Mga Hoben—Aprobetsaran an Saindong Pag-eskuela
1 Ano an saboot nindo dapit sa saindong pag-eskuela ngonyan na kamo minaentra na sa ikatolong bulan kan klase sa taon na ini? Pinagmamaigotan daw nindong makinabang sa edukasyon na iyan? Inaaprobetsaran daw nindo an mga oportunidad na itinatao sa saindo kan eskuelahan na ihiras an katotoohan sa saindong mga kaklase asin paratokdo? Kompiado kami na boot nindong gibohon an pinakamakakaya nindo sa eskuelahan.
2 Magin Marahay na Estudyante: Kun kamo andam na marhay paglaog nindo sa saindong mga klase asin nag-aatentong marhay, magkakamit kamo nin nagdadanay na mga pakinabang. Magin mahigos sa pag-asikaso sa saindong mga leksion na pag-aadalan, alagad dai pagtogotan an saindong mga leksion na makaolang sa teokratikong mga aktibidad.—Fil. 1:10.
3 Kun dai pa nindo nagigibo iyan, basahon an brosyur na Jehovah’s Witnesses and Education. Dangan, maninigo na tawan nindo o kan saindong mga magurang nin sarong kopya an kada saro sa saindong mga paratokdo. Ipaaram sa sainda na masisimbag an ano man na mga hapot ninda. Matabang ini sa sainda na orog na masabotan an saindong mga prinsipyo asin paniniwala patin makikooperar sa saindo mantang iinaaplikar nindo an itinokdo sa saindo. Sisiertohon man kaiyan sa saindong mga paratokdo na kamo asin an saindong mga magurang boot na makikooperar sa sainda mantang tinatabangan ninda kamong magkamit nin mahalagang marhay na edukasyon.
4 Magin Marahay na Saksi: Taano ta dai mansayon an eskuelahan bilang personal nindong teritoryo para sa impormal na pagpapatotoo? Sa maabot na taon nin klase, magkakaigwa kamo nin napapalaen na mga oportunidad na makapatotoo. Igwa kamo nin makangangalas na espirituwal na kaaraman na kun ihihiras, puedeng ‘iligtas kapwa an saindo man sana asin idtong mga naghihinanyog sa saindo.’ (1 Tim. 4:16) Paagi sa pagmantener nin arogan na Kristianong gawe-gawe asin paagi sa pagpapatotoo kun angay na gibohon iyan, makikinabang kamo mismo asin an iba.
5 An sarong hoben na tugang na lalaki impormal na nagpatotoo sa mga kapwa estudyante sa saiyang eskuelahan. Kabilang sa mga naghimate an sarong Katoliko, sarong ateista na dating nag-oolog-olog sa mga naniniwala sa Dios, asin sarong hoben na sugsug na parasigarilyo asin makosog na parainom. Gabos-gabos, natabangan kan hoben na tugang na lalaking ini an 15 sa saiyang kairiba pasiring sa pagdusay asin bautismo!
6 Kaya mga hoben, magmahigos kamo sa pag-adal asin sa paghuhulit sa napapalaen na teritoryo nindo. Dangan makakamtan nindo an pinakadakulang pakinabang sa pag-eskuela.