Kumusta an Pag-eskuwela kan Saindong mga Aki?
1 Ngonyan na haloy-haloy nang naglaog sa eskuwelahan an satong mga aki, kumusta an pag-atubang ninda sa angat na maglingkod ki Jehova sa irarom nin mga pagbalo sa saindang integridad? Paano nindo mga magurang maparirigon an saindong mga aki para sa mga pagbalong inaatubang ninda?
GAMITON AN PULYETONG SCHOOL
2 An pulyetong School sinadya tanganing malinaw na iatubang sa mga maestro an mga tinutubod asin iginagawe nin mga Saksi ni Jehova kun dapit sa mga aktibidad sa eskuwelahan. Iyan nagtatao man nin giya sa sararong paninindogan nin mga Saksi ni Jehova mapadapit sa moral na gawe.
3 Para sa dakol na aki nagin dakulang proteksion an pulyetong ini. Halimbawa, naaraman nin sarong magurang na Saksi na may mga diskurso sa edukasyon sa sekso na itatao sa mga estudyante nin mga tawong may hababang moral. Kapot an pulyeto, ipinaliwanag kan magurang an saiyang mga pagkontra asin ipinaliwat an klase kan saiyang aking babae.
4 Dakula an magigibo nin mga magurang na tabangan an saindang mga aki na “sumimbag sa lambang” maghapot sainda. (1 Ped. 3:15) Sa pirang kaso an mga magurang nag-iiskedyul nin pagsongko sa eskuwelahan sa panapanahon tanganing kaolayon an maestro. An siring na personal na interes nagpapakosog sa bogkos kan magurang asin aki. An iba nag-atender pa ngani sa klase kun ini itinotogot.
MAGIN SAKSI AROALDAW
5 An sarong aking Saksi sa Colorado nagpatabang sa saiyang maestra sa masakit na mga termino kun binabasa an Pagsiyasat sa Kasuratan Aroaldaw kada aldaw. Sarong aldaw narisa nia na nawawara an saiyang pulyeto. “Sinubli” iyan kan saiyang maestra kan sia magpuli nin amay huli sa helang. Habo niang mapaltahan an pagbasa sa teksto.
6 An positibong punto-de-vista kaiba an maimbod na pag-andam makatatabang kapwa sa mga magurang asin aki na ‘pasarigon an saindang isip para sa gibohon’ sa panahon kan taon nin pag-eskuwela.—1 Ped. 1:13.