“Sinisiyasat kan Espiritu . . . an Harararom na Bagay nin Dios”
“Sinisiyasat kan espiritu an gabos na bagay, pati an harararom na bagay nin Dios.”—1 COR. 2:10.
1. Anong papel kan banal na espiritu an itinampok ni Pablo sa 1 Corinto 2:10, asin anong mga hapot an minalataw?
MAKAKAPAGPASALAMAT nanggad kita huli sa paghiro kan banal na espiritu ni Jehova! Inapod kan Kasuratan an espiritu na paratabang, balaog, nagpapatotoo, asin nakikimaherak para sa sato. (Juan 14:16; Gibo 2:38; Roma 8:16, 26, 27) Itinampok ni apostol Pablo an saro pang mahalagang papel kan banal na espiritu: “Sinisiyasat kan espiritu an gabos na bagay, pati an harararom na bagay nin Dios.” (1 Cor. 2:10) Sa katunayan, ginagamit ni Jehova an saiyang banal na espiritu tanganing ihayag an harararom na espirituwal na katotoohan. Kun mayo an tabang na ini, masasabotan daw niato an mga katuyohan ni Jehova? (Basahon an 1 Corinto 2:9-12.) Minsan siring, may nagkapirang hapot na minalataw: Paano ‘sinisiyasat kan espiritu an harararom na bagay nin Dios’? Paagi kiisay ihinayag ni Jehova an mga bagay na ini kan enot na siglo C.E.? Paano asin paagi kiisay sinisiyasat kan espiritu an harararom na bagay na ini sa satong panahon?
2. Sa anong duwang paagi mahiro an espiritu?
2 Sinabi ni Jesus an duwang paagi na mahiro an espiritu. Kan madali na siang magadan, sinabihan nia an saiyang mga apostol: “An paratabang, an banal na espiritu, na isusugo kan Ama sa ngaran ko, an sarong iyan matokdo sa saindo kan gabos na bagay asin mapagirumdom sa saindo kan gabos na bagay na isinabi ko sa saindo.” (Juan 14:26) Sa siring, an banal na espiritu magseserbing paratokdo asin parapagirumdom. Bilang paratokdo, tatabangan kaiyan an mga Kristiano na masabotan an mga bagay na dati dai ninda nasasabotan. Bilang parapagirumdom, tatabangan sinda kaiyan na magirumdoman asin ikaaplikar nin tama an ipinaliwanag.
Kan Enot na Siglo
3. Anong mga tataramon ni Jesus an nagpaparisa na luway-luway na ihahayag “an harararom na bagay nin Dios”?
3 Itinokdo mismo ni Jesus sa saiyang mga disipulo an dakol na katotoohan na bago para sa sainda. Minsan siring, dakol pa an kaipuhan nindang manodan. Sinabihan ni Jesus an saiyang mga apostol: “Dakol pa an sasabihon ko sa saindo, alagad ta dai pa nindo iyan kaya ngonyan. Minsan siring, kun an sarong iyan dumatong na, an espiritu kan katotoohan, gigiyahan nia kamo sa gabos na katotoohan.” (Juan 16:12, 13) Sa siring, ipinarisa ni Jesus na paagi sa banal na espiritu, luway-luway na ihahayag an harararom na espirituwal na bagay.
4. Kan aldaw nin Pentecostes 33 C.E., paano an banal na espiritu nagserbing paratokdo asin parapagirumdom?
4 Kan aldaw nin Pentecostes 33 C.E., nagdatong “an espiritu kan katotoohan,” na ibinubo sa mga 120 Kristiano na nagkakatiripon sa Jerusalem. Nagkaigwa ini nin naheheling asin nadadangog na mga ebidensia. (Gibo 1:4, 5, 15; 2:1-4) An mga disipulo nagtaram nin manlaenlaen na lenguahe “dapit sa makangangalas na mga bagay nin Dios.” (Gibo 2:5-11) Panahon na iyan na ihayag an sarong bagong bagay. Ihinula ni propeta Joel an pagbubo na ini kan banal na espiritu. (Joel 2:28-32) Naheling kan mga nagmamasid an kaotoban kaiyan sa paaging dai inasahan nin siisay man sa sainda, asin pinangenotan ni apostol Pedro an pagpaliwanag kan pangyayaring ini. (Basahon an Gibo 2:14-18.) Sa siring, an banal na espiritu nagserbing paratokdo paagi sa paglinaw ki Pedro na an naeksperyensiahan kan mga disipulo kaotoban kan suanoy na hulang iyan. An espiritu nagserbi man na parapagirumdom, huling kinotar ni Pedro bako sana an hula ni Joel kundi pati an duwang salmo ni David. (Sal. 16:8-11; 110:1; Gibo 2:25-28, 34, 35) Talagang harararom na bagay nin Dios an naheling asin nadangog kan gabos na nagkakatiripon na idto.
