Andam daw Kamong Magpatotoo sa Eskuelahan?

1. Anong mga oportunidad an naghahalat sa saindo mantang nag-eeskuela kamo?

¹ Baga man ini an enot na taon nindo o saro na naman na taon sa pag-eskuela, kamong hoben na mga Kristiano napapaatubang sa bagong mga kadepisilan asin panggigipit. Alagad kamo igwa man nin bagong mga oportunidad na “magpatotoo sa katotoohan.” (Juan 18:37) Andam daw kamong marhay na magpatotoo?

2. Anong pagsasanay an matabang sa saindo na atubangon an mga kadepisilan na naeeksperyensiahan nindo sa eskuelahan?

² Tanganing tabangan kamo na makapanggana sa lambang aspekto nin buhay, dakol na pagsasanay an itinatao sa saindo hale ki Jehova, hale sa saindong mga magurang, saka hale sa maimbod asin mapagmansay na oripon. (Tal. 1:8; 6:20; 23:23-25; Efe. 6:1-4; 2 Tim. 3:16, 17) Paagi sa diosnon na pagsasanay asin kaaraman dapit sa mga kadepisilan na aroaldaw na napapaatubang sa saindo sa eskuelahan, andamon an saindong sadiri na magpatotoo. (Tal. 22:3) Pag-isipan na marhay an instruksion asin nakakatabang na sono sa Kasuratan na mga suhestion na yaon sa duwang tomo kan Young People Ask saka sa mga artikulong may koneksion dian na regular na ipinupublikar sa Awake!

3. Sa anong mga paagi kamo makakapagpatotoo?

³ An napapalaen na teritoryo nindo nagtatao sa saindo nin oportunidad na makapagpatotoo sa dakol na paagi. Kun naoobserbaran kan iba an saindong arogan na gubing asin pagpakarhay sa sadiri, an saindong paggawe asin pagtaram, an saindong pagigin magalang sa mga kaklase asin maestra nindo, pati an saindong mga marka, saka kun naririsa ninda na igwa kamo nin masarig na pundasyon sa buhay, an nagkapira tibaad maghapot, “Taano ta napapalaen kamong marhay?” (Mal. 3:18; Juan 15:19) Tibaad mabuksan sa saindo an oportunidad na makapagpatotoo asin ipaliwanag an saindong makosog na mga paniniwala. (1 Tim. 2:9, 10) Sa bilog na taon, posibleng marhay na mapaatubang kamo sa mga kadepisilan siring baga kan nasyonalistikong mga seremonya asin kapiestahan. Kun hapoton kamo kun taano ta dai kamo nakikikabtang dian, sasabihon sana daw nindo na, “Bawal iyan sa relihion ko; Saro ako sa mga Saksi ni Jehova,” o, aaprobetsaran daw nindo an oportunidad na ini na magpatotoo manongod sa saindong mamomoton na Ama, si Jehova? An marahay na pag-andam paagi sa paggiya ni Jehova gigibohon kamong andam na magtao nin marahay na patotoo sa mga maestra, kaeskuela, asin iba pa.—1 Ped. 3:15.

4. Taano ta may kompiansa kamo na puede kamong magin mapanggana sa pagpapatotoo?

⁴ Minsan ngani tibaad medyo nahahandal kamo manongod sa kadepisilan na magpatotoo sa eskuelahan, girumdomon na maoogma si Jehova kun naghihingoa kamo. Nakikigayagaya kami sa saindo sa oportunidad nindo na magpatotoo sa iba sa napapalaen na teritoryo nindo. Kun siring, magin makosog an boot asin andam na magpatotoo mantang nasa eskuelahan!