Sekular na Edukasyon Asin an Saimong Espirituwal na mga Pasohan
1 An pagkua nin marahay na pundamental na edukasyon kun ika hoben pa makatatao kan akademikong mga abilidad na kaipuhan tangani na ika makabasa asin makasurat nin marhay asin magkaigwa nin pankagabsan na pakasabot manongod sa geograpiya, kasaysayan, matematika, asin siensia. Mantang ginigibo iyan, makanonood man ika kun paano mag-isip nin malinaw, mag-analisar nin mga detalye, magresolber nin mga problema, asin magpaluwas nin mabungang mga ideya. An siring na pag-eskuela mapakikinabangan mong marhay sa bilog mong buhay. Paano an saimong sekular na edukasyon magigin konektado sa saimong espirituwal na mga pasohan sa buhay asin makatatabang sa saimo na magkamit nin “praktikal na kadonongan asin kakayahan nin pag-iisip”?—Tal. 3:21, 22.
2 Magin Kapakipakinabang sa Paglilingkod sa Dios: Mientras na ika nag-eeskuela, mag-atento sa klase asin gibohon nin marhay an saimong mga leksion na pag-aadalan. Kun magin tuodan na kamo sa pagbasa asin pag-adal, mas pasil na masisiyasat mo an Tataramon nin Dios asin mapagdadanay an saimong sadiri na makosog sa espirituwal. (Gibo 17:11) An kompletong kaaraman makatatabang sa saimo na makapakipag-olay sa mga tawo na manlaenlaen an pinaghalean, intereses, asin paniniwala kun nanonompongan mo sinda sa ministeryo. An edukasyon na nakukua mo sa eskuelahan magigin kapakipakinabang mantang ginigibo mo an saimong Kristianong mga paninimbagan sa organisasyon nin Dios.—Ikomparar an 2 Timoteo 2:21; 4:11.
3 Makanood na Suportaran an Saimong Sadiri: Kun ika magmamaigot, puede mo man na manodan an mga abilidad na kaipuhan sa paghanap-buhay pagkagradwar. (Ikomparar an 1 Timoteo 5:8.) Pilion nin maingat an saimong mga leksion. Imbes na magkonsentrar sa sarong langtad na limitado an mga oportunidad na makakua nin empleyo, estudyaran an pag-adal nin sarong hanap-buhay o abilidad na magpapangyari sa saimo na makakua nin angay na trabaho saen man. (Tal. 22:29) An siring na pagsasanay magpapangyaring magin posible na masustentohan mo an saimong sadiri kun halimbawang magdesisyon kang maglingkod kun saen mas dakula an pangangaipo.—Ikomparar an Gibo 18:1-4.
4 An pagkua nin marahay na pundamental na edukasyon mientras na nag-eeskuela makatatabang sa saimo na mapahiwas an saimong ministeryo. Magmaigot na magkaigwa nin mga abilidad na kaipuhan sa pagsustento sa saimong sadiri mientras na ika nag-ooswag sa paglilingkod ki Jehova. Sa siring an saimong pag-eskuela matabang sa saimo sa pag-aabot sa saimong espirituwal na mga pasohan.