Tabangan an mga Aki Nindo na Mapangganahan an Dakol na Kadepisilan

NAEEKSPERYENSIAHAN kan satong mga hoben an grabeng panggigipit. Sinda namemeligro huli sa espiritu kan maraot na kinaban ni Satanas, asin dapat nindang labanan an “mga mawot na konektado sa pagkahoben.” (2 Tim. 2:22; 1 Juan 5:19) Dugang pa, huling nagmamaigot sinda na ‘girumdomon an saindang Kaharohalangkaweng Kaglalang,’ dapat nindang atubangon an pang-oolog-olog—pati an pang-uuyam—kan mga nagkokontra sa saindang mga tinutubod. (Ecl. 12:1) Sa paggirumdom sa panahon kan sia aki pa, an tugang na si Vincent nagsabi: “May pirmeng nang-uuyam, nandadaogdaog, o nang-aangat sa sako huling saro akong Saksi. Dakol na beses na iyan grabe nanggad kaya habo ko nang mag-eskuela kaidto.”a

Apuera sa mga panggigipit kan kinaban, tibaad kaipuhan man na labanan kan satong mga aking lalaki o babae an saindang pagmawot na magin arog kan kairiba ninda. “Bakong pasil an pagigin napapalaen,” an sabi ni Cathleen, sarong 16 anyos na tugang. An 21 anyos na tugang na si Alan nag-admitir, “Sa parate, inaagda ako kan sakong mga kaeskuela na mag-iba sa sainda kun Sabado saka Domingo, asin talagang gusto kong mag-iba.” Dugang pa, puedeng magin makosog an pagmawot nin mga hoben na makikabtang sa mga isport sa eskuelahan, na posibleng magresulta sa maraot na pag-iriba. “Gustohon ko an mga isport,” an sabi kan 19 anyos na si Tanya. “An mga coach sa eskuelahan pirmeng nagmamaigot na isali ako sa team. Depisil na magsayuma.”

Paano nindo matatabangan an saindong mga aki na mapangganahan an dakol na kadepisilan? Pinagbotan ni Jehova an mga magurang na giyahan an mga aki ninda. (Tal. 22:6; Efe. 6:4) An pasohan kan mga magurang na may takot sa Dios iyo na pataluboon sa puso kan saindang mga aki an pagmawot na kuyogon si Jehova. (Tal. 6:20-23) Paagi kaiyan, mamomotibar an mga aki na labanan an mga panggigipit kan kinaban dawa dai sinda naheheling kan saindang mga magurang.

Para sa mga magurang, depisil pagsarabayon an paghanap-buhay, pagpadakula sa mga aki, asin pag-asikaso sa mga aktibidad kan kongregasyon. An nagkapira kaipuhan na gibohon iyan bilang nagsosolong magurang o mantang napapaatubang sa pagkontra nin agom na daing pagtubod. Pero, kahagadan ni Jehova na an mga magurang magtagama nin panahon tanganing suportaran an saindang mga aki. Huli kaini, ano an puede nindong gibohon tanganing tabangan an saindong mga aki na pakosogon an pandepensa ninda sa panggigipit kan kairiba, mga sugot, asin pang-uuyam na napapaatubang sa sainda aroaldaw?

Sarong Personal na Relasyon ki Jehova

Enot sa gabos, an mga aki sa satong mga kongregasyon kaipuhan na mamidbid si Jehova bilang tunay na Persona. Kaipuhan sindang tabangan na ‘maheling an Saro na dai naheheling.’ (Heb. 11:27) Nagigirumdoman ni Vincent, na nasambitan sa enotan, kun paano sia tinabangan kan saiyang mga magurang na magpatalubo nin personal na relasyon ki Jehova. Sia nagsabi: “Itinokdo ninda sa sako an kahalagahan nin pamibi. Nagigirumdoman ko na kan ako akion pa, namimibi ako ki Jehova kada banggi bago magtorog. Para sa sako, tunay si Jehova.” Namimibi daw kamo kaiba kan saindong mga aki? Taano ta dai hinanyogon an mga sinasabi ninda ki Jehova sa saindang personal na mga pamibi? Inoorootro daw sana ninda an saindang sinasabi? O ipinapahayag daw ninda sa saindang mga pamibi kun ano talaga an saboot ninda manongod ki Jehova? Paagi sa paghinanyog sa mga pamibi ninda, puede nindong marisa an saindang pag-oswag sa espirituwal.