5, 6. (a) Pagkatapos kan Pentecostes 33 C.E., anong importanteng mga hapot mapadapit sa bagong tipan an kaipuhan na masimbag? (b) Paagi kiisay ikinapaabot an mga isyung ini, asin paano ginibo an mga desisyon?
5 Dakol na bagay an kaipuhan pang linawon para sa mga Kristiano kan enot na siglo. Halimbawa, manongod sa bagong tipan na nagin balido kan aldaw na iyan nin Pentecostes, may mahalagang mga hapot. An bagong tipan daw limitado sana sa mga Judio asin proselitong Judio? An mga Hentil daw puede man na akoon dian asin lahidan kan banal na espiritu? (Gibo 10:45) Kaipuhan daw nguna kan mga lalaking Hentil na magpaturi asin magpasakop sa Ley ni Moises? (Gibo 15:1, 5) Mahahalagang hapot ini. Kaipuhan an espiritu ni Jehova tanganing masiyasat an harararom na bagay na ini. Pero, paagi kiisay iyan mahiro?
6 Ikinapaabot an lambang isyung kaipuhan na masimbag paagi sa mga tugang na lalaki na may paninimbagan. Si Pedro, Pablo, asin Bernabe kaiba sa miting na iyan kan namamahalang grupo asin isinaysay ninda kun paano trinatar ni Jehova an bakong turing mga Hentil. (Gibo 15:7-12) Pagkasiyasat kan ebidensiang ini kaoyon kan mga ipinarisa sa Hebreong Kasuratan asin sa tabang kan banal na espiritu, nagdesisyon an namamahalang grupo. Dangan, paagi sa surat, ipinaaram ninda sa mga kongregasyon an manongod sa desisyon na iyan.—Basahon an Gibo 15:25-30; 16:4, 5; Efe. 3:5, 6.
7. Paano ihinayag an harararom na katotoohan?
7 Dakol na iba pang bagay an lininaw paagi sa ipinasabong na mga isinurat ni Juan, Pedro, Santiago, asin Pablo. Alagad pagkakompleto kan Kristianong Kasuratan, natapos na an mga balaog nin paghula asin an milagrosong paghayag nin kaaraman. (1 Cor. 13:8) An espiritu daw padagos na magseserbing paratokdo asin parapagirumdom? Padagos daw kaiyan na tatabangan an mga Kristiano na siyasaton an harararom na bagay nin Dios? Ipinapaheling kan hula na iyo.
Durante kan Panahon kan Katapusan
8, 9. Sairisay an “masirang” na igwa nin espirituwal na pakarorop durante kan panahon kan katapusan?
8 Manongod sa panahon kan katapusan, sarong anghel an naghula: “An mga igwa nin pakarorop masirang na siring sa kaliwanagan kan kahiwasan; asin idtong mga nagdadara sa dakol pasiring sa katanosan, siring sa mga bitoon sagkod sa panahon na daing talaan, sagkod lamang pa ngani. . . . Asin an tunay na kaaraman magigin abunda.” (Dan. 12:3, 4) Sairisay an magkakaigwa nin pakarorop asin sairisay an masirang? Nagtao si Jesus nin kadikit na ideya paagi sa saiyang ilustrasyon dapit sa trigo asin mga doot. Manongod sa “pagtatapos nin sarong sistema nin mga bagay,” sia nagsabi: “Sa panahon na iyan an mga matanos masirang na siring kaliwanag kan saldang sa kahadean kan saindang Ama.” (Mat. 13:39, 43) Sa paliwanag nia, ipinamidbid ni Jesus “an mga matanos” bilang “an mga aki kan kahadean,” an linahidan na mga Kristiano.—Mat. 13:38.
