Dai Mag-alangan
1. Ano an nangangaipo nin kosog nin boot, asin taano?
1 Nag-alangan na daw kamong magpatotoo sa eskuelahan huling natakot kamong tuyatuyaon? Nangangaipo nanggad nin kosog nin boot na magtaram, nangorogna kun masusupgon kamo. Ano an makakatabang sa saindo?
2. Paano an marahay na paghusgar kalabot sa pagpapatotoo sa eskuelahan?
2 Gumamit nin Marahay na Paghusgar: Minsan ngani tama sanang mansayon an eskuelahan bilang an saindong personal na teritoryo, girumdomon na dai man kamo inaasahan na magpoon nin espirituwal na mga pakikipag-olay sa gabos arog kan ginigibo nindo kun naghuhulit sa harong-harong. Gumamit nin marahay na paghusgar tanganing madeterminaran kun noarin mataram. (Par. 3:1, 7) An leksion sa klase o assignment sa eskuelahan puedeng magtao sa saindo nin oportunidad na ipahayag an saindong pagtubod. O tibaad hapoton kamo kan saindong kapwa estudyante kun taano ta dai kamo nagpapartisipar sa nagkapirang aktibidad. Sa kapinonan kan ereskuelahan, inimpormaran nin nagkapirang Kristiano an saindang mga maestra na sinda Mga Saksi ni Jehova asin tinawan an mga maestra nin babasahon na nagpapaliwanag kan satong mga tinutubod. An iba nagwalat nin babasahon sa lamesa ninda tanganing mapahiro an saindang mga kaeskuela na maghapot.
3. Paano kamo makakapag-andam na magpatotoo sa eskuelahan?
3 Magin Andam: Kun kamo mag-aandam, an saindong kompiansa madudugangan. (1 Ped. 3:15) Kaya pagmaigotan na antisiparon an mga hapot na puedeng maglataw, asin isip-isipon kun paano kamo masimbag. (Tal. 15:28) Kun posible, magdara kamo sa eskuelahan nin Biblia asin nin nagkapirang publikasyon, arog kan librong Reasoning, Young People Ask, asin babasahon dapit sa paglalang, tanganing makonsulta nindo iyan kun kaipuhan. Hagadon sa saindong mga magurang na iiba sa saindong pampamilyang pagsamba an mga pag-ensayo.
4. Taano ta maninigo kamong padagos na magpatotoo sa eskuelahan?
4 Magin Positibo: Dai pag-isipon na pirme kamong tutuyatuyaon kan saindong mga kaeskuela kun sasabihon nindo an katotoohan. An nagkapira posibleng marhay na maghanga sa saindo huli sa saindong kosog nin boot asin tibaad magdangog pa ngani. Alagad dai madesganar kun mayo nin siisay man na maghimate. Maoogma si Jehova na nagmaigot kamo. (Heb. 13:15, 16) Padagos na hagadon sa saiya na tabangan kamong ‘magtaram na may bilog na kaisogan [“kapusoan,” NW].’ (Gui. 4:29; 2 Tim. 1:7, 8) Imahinara kun gurano kamo kaogma kun igwa nin sarong magdangog. Tibaad ngani magin kapwa pa niato lingkod ni Jehova an tawong iyan pag-abot nin panahon!