Magin Andam sa Espirituwal sa Eskuwelahan
1 An dakol sa satong Kristianong mga hobenes nag-aadal sa kinabanon na mga eskuwelahan. Ano an makatatabang sainda na kamtan an pinakadakula sa saindang pag-eskuwela mantang nagtatao nin marahay na arogan sa diosnon na gawe asin pagpapadanay sa integridad? Kan mapaatubang sa sekular na edukasyon, si Daniel asin an tolo niang kairibang tin-edyer naggibo nin maigot na pag-andam. An saindang ‘determinasyon sa puso’ na magdanay sa integridad nagdara sa sainda kan pag-oyon ni Jehova. An kaparehong determinasyon na magmaimbod ki Jehova mantang nasa eskuwelahan magdadara nin mga balos sa Kristianong mga hobenes ngonyan.—Dan. 1:8, 17; Tal. 10:22.
REPASOHON AN PULYETONG SCHOOL
2 Sa panapanahon maninigong repasohon kan mga magurang sa saindang mga aki an pulyetong School. Gumibo nin mga areglo na matawan nin kopya an mga maestro. An ibang hobenes puwedeng personal na itao an pulyeto sa saindang mga maestro. Kun may minalataw na mga situwasyon sa eskuwelahan, maninigong repasohon nin mga magurang asin aki an angay na mga kabtang kan pulyeto bago gumibo nin ultimong desisyon.—Fil. 1:10.
3 An kamagurangan makatatabang man sa mga hobenes na magin andam sa espirituwal. An mga nangengenot sa pag-adal sa libro puwedeng kumustahon an mga magurang asin hobenes tanganing maaraman kun kaipuhan an tabang. An dakol na kamagurangan nagpapaheling nin interes sa Kristianong gawe asin grado nin mga aki, kaya nakatatao nin praktikal na tabang siring sa kinakaipuhan. An odok sa pusong pagmakolog na iyan nin kamagurangan kan kongregasyon puwedeng magin “nakapakokosog na tabang” sa mga aki.—Col. 4:11, 12.
4 Mga hobenes, andam daw kamong suportaran an Kristianong mga prinsipyo sa eskuwelahan? An paggibo nindo kaiyan magtatao nin pakinabang bako sanang sa saindo asin sa ibang hobenes na Saksi sa saindong eskuwelahan kundi siring man an mga masurunod sa saindo sa maabot na mga taon. Mapaglalabanan daw nindo an impluwensia nin mga kaedad na nagtutulod saindo na gumibo nin sala? Kamo daw mapusong makapagpapadanay nin Kristianong neutralidad, dawa sa atubang nin pagtuya? Andam daw kamong gamiton an pulyetong School asin an librong Reasoning sa pagpaliwanag kan saindong basado sa Bibliang punto-de-vista manongod sa mga kapiyestahan asin kinabanon na mga selebrasyon? An mga pag-aling-aling daw makadadara saindo sa siod nin maraot na pag-iriba? Baga man nabasa na nindo kaidto o dai pa an pulyetong School, repasohon iyan ngonyan asin ‘desisyonan sa saindong puso’ an gigibohon nindo. Kun gigibohon nindo ini, an saindong hiro magigin kapareho kan marahay na gawe nin ibang maimbod na Saksi sa eskuwelahan.
5 Paagi sa pagpamidbid na kamo saro sa mga Saksi ni Jehova maiingatan kamo tumang sa maraot na mga impluwensia sa eskuwelahan. Aprobetsaran an mga oportunidad na magpatotoo sa impormal. Sa paaging ini kamo magdadanay na andam sa espirituwal mantang nasa eskuwelahan. Bendisyonan logod ni Jehova an saindong kaimbodan sa bagay na ini.