An personal na pagbasa sa Tataramon nin Dios saro pang importanteng paagi na an mga hoben mas dumayupot ki Jehova. Si Cathleen, na nasambitan kasubago, nagsabi: “Nakatabang sa sako an pagbasa kan bilog na Biblia mantang ako hoben pa. Iyan nagtao sa sako nin kompiansa na dawa kun tumang sa sako an mga tawo, suportado ako ni Jehova.” May sadiri daw na iskedyul nin pagbasa sa Biblia an saindong mga aki?—Sal. 1:1-3; 77:12.

Totoo, laen-laen an reaksion nin mga aki sa paggiya nin mga magurang. Siring man, an saindang pag-oswag sa espirituwal puedeng depende sa saindang edad. Pero, kun mayo nin paggiya, magigin depisil para sa mga hoben na mamidbid si Jehova bilang tunay na Persona. Dapat na itadom kan mga magurang sa saindang mga aki an mga tataramon nin Dios tanganing si Jehova madangog nin mga aki, sabi ngani, saen man sinda. (Deut. 6:6-9) Dapat na magtubod an saindong mga aki na si Jehova personal na may pagmakolog sa sainda.

Komunikasyon—Kun Paano Iyan Magigin Makahulogan

An komunikasyon saro pang mahalagang marhay na paagi tanganing tabangan an saindong mga aki. Siempre, kalabot sa marahay na komunikasyon bako sanang an pakikipag-olay sa mga aki nindo. Kaiba dian an paghapot asin mapasensiang paghinanyog sa saindang mga simbag—dawa kun iyan laen sa gusto nindong madangog. “Naghahapot ako sagkod na masabotan ko an iniisip ninda asin an mga inaatubang ninda sa saindang buhay,” an sabi ni Anne, na may duwang aking lalaki. Namamatean daw kan saindong mga aki na sinda dinadangog? Si Tanya, na kinotar sa enotan, nagsabi: “An sakong mga magurang talagang naghihinanyog sa sako asin nagigirumdoman an samong mga pag-oolay. Aram ninda an ngaran kan sakong mga kaklase. Sinda naghahapot manongod sa sainda asin sa iba pang situwasyon na napag-olayan mi kan nakaagi.” An paghinanyog asin paggirumdom mahalagang marhay sa mapangganang komunikasyon.

Napatunayan nin dakol na pamilya na an mga oras nin pagkakan marahay na oportunidad para sa makahulogan na komunikasyon. “An pagkakan na magkairibanan importante sa samong pamilya,” an paliwanag ni Vincent. “Kami inaasahan na nasa lamesa kaiba kan pamilya kun posible. Dai itinotogot an pagheling nin programa sa telebisyon, pagdangog sa radyo, o pagbasa kun nagkakakan. Mantang sa parate bako man na seryoso an orolay, nagigin trangkilo an kada aldaw na nakakatabang sa sako na atubangon an mga tension asin panggigipit sa eskuelahan.” Sinabi pa nia: “An pagigin tuod na makipag-olay sa sakong mga magurang sa mga oras nin pagkakan nakatabang man sa sako na magin komportable sa pakikipag-olay sa sainda kun kaipuhan ko nin tabang sa mas seryosong mga bagay.”

Hapoton an saimong sadiri, ‘Gurano daw kaparate kada semana na kami iribang nagkakakan bilang pamilya?’ Puede ka daw gumibo nin mga pagbabago sa bagay na ini na magtatao sa saimo nin oportunidad na orog na makikomunikar sa saimong mga aki asin paoswagon iyan?