9 “Masirang” daw an gabos na linahidan na Kristiano? Sa sarong paagi, iyo, huling makikikabtang an gabos na Kristiano sa paghuhulit, paggibo nin mga disipulo, asin pagparinigonan nin boot sa mga pagtiripon. An mga linahidan an magpapaheling nin halimbawa. (Zac. 8:23) Minsan siring, apuera kaini, an harararom na bagay ihahayag durante kan panahon kan katapusan. An mismong hula na irinekord ni Daniel “sinerahan nin tatak” sagkod sa panahon na iyan. (Dan. 12:9) Paano asin paagi kiisay sinisiyasat kan espiritu an harararom na bagay na ini?
10. (a) Paagi kiisay ihinahayag kan espiritu an harararom na katotoohan durante kan huring mga aldaw? (b) Ipaliwanag kun paano lininaw an mga katotoohan mapadapit sa dakulang espirituwal na templo ni Jehova.
10 Sa panahon niato, kun may kaipuhan na linawon na sarong espirituwal na bagay, an may paninimbagan na mga representante kan “maimbod asin mapagmansay na oripon” sa pangkinaban na opisina prinsipal tinatabangan kan banal na espiritu na maaraman an harararom na katotoohan na dati dai nasasabotan. (Mat. 24:45; 1 Cor. 2:13) Sa kabilogan, kinokonsiderar kan Namamahalang Grupo kun may kaipuhan na liwaton na mga paliwanag. (Gibo 15:6) Ipinupublikar ninda an saindang nanodan para sa kapakinabangan nin gabos. (Mat. 10:27) Sa pag-agi nin panahon, tibaad kaipuhan an dagdag na mga paglilinaw, asin ini man sadiosan na ipinapaliwanag.—Helingon an kahon na “Kun Paano Ihinayag kan Espiritu an Kahulogan kan Espirituwal na Templo.”
Pakikinabang sa Papel kan Espiritu Ngonyan
11. Paano an gabos na Kristiano ngonyan nakikinabang sa papel kan banal na espiritu sa paghayag kan harararom na bagay nin Dios?
11 An gabos na maimbod na Kristiano nakikinabang sa papel kan banal na espiritu sa paghayag kan harararom na bagay nin Dios. Arog kan mga Kristiano kan enot na siglo, kita ngonyan nag-aadal asin sa huri ginigirumdom asin iinaaplikar an impormasyon na nasabotan niato sa tabang kan banal na espiritu. (Luc. 12:11, 12) Dai niato kaipuhan an halangkaw na edukasyon tanganing masabotan an harararom na espirituwal na katotoohan na ipinublikar na. (Gibo 4:13) Paano niato mapapaoswag an satong pakasabot sa harararom na bagay nin Dios? Estudyare an pirang suhestion.
12. Noarin niato maninigong hagadon sa pamibi an banal na espiritu?
12 Hagadon sa pamibi an banal na espiritu. Bago niato pag-adalan an sarong materyal na sono sa Kasuratan, maninigong mamibi nguna kita na logod giyahan kita kan banal na espiritu. Totoo ini dawa kun solo sana kita o halipot sana an pag-adal niato. An siring na mapakumbabang mga pakimaherak siertong makakapaogma sa satong langitnon na Ama. Arog kan ipinarisa ni Jesus, itatao nanggad ni Jehova an saiyang banal na espiritu kun sinsero niatong hahagadon iyan.—Luc. 11:13.
13, 14. Sa pakasabot sa harararom na bagay nin Dios, ano an papel kan pag-andam para sa mga pagtiripon?
13 Mag-andam para sa mga pagtiripon. Nag-aako kita nin “kakanon sa tamang panahon” paagi sa grupong oripon. Inootob kan “oripon” an asignasyon kaiyan paagi sa pagtao nin sono sa Kasuratan na mga materyal asin pag-areglo nin mga programa para sa pag-adal asin mga pagtiripon. May pinag-isipan na marhay na mga dahelan kaya hinahagad sa “bilog na kasararoan nin mga tugang” na pag-adalan an partikular na impormasyon. (1 Ped. 2:17; Col. 4:16; Jud. 3) Nakikipagtabangan kita sa banal na espiritu kun ginigibo niato an satong pinakamakakaya na sunodon an itinaong mga rekomendasyon.—Kap. 2:29.
