Aprobetsaran an Pag-eskuela
1 An satong mga hoben labi nang duwang bulan ngonyan sa eskuelahan. Maski ngani tibaad igwa nin nagkapirang angat asin kahaditan na konektado sa pagbalik sa eskuelahan, igwa man nin dakol na pakinabang na makukua an mga hoben na nagmamahigos tanganing aprobetsaran an saindang edukasyon.
2 An marahay na pundamental na edukasyon makakokontribwir sa espirituwal na pag-oswag nin saro. An ginigibo nin saro durante kan saiyang pagkahoben igwa nin dakulang epekto sa kun ano an magigibo nia bilang adulto. Dawa pa kun manongod sa pag-eskuela, “an ano man na itinatanom nin tawo, iyan man sana an saiyang aanihon.” (Gal. 6:7) An mga hoben na mahigos na nag-aadal kan saindang mga leksion sa eskuelahan puedeng magkaigwa nin mga abilidad na pangyayarihon sindang mas kapakipakinabang para ki Jehova.
3 Kaipuhan an maingat na pagplano tanganing makapili nin tamang mga kurso sa eskuelahan. Maninigong tabangan nin mga magurang an saindang mga aki na pilion an mga nagtatao kan pinakapraktikal na pagsasanay tanganing maabot an espirituwal na mga pasohan sa buhay. Paagi sa pagpatalubo kan saindang mga abilidad, magkakabentaha an mga hoben na suportaran an saindang sadiri sa pagpapayunir. An saindang pundamental na edukasyon maninigong makatabang sa sainda na omawon si Jehova saen man sinda naglilingkod.
4 Mga hoben, pagmaigotan na aprobetsaran an mga taon kan saindong pag-eskuela. Sa paggibo kaiyan, magkonsentrar sa pagkaigwa nin makahulogan asin nakakokontentong pamumuhay sa sagradong paglilingkod, imbes na sa pagmamaigot na makamtan an sarong kinabanon na karera. Maghingoang gamiton an saindong buhay sa paggibo kan kabotan ni Jehova. Paagi kaiyan, gigibohon nindong mapanggana an saindong dalan, sa kaomawan ni Jehova.—Sal. 1:3.