Kun Taano ta Mahalagang Marhay an mga Pag-ensayo

An semanal na banggi nin Pampamilyang Pagsamba nakakaengganyar man nin makahulogan na pag-orolay asin nakakatabang sa mga hoben na atubangon an espesipikong mga problema. Si Alan, na nasambitan kasubago, nagsabi: “Ginagamit kan sakong mga magurang an panahon nin Pampamilyang Pagsamba tanganing engganyaron kami na sabihon an nasa boot mi. Ipinapakipag-olay ninda an mga tema na may koneksion sa mga inaatubang mi.” An ina ni Alan nagsabi: “Ginagamit niamo an sarong kabtang kan pag-adal para sa mga pag-ensayo. An mga pag-ensayong ini nakakatabang sa samong mga aki na makanood kun paano idepensa an saindang pagtubod asin patunayan na totoo an tinutubod ninda. Ini nagtatao sa sainda kan kompiansang kaipuhan ninda tanganing mapangganahan an mga kadepisilan na napapaatubang sa sainda.”

Tunay nanggad, kun an mga aki napapaatubang sa panggigipit nin kairiba, sa parate an kaipuhan nindang gibohon bako sanang magsayuma asin maghale. Dapat nindang masimbag an mga hapot na arog baga kan taano asin taano ta dai puede. Kaipuhan man nindang magkaigwa nin kompiansa sa kun ano an gigibohon ninda kun sinda inoolog-olog huli sa saindang pagtubod. Kun dai ninda kayang idepensa an saindang mga tinutubod, magigin masakit para sa sainda na pusoan na manindogan para sa tunay na pagsamba. An mga pag-ensayo makakatabang na pataluboon an kompiansang iyan.

Nakalista sa kahon na nasa pahina 18 an nagkapirang eksena na puedeng iakto durante kan banggi nin Pampamilyang Pagsamba nindo. Gibohon na realistiko an mga pag-ensayong ini paagi sa pagkuestion sa mga simbag kan mga aki nindo. Kaiba sa siring na mga pag-ensayo, pag-olayan an nagkapira sa praktikal na mga leksion na manonodan sa mga halimbawa sa Biblia. Daing duda na an siring na pagsasanay sa harong aandamon an saindong mga aki na mapangganahan an mga kadepisilan sa eskuelahan asin sa iba pang lugar.

Harong—Sarong Tiwasay na Lugar?

An harong daw nindo an klase nin lugar na gustong-gustong pulian kan saindong mga aki pagkaretira ninda sa eskuelahan kada aldaw? Kun iyan sarong tiwasay na lugar, makakatabang iyan sa saindong mga aki na atubangon an mga kadepisilan sa aroaldaw. An sarong tugang na babae, na miembro ngonyan nin pamilyang Bethel, nagsabi: “Kan ako aki pa, an saro sa pinakaimportanteng mga bagay para sa sako iyo na an samong harong sarong tiwasay na lugar. Gurano man karaot kan situwasyon sa eskuelahan, aram ko na pagpuli ko, magigin marahay an gabos na bagay.” Ano an situwasyon sa saindong harong? Iyan daw lugar na pirmeng may “mga pagputok nin kaanggotan, mga pasuruhay, [asin] pagkabaranga,” o iyan daw parateng may “pagkamoot, kagayagayahan, [asin] katoninongan”? (Gal. 5:19-23) Kun parateng mayo nin katoninongan, pinagmamaigotan daw nindong marhay na aramon kun anong mga pagbabago an kaipuhan tanganing an saindong harong magin sarong tiwasay na lugar para sa saindong mga aki?