14 Kun nag-aandam para sa Kristianong mga pagtiripon, marahay na helingon niato sa Biblia an sitadong mga teksto asin pagmaigotan na masabotan kun paano aplikado sa tema an kada saro kaiyan. An ugaleng ini luway-luway na magpapararom kan pakasabot niato sa Biblia. (Gibo 17:11, 12) Paagi sa paghanap sa mga teksto, nagigin pamilyar kita sa sinasabi kaiyan, na puede niatong magirumdoman sa tabang kan banal na espiritu. Natatabangan man kita kaiyan na mahanap tolos an mga tekstong iyan kun kaipuhan.
15. Taano ta dai kita maninigong magpahuri sa pinakabagong ipinublikar na materyal, asin paano mo ini ginigibo?
15 Dai magpahuri sa pinakabagong impormasyon. An nagkapirang ipinublikar na materyal dai rinerepaso sa satong mga pagtiripon, alagad inaandam iyan para sa satong kapakinabangan. Dawa an satong mga magasin na iinaalok sa publiko ginigibo para man sa kapakinabangan niato. Sa sibot na kinaban na ini, sa parate may kaipuhan kitang halaton, tawo man o bagay. Kun nagdadara kita nin publikasyon na dai pa niato nabasa o dai pa niato tapos basahon, tibaad magamit niato an mga oportunidad na ini na basahon iyan. An nagkapira dai nagpapahuri sa pinakabagong impormasyon paagi sa pagdangog sa mga rekording sa audio kan satong mga publikasyon mantang naglalakaw o nagbibiahe. An gabos na materyal na ini na maingat na siniyasat an laog alagad ginibo para sa ikakaogma kan ordinaryong mga parabasa nakakapararom kan satong pagpapahalaga sa espirituwal na mga bagay.—Hab. 2:2.
16. Ano an pakinabang sa pagsurat asin pagsiyasat sa mga hapot na naiisip niato?
16 Maghorophorop. Kun nagbabasa kan Biblia o nin mga publikasyon na basado dian, magtao nin panahon sa paghorophorop. Mantang maingat nindong sinusubaybayan an pagkasunodsunod kan mga ideya, tibaad may mga ihapot kamo. Puede nindong isurat an siring na mga hapot asin magsiyasat dapit dian pagkatapos. Sa parate, napapahiro kitang orog na mag-adal kun sinisiyasat niato an mga bagay na nakakaintriga sa sato. An pakasabot na nakakamtan niato nakakaiba sa personal na kayamanan na puede niatong kuanan kun kaipuhan niato.—Mat. 13:52.
17. Anong programa an sinusunod nindo para sa pampamilya o personal na pag-adal?
17 Mag-iskedyul nin panahon para sa pampamilyang pagsamba. Kita gabos dinadagka kan Namamahalang Grupo na magtagama nin sarong banggi o ibang panahon kada semana para sa personal o pampamilyang pag-adal. An satong liniwat na iskedyul sa pagtiripon nagtatao sa sato kan oportunidad na iaplikar an hatol na ini. Paano nindo ginigibo an mga banggi nin Pampamilyang Pagsamba? An nagkapira nagbabasa nin Biblia, na sinisiyasat an mga teksto na bakong malinaw sa sainda asin nagsusurat nin haralipot na nota sa Biblia ninda. Dakol na pamilya an nagtatao nin panahon na pag-olayan kun paano ninda ikakaaplikar bilang pamilya an materyal na pinag-aadalan. An nagkapirang payo nin pamilya nagpipili nin materyal na sa heling ninda kaipuhan kan pamilya o na konektado sa mga tema o hapot na gustong pag-olayan kan pamilya. Sa paglihis nin panahon, siertong may maiisip kamo na iba pang temang mapag-oolayan.a
18. Taano ta dai niato maninigong likayan an pag-adal sa mas harararom na katotoohan kan Tataramon nin Dios?
18 Sinabi ni Jesus na an espiritu magseserbing paratabang. Kaya dai niato maninigong likayan an pag-adal sa mas harararom na katotoohan kan Tataramon nin Dios. An siring na mga katotoohan kabtang kan mahalagang marhay na “kaaraman dapit sa Dios,” asin inaagda kita na siyasaton iyan. (Basahon an Talinhaga 2:1-5.) Dakol an ihinahayag kaiyan manongod sa “mga bagay na inandam nin Dios para sa mga namomoot sa saiya.” Mantang hinihingoa niato na makanood nin orog pa manongod sa Tataramon ni Jehova, tatabangan kita kan banal na espiritu, huli ta “sinisiyasat kan espiritu an gabos na bagay, pati an harararom na bagay nin Dios.”—1 Cor. 2:9, 10.
