahalaan nin sarong maringis na dios na nang-ooripon sa mga tawo. (Juan 14:30) Halimbawa, ginagamit kan sistema nin mga bagay ni Satanas an kasakitan sa pagbuhay tanganing mawara sa mga tawo an saindang katalingkasan. (Ikomparar an Kapahayagan 13:16, 17.) An kasalan may mapandaya man na puersa na oriponon an mga tawo. (Juan 8:34; Heb. 3:13) Kaya, minsan ngani tibaad nanunuga nin katalingkasan an mga daing pagtubod kun ineengganyar ninda an mga tawo na mamuhay nin kontra sa mga katokdoan ni Jehova, an siisay man na naghihinanyog sa sainda madali nanggad na magigin oripon nin makasalan asin nakakaraot na estilo nin pamumuhay.—Roma 1:24-32.
17. Anong katalingkasan an itinatao sa sato ni Jehova?
17 Sa ibong na lado, papatalingkason kita ni Jehova sa gabos na puedeng makadanyar sa sato kun ipinagkakatiwala niato an satong sadiri sa saiya. Sa nagkapirang paagi, an satong situwasyon siring sa sarong tawo na ipinagkakatiwala an saiyang buhay sa sarong ekspertong siruhano na kaya siang iligtas sa sarong kamugtakan na puede niang ikagadan. Gabos kita nasa kamugtakan na puede niatong ikagadan—an pakamana nin kasalan. Kita makakalaom na makatalingkas sa mga epekto nin kasalan asin mabuhay sagkod lamang solamente kun ipinagkakatiwala niato an satong sadiri ki Jehova, basado sa atang ni Cristo. (Juan 3:36) Kun paanong an satong kompiansa sa sarong siruhano puedeng kumosog mantang naaaraman niato an saiyang reputasyon, magkokosog man an satong pagtitiwala ki Jehova mantang padagos kitang nakakanood manongod sa saiya. Huli kaini, kita padagos na maingat na nag-aadal kan Tataramon nin Dios huling makakatabang iyan sa sato na mamotan sia sa paagi na nahahale an ano man na takot na magin sadiri nia.—1 Juan 4:18.
18. Ano an magigin bunga para sa mga sadiri ni Jehova?
18 Si Jehova nagtatao sa gabos na tawo nin katalingkasan na pumili. An saiyang Tataramon nagsasabi: “Dapat na pilion mo an buhay tanganing makapagpadagos kang mabuhay, ika asin an saimong aki, paagi sa pagkamoot ki Jehova na saimong Dios.” (Deut. 30:19, 20) Gusto niang ipahayag niato an satong pagkamoot sa saiya paagi sa paggibo niato nin sadiring desisyon na maglingkod sa saiya. Imbes na mawara an satong katalingkasan, an satong pagigin sadiri kan Dios na namomotan niato siertong magtatao sa sato nin nagdadanay na kaogmahan.
19. Taano an satong pagigin sadiri ni Jehova ta sarong dai na kutana maninigong kabootan?
19 Bilang mga makasalan, dai kita maninigo na magin sadiri nin sangkap na Dios. Solamenteng an dai na kutana maninigong kabootan nin Dios an nagpapagin posible kaiyan. (2 Tim. 1:9) Huli kaini, si Pablo nagsurat: “Pareho na kun kita mabuhay, nabubuhay kita para ki Jehova, asin kun kita magadan, magagadan kita para ki Jehova. Kun siring, pareho na kun kita mabuhay asin magadan, sadiri kita ni Jehova.” (Roma 14:8) Siertong nungka kitang mabasol sa satong desisyon na magin sadiri ni Jehova.
Ano an Isisimbag Nindo?
• Ano an mga pakinabang kan pagigin sadiri ni Jehova?
• Taano ta kaya niatong gibohon an mga inaasahan sa sato nin Dios?
• Paano si Jehova nagtatao nin proteksion sa saiyang mga lingkod?
[Mga Ritrato sa pahina 8]
Hapoton an iba kun paano sinda nakinabang sa saindang pagigin sadiri ni Jehova
[Ritrato sa pahina 10]
Ano an nagkapirang paagi na si Jehova nagtatao nin proteksion?