An saro pang paagi tanganing matabangan an saindong mga aki na mapangganahan an mga kadepisilan iyo na kamo na an mag-enot sa pagtao nin nakakapakosog na asosasyon para sa sainda. Halimbawa, puede daw nindong iiba sa saindong mga pag-aling-aling bilang pamilya an nagkapirang tugang sa kongregasyon na espirituwal an kaisipan? O puede daw kamong mag-areglo sa saindong harong nin simpleng pagkakan tanganing makaiba an nagbibiaheng paraataman o iba pang nasa bilog na panahon na paglilingkod? May midbid daw kamong mga misyonero o Bethelite na puedeng magin katood kan saindong mga aki, dawa kun paagi sana sa pagsurat, pag-e-mail, o paminsanminsan na pag-apod sa telepono? An siring na mga relasyon makakatabang sa saindong mga aki na lumakaw sa tanos na mga dalan asin magkaigwa nin espirituwal na mga pasohan. Isip-isipa an nagin marahay na impluwensia ni apostol Pablo sa hoben na si Timoteo. (2 Tim. 1:13; 3:10) An dayupot na pakikiasosyar ni Pablo sa saiya nakatabang ki Timoteo na papagdanayon an saiyang isip na nakakonsentrar sa espirituwal na mga pasohan.—1 Cor. 4:17.

Tawan nin Komendasyon an mga Aki Nindo

Naoogma si Jehova na maheling an mga hoben na naninindogan sa kun ano an tama sa ibong kan mga panggigipit kan kinaban ni Satanas. (Sal. 147:11; Tal. 27:11) Mayong duda na naggagayagaya man kamong maheling an satong mga hoben na nagpipili kan madonong na dalan. (Tal. 10:1) Ipaaram sa saindong mga aki kun ano an namamatean nindo manongod sa sainda, asin pirmeng tawan sinda nin mamomoton na komendasyon. Nagpaheling si Jehova nin marahay na halimbawa para sa mga magurang. Kan si Jesus bautismohan, si Jehova nagsabi: “Ika an sakong Aki, an namomotan; inoyonan taka.” (Mar. 1:11) An pag-asegurar kan saiyang Ama nakapakosog nanggad ki Jesus sa dakol na kadepisilan na aatubangon nia! Kaagid kaiyan, ipaaram sa saindong mga aki na namomotan nindo sinda, asin apresyaron an mga nagigibo ninda.

Totoo, dai nindo lubos na mapoprotehiran an saindong mga aki sa mga panggigipit, pang-uuyam, asin pang-oolog-olog. Pero, kadakol kamong magigibo tanganing tabangan sinda. Sa anong mga paagi? Tabangan sindang magpatalubo nin personal na relasyon ki Jehova. Gumibo nin paagi na nakakapukaw nin makahulogan na pag-orolay. Gibohon na praktikal an banggi nin Pampamilyang Pagsamba, asin gibohon an saindong harong na sarong tiwasay na lugar. Paagi sa paggibo kaiyan, daing duda na aandamon nindo an saindong mga aki na mapangganahan an dakol na kadepisilan.

[Nota sa Ibaba]

[Kahon/Ritrato sa pahina 18]

MAKAKATABANG AN MGA PAG-ENSAYO

Uya an nagkapirang halimbawa nin mga situwasyon na napapaatubang sa satong mga hoben. Taano ta dai ensayohon an nagkapira sa mga eksenang ini durante kan mga banggi nin Pampamilyang Pagsamba nindo?

▸ An sarong coach kinakaolay an saindong aking babae na sumali sa team nin isport sa eskuelahan.

▸ Inaalokan nin sigarilyo an saindong aking lalaki mantang papuli sia hale sa eskuelahan.

▸ Hinuhuma nin nagkapirang aking lalaki na kokolgan an saindong aking lalaki kun sia maheling ninda na naghuhulit giraray.

▸ Mantang naghaharongharong an saindong aking babae, may nanuparan siang kaeskuela.

▸ Sa atubangan kan klase, hinahapot an saindong aking babae kun taano ta dai sia nagsasaludo sa bandera.

▸ Sarong aking lalaki an daing ontok na nag-oolog-olog sa saindong aking lalaki huli sa pagigin Saksi.

[Ritrato sa pahina 17]

May sadiri daw na iskedyul nin pagbasa sa Biblia an saindong mga aki?

[Ritrato sa pahina 19]

Iiniiba daw nindo sa saindong mga pag-aling-aling an mga tugang na espirituwal an kaisipan?