[Nota sa Ibaba]
a Helingon man An Satong Ministeryo sa Kahadean na Oktubre 2008, pahina 8.
Ano an Isisimbag Nindo?
• Sa anong duwang paagi kita tinatabangan kan espiritu na siyasaton an “harararom na bagay nin Dios”?
• Kan enot na siglo, paagi kiisay ihinayag kan banal na espiritu an harararom na katotoohan?
• Sa satong panahon, paano naghihiro an banal na espiritu tanganing linawon an mga bagay-bagay?
• Ano an magigibo mo tanganing makinabang sa papel kan espiritu?
[Kahon sa pahina 22]
Kun Paano Ihinayag kan Espiritu an Kahulogan kan Espirituwal na Templo
Kaiba sa “harararom na bagay nin Dios” na ihinayag durante kan enot na siglo iyo an bagay na an tabernakulo asin, kan huri, an mga templo igwa nin mas dakulang espirituwal na kahulogan. Inapod ini ni Pablo na “totoong tolda, na pinatindog ni Jehova, asin bakong nin tawo.” (Heb. 8:2) Saro ining dakulang espirituwal na templo, sarong areglo para sa pagdolok sa Dios na nagin posible huli sa atang asin pagkasaserdote ni Jesu-Cristo.
An “totoong tolda” nag-eksister kan 29 C.E. kan si Jesus mabautismohan asin akoon ni Jehova bilang an saro na magigin sangkap na atang. (Heb. 10:5-10) Pagkatapos kan saiyang kagadanan asin pagkabuhay liwat, naglaog si Jesus sa Kabanalbanale kan espirituwal na templo asin iprinesentar an halaga kan saiyang atang ‘sa atubangan mismo nin Dios.’—Heb. 9:11, 12, 24.
Sa ibang teksto, sinambit ni apostol Pablo an linahidan na mga Kristiano bilang “nagtatalubo na magin sarong banal na templo para ki Jehova.” (Efe. 2:20-22) An templo daw na ini iyo man sana an “totoong tolda” na ilinadawan nia kan huri sa saiyang surat sa mga Hebreo? Sa laog nin mga dekada, iyan an paghona kan mga lingkod ni Jehova. Inisip ninda na an linahidan na mga Kristiano iinaandam sa daga tanganing magin ‘mga gapo’ sa langitnon na templo ni Jehova.—1 Ped. 2:5.
Minsan siring, kan madali na an 1971, nasabotan kan may paninimbagan na mga miembro kan grupong oripon na an templong sinambit ni Pablo sa Efeso bako an dakulang espirituwal na templo ni Jehova. Kun an “totoong tolda” kompuesto nin binuhay liwat na linahidan na mga Kristiano, kun siring dai iyan nag-eksister sagkod na dai pa nagpoon an pagbuhay liwat sa sainda durante kan “presensia kan Kagurangnan.” (1 Tes. 4:15-17) Alagad dapit sa tabernakulo, si Pablo nagsurat: “An mismong toldang ini sarong ilustrasyon para sa itinalagang panahon na yaon na ngonyan.”—Heb. 9:9.
Sa maingat na pagkomparar kan mga tekstong ini asin kan iba pang mga teksto, nagin maliwanag na an espirituwal na templo dai itinitindog pa sana ngonyan asin na an linahidan na mga Kristiano bakong ‘mga gapo’ na iinaandam sa daga tanganing makaiba dian. Imbes, an linahidan na mga Kristiano naglilingkod sa mga patyo asin sa Banal na lugar kan espirituwal na templo, na aroaldaw na nagdodolot sa Dios “nin atang nin pag-omaw.”—Heb. 13:15.
[Ritrato sa pahina 23]
Paano niato mapapaoswag an satong pakasabot sa “harararom na bagay nin Dios”?