Andam Na daw an Saindong mga Aki?

1. Taano ta dapat na magin andam an mga aking nag-eeskuela?

¹ Ereskuelahan na naman. Daing duda na napapaatubang sa bagong mga kadepisilan asin panggigipit an saindong mga aki. Igwa man sinda nin bagong mga oportunidad na “magpatotoo kan katotoohan.” (Juan 18:37) Andam na daw sinda?

2. Tanganing magin andam, ano an dapat na maaraman kan saindong mga aki?

² Malinaw daw na nasasabotan kan saindong mga aki kun anong mga aktibidad an konektado sa nasyonalistikong mga seremonya saka paganong mga kapiestahan, asin kun taano ta sala an pakikikabtang dian? Andam na daw sinda sa panggigipit na kumua nin halangkaw na edukasyon, makipag-date, asin uminom nin inomon na de alkohol o magdroga? Sasabihon sana daw ninda na bawal sa relihion ninda an sarong kuestionableng aktibidad, o aram daw ninda kun paano ipapaliwanag an saindang mga tinutubod?—1 Ped. 3:15.

3. Paano puedeng gamiton nin mga magurang an banggi nin Pampamilyang Pagsamba tanganing andamon an saindang mga aki?

³ Gamiton an Banggi nin Pampamilyang Pagsamba: Siempre, sa bilog na taon nin pag-eskuela, posibleng marhay na mag-oorolay kamo kun magkaigwa nin mga problema. An espesyal na paghihingoa nindo ngonyan pa sana tanganing pag-olayan an mga bagay na may koneksion sa pag-eskuela matao nin kompiansa sa saindong mga aki. Taano ta dai gamiton an saro o nagkapirang banggi nin Pampamilyang Pagsamba sa katuyohan na ini? Puede nindong hapoton an saindong mga aki kun ano an pangenot na ikinakahadit ninda ngonyan na ereskuelahan. Mantang an mga aki darakula na asin nag-oswag na sa pakasabot, puede nindong repasohon an napag-orolayan nindo kan nakaaging mga taon. (Sal. 119:95) Puede nindong iiba an mga pag-ensayo na nag-aakto kamong maestra, guidance counselor, o kapwa estudyante. Tokdoan an saindong mga aki kun paano masimbag gamit an Biblia asin kun paano gagamiton an mga kasangkapan siring kan librong Reasoning asin mga librong Young People Ask. An sarong magurang naggamit nin mga pag-ensayo tanganing andamon an saiyang mga aki na kaolayon an bagong mga maestra ninda kada ereskuelahan asin ipaaram sa sainda na sinda mga Saksi ni Jehova.—Helingon an Torrengbantayan na Disyembre 15, 2010, pahina 3-5.

4. Ano an gigibohon nin madonong na mga magurang?

⁴ An mga kadepisilan na kaipuhan atubangon ngonyan nin Kristianong mga hoben orog na nagigin masakit pakibagayan o ‘nakakahandal.’ (2 Tim. 3:1) Pagmamaigotan na antisiparon nin madonong na mga magurang an mga ini. (Tal. 22:3) Durante kan taon na ini nin pag-eskuela, gibohon an bilog nindong makakaya na tabangan an saindong mga aki na magin andam.